الوعي المصري

The Hoax of Restoring my Account by YouTube
خدعة إعادة حسابي في يوتيوب

في جوادالاهارا بالمكسيك
أعود إليكم بعد 30 يوم حول العالم قضيتها بين بيروت وواشنطون ونيويورك والرباط وكازابلانكا وجوادالاهارا بالمكسيك
هابقى أحكيلكم بعدين كنت بأعمل إيه
لم يكن لدي الوقت الكافي ولا وصلة الإنترنت المتاحة لأدون
لكن حيث إن يوتيوب أصدرت بيان صحفي ووزعته على وكالات الأنباء بيقولوا فيه قال إيه إنهم رجعولي الأكاونت بتاعي وكان هذا نصه
Our general policy against graphic violence led to the removal of videos documenting alleged human rights abuses because the context was not apparent
Having reviewed the case, we have restored the account of Egyptian blogger Wael Abbas. And if he chooses to upload the video again with sufficient context so that users can understand his important message, we will of course leave it on the site
البيان الصحفي على Reuters
البيان الصحفي على FoxNews
فياريت تتفضلوا بزيارة الأكاونت بتاعي كده علشان تشوفوا إيه اللي رجع
ولا حاجة !!!
كل الفيديوهات إتشالت سواء ليها علاقة بالتعذيب أو لا
ومعاها طبعا كل الإحصائيات بأعداد الزوار
وكل التعليقات
وكل الردود بالفيديو
وكل التقديرات
يا فرحة مامتي يعني !!!
عملوا إيه هما يعني غير حفظ ماء وجههم اللي إتبتعتر على وسائل الإعلام الغربية وعلى المدونات الغربية أكتر من المصرية
آه والله للأسف أكتر ناس إهتمت كانت المدونات الغربية
ناس لا من ديني ولا من دينكم ولا من بلدي ولا من بلدكم ولا يعرفوني ولا أعرفهم
I thank all the western bloggers who stood by me
وعدد قليل جدا من المدونات المصرية من أصحابي المقربين بس وبعضهم عرض نعمل حملة ضد يوتيوب وأنا حقيقي بأشكرهم جدا وحطيت عليهم علامة صح في قلبي خلاص
كل مجهودي في رفع 181 فيديو كليب على مدار ثلاث سنوات راح هدر
أيوة 181 فيديو مش 100 فقط زي ما أنا كنت فاكر
وقال إيه مسموح لي ارفعهم تاني بشرط إني أكتب معاهم شرح بيوضح فيهم إيه علشان محدش يفتكر حاجة غلط لا سمح الله
طب هو أنا لما أكتب
Egyptian police brutality
ده مش كفاية؟
يعني ممكن حد يفتكر فيديو عماد الكبير ده مثلا Gay Orgy
ولا فيديو البنت المتعلقة بين كرسيين ده BDSM
ما أنا كاتب إنه
Egyptian police torturing a female murder suspect
وبعدين معظم الفيديوهات طالع فيها الظباط باليونيفورم
هل ده ممكن يعتبر عند يوتيوب
Police uniform fetish
الخلاصة يعني ومن الآخر
It was a hoax
YouTube restored an empty account
removed my 181 videos
along with all comment, ratings, video responses and statistics of numbers of visitors
the hard work of almost three years
they wanted only to save face at my expense
what more context would they ever want than what was already there
الحملة ضد يوتيوب لم تتوقف
فشكرا لكل من يساعد
وربنا يشفي الشامتين
-
Yahoo also restores my email account
بمناسبة فضيحة يوتيوب
ياهو كمان رجعولي الأكاونت في صمت مش ناقص ولا إيميل
وبعتولي الرسالة التالية
The situation you describe has been resolved.  I apologize for any
inconvenience this issue may have caused you.  Please be assured that
we'll do our best to prevent such problems in the future

بعد يوتيوب - ياهو توقف إيميلي للمرة الثالثة
And Yahoo Too Disables My E-mail Account

لا أستطيع ان أصف ما أشعر به حاليا
لا توجد كلمات
فقط سأعطيكم المعطيات ولكم أن تتخيلوا ما أشعر به
وهل من حقي أن يجن جنوني
وهل من حقي أن أشعر بالبارانويا وأني مستهدف وأن هناك مؤامرة ضدي في الخفاء

بعد أن أوقف يوتيوب حسابي الخاص بالفيديو
الآن ياهو توقف حساب بريدي الإلكتروني
حاولت الدخول بإسم المستخدم والباسوورد الخاص بي فلم أفلح
أرسلت رسالة إلى بريدي من بريد آخر فجاءني الرد التالي:

Sorry, we were unable to deliver your message to the following address.
<wa2el_3abbas@yahoo.com>:
Remote host said: 554 delivery error: dd Sorry your message to
wa2el_3abbas@yahoo.com cannot be delivered. This account has been
disabled or discontinued [#102]. - mta518.mail.mud.yahoo.com [BODY]

هل هي حرب إلكترونية
ومن يشنها ضدي
هذا العنوان تم إيقافه من قبل أوائل العام الماضي
وأيضا العنوان الذي أراسلكم منه
wa2el3abbas@yahoo.com
وتم إسترجاعهما بعد أن تأكدت ياهو من ان الشكاوى كيدية
فهل يعود إلي بريدي هذه المرة؟

بريدي يحتوي على مراسلات هامة وانتظر عليه مراسلات هامة أيضا لا يمكن أن تضيع مني
يمكنكم الآن مراسلتي على هذا العنوان
wa2el3abbas@yahoo.com
حتى يوقفوه أيضا
!!!

مدون على حافة الجنون

عاجل وخطير - يوتيوب توقف عرض كليبات التعذيب
Youtube suspends my account

This is by far the biggest blow to the anti-torture movement in Egypt
أوقف موقع يوتيوب حسابي الخاص والذي يحتوى على جميع لقطات الفيديو التي حملتها من تغطيات للمظاهرات وأحداث أخرى ومنها خصوصا فيديوهات التعذيب في أقسام الشرطة
وقد ادعى موقع يوتيوب بان وصلته كثير من الشكاوى بشان هذا المحتوى
وانا الآن في حالة صدمة مما حدث وأحاول معرفة أسبابه
وقد راسلت الموقع في إنتظار التوضيح
لكن كل الإحتمالات قائمة
شكاوى كيدية من النظام المصري خصوصا بعد صفعة حبس إسلام نبيه
تعاون بين يوتيوب والنظام المصري في ظل صفقة ما خصوصا وأن يوتيوب مملوكة لشركة جوجل
فهل هو خطأ يمكن إصلاحه
أم أن يوتيوب أصبحت تدعم التعذيب وتتستر على فاعليه وتتعاون مع الحكومات الديكتاتورية
وفي النهاية أقول أن هذه كارثة كبري
ليس لي فقط ولكن لكم جميعا مدونين وقراء ونشطاء
وأطلب منكم جميعا الوقوف معي
For Details in English Click Here

ياريتني كنت معاهم في نطق الحكم على إسلام نبيه

للأسف أنا في بيروت ومصر مقلوبة
مش مصدق
إسلام نبيه خد تلات سنين مع الشغل والنفاذ
الحكم الصراحة مخفف وقليل وتقريبا هو بالفعل قضى تلات ارباع المدة لانهم ها يحسبوله من أول ما بسلامته إتحبس
بس ده مش هو اللي دار في ذهني اول ما وصلني الخبر من المدونين برسالة على تليفوني المحمول
حكم انا مش بارد على الموبايل وانا خارج البلاد لان الدقيقة باربعة جنيه
من ساعة ما وصلت بيروت مش عارف اخش على النت لان الانترنت هنا في الاوتيل غالي فشخ والساعة بتمانية دولار يعني معدية الاربعين جنيه
وانا ساكن في اوتيل رغم انه في وسط بيروت على البحر والمارينا الجديدة اللي بيبنوها انما الحته مقطوعة وبيروت على كف عفريت مليانة امن وجيش ومغاوير ونقط تفتيش وبلوكات اسمنت والتلفزيونات كلها عمالة تشتم في بعض والشرطة بتوقف الناس تسألهم على بطايقهم الشخصية
قاعد أنا في فندق مونرو شارع كينيدي
أه والله شوفوا الصدف مونرو وكينيدي
والفندق اللي قدامي فندق انتركونتينينتال فينيشيا قاعد فيه نواب اربعتاشر آذار لأنهم خايفين من الإغتيالات ومتأمن تأمين جامد قوي
وزي ما كنت في الأردن قاعد في راديسون ساس اللي حصل فيه الانفجار
من حظي ان فندق مونرو بيطل على الحتة اللي حصل فيها اغتيال رفيق الحريري
هابقى انشر الصور بقى لما الاقي انترنت رخيص شوية
المهم انا عمال ارغي ونسيت انا كنت باتكلم عن ايه
اول ما جاتلي رسالة الحكم على اسلام نبيه مش فاكر من مين لانها وصلتني من مليون واحد
ولبنى حاولت تتصل بيا على الموبايل بس انا قفلت عليها
معلش يا لبنى
المهم انا كنت تقريبا ها ارقص وعمال الف الاوتيل ادور على حد اقول له
قلت الأول لدينا حشمت الصحفية بالأهرام إبدو اللي معايا في المؤتمر
وبعدين لرانيا المالكي رئيسة تحرير الديلي نيوز
وقعدت أقول لناس تانية ما اعرفهمش زي العبيط
وقعدت ادور على وائل عبد الفتاح لانه معايا برضه بيحضر نفس المؤتمر لكن ما لقيتهوش
بس بجد كنت في حالة نشوة عارمة
عقبال كده ما نفرح في سيادة اللوا أحمد ضياء اللي بيلوث سمعة الشرفاء
أي نعم أنا ما كنتش في الجلسة
بس الصديقة الصحفية الأسبانية لالي سانديمونجي بعتتلي شوية صور معبرة لعماد الكبير بعد النطق بالحكم
قلت أشارككم معايا فيهم











أنا في بيروت باحضر مؤتمرين
الأولاني منظماه جريدة الأخبار اللبنانية وهو عن الموضوعية في الإعلام
والتاني هو بيروت ميديا فورام
اللي منظماه مؤسسة فريدريش آيبرت والمعهد الفرنسي للشرق الأدنى والمعهد الألماني للأبحاث الشرقية
فمش ها أقدر أرد على تليفونات للأسف لكن ممكن أستقبل رسائل المحمول
مش عارف حسيت إن غرفتي إتفتشت وأنا مش موجود ليه
مش بارانويا ولا علشان أنا واد مهم وجامد ولا حاجة
بس يمكن علشان شباكي بيبص على فندق فينيشيا اللي قاعد فيه النواب
وكنت باقف في الشباك أصور بالكاميرا
ربنا يستر
لبنان فيها غليان من تحت وشكلها داخلة على حاجة

تقرير سي إن إن عن الوعي المصري
CNN Report on Misr Digit@l

إضغط هنا لمشاهدته
Click Here

Jimmy is Cairo's Sexiest

الصورة دي منشورة عند دماغ ماك من فترة
بس مكنتش أعرف من أنهو مجلة
وبما إني عرفت هي من أنهو مجلة فقلت أنشر وأسيب لكم التعليق وبلاش اعلق أنا علشان أنا قليل الأدب خلقة لكن متأكد إنكم لما تشوفوا الصورة دي كلكم كده بقدرة قادر ها تبقوا قلالات الأدب أكتر مني وها تخرج منكم الفاظ مكنتوش تتخيلوا إنكم تقولوها في حياتكم
المقال ده منشور في مجلة إسمها إنسايت
Insight
وهي مجلة بتصدر في مصر باللغة الإنجليزية
وعنوان المقالة بيقول إن الننوس هو أكثر راجل سكسي وناجح في القاهرة
والتعليق لكم أحسن يقولوا إن أنا غيران ولا حاجة

الوعي المصري في بيوت عمال المحلة

فيديو 1
مقابلة مع أحد من شاركوا في الإضراب
إضغط هنا
لم أتمكن من تغطية إضراب عمال غزل المحلة في وقتها كما ينبغي لظروف خارجة عن إرادتي وخارجة عن الميزانية
لكن تشاء الظروف والصدف أن أسافر إلى المحلة وأتمكن من اللقاء ببعض العمال وقيادات الإضراب بعد إنتهاؤه
وربما إنتهاء الإضراب يجعل الصحافة والنشطاء يظنون أن كل شيء على ما يرام وأن عمال المحلة قد حلت مشكلاتهم وإنتهى الأمر على ما يرام
ولكن كما ستشاهدون في تلك الفيديوهات فإن الأمر مختلف عما نظن هنا في القاهرة
قابلت الكثير من العمال معظمهم رفض التصوير خوفا من - الكلابوش - على حد تعبيرهم
لكن الحقيقة أن العمال بمجرد معرفتهم بوجود صحفيين بخارج المصنع تجمهروا حولنا وكل منهم يريد الحديث وان يحكي مشاكله فبعضهم عدد أهمية المصنع وبعضهم تحدث عن الأجور والمعايش والدروس الخصوصية وبعضهم تحدث عن السكن والتأمين الصحي وتواطؤ النقابة
ثم إنضمت عناصر من أمن المصنع لمراقبة ما يقوله العمال
ثم شخص قال انه رئيس وردية هو الوحيد الذي شكك في أقوال العمال وهاجمهم

فيديو 2
جولة في شقة العامل
إضغط هنا
أحد الأشخاص الذي نجحت في التصوير معهم والتصوير في منزله ربما يكون من أحسن العمال حالا
ولكن كما سترون إذا كان هذا هو وضع أحسن العمال
يمكنكم تخيل الباقي
خصوصا أن المحلة الكبرى هي مدينة مزدحمة وكبيرة مثل القاهرة مع الفارق في تدني الخدمات ومثلها مثل القاهرة المدينة تتضخم وتزحف وتكبر ولا تكفي سكانها فيكونون عشوائيات على الأطراف حتى وصلوا إلى الطريق الدائري حول المحلة وكثير من العمال لا يمكنه السكن داخل المحلة لغلو الإيجارات فيسكنون في القرى المحيطة ويذهبون للعمل كل يوم
ووسيلة مواصلاتهم غالبا هي دراجة هوائية
وبالمناسبة هذا العامل له في الخدمة خمسة عشر عاما لم يحقق فيها شيئا لنفسه واسرته ولا يستطيع حتى تشطيب شقته

فيديو 3
العامل يتحدث عن فساد التأمين الصحي وضرورة التظبيط مع طبيب خارج المستشفى
كما أخبرني أنهم يعطون علاج واحد لكل الأمراض
إضغط هنا
وفي النهاية أحب أشكر كريم البحيري على مجهوداته أثناء الإضراب وأثناء زيارتي للمحلة
ملحوظة أخرى على مدينة المحلة وهي أنه بسبب الفقر وتدني الأحوال المعيشية هناك أصبح للسلفيين نفوذ كبير في المدينة العمالية والتي من المفترض ان يكون فيها النفوذ لليسار
أما ما هو مؤكد فهو نية العمال للقيام بإضراب جديد إذا لم تنفذ مطالبهم في المدة المحددة

يا خرابي يا عرابي

رغم إن انا معروف عني تقل الدم ومش مشهور بالقفشات والتنكيت مع الناس ومش واد إجتماعي خالص لكن هذا الموقف حصل بالنص لا أكثر ولا أقل بدون مبالغة والله على ما اقول شهيد بيني وبين راكب في مترو الأنفاق قبل الإفطار في أحد أيام رمضان وكان هذا الراكب يبدو عليه رقة الحال ويرتدي جلباب رث مخيط يدويا من كثرة ما تمزق
هو - مش المحطة اللي جاية دي مبارك
انا - لا اللي جاية دي غمرة وبعدها رمسيس يا حاج
هو - لا ماهو رمسيس شالوه خلاص وبقت بتاعة مبارك
انا - على رأيك
هو - طب كويس غمرة محطة صغيرة مش بيقف فيها كتير
انا - صح بس مبارك بيقف فيها خمسة وعشرين سنة
فترة صمت ...
انا - انت نازل رمسيس ولا ايه يا حاج
هو- لا انا نازل السيدة زينب بعد يا خرابي يا عرابي
انا - لا يا حاج السيدة زينب بعد سعد زغلول لما يقول مافيش فايدة
هو - أومال يا خرابي يا عرابي دي بيقولوها إمتى
انا - يا خرابي يا عرابي دي بعد مبارك
تابعنا بقية الركاب في عربة المترو ونظرات الفزع والذعر تعلو وجوههم لأننا في نظرهم إتكلمنا كلام كبير قوي في السياسة وبعضهم أظهر الضيق ولسان حاله يقول عاوزين نروح بيوتنا يا عم إنت وهو عندنا عيال والدنيا رمضان
وبعدين إبتدت البسمات تعلو وجوههم ويضحكوا على كلامنا

عندما قال مبارك وعليكم واحد

قام حسني مبارك بزيارة مفاجئة لمدينة السادس من أكتوبر بدون ما يقول للناس ولا يخلي الناس تعمل حسابها
وتقول الأسطورة إنه عمل نفس الموقف السنة اللي فاتت
طب إيه الجديد
ها نقولك الجديد بعد شوية
بس نحب نقولك ان مصالح الناس اتعطلت واشغالهم والجامعات وتم اغلاق كل مداخل مدينة السادس من أكتوبر وده بحسب روايات شهود العيان ورواية القاريء العزيز مرسل هذه اللقطات ك ي
فضل الناس يدوروا في دواير مغلقة وتحول ميدان جهينة إلى جراج كبير للسيارات وترك الناس سياراتهم وإفترشوا العراء وبدأوا الصلاة في الحدائق والدعاء على مبارك والناس تحاول مع الظباط برضه علشان يعدوهم لكن مافيش فايدة لدرجة إن الظباط هما كمان دعوا على مبارك
إستمر هذا الموقف لعدة ساعات
ويروي ك انه كان في مشوار لتخليص ورقه في الجامعة بينما كان هناك رجل آخر ذاهب لتسلم جثة والدته من مستشفى دار الفؤاد وست عاوزة تجيب أطفالها من المدرسة وحتى سكان مينا جاردن سيتي التي لا تبعد شيئا عن ميدان جهينة لم يتمكنوا من الذهاب الى منازلهم

وظل الإنتظار من الصباح الباكر حتى الواحدة ظهرا
حتى ظهر موكب بسلامته ومر
لكن المفاجأة الكبيرة والمهموز الكبير اللي لبسه السادة المواطنين
هو إن مبارك مكانش في الموكب الوهمي !!!
لكن وصل بطيارة هليكوبتر
رآها الناس في السماء
فإنهالوا عليه بالدعاء
وضاع يوم عمل ويوم جامعة ويوم كل من أراد قضاء مصلحة في ستة اكتوبر

أنا وجحا والبضان في رمضان

يعني عملت اللي عليا وكتبت إقرار المفروض كل اللي داخل المدونة موافق عليه
وفهمت الناس إن مش المفروض أغطي كل حاجة ومش مفروض اكتب عن كل حاجة طالما غيري بيكتب وبيصور وبيغطي وفيه تناول إعلامي للموضوع لأن المدونة أساسا عملت إسمها بتناول ما يتجاهله الإعلام
وقلت ميت مرة إني مش بأشتغل عند حد ولا عضو في أي حزب أو تنظيم أو حركة ولا باخد تمويلات ومش عاوز آخد تمويلات واللي بياخد تمويلات الله يسهله
حتى حركة شباب من أجل التغيير اللي أنا واحد من مؤسسينها سبتها لما بتوع الأحزاب الوسخة بضنوني
وقلت أن أولويتي هي مصر أولا - بصفتي مؤمن بالقومية المصرية - وقبل أي قضية أخرى إلا ما أرتأيه انا شخصيا على المستوى الإنساني
لكن مهما أعمل فيه ناس كده بضان بيحسسوني كأني جحا
فاكرين قصة جحا وإبنه والحمار
كانوا ماشيين في الشارع
والناس قالت بقى عندهم حمار بيمشوا جنبه ومش بيركبوه ده ايه الغباء ده
قام جحا ركب الحمار
قامت الناس قالت بقى الراجل النطع ده يركب وسايب إبنه يمشي
قام جحا نازل ومركب إبنه
قامت الناس قالت بقى الواد قليل الرباية ده يركب وأبوه ماشي
قام جحا ركب هو وإبنه على الحمار
قامت الناس قالت معندهمش رحمة بالحيوان وراكبين هما الاتنين فوق الحمار
والخلاصة إنك مهما عملت مش ها تعجب حد
وده اللي حصل في تغطية زيارة رفح اللي نشرتها
ودي بعض الرسائل الوقحة اللي وصلتني على الإيميل أو كتعليق على المدونة من ناس فاكراني بأشتغل عند اللي جابت أمهم رغم إن بعضهم في نظري بصراحة خونة لأنهم يهتمون بقضايا أخرى - غير مصرية - ولا يولون إهتمامهم للقضية المصرية - نهائيا - ولا تراهم في أي فعالية تخص مصر لأنهم يعملون حيث تأتي - التمويلات - وحيث إنتماؤهم للبلد اللي حدفتهم علينا وإحنا إديناهم الجنسية - والكلام إلك يا جارة - وتلاقيهم دايما يتشدقوا بالعروبة - ودول ديتهم معروفة - ويتشدقوا بالإسلام وكأن مصر دي بلد كافرة بنت كلب مش محتاجة اللي يساعدها فبيدوروا على بلد مسلم يساعدوه
الأحمر هو تعليقي أنا
-
1
أسف أيه بس يا اخ وائل - سحبت الأسف والله بعد اللي شفته من أشكالكم - بعد ايه المفترض نشر هذه الصور في وقتها في عز أزمة العالقين - وهي الأزمة خلصت لا مؤاخذة - مش بعد خراب مالطة - ده بدل ما تشكرني إني جددت إهتمام الناس بالموضوع - وانتا شفت بعينك حجم المأساة ولا عشان هما مش مصريين وفلسطينين - لا تعليق علشان ما أقلش أدبي بس عموما ده إسمه إبتزاز عاطفي ومستمر من ستين سنة - بجد أنا حزين لأهمالك - شفتوا إهمالك دي ولا كأني السفرجي بتاعهم - ولعدم ردك علينا في أن تعطينا الصور ولو بالعلامة المائية للوعي المصري
-
2
من أهم مباديئ الصحافة - والله عال وبقينا بنتعلم الصحافة من اللي يسوا واللي ما يسواش - سرعة نقل الخبر الصحفي لكن أن يتم نقل الخبر بعد مرور ما يقرب من شهرين من باب اه مادة أعلاميه عندي والسلام فهذا ما احسسته من رسالتك يا أخ وائل أرسلنا لك بعد العودة راجين بأن تسلمنا الصور لآبرازها لوسائل الأعلام دون أي رد منك ، لو قام أمين شرطة بصفع منادي ميكروباس في أسوان لذهبت علي الفور وغطيت الخبر ونشرته علي كافة المواقع في نفس اليوم - آه طبعا وإنت مال أمك ولا هو علشان إنت مش مصري ومعاك الجنسية المصرية بالأونطه يعني ولا هو المصري دايما رخيص عند العرب ومالوش تمن ومش مهم مشاكله وقضاياه - رغم أيماني الشخصي بهذا ، لكن عشان دول فلسطينين فيستنوا شوية عشان حضرتك مشغول - رجعنا تاني للابتزاز العاطفي بتاع الستين سنة رغم إن احوالهم والله أحسن من احوالنا وده بحسب تقارير الأمم المتحدة الإقتصادية وعلى الأقل المصريين عالقين في بلدهم مش بلد غيرهم وما عندهمش أمل ولا حتة يروحوها ولا حد بيديهم إعانات - وينفتح معبر الصهاينة العوجة ويعبر معظم العالقين معلش يستنوا سعادتك - وسعادتي ليه ما البركة فيكم معاكم تمويلات وكاميرات ووراكم احزاب سياسية ممولة خاينة بجرايدها وعندكم لسان زي الفرقلة عليا وبناقصني أنا وكاميرتي يعني لأنكم خسرتوني خلاص هو انا يعني اللي هافرق معاكم - ويمكث بعض العالقين وينضم أليهم غيرهم برضه يستنوا سيادتك شوية لما تفضي لكن ما مغزي أن تنشرها بعد شهرين دون اشارة حتي لتجدد المعاناة الحالية حتي تعليقاتك كانت لا تدل بأحساس بمعانتهم التي لو أحسستها فعلا لما قمت بتأخير النشر حتي الأن
-
3
يابنى شوف العالقين فى قلعة الكبش واللى نايمين على ارصفة ميدان السيدة عائشة وكورنيش الملك الصالح وبعيدن ابقى شوف الجنسيات التانية
لحد امتى بقى هنفضل شاغلين بالنا بالغرب وسايبين اهل بلادنا ينامو فى الشوارع وياكلو الاسفلت
وايه محسوبكم محسوبكم
انت نفسك تشتغل قهوجى بعد الضهر ولا ايه ؟
تصدق بالله إنت الوحيد اللي معاك حق فيهم
أنا المفروض فعلا أشتغل قهوجي علشان ألبي طلبات كل الناس
-
التعليق النهائي لكم

الوعي المصري مع العالقين في رفح والعريش

معلش هي التغطية متأخرة شوية لما فضيت علشان ما اعملهاش سلوقة واي كلام
بس أحسن من مافيش خالص
أخدنا شوية مساعدات كده على ما قسم من اهل الخير وطلعنا على رفح كل واحد من جيب أبوه
كنا متنوعين سياسيا لأقصى درجة تتخيلوها
أخدنا اوتوبيس للعريش من ميناء - قال إية - مبارك البري

ووصلنا العريش ونزلنا الحاجات من الأوتوبيس

وقعدنا في العريش شوية وقابلنا بعض العالقين هناك وقابلنا ناس من حزب التجمع

واللي إستغربتله إن الأمن لم يعترضنا ولا مرة طول رحلتنا نحو رفح على عكس ما عملوا معانا سنة 2004 لما وقفونا في بالوظة قبل العريش والأمن المركزي عزقنا ضرب إحنا والأجانب اللي كانوا جايين متضامنين معانا

والغريب إن حظي مع سيناء ما يجيش إلا في المشاكل
مافيش بس غير هي مرة واحدة اللي رحت دهب فسحة السنة دي مع أصدقاء أجانب
والغريب ان الإجراءات الامنية في جنوب سيناء بالعبيط
وقفونا حوالي 35 مرة بدون مبالغة من أول نفق الشهيد أحمد حمدي لحد دهب
بس المسخرة اللي سمعتها من ناس أجانب صحابي كانوا هناك لوحدهم ان الكماين دي طلعت سبوبة بتعملها الشرطة مع السواقين علشان ينصبوا على السياح الأجانب علشان كده في سيناء لو ركب معاكم ظابط او امين شرطة التاكسي او الميكروباص اعرفوا انه واخد 30% من السواق
ها ابقى اشرحلكم بعدين بقى علشان ده مش وقته
بس بجد موضوع فضيحة بكل المقاييس
مافيا شرطة وسواقين !!!
باقي المرات اللي رحت سينا كان تضامن 2004
وتفجيرات شرم الشيخ 2005
ودي قعدت فيها أسبوعين في شرم الشيخ
لكن كانت شرم الشيخ مهجورة بتنش
والمرة دي بتاعة العالقين 2007

نرجع بقى مرجوعنا للعالقين في العريش ورفح
هنا قدام مقر الهلال الأحمر وتوزيع الإعانات عليهم

يعرضون وثائقهم





أنهكه الحر

باب مقر الهلال الأحمر

سمح لنا أحد السكان بالتصوير من بلكونة منزله

لكن هذا لم يعجب الشرطة كما ترون
مع اننا يعني بنصورهم وهما بيقوموا بشغلهم
وبعدين رحنا المخيم اللي قاعدين فيه في العريش

شاهدوا فيديو لمقابلات مع بعض العالقين

إضغط هنا
أهم شيء في تلك الفيديوهات أن تسمعوا رأيهم سواء في حماس أو في فتح وهناك من قالوا كلاما في غاية القوة لكن رفضوا تسجيله ربما خوفا من بطش حماس أو بطش فتح



وبعد كده رحنا نشوف باقي العالقين في رفح















وبعدين رحنا نتفرج على الحدود اللي كل يوم بيتقتل عليها متسللين
مصريين وفلسطينيين وسوادنيين وجنود حرس الحدود المصري أيضا
على الرغم مما في ذلك من مخاطرة
لكن لم نستطع المقاومة
فهذه حدود مصر مع إسرائيل وفلسطين
وأقصى نقطة في حدود مصر الشمالية الشرقية
حيث يمكنك رؤية رفح وقطاع غزة
وكانت تجربة مثيرة جدا بالنسبة لي شخصيا أن أكون هناك

محسوبكم عند معبر صلاح الدين المغلق حاليا

الجدار العازل





أغنام ترعى في المنطقة

برج حراسة مصري

نقطة تابعة لحركة حماس
لاحظوا الأعلام الخضراء المميزة

لقطة تذكارية على الحدود

مع تحيات محسوبكم

فيديوهات مدون في أمريكا

فعاليات كتير حصلت وحضرتها وغطيتها وما نشرتهاش
ومش عارف راكنها ليه
أنا بقيت كسلان يمكن ولا ده من الإكتئاب والإحباط على المستويين الشخصي والعام
ولا يمكن بأشاور عقلي أخش التقفيصة أنا كمان زي غيري
وإشمعنى أنا يعني اللي لازم أبقى نشيط وباعمل حاجة وهو أصلا مافيش حاجة بتحصل
خليني كده أحسن بدل ما أخش هوجة المزايدات الناتجة عن حالة الفراغ اللي بيعاني منها الكل
خصوصا إني معبي من الإخوان اللي مدونينهم بيشتموني
وبرنامج حزبهم الجديد الذي لا يقال عنه إلا أنه برنامج وقح خصوصا فيما يتعلق بالحريات
وحتى عبد المنعم صديقي طلع في قناة الحرة يقول المدونين العلمانيين
عموما كل سنة وانتم طيبين بمناسبة رمضان
مش طالبة أتكلم في السياسة كمان وانا صايم علشان كده قلت أنشر حاجة خفيفة وان كانت برضه غصب عني لن تخلو من السياسة لان كما يقول المثل يموت الزمار وصوابعه بتلعب
وفي حالتي أنا بتدوس على زر - الشاتر - بتاع الكاميرا
طبعا فيه ناس كالعادة ها تدخل تشتم وتلعن كانها مدونة ابوهم مش مدونتي وانا حر فيها زي ما عملوا لما غطيت رحلة إسطنبول
وناس تانية ها تخش تزايد وتقول لي ليه مش بتتكلم عن قضايا الصحفيين اللي بيتحاكموا وصدر ضدهم أحكام
وها تلاقي الناس كلها بتهاجم قضاء مصر النزيه الشريف العفيف اللي ما يصحش حد ييجي جنبه كما يزعم اللواء الكذاب احمد ضياء وكما زعم محامي اسم النبي حارسه وصاين - عصايته - من العين سي اسلام نبيه باشا بيه
مش عارف ايه الصحوة دي كلها وكانت فين لما قضاء مصر طلع الواد بتاع شها العفريت الحبرتقي اللي بيتشاقى هو اللي كهرب نفسه وحرق نفسه وبعد كده انتحر ولا مش كده بس ده الراجل الارهابي بتاع حدايق القبة ابو دقن طلع هو كمان كهرب وحرق نفسه وبعد كده انتحر علشان يرمي بلاه على ظابط امن الدولة الشريف العفيف المكافح ابن الناس - شوف يا اخي الافترا بتاع الارهابيين وصل لحد فين - لا وكمان الارهابي مخلف ارهابيين اطفال صغيرين سابهم وراه من غير ما حد يصرف عليهم علشان يطلعوا ارهابيين على اصله بقى وعارفين ان البوليس قتل ابوهم والواد بتاع امبابة طلع هو اللي كان بيلطع نفسه بالقفا كمان والظابط طلع براءة وجالي يطلعلي لسانه في محاكمة إسلام نبيه ويوريني ازاي انه بره
وما سمعناش حد إعترض بجيصة أو حتى فسية
دلوقتي بس بننتقد قضاء مصر ومش عاجبانا الاحكام
يا ترى لما الدور ييجي علينا ها يبقى معانا فلوس الغرامة والكفالة
اللهم إني صائم
علشان كده قلت مش ها اتكلم في السياسة الأول بس أعمل إيه إنتم اللي إستدرجتوني في الكلام
ما علينا
نرجع لموضوعنا
أنا قلت أسلي صيامكم وآخدكم في جولة سياحية في بلاد الشيطان الأكبر أمريكا على رأي أحمقي نجاد - ودي بالمناسبة مش من عندي ده الإيرانيين هما اللي بيسموه كده والله
ودي مش تغطية كاملة للسفرية لكن دي بس الفيديوهات المتاحة اللي انا صورتها هناك
والتغطية الكاملة بقى ربنا يسهل وعليكوا خير وربنا يدينا ويديكم طولة العمر ويدينا الحرية من الوطني والإخوان ومن امريكا والسعودية الوهابية ومن مبارك وولده جمال
لكن قبل ما نروح امريكا ودونا أسبوع عمان في الأردن
ويا أخي ما يختارولناش أوتيل نقعد فيه غير سبحان الله راديسون ساس اللي كان فيه التفجيرات اللي مات فيها مخرج فيلم عمر المختار مصطفى العقاد
وده كان فيديو من شباك الغرفة اللي كنت قاعد فيها

إضغط هنا
وإستقبلتني واشنطون بالأمطار والجو البارد وحمدت الله إني ما جيتش في التلج لأن طلع إن الهدوم اللي عندي كلها حتى لو لبستها فوق بعض ما كانتشي ها تنفع لأني كنت لابس جاكت جلد وتحتيه جاكت بزعبوط وتحتهم بلوفر وبرضه مافيش فايدة
الملابس الشتوي اللي عندنا في مصر دي ورق الصراحة
ودي جولة بالأوتوبيس في شوارع واشنطون الماطرة

إضغط هنا
وبما إني في واشنطون كان لازم أمسي على حبيب الكل الحاج بوش أعظم حشاش حكم امريكا واكبر أفيونجي بيعرف يتكلم في السياسة أمام الإعلام وعارف الفرق كويس بين استراليا واوستريا او النمسا

إضغط هنا
وكان لي نصيب أغطي المظاهرات حتى وانا هناك ودي مظاهرة نظموها الناس بتوع حركة ماس او مسلمي أمريكا قدام السفارة المصرية في واشنطون وفي الفيديو ها تشوفوا نورا يونس وهي بتخطب وتهتف

إضغط هنا
وده راجل طيب كان واقف يغني قدام البيت الابيض اغاني عن السلام وعلى فكره ده مش شحات ده متظاهر والاغاني كانت جميلة وحزينة لدرجة ان عنيا دمعت وقلتله شكرا انت جميل

إضغط هنا
وده ميدان دوبونت سيركل اللي سكنت فيه لمدة اسبوع وبالنسبة لي انا شخصيا هو احلى حته في واشنطون المملة وده يوم كده نزلت لقيت الناس بيرقصوا في الشارع ولحد دلوقت ما اعرفش ليه وما سالتهمش ليه بس صورتهم

إضغط هنا
ومن نافورة ميدان دوبونت سيركل لما الجو ابتدى يدفي ونخش على الصيف لفت نظري البط المهاجر وبالذات ذكر وانثى البط دول لانهم كانوا مع بعض على طول وكانوا مستمتعين بالشمس ومياة النافورة في ذلك اليوم فحسدتهم على راحة البال والحب المتبادل وبرضه صورتهم
على فكرة في عالم الحيوان دايما الدكر احلى من النتاية

إضغط هنا
وده برضه حمام من دوبونت سيركل كان فيهم دكر دبور عامل نفسه بياكل بس هو بيحرجم على الحريم لكن على مين لقطته برضه

إضغط هنا
وأنا في واشنطون زرت ستوديوهات الجزيرة إنجليش بناء على دعوة الزميل عماد موسى وكان على الهواء برنامج ريز خان مستضيف هبة قطب من القاهرة

إضغط هنا
وده مؤتمر صحفي للمتحدث يإسم الخارجية الأمريكية من اللي بتشوفوهم في التلفزيون منقولين على الهواء بالقمر الصناعي ومحسوبكم بقى كان هناك

إضغط هنا
وده مؤتمر صحفي كنت بأرد فيه على أسئلة الصحفيين عن التدوين والحريات في مصر
شفتوني وانا ماسك الميكروفون
هاهاها

إضغط هنا
ما قدرتش ما أروحش نيويورك - ذا بيج آبل أو التفاحة الكبيرة - خصوصا وإن الحياة مملة جدا في واشنطون فأخدت اوتوبيس من الحي الصيني بيروح نيويورك وقعدت هناك يومين وللأسف مكانش معايا ولا رقم تليفون حد اعرفه في نيويورك واضطريت ابات في اوتيل - يعني اللي وفرته في الاوتوبيس الصيني وعملت ناصح كعيته في الاوتيل - وده فيديو من فوق مبنى الإمباير ستيت أعلى مبني في نيويورك واعلى مبنى في العالم سابقا

إضغط هنا
ومن أهم الأماكن في نيويورك ميدان تايمز سكوير اللي بيحسسك كأنك عايش جوه إعلانات التلفزيون وللأسف الجيش الأمريكي كان حاطط مركز تطوع متنقل للجيش الأمريكي في وسط الميدان منظره عكنن عليا ولو إني كنت باركب المترو في واشنطون من المحطة اللي تحت البنتاجون وباشوف العسكريين والاشكال الوسخة دي كل يوم

إضغط هنا
ودي جولة بالأوتوبيس في شوارع نيويورك أو بالأصح شوارع مانهاتن

إضغط هنا
بعد ما قعدت في دوبونت سيركل أسبوع سكنت في اليكساندريا - أو الإسكندرية - في ولاية فيرجينيا لمدة أسبوع برضه وبعدين بقية المدة قضيتها في مقاطعة أرلينجتون برضه في ولاية فرجينيا وكنت بأنزل شغلي في مجلة سليت كل يوم في واشنطون بمواصلتين أولهم أوتوبيس لحد مبنى البنتاجون وبعدين باخد المترو من تحت البنتاجون زي ما قلتلكم
أي والله محطة المترو تحت البنتاجون ما نقلوهاش والغريب ان محدش بيوقفك يقولك بطاقتك يا كابتن او باسبورك يا كابتن ولا بيفتشوا شنطتي رغم اني كنت بابقى شايل شنطة ضهر فيها لابتوب كل يوم مش زي عندنا لو ولية شايلة بطة رايحة بيها السوق يفتشوا تحت جناحاتها أحسن تكون حاطة متفجرات تفجر مترو الأنفاق
وده فيديو من مهرجان إسمه مهرجان أرلينجتون للتذوق يظهر بيتعمل كل سنة علشان الناس تجرب مطاعم المنطقة وأحلى حاجة فيه جنب الأكل هي العاب الاطفال والتسلق وساعتها اتمنيت لو كنت لسه طفل

إضغط هنا
وده فيديو تاني كنت باحاول اصور فيه نظام المرور في فرجينيا وبأشرح وبأعلق بصوتي وما كنتش واخد بالي إن الهوا كان ضارب جامد في ميكروفون الكاميرا فكل الصوت اللي طلع كان عبارة عن وش

إضغط هنا
ودي زي ما قلت كانت شوية فيديوهات على ما قسم كده مش كل التغطية بتاعة أمريكا كنت قاعد باسلي صيامي إمبارح ورفعتهم

جديد الوعي المصري على المحمول

نشكر للقراء الثقة الغالية
فقد بلغ عدد المشتركين في خدمة رسائل الوعي المصري القصيرة على المحمول أكثر من ألف مشترك حتى الآن
ولكن يبدو أن البعض يجد صعوبة في تلقي الرسائل على محموله بسبب عيب في متصفح ميكروسوفت للإنترنت المسمى انترنت اكسبلورار يجعلهم غير قادرين على وضع علامة على
Notifications on
لذا كما قلنا من قبل يجب إستخدام متصفح آخر مثل فاير فوكس
كما يمكنكم قراءة آخر عشرون رسالة على المحمول على موقع الوعي المصري مباشرة وذلك في العامود الأيمن من الصفحة

مع ريز خان على الجزيرة إنجليش

إضغط هنا لتشاهد الحلقة

بلطجية لإعاقة تصوير إسلام نبيه في القفص

لم أتمكن من حضور جلسة اليوم خمسة سبتمبر لكن وصلتني رسالة من نوارة من داخل القاعة بتقول لي أن محامي إسلام نبيه شتمها في مرافعته وهو شيء مش مستغرب من مثل هذا المحامي لأنه في الجلسة السابقة التي أنشر تغطيتها اليوم إستمر يكرر كلمة الكلب الكهربائي في وصف خبير الأصوات بالإذاعة والتلفزيون
وإليكم صور جلسة اتنين سبتمبر وبعض الفيديوهات

خارج القاعة قبل الجلسة

الإعلام منتظرا

داخل القاعة الكاميرات متأهبة

بدون تعليق

إسلام يدخل القفص
يارب للأبد

عماد الكبير الضحية اللي عاوزين يعملوه مجرم بالعافية

النيابة

القاضي

ناصر أمين محامي عماد الكبير يترافع

ثم يتحدث للصحفيين بعد الجلسة
أما محاميي الدفاع عن إسلام نبيه فكرروا نفس الكلام حول المؤامرة على يا حبة عين أمه زينة الشباب المظلوم إسلام نبيه وعن الناس اللي بتقبض من بره علشان يشوهوا سمعة مصر
بره الجلسة استوقفتني صحفية ومصور من جريدة أخبار الحوادث وكما توقعت سؤال سخيف عن ما ردك على إتهامات الدفاع لمنظمات حقوق الإنسان والمدونين بتلقي أموال من الخارج وقاموا مصورينني صورة
رديت قلتلها المحامي ده ببساطة بيقول كلام يعاقبه عليه القانون
كس أم التعريص في البلد دي يا أخي
بلد تروح تطلب حقك يطلعوك مجرم وخاين ومرتشي وبتقاوم السلطات وتتحبس تلات اشهر ويطلع لك سوابق من قبل ما تتولد وبتتعامل مع جهات أجنبية وبتشوه سمعة مصر وبتشارك في مافيا إتحاد تجار المخدرات مع بتوع حقوق الإنسان
بس الجديد في هذه الجلسة هو إستخدام بلطجية داخل القفص علشان يداروا على إسلام نبيه من المصورين
شاهد فيديو البلطجية في القفص

إضغط هنا
كما تم التنبيه على العساكر أن يرفعوا ايديهم واذرعتهم أيضا لحجب إسلام نبيه
وتم حصر المصورين في ممر ومنعهم من التحرك في القاعة بحرية كما كان يحدث في الجلسات السابقة
بس على مين
خدوا الفيديو ده صورته في الخباثة
نظرات إسلام نبيه الزائغة

إضغط هنا
بالذمة مش ينفع إسم فيلم روائي قصير
في إنتظار نتائج جلسة اليوم من نوارة والزملاء
-
تغطية تأخر نشرها
الوعي المصري في رفح
بعد قليل

بعد صدور الأحكام في تفجيرات عبدالمنعم رياض

الآن وبعد صدور الأحكام في قضية تفجيرات عبد المنعم رياض وخان الخليلي والسيدة عائشة من الواجب تذكير القراء وخصوصا الجدد ممن لم يتابعوا الوعي المصري عام 2005 بالأحداث كما غطتها الوعي المصري في وقتها حيث تواجد الوعي المصري في ميدان عبد المنعم رياض بعد الإنفجار بدقائق فقط كما قمنا بزيارة شبرا الخيمة حيث يسكن المتهمون وإلتقطنا هذه الصور النادرة

وكان البطل هنا هو هذه الكاميرا أكرم الله مثواها

Trust Power Cam 350 FS
وهي بطلة كثير من الأحداث في عام 2005 ومن بينها أحداث الإستفتاء الشهيرة وهي الكاميرا التي ضربت يومها وإختطفتها الشرطة مني وصاحبة قصة البطاريات الشهيرة التي تسمعونها في وثائقي قناة الجزيرة عن المدونين
أحداث الإستفتاء - وصلة أولى
أحداث الإستفتاء - وصلة ثانية
وقد إنتهى بها الأمر مباعة لأحد الأصدقاء من النشطاء والتي سرقتها الشرطة منه هذه المرة للأسف بلا رجعة
رحمها الله
-
التغطيات

للبيع
كاميرا ذات تاريخ أيضا
Sony H1

هذه الكاميرا أيضا شهدت كثير من الأحداث الهامة وكان أهمها أحداث نادي القضاة
وإستخدمت لقطات صورتها بها في قناة الجزيرة وقناة الحرة

إضغط هنا
للبيع لأعلى سعر
5.1 ميجا بيكسل
حجم الصورة 2592 في 1944 بيكسل
12x زووم بصري
شاشة بانتالا 2.5 بوصة
عدسة سوني
Super Steady Shot
تسجيل فيديو صوت وصورة MPEG
تلتقط فيديو بسرعة 30 فريم في الثانية
مجهزة للعرض على شاشة التلفزيون
ذاكرة داخلية 32 ميجا
تقبل كروت الذاكرة سوني ميموري ستيك
بروسيسور داخلي
تعمل ببطاريات الألكالاين العادية أو بطاريات الشحن
ومميزات أخرى كثيرة

صور قتيل جزاري الشرطة الطفل

أحدث ضحية لجزاري الشرطة عمره إتناشر سنة فقط
تحذير لضعاف القلوب - الصور صادمة جدا

الوعي المصري تكشف كذب تقرير الطبيب الشرعي
وكذب مساعد وزير الداخلية إياه معتاد الكذب

التقرير قال جثة الطفل محمد ممدوح ليست بها أثار تعذيب
وأن محمد مات بالسكتة القلبية

ونحن نخرم عينهم بصور إصابات تعذيب محمد
حروق وكسور وجروح قطعية وكهرباء في المؤخرة والخصية

الصور وصلتنا من مصادرنا بالمنصورة
مع حوار مع أم القتيل
الصور أخذت قبل وفاته بإتناشر ساعة وكان ما زال حيا يتأوه

أم محمد تقول
ابني كان رايح القسم سليم زي الحصان
ابني فتحوله جنبه في القسم
الكابتن سيد بتاع المركز هو اللي واخده من هنا وكان معاه اربع مخبرين تبع قسم المنصورة
قعدت أصوت في القسم قام المأمور بعته مستشفى الصدر
في مستشفى الصدر الدكتور قال لي ده عامل عملية
ابني عملوله عملية في المركز
الواد كله محروق وظهره مكسور
وديته الجامعة قالولي دي مش عملية دي مفتوحة غلط
وبعدين طردوه من المستشفى

المستشفى عرصت على المأمور بتاع المركز
خدوه بعربية مخصوص ورموه على الكوبري
رموه عند موقف المنصورة بتاع الدراسات
كان مرمي خلصان خالص والناس الله يصلح حالهم جابوه
بقاله يومين في البيت
أعمل إيه يابا مانا ماليش ضهر وبعت اللي ورايا واللي قدامي
ممكن ادخل السجن في اي وقت وعليا فلوس قد كده وباجري على خمسة
اخوه ابراهيم ممدوح لسه في المركز
خدوه علشان ما يتكلمش
دول قلبهم بقى يهودي وها يعملوا في اخوه زي ما عملوا فيه
كل اللي جوه في المركز بيعملوا فيهم كده
ابني وابن غيري
اقول ايه بس بعد ما عيالي راحوا
من يوم ما جوزي مات محدش بيجري عليا واتداينت واتهانت

ده حرق كهربا
سلسلة ضهره مكسوره اهه
وجنبه مخروق
هو فيه عمليات بتتعمل في المركز
مستشفى الصدر طردوه
الدكتور في الجامعة قال لي عملية رئة ايه يا حاجة
دي مش عملية ده حد خابطه بحاجة يا حاجة
وباقول يا رب ربنا ينتقم منهم ربنا ينتقم من الظالم
ربنا ينتقم من اللي في المركز بتاع المنصورة كله
ما حلتيش حاجة علشان ابيعها
معندناش حمام وبنملا المية من بره

لما انا سبته في المستشفى ومشيت طردوه
قالوا طردناه علشان كان بيقطع في المراتب
هو بيتحرك اصلا علشان يقطع في المراتب
بيقولي التمرجية حطوني في عربية ورموني في الموقف
وواحد ابن حلال ركبه عربية محلة دمنة
وواحد تاني جابه بتوك توك لحد البيت
جالي مرسال ابنك في مستشفى الصدر
رحت التمرجية قالولي ممنوع تقعدي معاه علشان هنا قسم القلب

الصور بدون علامة مائية
وندعوكم لسرقتها ونشرها في كل مكان
إفضحوا الفجرة الجزارين
إستقيل بقى يا فاجر أكرملك
الناس كلها بتلعنك
وأبو طلعة جوية ما بيتكلمش ليه وساكت هو كمان

تقرير خاص لقناة الحرة عن المدونين المصريين

تحدث في التقرير كل من خالد البلشي وجمال عيد ومالك مصطفى وشاهيناز عبد السلام وعبد المنعم محمود وآخرون بالإضافة إلى العبد لله
شاهد الجزء الأول

إضغط هنا
-
الجزء الثاني

إضغط هنا
-
الجزء الثالث

إضغط هنا
-
الجزء الرابع

إضغط هنا
-
الجزء الخامس

إضغط هنا
-
الجزء السادس

إضغط هنا

هوجة - دقن - عرابي

هاجت الدنيا وماجت وقامت ولم تقعد وإنبرى الإسلامجية إزاي جامعة الزقازيق تحلق دقن أحمد عرابي اللي في الشعار بعد كل السنين دي وتخليه أقرع كده من غير دقن وإنبرى عظماء الكتاب يتحدثون عن المؤامرة الأمنية لحلق دقن عرابي لأنها تحرض على الإرهاب من وجهة نظر الأمن وتوالت ردود الأفعال الأتفه من بعضها سواء من المتأسلمجية أو من إدارة الجامعة التي طلعت أهبل من الجميع وهل هذا بسبب موضوع فتحه موقع تافه لا ينشر الا الاخبار المفبركة والامنية والهجوم على المعارضة المصرية وهو موقع من المعروف ان الامن قام بإنشاؤه من أجل دحض مصداقية أخبار المواقع الإلكترونية وإختار القائمين عليه القيام بدور الأراجوزات الأمنيين رغم إنتماؤهم السابق لأحد الجماعات الإسلامية الراديكالية العنيفة وأكثر من مرة أقوم أنا أو أحد الزملاء بمحاولات للتحقق من أخبار هذا الموقع خاصة ما يتعلق منها بوقائع تعذيب فيثبت أنه لا أساس لها من الصحة وان حتى الشخصيات وأرقام المحاضر غير موجودة بالمرة

والسؤال هنا هو صحيح عرابي كان بدقن
طب وها نتعب نفسنا ليه
ماهو فيه صور كتيرة اترسمت له في هذا العصر من رسامين مصريين وأجانب
بل كمان كانت فيه صور فوتوغرافية ليه



محاكمة عرابي

عرابي - على اليمين - في المنفى
طب خدوا دي بقى
صورة فوتوغرافية نادرة لأحمد عرابي نفسه ومش رسمة

طب مش يمكن ياد يا وائل عرابي كان مربي دقنه في فترة ما
آه صح معاكم حق هو فعلا كان مربيها
بس الكلام ده بعد ما كبر وعجز ودقنه إبيضت والملكة فيكتوريا اصدرت عفو عنه ورجع مصر

وبرضه ما كانش شكله زي ماهو في الشعار حتى شوفوا
مش نفس حتى تقاطيع الوش والجمجمة

سبحان الله
أما والله حاجة تحير
أومال اللي في الشعار ده يطلع مين
أقولكم الغلطة التاريخية اللي وقع فيها المصمم من تلاتين سنة وبيصلحوها دلوقت
اللي في الشعار ده طلع الخديو إسماعيل

وتوته فرغت الحدوته
ورجاء لا تنشغلوا بالتوافه عن ما هو هام وحيوي ولا تتبعوا المواقع الأمنية