Ok

By continuing your visit to this site, you accept the use of cookies. These ensure the smooth running of our services. Learn more.

Sunday, 20 January 2008

On Bush and al-Farhan

On Bush and al-Farhan
عن زيارة بوش وإعتقال الفرحان في مقابلات تلفزيونية

تعليق على زيارة بوش لمصر في مقابلة مع القناة الأولى للتلفزيون الألماني
Commenting on Bush's visit to Egypt in an interview with German televisisin Das Erste
إضغط هنا
Click here to watch - German Only


على سي إن إن في حلقة عن إعتقال المدون السعودي فؤاد الفرحان
On CNN's International Correspondents on the detention of Saudi blogger Fouad al-Farhan and the situation of blogging in the Middle East
إضغط هنا
Click here to watch - English

Saturday, 19 January 2008

عاجل - جوجل تحجب موقع حركة كفاية

عاجل - جوجل تحجب موقع حركة كفاية
Google
إتهمني كثير من الزملاء وما زالوا حتى الآن إني شطحت وخرفت وكبرت المواضيع وبقيت مهووس وبارانويد وغاوي شهرة وتهويل ومحتاج علاج لما ألمحت مجرد تلميح إلى وجود يد خفية للنظام المصري وراء حذف حسابي الخاص بلقطات الفيديو على موقع يوتيوب المملوك لشركة جوجل صاحبة محرك البحث الشهير والذي تصادف أيضا في نفس الوقت - سبحان الله - مع حذف حسابي البريدي من ياهو للمرة الرابعة في أقل من عام وقلت أنني أتعرض لحرب إلكترونية وتكنيك جديد يستخدمه النظام المصري لقمع صوت المعارضة على الإنترنت وللأسف كان معظم التضامن والدعم المعنوي الذي تلقيته من وكلالت أنباء أجنبية ومحطات تلفزة أمريكية ومدونين امريكان

الآن جاءت ساعة الحقيقة لتثبت وجهة نظري في وجود يد خفية للنظام المصري تعبث مع أو بالتعاون مع جوجل لقمع صوت المعارضة في مصر بإستخدام تكنيكات جديدة ولجوجل سابقة في هذا المجال وهو حذف أي نتائج للبحث عن مواقع تعارض الحكومة الصينية من محركه للبحث
الحقيقة لم أكن أنا مكتشف هذا الموضوع ولكن الفضل يرجع للزميل محمد جمال صاحب مدونة جيمي هود الذي إتصل بي تليفونيا منذ قليل ليخبرني بهذا الإكتشاف وأنه نشر تفاصيله على مدونته وفعلا رحت قريت عنده في المدونة لكن برضه قلت لنفسي إتأكد يا واد بدل ما يتهموك تاني إنك مختل عقليا وبتتوهم حاجات وبتكبر المواضيع وإن الموضوع بسيط وغلطة سبحان الله إنها تحصل مع يوتيوب وياهو كمان أربع مرات
وبالفعل ما أخدتش كلام الواد جيمي على علاته ورحت فاتح محرك البحث جوجل وكتبت كفاية

لقيت لينكات لصفحات بتتكلم عن حركة كفاية بالفعل لكن ولا لينك للموقع ذات نفسه
وبعدين كتبت حركة كفاية

برضه مافيش أي حاجة
وبعدين كتبت الحركة المصرية من أجل التغيير

ولا الهوا
وبالعنجليزي كتبت harakamasria

برضه ولا الدموع
الله
هو فيه إيه يا جدعان
برضه قلت بلاش تتسرع ياد يا وائل
يمكن موقع كفاية نفسه فيه حاجة غلط خصوصا إن الموقع بقاله فتره بيديره ناس مش محترفين علشان كده مش بيظهر في محرك جوجل مع انه حتى لو الموقع اختفى لازم يظهرله صفحات متكيشة على الأقل - حلوة متكيشة دي
المهم هداني تفكيري أشوف بقية محركات البحث
وطبعا أهم تاني محرك بحث بعد جوجل هو ياهو

برضه كتبت كفاية

وهنا لقيت موقع كفاية ظاهر وأول لينك كمان في الصفحة
كتبت حركة كفاية

نفس الحكاية
الحركة المصرية من أجل التغيير

برضة ظاهر وموجود وزي الفل
وبالعنجليزي harakamasria

موجود وتمام التمام
أومال إيه الحكاية يا جوجل

Thursday, 17 January 2008

متابعة إعتقالات مظاهرة السيدة زينب

متابعة إعتقالات مظاهرة السيدة زينب

صورة من أرشيف الوعي المصري
مظاهرة كنس السيدة عام 2005
اعتقلت قوات الامن كل المتظاهرين الذين حاولوا التظاهر امام مسجد السيدة زينب كما كان مقررا
ولم تفرق بين كبير وصغير وشاب وفتاة
ملأ المعتقلين ثلاث عربات للترحيلات
اعتدى الامن على الصحفيين والمصورين الاجانب
ومنهم بير بيركلوند السويدي الذي صادر الامن كارت الذاكرة الخاص بكاميرته وكارت تليفونه المحمول
وصلت انباء عن اعتقال المسيري وعدد من قيادات كفاية من داخل جامع السيدة زينب
اطلق الامن سراح الفتيات اولا
ومنهم
بيسان كساب صحفية بالدستور
ابتسام تعلب صحفية بالبديل
نوال علي صحفية بالبديل
رشا عزب صحفية بالفجر
تم القاء عدد من المعتقلين في مناطق صحراوية نائية على الطريق الدائري وطريق القطامية
استطاع البعض العودة في عربات عمال التراحيل التي تصادف مرورها في قلب الصحراء
ومنهم
هاني الاعصر صحفي بالدستور
محمد جمال مدون
عصام فضل صحفي بالشرق الاوسط
لم يطلق سراح الكل
بعض المعتقلين معروضين وقت كتابة هذا الايميل على نيابة الجلاء
ومنهم الاسماء التالية
محمد عادل مدون
عمر سعيد صحفي بالبديل
بيتر الفريد صحفي بالكرامة
ومعهم الان عدد من المحامين والحقوقيين
وسنوافيكم بمزيد من التفاصيل فور وصولها الينا
وهذه بعض أسماء من كانوا في عربات الترحيلات
ساهر جاد
سامح عيد
علاء فخري
محمود الزهيري
هشام الجندي
سيد الطوخي
سيد سعداوي
مسعد أبو لوايا
محمد دومة
سنوافيكم بالمزيد من التفاصيل حال ورودها الينا فتابعونا

تحديث
النيابة تأمر بالإفراج عن المعتقلين بضمان محل إقامتهم
التهم التي وجهت إليهم
تعمد تعطيل حركة المواصلات العامة وتعريض سلامة وسائل النقل البرى للخطر
الاشتراك فى تجمهر بطريق الاتفاق حال كونه المتهمين اكثر من خمسة اشخاص بغرض ارتكاب جريمة وهى تعطيل حركة المواصلات العامة واثارة الفتن وبث الشائعات الكاذبة والتى من شأنها تكدير السلم والأمن العام
الاشتراك فى الجهر العلنى بغرض اثارة الفتن وبث الشائعات الكاذبة والتى من شأنها تكدير الأمن العام وإلحاق الضرر بالمصلحة العامة
أسماء من تم التحقيق معهم
محمد عادل
عمر سعيد
بيتر الفريد
صفاء المويلحي
عبد النبي حامد
محمد العجمي
فتحي الحفناوي
أسامة كامل
عمرو يوسف
ولأن اليوم الجمعة فمن المتوقع أن لا يفرج عنهم قبل السبت إلا إذا تدخل أمن الدولة
ومن المقرر أن يفرج عنهم من أقسام الشرطة التابعين لها

صور أرشيفية لمظاهرات سابقة في السيدة زينب
كنس السيدة 2005

إضغط هنا
مظاهرة فوانيس رمضان 2005

إضغط هنا

-
ذكريات إنتفاضة الحرامية

طبعا أنا ما رحتش مظاهرة السيدة زينب دي
ليس جبنا ولا حاجة
لكن إعتراضا على إختيار ناصرجية كفاية لهذا التاريخ نكاية في السادات
ودي أنا شايفها سخافة
بس نعمل إيه في أم هيافة الناصرجية اللي بيتلقوا الدعم والتمويل من القذافي والأسد وغيرهم لمجرد إنهم يشتموا السادات
وهذا التاريخ يواكب ما أسماه السادات إنتفاضة الحرامية
ويسميه البعض إنتفاضة الخبز
وهي عندما أعلن السادات صراحة في مجلس الشعب عن رفع بعض أسعار السلع الغذائية محترما للشعب ومصارحا له على عكس ما يفعل مبارك الآن من رفع للإسعار تدريجيا من تحت لتحت والناس نايمة على ودانها
ويحاول الناصرجية هباء تذكير الناس بشيء يكرهونه أساسا لأن ما حدث في تلك الأحداث كان همجية وغوغائية
ويدعي الناصرجية ويسارجية 1964 - بتوع يلا نحل منظماتنا ونخرج من المعتقل ونخش في زوارق الحكومة - المنبطحين لعبناصر أنهم قادة تلك الهبة
رغم أنها كانت هبة شعبية عفوية تماما ليس لأي من التيارات السياسية فضل فيها برغم تمويل الإتحاد السوفيتي الجامد ليهم وقتها وهو ما كشفته أشرطة فيديو سجلت وقتها لبعض قياداتهم
والكلام عن ملاعيب الإتحاد السوفيتي في مصر في السبعينات يطول
وهو يبدأ بالخبراء أو الجواسيس الروس اللي جابهم عبد الناصر يتدخلوا في كل كبيرة وصغيرة في البلد - بعد ما إسرائيل قتلت له الخبراء الألمان النازيين في حادثة فيلا الهرم الشهيرة - إنصياعا لتبعيته المقيته للسوفيت - برغم إدعاؤه عدم الإنحياز - اللي ودتنا في داهية في 1967 وأجهضت كثير من البرامج العسكرية الهامة كالبرنامج النووي وبرنامج تصنيع طائرة حربية مصرية نفاثة علشان نعتمد على التسليح الروسي في وقت صنعت فيه إسرائيل الطائرة الكافير
ورغبة السادات في التخلص من النفوذ السوفيتي بطرد الخبراء الروس وتنويع مصادر السلاح وإدارة مصانعنا بخبرات مصرية خصوصا بعد إستندال الإتحاد السوفيتي معانا وعدم إمداده لنا بالسلاح المطلوب لإسترداد سيناء بحجة أن مصر في 1967 تركت عتاد سوفيتي حديث يقع في أيدي الإسرائيليين ليسلمونه فيما بعد لأعداء السوفيت الأمريكان ولهم في ذلك بعض الحق
وبرغم ذلك نجحنا في العبور بما لدينا من عتاد في 1973 وحقق السادات المعجزة
لكن ده مش موضوعنا وسوري إني بأسرح ونعود لموضوعنا الأصلي
وهذا بإختصار هو سبب عدم إنتفاضة المصريين مرة أخرى رغم إرتفاع سعر الخبز من خمسة مليمات عند تولي مبارك إلى خمسة قروش الآن لو لقيت أبو خمسة ده أصلا
لأن المصريون لم يرضوا عن التخريب الذي حدث وقتها
ولا أعرف لماذا تحاول بعض التيارات السياسية تمجيد أعمال عنف
حوالي 300 قتيل
حرق حوالي 100 أوتوبيس هيئة نقل عام
نهب حوالي  300 محل
حرق وتدمير حوالي 200 مبنى حكومي
حرق وتدمير حوالي 200 منشاة خاصة
حرق حوالي 200 سيارة خاصة
لقد كدت أن افقد والدي في تلك الأحداث الدامية
فقد أوقف الغوغاء المواصلات
قطار باب اللوق حلوان ومترو مصر الجديدة وترام السيدة زينب وأوتوبيسات النقل العام
وإضطر والدي إلى العودة إلى المنزل سيرا على الأقدام من وسط البلد كحال كل العمال والموظفين يومها
ولم يكن يملك سيارة وقتها
والحمد لله أنه لم يملك سيارة وقتها وإلا كان حدث ما لا يحمد عقباه
ولأنه كان موظف حكومة ويرتدي بذلة فقد قذفه بعض السفهاء بالحجارة ظنا منهم أنه مسئول أو من البهوات الكبار حتى أنقذه بعض العاملين في توكيل كاديلاك بشارع رمسيس وخبأوه في الجاراج وعاد إلينا مصابا
كما أحرق السفهاء سيارات بعض معارفنا من الغلابة اللي إشتروا عربيات نصر 128 وقتها بالتقسيط
فالعنف والتخريب هنا لم يكن موجها للنظام بل كان من الشعب ضد الشعب
وأكبر مرفق تعرض للتخريب وقتها كان مرفق المواصلات اللي بيركبه الشعب العادي وتم نهب المجمعات الإستهلاكية - طبعا الأجيال الجديدة ما توعاش على مجمعات النيل والأهرام والحاجات دي - والمحلات العادية
أما عن الدور الأحمق للشرطة كالعادة
فقد إندلعت مظاهرات سلمية من جامعة عين شمس
وتوجهت كالعادة في تلك الأوقات إلى شارع مصر والسودان بحدائق القبة
وده قبل ما يعملوا مترو الانفاق في أواخر الثمانينات ويعزلوا حدائق القبة عن جامعة عين شمس بسور خرساني
وكان ذلك المكان قبلها مجرد مزلقان للقطار المتجة الى بعض محافظات الوجه البحري
وتوجهت تلك المظاهرات إلى نقطة شرطة حدائق القبة
فما كان من أحد الضباط الحمقى إلا أن أطلق النار من مسدسه في المليان بدون تلقيه لأي أوامر
فقتل على الفور إحدى الفتيات
وقد تم معاقبة هذا الضابط فيما بعد مع عدد كبير من الضباط
ولنا أن نذكر حرية القضاء في عهد السادات والذي كان السادات نفسه ينصاع لأحكامه وفي ذلك يمكن أن نورد كثير من الأمثلة
فقد أنصف القضاء من قبض عليهم في تلك الأحداث
وأدان أداء الشرطة وقتها
على عكس أحوال القضاء في عهد عبد الناصر صاحب مذبحة القضاة وقتل السنهوري باشا
وأحوال القضاء أيضا حاليا في عهد حسني مبارك صاحب مذبحة القضاة الثانية

ورغم أني كنت في الثالثة فقط من العمر إلا أنني أتذكر مشهد جنود الأمن المركزي تحت نافذة منزلي وهم يصيحون ويدبدبون على الأرض وكان مشهد لا ينسى لطفل مثلي
ويمكن دي كانت بداية علاقتي بالسياسة أساسا
ودي كانت ذكرياتي عن أحداث يناير 1977
الله يرحمك يا سادات
كنت راجل طيب وذكي
بس أعداءك كتير بره وجوه
لسه بياكلوا لحمك وإنت ميت لحد دلوقت

حسني مبارك يمثل مع كمال الشناوي وشادية

حسني مبارك يمثل مع كمال الشناوي وشادية

الحقيقة أنا عارف الموضوع ده من زمان
وبقالي كتير قوي بأدور على اللقطة دي
لحد ما لقيتها
اللقطة من فيلم إسمه وداع في الفجر
بطولة كمال الشناوي وشادية وعبد المنعم إبراهيم
وإنتاج 1956
دور حسني مبارك كان مدرس في مدرسة الطيران
غير متكلم
ومن أغاني الفيلم المشهورة
دور عليه تلقاه
هاهاها
أسيبكم مع اللقطة بقى
إضغط هنا

Wednesday, 16 January 2008

Don't Vote Republican!

Don't Vote Republican!

Use this banner on your blogs!
This is an invitation not only to Egyptian Americans, but to anybody who does not want crazy people in power positions in the world

Wednesday, 09 January 2008

إيلي ياتزبان يضرب مرة أخرى

إيلي ياتزبان يضرب مرة أخرى

كنا نشرنا قبل كده مقطع فيديو موجود على يوتيوب للمثل الكوميدي الإسرائيلي إيلي ياتزبان وهو يقلد الرئيس المصري محمد حسني مبارك
وإيلي ياتزبان ممثل كوميدي مشهور بتقليد رجال السياسة الإسرائيليين والعرب
אלי יצפאן
وله تاريخ حافل مع مبارك بالذات
وياما قلده على التلفزيون الإسرائيلي
لكن الحلقات المتاحة على الإنترنت قليلة جدا
ومنها الكليب بتاع النهارده ده
وفي 2001 كان فيه أزمة كبيرة قوي بين وزارة الخارجية المصرية والحكومة الإسرائيلية بسبب الممثل ده وتدخل فيها أولمرت علشان يحلها
ووزارة الخارجية الإسرائيلية بعتت السفير السابق ليها في مصر - زفي مازال - علشان يوضح حرية التعبير في إسرائيل
وبعدها أولمرت قال لياتزبان خلاص المشكلة إتحلت وتقدر تسافر مصر لو عايز بكل سهولة لكن ما أضمنلكش إنك تخرج منها تاني
عموما آدي الفيديو اللي إكتشفته جديد
חמש עם דינה חממי - דינה מראיינת את חוסני מובראכ
إضغط هنا

Tuesday, 08 January 2008

سبقناك يا هيكل بسنتين

سبقناك يا هيكل بسنتين

جامع محمد على بالقلعة من جوجل إيرث
هيكل عامل قلق اليومين دول بموضوع جوجل إيرث وإزاي إننا مكشوفين كده بقواعدنا العسكرية بالأقمار الصناعية بينما إسرائيل متغطية
في حين إننا إتكلمنا في الموضوع ده على الوعي المصري من سنتين بالضبط
تحديدا في سبعتاشر يناير 2006
بالصور النادرة من مصر والدول العربية
ومقارنتها بصور القواعد العسكرية في إسرائيل
وحيث إن أنا قارش ملحة هيكل وبأعتبره من أكبر مزوري تاريخ مصر الحديث لصالح حقبة الديكتاتور عبناصر
فلو قلت إن معدين برنامجه سرقوا فكرة الموضوع من عندي الناس ها تتهمني إني متجني عليه علشان ما باحبوش
قوم إيه بقى
ها أستنهز الفرصة وأنشر وصلة للموضوع من أرشيف الوعي المصري
إضغط هنا
علشان أفكر الناس بس أنا كنت ناشر إيه وقتها
لا أكثر ولا أقل
إيه رأيكم بقى
لا ده إحنا جامدين قوي
غيرش بس هو يعني
ده أنا غلبااااااان
عموما جوجل إيرث بقى أوضح الآن فيما يخص إسرائيل والمناطق الحساسة فيها وإن لم يكن الوضوح الكافي أكثر مما كانت عليه عام 2005 وقت إعداد الوعي المصري للموضوع الذي سرقه معدي برنامج هيكل مما أوقعهم في الحرج الذي وقعوا فيه وتسبب في إتهام هيكل بإنه مش عارف بيقول إيه
يللا يا عم
أدينا عملنا خدمة لهيكل ووضحنا هو غلط إزاي
-
تحديث عن أبو زيد الهيكلالي

الصراحة لقيت شراشيح الناصرية زعلوا قوي في التعليقات وبيشتموا ويقلوا أدبهم إزاي أتطاول على سي هيكل وعلى عبناصر
قلت أحطلهم الوصلات دي من الأرشيف يمكن يهدوا
ملف خاص عن اكاذيب هيكل
وردود كتاب من مختلف التيارات السياسية عليه ومنهم إخوان وشيوعيين وحزب وفد وانصار القومية المصرية

ويحتوي المقالات التالية
هيكل والحركة الشيوعية المصرية - محمود أمين العالم
لا يا هيكل - عبد القادر ياسين
لا تروجوا الوعي الزائف - دكتور أحمد القصير
قصة أبو زيد الهيكلالي - عبد الرحمن فهمي
التاريخ البلاستيك للأستاذ هيكل - أحمد عز العرب
عزيزي هيكل لماذا تكذب - عبد الرحمن فهمي
الحياد غير الإيجابي هيكل والوفد - علي أبو الخير
معذرة يا أستاذ هيكل - عبد الرحمن فهمي
الدكتور جابر قميحة يرد على حديث هيكل في الجزيرة
محمد يوسف الجندي في مناظرة مع مؤرخ إنقلاب يوليو
أستاذ هيكل لسنا بحاجة لقائد ملهم - أحمد الحسنية
هيكل وحكاية السنوات العشر - محمد حسن أحمد
الحقيقة بين أبو الفتح وهيكل - عبد الرحمن فهمي
بين أبو الفتح وهيكل أخطر مكالمة تليفونية - عبد الرحمن فهمي
هيكل يتحدث كما لم يتحدث من قبل
من الأستاذ إلهامي الميرغني
تحية وتعظيم سلام
هيكل أبو شرايط
لغوصة هيكل في شرف النحاس باشا وزينب هانم الوكيل
ومعلش ما شفتش الحلقة اللي لغوص فيها في شرف نسوان عيلة الملك فاروق فما علقتش عليها
هيكل بيلعب البخت في تاريخ مصر

هيكل لما يعك
والهدية والمهموز الكبير
عدد الوعي المصري التذكاري بمناسبة النكسة

Monday, 07 January 2008

تاني يا دستور ها نعيده تاني؟؟؟

تاني يا دستور ها نعيده تاني؟؟؟

إضغط هنا لتكبير الصورة
ده خبر منشور في جريدة الدستور النهارده
الإثنين 7 يناير 2008
الصحفيين الشطورين الأمامير سرقوا صورة من عندي
لحد هنا وها تقولوا وإيه يعني
ما ياما عملوها يا وائل
ما تفوت بقى
وبعدين ما إنت الغلطان إنك ما حطيتش علامة مائية
ما إنت بتحط على طول
والحقيقة أنا كنت ها أطنش لأن الموضوع بسيط جدا
ولو كلمت الدستور يعني ها يعملولي إيه
ولا ها يدوني كام مقابل الصورة
ده لو ما قالوليش ده احنا واخدينها من أرشيف الأهرام زي ما الواد دسوقي قال لي مرة بعد نهيبة كبيرة من صوري الحصرية نشرتها الدستور بدون أي مقابل للعبد الفقير لله وكأنه سبيل أم عباس اللي بيلجأله كل صحفي محتاس
لكن اللي خلاني أنشر هو طرافة وخفة دم الصحفيين اللي كتبوا الموضوع
بصوا كده كاتبين ايه تحت الصورة
حضور كثير أثناء جلسة محاكمة ضابط الشرطة أمس
والنعمة؟
ده بجد وجديد؟
ياخي أحه
طب الصورة أهه

الصورة منشورة عندي بتاريخ سته يوليو 2007
إضغط هنا للذهاب للعدد
ومتصورة في دار القضاء العالي في القاهرة
من جلسة محاكمة إسلام نبيه
بقت بقدرة قادر متصورة إمبارح ؟؟؟
في محكمة جنايات اسكندرية!!!
ومين صورها؟
وفين صورها؟
يعني عادي إن يبقى صحفي حرامي
آه والله عادي وبتحصل في أحسن العائلات
لكن إنه يبقى عبيط كمان
أهو دي اللي جديدة بقى

Wednesday, 02 January 2008

القضاء الإداري يكفل حرية المدونات ويساويها بالصحف

القضاء الإداري يكفل حرية المدونات ويساويها بالصحف

مقتطفات من حكم القضاء الإداري في القضية رقم 15575/ 61
وهي القضية التي رفعها القاضي عبد الفتاح مراد مطالبا بغلق 49 مدونة وموقع على الإنترنت
وهي تعد مباديء قضائية أرساها القضاء الإداري

ومن حيث انه عن الموضوع فان المادة 47 من دستور جمهورية مصر العربية تنص على أن حرية الرأي مكفولة ولكل إنسان التعبير عن رأية ونشره بالقول أو الكتابة أو التصوير أو غير ذلك من وسائل التعبير في حدود القانون والنقد الذاتي والنقد البناء ضمانا لسلامة البناء الوطني، وتنص المادة 48 من ذات القانون على أن حرية الصحافة والطباعة والنشر ووسائل الإعلام مكفولة والرقابة على الصحف محظورة وإنذارها أو وقفها أو إلغائها بالطريق الإداري محظور ويجوز استثناء في حالة إعلان الطوارئ أو في زمن الحرب ، أن يفرض على الصحف والمطبوعات ووسائل الإعلان رقابة محدده في الأمور التي تتصل بالسلامة العامة أو أغراض الأمن القومي وذلك كله وفقا للقانون

ومن حيث أن الماد19 من العهد الدولي الخاص بالحقوق المدنية والسياسية تنص على أن :-
لكل إنسان حق في اعتناق أراء دون مضايقه.
لكل إنسان حق في التعبير ويشمل هذا الحق حريته في التماس دروب المعلومات والأفكار وتلقيها ونقلها إلى الآخرين دونما اعتبار سواء على شكل مكتوب أو مطبوع أو في قالب فني أو بأي وسيلة أخرى يختارها
تستتبع ممارسة الحقوق المنصوص عليها في الفقرة 2 من هذه المادة واجبات ومسئوليات خاصة وعلى ذلك يجوز إخضاعها لبعض القيود ولكن شريطة أن تكون محددة بنص القانون أو تكون ضرورية:
لحقوق الآخرين أو سمعتهم
لحماية الأمن القومي أو النظام العام أو الصحة العامة أو الآداب العامة .
ومن حيث أن المستفاد مما تقدم أن الدستور المصري مساير في ذلك الاتفاقيات الدولية المقرر لحقوق الإنسان ، قد كفل حرية التعبير بمدلوله العام وفى مجالاته المختلفة السياسية والاقتصادية والاجتماعية وبجميع وسائل التعبير

وضمانا من الدستور لحرية التعبير والتمكين من عرضها ونشرها بأية وسيلة على نحو ما جاء بالمادة 47 سالفة الذكر قد تقرر بوصفها الحرية الأصل التي لا يتم الحوار المفتوح إلا في نطاقها و
على ذلك فان هذه الحرية لا تنفصل عن الديمقراطية وعلى ذلك فان ما توخاه الدستور من خلال ضمان حرية التعبير وهو أن يكون التماس الآراء والأفكار وتلقيها عن الغير ونقلها إليه غير مقيد بالحدود الإقليمية على اختلافها ولا تنحصر في مصادر بذاتها تعد من قنواتها بل أن تترامى أفاقها بل قصد أن تتعدد مواردها وأدواتها
كما أن الدستور بعد أن ارسي القاعدة العامة التي تقوم عليها حرية التعبير حرص على إكمالها بإحدى الحريات المتولدة عنها كإحدى صورها الأكثر أهمية والأكثر أثرا في المجتمع وهى حرية الصحافة وذلك باعتبارها من أفضل المنابع التي تكفل تدفق الإنباء والآراء والأفكار ونقلها إلى قطاع عريض من المواطنين مما يسهم في تطوير المجتمع وتدعيم الحريات فيه

ومن حيث انه بالبناء على ما تقدم ولما كان الثابت من الأوراق أن المدعى قد استند في طلبه إلى الجهة الإدارية بحجب المواقع المنوه عنها سلفا إلى قيامها بارتكاب جرائم تمس امن واستقرار الوطن : وقد سبق القول بأنه ليس للمدعى مصلحة شخصية ومباشرة في هذا الشق فضلا عن انه يستفاد من رفض جهة الإدارة الاستجابة لطلب المدعى أنها انحازت للأصل وهو حرية التعبير ورفضت الاستثناء وهو التقييد ،
إذ أن حجب موقع بالصحافة الاليكترونية هو من ذات جنس حظر صحيفة مكتوبة بجانب أن كل ذلك قيد علي حرية التعبير محظور دستوريا

وكانت هذه هي هدية القضاء المصري للمدونين في نهاية عام 2007
المزيد إضغط هنا

Tuesday, 01 January 2008

Wael Abbas is CNN's Poll Winner

Wael Abbas is CNN's Poll Winner
وائل عباس يفوز بلقب شخصية العام من سي إن إن

أعلنت شبكة سي إن إن وبرنامج - إنسايد ذا ميدل إيست - عن الخمسة الفائزين بلقب شخصية العام لعام 2007 لمنطقة الشرق الأوسط
وكان الفائز الأول هو وائل عباس
الحمد لله
وشكرا لكم جميعا

إضغط هنا للتفاصيل

Click here for details

Sunday, 30 December 2007

إهتمام إعلامي دولي بكليب الفتاة

Saturday, 29 December 2007

إبحث مع الوعي المصري عن هؤلاء

إبحث مع الوعي المصري عن هؤلاء

هذه صور الأشخاص الذين يظهرون في فيديو الفتاة
إذا كنت تعرف أحد أو كل هؤلاء الأشخاص برجاء الإتصال بنا
Wa2el_3abbas@yahoo.com
ورجاء كل من يقرأ هذا أن يمرره ويرسله لكل من يعرف

suspect 1
وهو المشتبه به الأول ومن يضرب الفتاة ويطلب منها خلع ملابسها



الفتاة الضحية كما تظهر في الفيديو













الشخص الغامض الذي يظهر ملوحا في الفيديو

شخص آخر غامض يظهر في نهاية الفيديو قبل التوقف عن التصوير
وملامحه هنا واضحة

لقطة نهاية الفيديو ويظهر فيها المشتبه به رقم 3
وخلفه مرآة تعكس ما في غرفة النوم
ويظهر جزء من كتف المشتبه به رقم 2
وهو من لوح للموبايل
الى جانب مشتبه بهم جدد يظهرون لأول مرة في الفيديو
4 و 5

في هذه اللقطة أيضا يظهر المشتبه به الأول في المرآة بالإضافة إلى باقي المشتبه بهم
-
أكرر مرة أخرى
إذا كنت تعرف أحد أو كل هؤلاء الأشخاص برجاء الإتصال بنا
Wa2el_3abbas@yahoo.com
ورجاء كل من يقرأ هذا أن يمرره ويرسله لكل من يعرف

فضيحة تليفونات قناة المحور

فضيحة تليفونات قناة المحور

كان عندي شكوك في مدى صدق المكالمات التليفونية التي وصلت قناة المحور في حلقة تسعين دقيقة التي تحدثت أنا فيها عن الكليب الأخير
وزادت شكوكي بعد علمي بأن البرنامج لم يعرض أرقام تليفونات على الشاشة ليتمكن المواطنون من الإتصال
وعندما أخبرني كل أصدقائي بأنهم لم يتمكنوا من الإتصال بقناة المحور لأن الخطوط مشغولة أو لا أحد يجيب أو يتركوك على السماعة لحد ما تزهق
لكن ما حول الشك إلى يقين أن أخبرني بعض المواطنين أنهم عندما نجحوا في الإتصال سألتهم الموظفة المسئولة على التليفون:
ها تقول إيه؟
إنت مع الكليب ولا ضده؟
وإذا إنت مع صحة الكليب يقولولك هات رقم تليفونك ها نتصل بيك!
وعندي شهود على ذلك!

Friday, 28 December 2007

عشرة ملايين مشاهدة لفيديوهاتنا

عشرة ملايين مشاهدة لفيديوهاتنا

وصل عدد مشاهدات الفيديوهات المنشورة على قناة الوعي المصري على موقع يوتيوب إلى ما يقارب على العشرة ملايين مشاهدة حاليا
وتحديدا تسعة ملايين وسبعون الفا ومائة وسبعة وستون
9070167
فشكرا لمشاهدينا

Thursday, 27 December 2007

ICFJ Award Dinner 2007

كلمة العبد لله في حفل توزيع جوائز المركز الدولي للصحفيين
ICFJ Award Dinner 2007

مش سر ولا مؤامرة إني كنت في واشنطون من 11 لحد 14 نوفمبر
وفي نيويورك من 14 لحد 17 نوفمبر
بس مش علشان أقابل كوندليزا رايس زي ما فيه ناس ولاد حلال مطلعين إشاعة كده
لكن علشان أحضر حفل توزيع جوائز المركز الدولي للصحفيين بصفتي الحاصل على جائزة نايت الدولية للصحافة لعام 2007

جائزة نايت الدولية للصحافة التي حصلت عليها
The Knight International Journalism Award

شاهد كلمتي في الحفل فيديو
My Acceptance Speech Video
الحقيقة أنا قلت أطلع أقول الكلمتين اللي أنا كاتبهم وانزل اقعد مطرحي لكن فوجئت بعد كلمتي بتصفيق حاد والناس وقفت على حيلها تحييني وأنا نازل من علىالمسرح وتمد إيدها تسلم عليا زي ما يمكن تلاحظوا في نهاية الفيديو ودول أصلا فطاحل الإعلام في أمريكا والعالم ومنهم صحفي من اللي كشفوا فضيحة ووترجيت
بجد كان يوم يمكن ما يتكررش في العمر كله غير مرة واحدة

شاهد فيديو الترشيح للجائزة
Award Tribute Video

الحفلة كانت يوم 13 نوفمبر
يعني قبل عيد ميلادي ال 33 بيوم
وده يمكن كان أحسن إحتفال بعيد ميلادي وأقيم هدية حصلت عليها

كان بيقدم الحفلة جورج ستيفانوبولوس المذيع المشهور
ورئيس قسم الأخبار بشبكة ABC التلفزيونية
ومقدم برنامج This Week الشهير

الصحفي الشهير جيمس ف هوج رئيس مجلس إدارة المركز الدولي للصحفيين

جويس بارناثان مديرة المركز الدولي للصحفيين

نائب رئيس مؤسسة نايت إريك نيوتن يقدمني
إريك نيوتن أيضا مؤسس متحف الأخبار بالولايات المتحدة

محسوبكم وهو بيستلم الجايزة من إريك نيوتن
وبالمناسبة كنت أول مدون في العالم يفوز بهذه الجائزة

أوبس
كنت هانسى الجايزة وأنا نازل

المذيع القدير بوب شيفر بشبكة CBS التلفزيونية
ومقدم البرنامج الشهير Face The Nation
يقدم جائزة المؤسسين لتوم بروكو

المذيع القدير توم بروكو بشبكة NBC
تسلم جائزة المؤسسين من المركز الدولي للصحفيين

كلمة بوب وودروف المذيع الشهير بشبكة ABC

دردشة بين جورج ستيفانوبولوس وبوب وودروف

لقطات متنوعة من الحفل













يوم 11 نوفمبر إستلموني السي إن إن وأنا لسه جاي من المطار وبعتولي عربية ليموزين لينكون علشان أروح أطلع في الإستديو بتاعهم علىالهوا من واشنطون
يوم 12 نوفمبر عقدوا ندوة في نادي الصحافة الوطني بواشنطون كنت أنا أحد الضيوف فيها
وكانت بعنوان إختراق الحواجز
يوم 15 نوفمبر عقدوا ندوة بجامعة سيتي نيويورك كنت برضه أحد ضيوفها
كانت بعنوان طفرة الصحافة العالمية
وأنا هناك عزمني مدير جامعة جوادالاهارا بالمكسيك لحضور إفتتاح قسم الصحافة الإلكترونية بالجامعة علشان أتكلم عن تجربة التدوين في مصر
وفعلا رحت المكسيك من 30 نوفمبر لحد 4 ديسمبر
وكمان إتكلمت في معرض الكتاب الأسباني بجوادلاهارا وهو أكبر معرض كتاب أسباني في العالم
وطلعت في أشهر برنامج صباحي في التلفزيون المكسيكي
حاجة زي صباح الخير يا مكسيك وكده
-
أنا دايما لما أتكلم في أي محفل دولي بأحاول ما أتكلمش عن نفسي ولكن بأتكلم عن المدونين المصريين عموما ومجهوداتهم
حتى في أخر كلمتي وأنا باستلم الجايزة أهديتها لكل المدونين المصريين
لكن فيه ناس - مدونين - يظهر مش عاجبهم إني أتكلم على حد زعمهم بإسم المدونين المصريين
وأنا إحترت
لو إتكلمت بإسم نفسي يقولوا إتغريت وبتعمل دعاية لنفسك
ولو إتكلمت عن كل المدونين يقولوا إنت ليه بتتكلم بإسمنا
أنا غلب حماري
ربنا يكفينا شر المنفسنين
قولوا آمين

Tuesday, 25 December 2007

حلقة تسعين دقيقة - كمين شرطة على المحور

حلقة تسعين دقيقة - كمين شرطة على المحور

الجزء الأول
إضغط هنا


الجزء الثاني
إضغط هنا


الجزء الثالث
إضغط هنا


الجزء الرابع
إضغط هنا

رجاء مشاهدة الحلقة كاملة قبل التسرع في الحكم على الإعلامي الكبير والقدير معتز الدمرداش اللي بيدرس الإعلام في الجامعة الأمريكية
وبلاش والنبي أسئلتكم الخبيثة من نوعية هو ليه ما ظهرش أرقام تليفون على الشاشة علشان الناس اللي بجد تتصل
وليه المتصلين كلهم كان رأيهم واحد سبحان الله
وبعدين الراجل اللي في الكليب ممكن يطلع أي حاجة مش ضروري ظابط
والمسدس اللي في ضهره ده ممكن يكون مسدس خرز من بتاع العيد
والفيديو اللي جاي ها يبقى مهندس حاطط في بنطلونه مسطرة حرف تي
واللي بعده دكتور معلق سماعة
نوعدكم دائما بكل جديد في فيديوهاتنا الملفقة
ومش مهم حد يقلع ولا حد يلبس ولا حد يتعذب
المهم قناة المحور تعمل فواصل إعلانية تلاتين دقيقة في فقرة أربعين دقيقة
وعاش الإعلام المصري المستكل
وكان الله في عون الجامعة الأمريكية
-
كليبات ملفقة لم يتم التحقيق فيها
أدي كليبات فيها مهندسين ودكاتره ومدرسين لابسين يونيفورم الشرطة
يعني جنحة فيها ست أشهر أهه
ياريت نشوف الهمة بقى

إضغط هنا

إضغط هنا
إضغط هنا إضغط هنا

وهيا بنا نلعب

Monday, 24 December 2007

Nominated for CNN's People of the Year

Nominated for CNN's People of the Year
سي إن إن ترشحني للقب شخصية العام

إضغط هنا للذهاب إلى التفاصيل
Click here

لو شايفين إني أستحق ممكن تصوتولي أو تصوتوا عليا يعني زي ما تحبوا
If you think that I deserve it vote for me

Thursday, 20 December 2007

Police officer forces girl to strip naked?

ضابط يجبر فتاه على خلع ملابسها؟
Police officer forces girl to strip naked?

صورة من الفيديو للشخص يصفع الفتاة لأنها رفضت خلع ملابسها
كل سنة وإنتم طيبين جميعا أولا ودون تفريق
معلش أنا عارف إنه عيد الأضحى وعيد الميلاد المجيد ورأس السنة الجديدة
لكن التعذيب ما بيستناش ولا بيعرف أعياد زي ما كلكم راسيين
فمعلش ها أنكد عليكم برغم كل هذه المناسبات
واديني بأنشرها تاني يوم العيد مش أول يوم أهه
ده فيديو وصلني على الإيميل من واحد مش عاوز إسمه يتقال
وعلى حد قوله هذا ضابط شرطة يجبر فتاة على خلع ملابسها
طبعا انا ما قدرتش انشر الفيديو كما هو لأن فيه واحدة عريانة
فمضطر أنشر الصوت فقط مع صورة ثابتة
لا أعرف ولا يعرف مرسل الفيديو والذي يبدو أنه منتشر على موبايلات المواطنين وعلى مواقع الإنترنت منذ فترة ملابسات الواقعة
لذا أترك لكم إستنتاج الواقعة
لكن في كل الأحوال ما تم تصويره في الفيديو هو جريمة بكل الأشكال
والدور هنا متروك للمحامين ومنظمات حقوق الإنسان للقيام باللازم
This is a video of allegedly an Egyptian police officer slapping a girl - maybe a prostitute - and forcing her to strip naked apparently to prove that he caught her red handed
The video contains nudity so I only posted the audio from the video with a still image

إضغط هنا للإستماع للفيديو
Click here to listen to the audio from the video

-
تحديث
الفيديو يحتوي جريمة تستدعي التحقيق


قررت نشر هذه اللقطة المموهة من الفيديو لأثبت أن هذا الفيديو يحتوي على جريمة لا تغتفر ولا يجب أن تمر مرور الكرام
-
تحديث
نص إيميل مرسل الفيديو
حيث أنه بدأت تصلني الكثير من المكالمات الهاتفية من صحفيين ونشطاء حقوق إنسان يطلبون تفاصيل أكثر عن الكليب والأشخاص في الكليب ومرسل الكليب وحيث أني لا أملك تفاصيل أكثر مما نشرته فإنني أنشر نص إيميل مرسل الفيديو عله يفيد في إلقاء الضوء على ما هو غامض
أخي المناضل الشريف وائل عباس
السلام عليكم ورحمة الله وبركاته

تحية إجلال وتقدير لك ولأمثالك من الشرفاء الذين يخاطرون بقول كلمة الحق في وجه سلطان جائر ، وهم فريق من الفرق الخمس التي بشرها رسولنا الكريم صلى الله عليه وسلم بظل الله يوم لاظل إلا ظله ، ونحسبك - أنت ورفاقك المناضلين الشرفاء - منهم ، ولانزكي على الله أحداً
وفي محاولة مني لكسر قيود السلبية أرفق لكم مع هذه الرسالة كليباً آخر بات ينتشر على الجولات ، وبالتأكيد أنك قد تكون رأيته أو سمعت به ، وأريد فقط أن أثير التساؤلات التالية
قد يقول قائل أن الفيلم ليس داخل قسم الشرطة ، وهذا صحيح فالفيلم مصور داخل شقة 
وقد يقول قائل آخر أن الشقة ربما تكون شقة مشبوهة ، وهذا وارد ، وقد يقول قائل آخر أن البنت التي تظهر في الكليب ربما تكون سيئة السمعة وقد تم ضبطها في حملة من ضباط وأفراد الشرطة ، وهذا لانستطيع نفيه أوتأكيده
ولكن السؤال هو : إذا كانت كل هذه الاحتمالات صحيحة فهل من حق الضابط الذي اقتحم الشقة - حتى ولو بإذن النيابة - هل من حقه إذا وجد الفتاة المستهدفة بكامل ملابسها - سواء قبل أو بعد ممارستها لعمل شائن ما - أقول حتى لو كانت مذنبة فهل من حقه ترهيبها وإهانتها وانتهاك كرامتها وإجبارها على خلع نصف ملابسها بل كل ملابسها حسبما يظهر من سياق الكليب والذي توقف تصويره قبل أن تخلع  نصف ملابسها الآخر ؟ وبالتأكيد فقد تم إجبارها على الخروج إلى الشارع بهذا الوضع لتكون الصيد المظفر في هذه الحملة للضابط الهمام
أترك لك ولقرائك الأحرار والصحفيين الشرفاء التحري لمعرفة أبطال وملابسات هذا الكليب ، وأعتذر لك ولقرائك وللفتاة المسكينة عن ترويج هذه الصور العارية ، ولكني قصدت أن أضيف ولو لبنة صغيرة لبناء كرامة هذا الشعب الذي هانت كرامته على الجميع اللهم إلا بعض الشرفاء من أمثالكم

أخوكم *****

-
تابع موضوع السمورة
More torture videos of same suspect
الحقيقة انا لا يهمني السمورة ولا يهمني ان اعرف انه مجرم او بتاع مخدرات او قتال قتلا أو مغتصب
فهناك قانون يعاقبه
انا يهمني من يقومون على تنفيذ القانون وسلوكهم مع المواطنين متهمين وغير متهمين ومدانين او غير مدانين
التعذيب غير مبرر مع أي شخص
لأن من يعذب مجرما يعذب مائة بريء في المقابل أيضا
وكلنا نتذكر الرجل الذي اعترف بقتل إبنته في الاسكندرية
ليكتشفوا بعدها أنها حية
والممثلة حبيبة التي قضت سنوات في السجن بتهمة قتل زوجها
لانها إعترفت تحت التعذيب
ثم اكتشفوا ان القتلة لصوص سرقوا شقته قبضوا عليهم أثناء بيعهم مشغولات ذهبية
كل ده بيحصل لان ظابط ما إبن ****** كسلان مش عاوز يقوم بشغله وتحرياته زي الناس وزي ما إتعلم في الاكاديمية - ده لو كانوا بيعلموهم حاجة مفيدة حاليا غير التعذيب وقلة الادب والتعالي على باقي المواطنين - وكرشه قدامه نص متر وط*** واره نص متر وبيستسهل يلزق التهمة في اي حد معدي في الشارع ويقفل القضية وملفها ويقبض فلوس حرام في الاخر ويترقى
القانون نصوصه واضحة
لا توجد نصوص في قانون العقوبات مثلا لوضع العصاية في المؤخرة
ولا التعليق بين كرسيين
ولا المنع من الشخاخ
ولا الضرب على القفا
ولا حتى الشتيمة بالأم والأب
المهم وصلني هذان الفيديوهان الجديدان لسمورة في بورسعيد

dragging a suspect on the floor
جر سمورة على الأرض
إضغط هنا
click here to watch video


kicking a suspect in the face
ركل سمورة بالحذاء في وجهه
إضغط هنا
click here to watch video

وياريت نادي محبي الظبابيط ورياضات التعذيب والتعليق وألعاب التلاجة والعروسة وعصيان المقشات يورونا تعليقاتهم اللي أتحفونا بيها البوست اللي فات
-
نكتة بمناسبة التعذيب وبمناسبة العيد والكريسماس
بما إني نكدت عليكم يعني
فى عهد عبد الناصر تم إكتشاف أحد التماثيل الفرعونية , و لكن لم يتمكن أحد من معرفة إسم صاحبة من ملوك الفراعنة , فكلف عبد الناصر جهاز المخابرات بمعرفة إسم صاحب التمثال , و بعد ساعة واحدة دخل مدير المخابرات مكتب عبد الناصر و قال " عرفنا دة مين يا أفندم , دة رمسيس الخامس " , فسألة عبد الناصر : " و عرفتم إزاى ؟ " , فقال مدير المخابرات : " التمثال إعترف يا أفندم "
عن أمين الرفاعى - جريدة عالم المشاهير - العدد 13
منقولة من مدونة إبن رع

Thursday, 13 December 2007

New Torture Video - Shit on Yourself

شخ على نفسك

New Torture Video
Egyptian police torture a suspect by preventing him from going to the bathroom
ظنوا أنهم سيصيبوننا بالشلل
بمحاولة إيقاف حسابات يوتيوب وياهو بالشكاوى الكيدية
وهو التكنيك الجديد الذي تفتقت عنه قريحتهم
ظنوا أننا وقعنا وقعة لا قومة لنا منها
وظن الشامتون أن الملعب قد خلا لهم وشياطينهم
لكن عمر الشقي بقي
وإنتصرنا وبشروطنا كمان
ونواصل نشاطنا في فضح المجرمين مع فيديو جديد أرسله لنا مواطن مصري غيور على كرامة شعبه ورفض أن يذكر إسمه
والمعلومات التي وفرها لنا مرسل الكليب هي كما يلي
المتهم الشهير بسمورة في غرفة رئيس المباحث في بورسعيد
والضابط الذي يقوم بالتصوير إسمه شريف بيه
المواطن متهم على ذمة قضية مخدرات
والضباط يمنعونه من الذهاب إلى دورة المياة ويتلذذون بعذابه أثناء شربهم الشاي ويطلبون من ان - يشخ على نفسه
إضغط هنا لمشاهدة الفيديو
Click here to watch the video

Tuesday, 11 December 2007

Urgent - YouTube Restores my Videos

Urgent - YouTube Restores my Videos
YouTube restored 177 of my 181 videos
details in a few hours
sorry
just landed in Cairo from Beirut
so exhausted

Wednesday, 05 December 2007

The Hoax of Restoring my Account by YouTube

The Hoax of Restoring my Account by YouTube
خدعة إعادة حسابي في يوتيوب

في جوادالاهارا بالمكسيك
أعود إليكم بعد 30 يوم حول العالم قضيتها بين بيروت وواشنطون ونيويورك والرباط وكازابلانكا وجوادالاهارا بالمكسيك
هابقى أحكيلكم بعدين كنت بأعمل إيه
لم يكن لدي الوقت الكافي ولا وصلة الإنترنت المتاحة لأدون
لكن حيث إن يوتيوب أصدرت بيان صحفي ووزعته على وكالات الأنباء بيقولوا فيه قال إيه إنهم رجعولي الأكاونت بتاعي وكان هذا نصه
Our general policy against graphic violence led to the removal of videos documenting alleged human rights abuses because the context was not apparent
Having reviewed the case, we have restored the account of Egyptian blogger Wael Abbas. And if he chooses to upload the video again with sufficient context so that users can understand his important message, we will of course leave it on the site

البيان الصحفي على Reuters
البيان الصحفي على FoxNews

فياريت تتفضلوا بزيارة الأكاونت بتاعي كده علشان تشوفوا إيه اللي رجع
ولا حاجة !!!
كل الفيديوهات إتشالت سواء ليها علاقة بالتعذيب أو لا
ومعاها طبعا كل الإحصائيات بأعداد الزوار
وكل التعليقات
وكل الردود بالفيديو
وكل التقديرات
يا فرحة مامتي يعني !!!
عملوا إيه هما يعني غير حفظ ماء وجههم اللي إتبتعتر على وسائل الإعلام الغربية وعلى المدونات الغربية أكتر من المصرية
آه والله للأسف أكتر ناس إهتمت كانت المدونات الغربية
ناس لا من ديني ولا من دينكم ولا من بلدي ولا من بلدكم ولا يعرفوني ولا أعرفهم
I thank all the western bloggers who stood by me
وعدد قليل جدا من المدونات المصرية من أصحابي المقربين بس وبعضهم عرض نعمل حملة ضد يوتيوب وأنا حقيقي بأشكرهم جدا وحطيت عليهم علامة صح في قلبي خلاص
كل مجهودي في رفع 181 فيديو كليب على مدار ثلاث سنوات راح هدر
أيوة 181 فيديو مش 100 فقط زي ما أنا كنت فاكر
وقال إيه مسموح لي ارفعهم تاني بشرط إني أكتب معاهم شرح بيوضح فيهم إيه علشان محدش يفتكر حاجة غلط لا سمح الله
طب هو أنا لما أكتب
Egyptian police brutality
ده مش كفاية؟
يعني ممكن حد يفتكر فيديو عماد الكبير ده مثلا
Gay Orgy
ولا فيديو البنت المتعلقة بين كرسيين ده BDSM
ما أنا كاتب إنه
Egyptian police torturing a female murder suspect
وبعدين معظم الفيديوهات طالع فيها الظباط باليونيفورم
هل ده ممكن يعتبر عند يوتيوب
Police uniform fetish
الخلاصة يعني ومن الآخر
It was a hoax
YouTube restored an empty account
removed my 181 videos
along with all comment, ratings, video responses and statistics of numbers of visitors
the hard work of almost three years
they wanted only to save face at my expense
what more context would they ever want than what was already there
الحملة ضد يوتيوب لم تتوقف
فشكرا لكل من يساعد
وربنا يشفي الشامتين

-
Yahoo also restores my email account
بمناسبة فضيحة يوتيوب
ياهو كمان رجعولي الأكاونت في صمت مش ناقص ولا إيميل
وبعتولي الرسالة التالية
The situation you describe has been resolved.  I apologize for any
inconvenience this issue may have caused you.  Please be assured that
we'll do our best to prevent such problems in the future

Thursday, 29 November 2007

And Yahoo Too Disables My E-mail Account

بعد يوتيوب - ياهو توقف إيميلي للمرة الثالثة
And Yahoo Too Disables My E-mail Account

لا أستطيع ان أصف ما أشعر به حاليا
لا توجد كلمات
فقط سأعطيكم المعطيات ولكم أن تتخيلوا ما أشعر به
وهل من حقي أن يجن جنوني
وهل من حقي أن أشعر بالبارانويا وأني مستهدف وأن هناك مؤامرة ضدي في الخفاء

بعد أن أوقف يوتيوب حسابي الخاص بالفيديو
الآن ياهو توقف حساب بريدي الإلكتروني
حاولت الدخول بإسم المستخدم والباسوورد الخاص بي فلم أفلح
أرسلت رسالة إلى بريدي من بريد آخر فجاءني الرد التالي:

Sorry, we were unable to deliver your message to the following address.
<wa2el_3abbas@yahoo.com>:
Remote host said: 554 delivery error: dd Sorry your message to
wa2el_3abbas@yahoo.com cannot be delivered. This account has been
disabled or discontinued
[#102]. - mta518.mail.mud.yahoo.com [BODY]

هل هي حرب إلكترونية
ومن يشنها ضدي
هذا العنوان تم إيقافه من قبل أوائل العام الماضي
وأيضا العنوان الذي أراسلكم منه
wa2el3abbas@yahoo.com
وتم إسترجاعهما بعد أن تأكدت ياهو من ان الشكاوى كيدية
فهل يعود إلي بريدي هذه المرة؟

بريدي يحتوي على مراسلات هامة وانتظر عليه مراسلات هامة أيضا لا يمكن أن تضيع مني
يمكنكم الآن مراسلتي على هذا العنوان
wa2el3abbas@yahoo.com
حتى يوقفوه أيضا
!!!

مدون على حافة الجنون

Thursday, 22 November 2007

Youtube suspends my account

عاجل وخطير - يوتيوب توقف عرض كليبات التعذيب
Youtube suspends my account

This is by far the biggest blow to the anti-torture movement in Egypt
أوقف موقع يوتيوب حسابي الخاص والذي يحتوى على جميع لقطات الفيديو التي حملتها من تغطيات للمظاهرات وأحداث أخرى ومنها خصوصا فيديوهات التعذيب في أقسام الشرطة
وقد ادعى موقع يوتيوب بان وصلته كثير من الشكاوى بشان هذا المحتوى
وانا الآن في حالة صدمة مما حدث وأحاول معرفة أسبابه
وقد راسلت الموقع في إنتظار التوضيح
لكن كل الإحتمالات قائمة
شكاوى كيدية من النظام المصري خصوصا بعد صفعة حبس إسلام نبيه
تعاون بين يوتيوب والنظام المصري في ظل صفقة ما خصوصا وأن يوتيوب مملوكة لشركة جوجل
فهل هو خطأ يمكن إصلاحه
أم أن يوتيوب أصبحت تدعم التعذيب وتتستر على فاعليه وتتعاون مع الحكومات الديكتاتورية
وفي النهاية أقول أن هذه كارثة كبري
ليس لي فقط ولكن لكم جميعا مدونين وقراء ونشطاء
وأطلب منكم جميعا الوقوف معي
For Details in English Click Here

Wednesday, 07 November 2007

ياريتني كنت معاهم في نطق الحكم على إسلام نبيه

ياريتني كنت معاهم في نطق الحكم على إسلام نبيه

للأسف أنا في بيروت ومصر مقلوبة
مش مصدق
إسلام نبيه خد تلات سنين مع الشغل والنفاذ
الحكم الصراحة مخفف وقليل وتقريبا هو بالفعل قضى تلات ارباع المدة لانهم ها يحسبوله من أول ما بسلامته إتحبس
بس ده مش هو اللي دار في ذهني اول ما وصلني الخبر من المدونين برسالة على تليفوني المحمول
حكم انا مش بارد على الموبايل وانا خارج البلاد لان الدقيقة باربعة جنيه
من ساعة ما وصلت بيروت مش عارف اخش على النت لان الانترنت هنا في الاوتيل غالي فشخ والساعة بتمانية دولار يعني معدية الاربعين جنيه
وانا ساكن في اوتيل رغم انه في وسط بيروت على البحر والمارينا الجديدة اللي بيبنوها انما الحته مقطوعة وبيروت على كف عفريت مليانة امن وجيش ومغاوير ونقط تفتيش وبلوكات اسمنت والتلفزيونات كلها عمالة تشتم في بعض والشرطة بتوقف الناس تسألهم على بطايقهم الشخصية
قاعد أنا في فندق مونرو شارع كينيدي
أه والله شوفوا الصدف مونرو وكينيدي
والفندق اللي قدامي فندق انتركونتينينتال فينيشيا قاعد فيه نواب اربعتاشر آذار لأنهم خايفين من الإغتيالات ومتأمن تأمين جامد قوي
وزي ما كنت في الأردن قاعد في راديسون ساس اللي حصل فيه الانفجار
من حظي ان فندق مونرو بيطل على الحتة اللي حصل فيها اغتيال رفيق الحريري
هابقى انشر الصور بقى لما الاقي انترنت رخيص شوية
المهم انا عمال ارغي ونسيت انا كنت باتكلم عن ايه
اول ما جاتلي رسالة الحكم على اسلام نبيه مش فاكر من مين لانها وصلتني من مليون واحد
ولبنى حاولت تتصل بيا على الموبايل بس انا قفلت عليها
معلش يا لبنى
المهم انا كنت تقريبا ها ارقص وعمال الف الاوتيل ادور على حد اقول له
قلت الأول لدينا حشمت الصحفية بالأهرام إبدو اللي معايا في المؤتمر
وبعدين لرانيا المالكي رئيسة تحرير الديلي نيوز
وقعدت أقول لناس تانية ما اعرفهمش زي العبيط
وقعدت ادور على وائل عبد الفتاح لانه معايا برضه بيحضر نفس المؤتمر لكن ما لقيتهوش
بس بجد كنت في حالة نشوة عارمة
عقبال كده ما نفرح في سيادة اللوا أحمد ضياء اللي بيلوث سمعة الشرفاء
أي نعم أنا ما كنتش في الجلسة
بس الصديقة الصحفية الأسبانية لالي سانديمونجي بعتتلي شوية صور معبرة لعماد الكبير بعد النطق بالحكم
قلت أشارككم معايا فيهم











أنا في بيروت باحضر مؤتمرين
الأولاني منظماه جريدة الأخبار اللبنانية وهو عن الموضوعية في الإعلام
والتاني هو بيروت ميديا فورام
اللي منظماه مؤسسة فريدريش آيبرت والمعهد الفرنسي للشرق الأدنى والمعهد الألماني للأبحاث الشرقية
فمش ها أقدر أرد على تليفونات للأسف لكن ممكن أستقبل رسائل المحمول
مش عارف حسيت إن غرفتي إتفتشت وأنا مش موجود ليه
مش بارانويا ولا علشان أنا واد مهم وجامد ولا حاجة
بس يمكن علشان شباكي بيبص على فندق فينيشيا اللي قاعد فيه النواب
وكنت باقف في الشباك أصور بالكاميرا
ربنا يستر
لبنان فيها غليان من تحت وشكلها داخلة على حاجة

Saturday, 03 November 2007

تقرير سي إن إن عن الوعي المصري

تقرير سي إن إن عن الوعي المصري
CNN Report on Misr Digit@l

إضغط هنا لمشاهدته
Click Here

Thursday, 01 November 2007

Jimmy is Cairo's Sexiest

Jimmy is Cairo's Sexiest

الصورة دي منشورة عند دماغ ماك من فترة
بس مكنتش أعرف من أنهو مجلة
وبما إني عرفت هي من أنهو مجلة فقلت أنشر وأسيب لكم التعليق وبلاش اعلق أنا علشان أنا قليل الأدب خلقة لكن متأكد إنكم لما تشوفوا الصورة دي كلكم كده بقدرة قادر ها تبقوا قلالات الأدب أكتر مني وها تخرج منكم الفاظ مكنتوش تتخيلوا إنكم تقولوها في حياتكم
المقال ده منشور في مجلة إسمها إنسايت
Insight
وهي مجلة بتصدر في مصر باللغة الإنجليزية
وعنوان المقالة بيقول إن الننوس هو أكثر راجل سكسي وناجح في القاهرة
والتعليق لكم أحسن يقولوا إن أنا غيران ولا حاجة

Saturday, 27 October 2007

إقتراحاتكم حول خدمة رسائل المحمول

إقتراحاتكم حول خدمة رسائل المحمول

هذا البوست هو لتلقي إقتراحاتكم وشكاواكم وتجاربكم مع خدمة رسائل المحمول للأخبار التي تقدمها الوعي المصري عبر موقع تويتر خاصة وقد بلغ عدد المشتركين حاليا 1200 مشترك وصرنا من اكثر الخدمات المتبوعة على موقع تويتر
ويمكنكم أيضا المناقشة وحل مشكلات بعضكم البعض لمن لديه خبرة في التعامل مع تويتر أكثر من الآخرين
في إنتظار تعليقاتكم
ولا تنسوا أنه يمكنكم قراءة خدمة المحمول دائما على العمود الأيمن في المدونة

رسائل وأخبار جديدة على مدار اليوم
أخبار عاجلة تنشر وتصلك على محمولك فور حدوثها
وأهلا بكم

Tuesday, 23 October 2007

الوعي المصري في بيوت عمال المحلة

الوعي المصري في بيوت عمال المحلة

فيديو 1
مقابلة مع أحد من شاركوا في الإضراب
إضغط هنا
لم أتمكن من تغطية إضراب عمال غزل المحلة في وقتها كما ينبغي لظروف خارجة عن إرادتي وخارجة عن الميزانية
لكن تشاء الظروف والصدف أن أسافر إلى المحلة وأتمكن من اللقاء ببعض العمال وقيادات الإضراب بعد إنتهاؤه
وربما إنتهاء الإضراب يجعل الصحافة والنشطاء يظنون أن كل شيء على ما يرام وأن عمال المحلة قد حلت مشكلاتهم وإنتهى الأمر على ما يرام
ولكن كما ستشاهدون في تلك الفيديوهات فإن الأمر مختلف عما نظن هنا في القاهرة
قابلت الكثير من العمال معظمهم رفض التصوير خوفا من - الكلابوش - على حد تعبيرهم
لكن الحقيقة أن العمال بمجرد معرفتهم بوجود صحفيين بخارج المصنع تجمهروا حولنا وكل منهم يريد الحديث وان يحكي مشاكله فبعضهم عدد أهمية المصنع وبعضهم تحدث عن الأجور والمعايش والدروس الخصوصية وبعضهم تحدث عن السكن والتأمين الصحي وتواطؤ النقابة
ثم إنضمت عناصر من أمن المصنع لمراقبة ما يقوله العمال
ثم شخص قال انه رئيس وردية هو الوحيد الذي شكك في أقوال العمال وهاجمهم

فيديو 2
جولة في شقة العامل
إضغط هنا
أحد الأشخاص الذي نجحت في التصوير معهم والتصوير في منزله ربما يكون من أحسن العمال حالا
ولكن كما سترون إذا كان هذا هو وضع أحسن العمال
يمكنكم تخيل الباقي
خصوصا أن المحلة الكبرى هي مدينة مزدحمة وكبيرة مثل القاهرة مع الفارق في تدني الخدمات ومثلها مثل القاهرة المدينة تتضخم وتزحف وتكبر ولا تكفي سكانها فيكونون عشوائيات على الأطراف حتى وصلوا إلى الطريق الدائري حول المحلة وكثير من العمال لا يمكنه السكن داخل المحلة لغلو الإيجارات فيسكنون في القرى المحيطة ويذهبون للعمل كل يوم
ووسيلة مواصلاتهم غالبا هي دراجة هوائية
وبالمناسبة هذا العامل له في الخدمة خمسة عشر عاما لم يحقق فيها شيئا لنفسه واسرته ولا يستطيع حتى تشطيب شقته

فيديو 3
العامل يتحدث عن فساد التأمين الصحي وضرورة التظبيط مع طبيب خارج المستشفى
كما أخبرني أنهم يعطون علاج واحد لكل الأمراض
إضغط هنا

وفي النهاية أحب أشكر كريم البحيري على مجهوداته أثناء الإضراب وأثناء زيارتي للمحلة
ملحوظة أخرى على مدينة المحلة وهي أنه بسبب الفقر وتدني الأحوال المعيشية هناك أصبح للسلفيين نفوذ كبير في المدينة العمالية والتي من المفترض ان يكون فيها النفوذ لليسار
أما ما هو مؤكد فهو نية العمال للقيام بإضراب جديد إذا لم تنفذ مطالبهم في المدة المحددة

Thursday, 18 October 2007

يا خرابي يا عرابي

يا خرابي يا عرابي

رغم إن انا معروف عني تقل الدم ومش مشهور بالقفشات والتنكيت مع الناس ومش واد إجتماعي خالص لكن هذا الموقف حصل بالنص لا أكثر ولا أقل بدون مبالغة والله على ما اقول شهيد بيني وبين راكب في مترو الأنفاق قبل الإفطار في أحد أيام رمضان وكان هذا الراكب يبدو عليه رقة الحال ويرتدي جلباب رث مخيط يدويا من كثرة ما تمزق
هو - مش المحطة اللي جاية دي مبارك
انا - لا اللي جاية دي غمرة وبعدها رمسيس يا حاج
هو - لا ماهو رمسيس شالوه خلاص وبقت بتاعة مبارك
انا - على رأيك
هو - طب كويس غمرة محطة صغيرة مش بيقف فيها كتير
انا - صح بس مبارك بيقف فيها خمسة وعشرين سنة
فترة صمت ...
انا - انت نازل رمسيس ولا ايه يا حاج
هو- لا انا نازل السيدة زينب بعد يا خرابي يا عرابي
انا - لا يا حاج السيدة زينب بعد سعد زغلول لما يقول مافيش فايدة
هو - أومال يا خرابي يا عرابي دي بيقولوها إمتى
انا - يا خرابي يا عرابي دي بعد مبارك
تابعنا بقية الركاب في عربة المترو ونظرات الفزع والذعر تعلو وجوههم لأننا في نظرهم إتكلمنا كلام كبير قوي في السياسة وبعضهم أظهر الضيق ولسان حاله يقول عاوزين نروح بيوتنا يا عم إنت وهو عندنا عيال والدنيا رمضان
وبعدين إبتدت البسمات تعلو وجوههم ويضحكوا على كلامنا

Sunday, 07 October 2007

محتجبون ونصلح الساعات

محتجبون اليوم
ونصلح الساعات

محتجبون ضد قمع حرية النشر
محتجبون ضد قمع حرية التعبير
محتجبون ضد حبس المدونين
محتجبون ضد الهجوم على المدونات
محتجبون ضد حبس الصحفيين الصغار
محتجبون ضد أكل حقوق الصحفيين الصغار
محتجبون ضد كل ما يتعرض له الصحفيين غير النقابيين
أما الصحفيين الكبار فلهم صحف تحتجبلهم
وإحتجابنا لله والوطن
مش دعاية لأجندة حد في إنتخابات نقابة الصحفيين