Ok

By continuing your visit to this site, you accept the use of cookies. These ensure the smooth running of our services. Learn more.

Friday, 23 May 2008

هو عدم اللامؤاخذة مش الأهرام ده بينطبع في مصر

هو عدم اللامؤاخذة مش الأهرام ده بينطبع في مصر

خوفو وخفرع ومنقرع بنوا الأهرامات التلاته
وسليم وبشارة تقلا أسسوا جريدة الأهرام الغراء
أما عامر بيه الله يعمر بيته فبنى أهرامات بورتو السخنة
علشان يعلن عنها على صفحة كاملة في آخر صفحة في جريدة الأهرام

ليه ياربي ما خلقتنيش عندي شاليه في مارينا وعربية هامر
أكيد أكيد أكيد يعني مكانش ها يحصلي حالة الإستفزاز اللي أنا فيها بقالي تلات أسابيع دي
أصل أنا عقبال أملتكم قررت أشتري الأهرام الإسبوعي بتاع الجمعة كام أسبوع كده علشان كنت مقرر أكتب حاجة عن الإعلانات المستفزة فيه
والحمد لله لم يخب ظني بل أستفزيت أكتر ما أنا كنت معد نفسي إني أستفز
الحقيقة بقى عندي شك إن جرنال الأهرام بينطبع في منتجع نيس أو مونت كارلو أو جزر الباهاماس
بقى صعب قوي أصدق إن جرنال الأهرام بينطبع في مصر كجرنال قومي للشعب المصري بيقروه المصريين وبعدين يلفوا فيه السندوتشات
الجرنال بقى إيه حاجة ما أقولكمش تصاوير تشرح القلب وينفع تتعلق على الحيط
ولو إن الحبر الخرا بتاعهم هو هو اللي بيوسخ الإيدين ده
لكن منتجعات إيه وريزورتات إيه وشاليهات إيه وعربيات إيه
الله أكبر الله أكبر
اللهم لا حسد
فين الكلاب بتوع المعارضة يشوفوا العز والنغنغة اللي البلد فيها
أيوة العز
وصدقوني مش بارمي كلام على أحمد عز اللي مسيخنا أجدع تسييخ
طب والله ما عندي حقد طبقي
أنا إبن ناس طبقة متوسطة ولا فضل لي في ذلك
ولحد 2004 كان تحت طيزي عربية بيجو محترمة بتاعة أبويا كنت مسيطر عليها لحد ما شم خبر إن أخلاقي تلفت وبقيت باروح المظاهرات فسحبها مني
ومش محروم ولا حاجة وباروح مارينا أي نعم بابقى معزوم عند حد بس أهو برضه إسمي باروح
إنما اللي بيتنشر في الأهرام ده يا سداحمد أفندي أوفر أوفر أوفر
أسيبكم تتبضنوا
وصدقوني حتى لو مصر مافيهاش أزمة عيش ولا أزمة بطالة ولا عنوسة ولا إسكان ولا غلا ولا كوا
ولا ناس بتتظاهر بالحلل والطشوت والجراكن علشان المية مقطوعة بينما إحنا عمالين نتوسع في ملاعب الجولف أم نجيلة بالألوفات رغم إن أهالينا وأهالي المسئولين والمستثمرين واللي بيشتروا من المستثمرين كان كبيرهم يلعبوا الحكشة بجريد النخل
لكن برضه ها تتبضنوا

حلم يتحقق وسط الحضارة
آه والنعمة بيقول الحضارة

 يا طلعت يا مطلعنا عالتلال

يعني كل واحد يشتري ظرف ويروح
والأحسن يشوفله حد يظرفه

 فعلا مافيش أقرب من كده إنت بس خد ميكروباص الساحل الشمالي اللي يمكن يكون غلي علشان إنت كلك نظر أسعار السولار وكده وبتاع

 هوا يعني إيه كومباوند ويعني إيه سمارت هوم؟
ويعني إيه تكنولوجيا أساسا؟

 أيوة وأنا برضه باحب الصيف علشان باستحمى بمية ساقعة وأوفر غاز نصدره للغلبانة الصدمانة العدمانة إسرائيل وكله بثوابه

أيوة
فلاور يعني وردة
عرفتها دي

 بجوار الجامعة الأمريكية ذلك أفضل جدا

 داماك تقيل يا مضروب

وأنا اللي كنت فاكر إن أقرب قرية للقاهرة هي كفر طهرمس

 لا ده بقى مش إعلان على صفحة وحياتك مش شايف التنيتين
ده إعلان على صفحتين في وسط الأهرام
وبالعنجليزي
وكل واحد وعلامه بقى يا قفا
أهو مكتوب أهه هاشتهجاهالك : ماونتين ديو
يعني القزازة بجنيه بس وقوي قلبك
-
خبر غير متعلق بالموضوع
تغيير موقع الشبكة العربية لحقوق الإنسان
الرئيسية
رسالة وصلتني من الأستاذ جمال عيد
الأصدقاء الأعزاء ،، بدءا من اليوم الجمعة 23 مايو 2008 ، اصبح الموقع الجديد للشبكة العربية لمعلومات حقوق الإنسان هو : www.anhri.net بدلا من الموقع القديم hrinfo.net ، نظرا لتحكم موظف سابق بالشبكة بالدومين القديم للشبكة ورفضه أن يرده له ويحوله لحساب الشبكة العربية. نعلم حجم الارتباك الذي سوف يتسبب فيه تغيير الدومين ، ونتطلع لتعاونكم وأن تساعدونا في تقليل حجم الخسائر والإرباك المتوقع حدوثه
كل ما نرغبه منكم أن يشير كل منكم إلى الموقع الجديد على موقعه أو مدونته ولتكن مثلا جملة: الموقع الجديد للشبكة العربية لمعلومات حقوق الإنسان هو : www.anhri.net مساعدتكم ودعمكم هما شيء رائع فلا تبخلوا به علينا
تحياتي
جمال عيد

Tuesday, 20 May 2008

مساءك سكر زيادة

مساءك سكر زيادة

تسجيل لبرنامج مساءك سكر زيادة على قناة أو تي في إمبارح

الجزء الأول
إضغط هنا

الجزء الثاني
إضغط هنا

Monday, 19 May 2008

الكرنك 2008

الكرنك 2008

أحمد ماهر يحكي تجربته مع الإختطاف والتعذيب بكلماته هو

استيقظت صباح ذلك اليوم متعبا بعد يومين من العمل الشاق المتواصل .. فقد كاد عملى يضيع بسبب 4 مايو الذى لم يؤتى بثماره
ذهبت الى عملى مبكرا .. فاليوم لابد من اجراء بعض الحسابات الهامه و طباعة لوحات فى غاية الاهميه و تسليمها للمكتب
لا اعرف لماذا لم اكن متفائلا ذلك اليوم .. اتصلت بكثير من الاصدقاء .. و كنت لاول مره منذ اكثر من شهر اذكر مكانى فى التليفون بصراحه
*ايوه يا زميلى .. انا انهارده فى التجمع الخامس .. فى شارع التسعين .. ايوه فى المعرض ..هامشى على الساعه واحده
*ايوه يا بشمهندس طبعت كل اللوحات و الاستشارى مضى عليها ووافق .. جاى دلوقتى على المكتب
كان بعض العمال قد اعدوا طعام الغذاء و لكنى فضلت التحرك لان هذا اليوم كان مليئا بكثير من المواعيد الهامه
ركبت سيارتى المتهالكه و بدات فى التحرك و لمحت فى المرأه اليتيمه سياره بيجو مسرعه تتوقف فجاه امام الموقع الذى اشرف عليه
جاء خاطر فجأه بداخلى انها قد يكون بها بعض ظباط امن الدوله
ههههههه .. طب كويس انى مشيت
تعانى سيارتى من بعض الامراض المستعصيه التى تجعل تحركها بطيئا و تحتاج لأموال كثيره لكى تشفى و تعود سياره مره اخرى .. زقزوقه حبيبتى اكيد هاصلحها فى يوم من الايام ..دى ياما شاليتنى و انقذتنى من اخطار كتير .. ايه يعنى الكبالن مكسره و علبة الدركسيون بتزيق و لا المقص مكسور و ملحوم اى كلام
ايه المشكله ان مافيش استبن و مافيش كوريك وواخده كام خبطه ..اول الشهر هاجيبلك بطاريه جديده يا زقزوقه..انا مسميكى زقزوقه علشان الناس بيزقوكى كتير
ابتسم فى خاطرى الى ان فوجئت بسياره ميكروباص اجره سوهاج تقطع الطريق
ايه ابن الهبله ده ..الشارع فاضى و الدنيا صحرا و مش عارف يسوق .. حبكت يركن قدامى
احاول التحرك .. فأجده مصمم على الغلاسه ..ايه ياد يابن ال**** .. اقطع الشتيمه لاننى لمحت ان كل من فى الميكروباص ينظرون إلى بتحفز واضح .. الشرر يتطاير بوضوح من اعينهم .. اول مره المح الشرر ينطلق من العيون ... اجسام ضخمه .. حلاقه زيرو .. نضارات شمس .. يانهار اسود .. انتوا جيتو
اعود بالسياره للخلف سريعا .. لا اعرف لماذا
ثمانية بغال ينزلون دفعه واحده من الميكروباص و يحاولون اللحاق بى .. يشيرون لشخص ما فى الخلف
انظر خلفى فأجد ثلاث سيارات ملاكى يسدون الطريق مره واحده ..ارتطم بواحده .. اتحرك للامام مره اخرى و يبدأ قذف الطوب و الحجاره على السياره .. هى بقى فيها طوب كمان؟؟
سائق الميكروباص الصعيدى الغلبان يسد الطرق و يصدمنى بظهر سيارته .. ليه كده بس ياسطى احنا غلابه زى بعض .. عملتيها يا زقزوقه .. اخص عليكى
افاجىء بأياد كثيره تمتد الى ملابسى و تفتح الباب و تبدأ حفلة اللكمات و السباب.. مباراه
- محدش ليه دعوه .. كله يمشى .. احنا امن دوله .. ياللا من هنا يا ** انت و هو
اجد نفسى فجأه بداخل الميكروباص ..
- مانت وقعت أهوه يا **** فيه حد يهرب من امن الدوله يابن ال***
- احنا هانعرفك احنا مين يابن ال****
- كسروله العربيه ... كسروا عضم امه ابن ال*** ده .... مش عايزه يبطل صويت
هكذا هتف كبيرهم .. و الجميع عنده ضمير شديد فى تنفيذ الأوامر ... ضرب شديد من جميع الاتجاهات .. و بجميع اطرافهم .. إيد و رجل
آآآآآآآآآآآه هكذا هتفت انا رغم محاولتى للتحمل .. لكن الضرب كان فعلا شديد و متواصل .. و من يتعب منهم الباقى يكمل .. و لكن هل اشترك معهم السائق الصعيدى الغلبان أم اكتفى بقيادة السياره؟؟
قبل الضرب تبرع احدهم بوضع التيشيرت فوق وجهى .. و تبرع اخر بتقطيع الفانله الداخليه لنصفين .. و تبرع ثالث بربط النصف فوق عينى و تبرع اخر بربط يدى خلف ظهرى بالنصف الاخر .. و تبارى الاخرون فى تكتيفى و ضربى ... منتهى التعاون فعلا
يتوقف الميكروباص بعد رحله قصيره جدا امام احد المبانى .. احد الشوارع المجاوره .. لابد انه احد فيلات احد الباشوات ..او مقر خفى لامن الدوله
يجرجرونى على السلالم و انا معصب العينين وسط ركلات و صفعات و سب لجميع اهلى .. الكبير و الصغير
يلقون بى على بلاط احدى الغرف .. البلاط بارد رغم حرارة الجو ..يا سلااااام
ياتى احدهم و يستبدل الفانله الداخليه بكلابشات حديديه حول يدى وراء ظهرى و يغلقها على اخرها
*يا ريت تخف الكلابشات شويه ...
- إخرس ياد يابن ال***** ... انت بتتكلم ليه
- قوم اقف ياد ..انت بقى المناضل؟؟ .. انت بقى اللى هاتعمل اللى محدش عمله؟؟؟ ... انت يابنى هتسافر دلوقتى
- ابقى تعالى *** على قبرى لو شوفت الشارع تانى .. يابن ال*****
- حضروا الكهربا .. الواد ده مش متربى و مش عارف ازاى يعامل اسياده
- احنا ياد اسيادكوا و اسياد كل البلد دى .. هنعرفك دلوقتى احنا مين
- مابتردش علينا ليه
* يعنى اتكلم و لا اخرس ..؟؟؟؟
- ... يا جماعه قولت مش عايزه يبطل صويت .. احنا هانطلع دين امك
* آآآآآآآآآآه
فجأه انفتح مره اخرى دش كبير من الضربات و الصفعات و الركلات من جميع الإتجاهات .. انهم بلا شك لا يقلون عن 15 جثه و أحجام اياديهم و ارجلهم مختلفه فى المقاس و القوه
لا اعلم كيف يحفظون هذا الكم الهائل من السباب .. رغم انى كنت اعتقد ان لسانى طويل لكنى سمعت شتائم لم اكن اتخيل انها موجوده ... قاموس لغوى عظيم
استمر دش الضرب و السب اكثر من 30 دقيقه .. تبعه بعد ذلك بعض التوابع القليله لبعض راغبى التسليه
- انت بقى اللى عاملى فيها راجل؟؟؟
- قول انا مره
تذكر فلتلتزم بسلاح الصمت
- قول انا مره
- قول انا مره
و تنهال الصفعات و الركلات مره اخرى كم كنت اود ان اقول له انت مره و لكننى وجدت نفسى اردد
* حسبى الله و نعم الوكيل
- و كمان بتحسبن علينا؟؟؟ دا انت هايطلع دين امك
خلاص سيبه هو لما يركب الزحليقه هايقول كل حاجه
فجأه يختفى الجميع ...
تمر الدقائق كالسنين ... إلى ان اسمع اصوات كثيره .. نساء و أطفال و شيوخ و رجال ... زعيق و خناق و شتيمه
مين دول .. هو انا فين ... بس اكيد انا فى القسم
* لو سمحت
- عايز ايه
* هو انا فى قسم القاهره الجديده؟؟؟
- مش قالولك ماتفتحش بوقك ياض
*خلاص انا عرفت .. طب ممكن تفك الكلابشات شويه .. مش هما مشيو برضه .. انت من القسم ولا تبعهم؟؟؟
*خلاص يا عم مش هاسأل تانى .. بس يا ريت تخف الكلابشات شويه
- حاضر المفتاح تحت و هانزل اجيبه
إنه بالتاكيد احد عساكر القسم .. إنه لا يسبنى كما فعل الاخرون .. و لكن اين هم .. و لماذا اختفوا فجاه؟؟؟
- اخف الكلابشات عن كده كمان؟؟
* لا كده قشطه .. شكرا يا ذوق .. ممكن بقى شوية ميه علشان عطشان و الجو حر
- حاضر .. انت طلباتك كترت قوى ماتتعودش على كده
يأتى لى بزجاجة مياه و يشربنى
* جزاك الله كل خير .. طلب اخير بقى
- لأ
* طب خلاص
و تمر الدقائق مره اخرى و الذباب يقف على ظهرى و جروحى
* لو سمحت
- ايه تانى .. انت مش بتبطل طلبات
* عايز سيجاره
- نعم؟؟؟
* سيجاره .. انا كان معايا علبة سجاير فى العربيه .. هات واحده و خدها كلها
- طب و هاتشربها ازاى و انت متكلبش
* فكنى او شربهالى
- يا عم سيبك منه انت هاتسمعله كمان .. دا عيل ابن **** انت بتتكلم معاه ليه مش كفايه شرب
* ربنا يسامحك
- انت بتشتغل ايه
* مهندس
- مهندس ؟؟؟؟ طب و هما جابوك هنا ليه
* اصلى معترض على زيادة الاسعار و البهدله اللى عايشينها .. تسمع عن الفيس بوك
- لأ
* طب ممكن سيجاره؟؟
- طيب لما الظابط ينزل بس
أخيرا وجدت بعض البنى ادمين فى وزارة الداخليه
- هاولعهالك و هاشربهالك فى السريع .. بسرعه قبل ما الظابط يرجع
* قشطه
- خلاص يا عم شربت السيجاره ... عايز حاجه تانى ... ياريت تتكتم بقى
* حاجه اخيره .. معلش اصل عنيا اصلا تعبانه و اللى رابطها رابط بضمير شويه و عاملالى صداع .. يا ريت تخفها شويه
- طب كمان شويه علشان فيه حد جاى
* انتوا بتتكلموا معاه ليه يا ولاد ال*****
هات ضهرك ياد ... ارفعله التيشيرت علشان ادهنله المرهم
مرهم؟؟؟ ... كريم ؟؟؟؟ غريبه
ياللا انزل معانا ..حاسب السلمه لف يمين يابنى اتحرك متخشب ليه كده
اركب الميكروباص مره اخرى و معى اتنين عساكر او مندوبين غلابه من القسم يرافقهم ضابط امن الدوله ابو مرهم
اجلس على الكرسى الخفى نائم مختفى عن انظار الماره ... و يستمر صديقى الذى لا اعرف اسمه فى امدادى بكام نفس كل ما اطلب منه
اساله ... * هو الظابط اللى راكب العربيه معنا اسمه ايه؟؟
- و الله ماعرف .. بس هو ابن *****
* طب تعرف اسم اى ظابط من اللى جابونى القسم ؟؟؟؟
- لأ ... و اسكت احسن لك
* احنا رايحين لاظوغلى طبعا
- مش عارف
* بس انا عارف
- و عرفت منين و انت متغمى .. انت شايف ولا ايه
* لا يا عم .. من الاتجاهات .. انا مهندس .. دماغى جواها خريطه
- ماشى يا خفيف .. بس انا اخرى معاك على الباب .. هناك مش هاعرف اعملك اى حاجه
تمر على الافكار مجتمعه تاره و متفرقه تاره ... ترى هل علم احد الزملاء بذلك .. ترى هل تحرك أحد .. لو تم سجنى ..من سيدفع عنى اقساطى و ديونى الكثيره ... و من و كيف و هل ... ياللا بقى .. كله بيطلع فى الغسيل
- ياللا علشان نازلين ..وطى علشان الباب
اتذكر تلك رائحة فى هذا المكان ...رائحة التعذيب و الموتى... حضرت الى هنا منذ عامين بعد خروجى من سجن طره .. و لكن وقتها كنت ارى كل شىء و لم يغمينى احد
اتذكر شكل تلك البلاطات التى امشى عليها الان .. و تلك العتبه التى تفصل بين العالم العلوى و السفلى
اتذكر رائحة دورات المياه التى فى الممر الذى تحت الارض بجوار زنازين الاسلاميين .. لابد اننا مررنا عليها .. هل سيضعوننى فى تلك الزنزانه الى كنت اسمع من بداخلها يطلبون الرحمه من الله و يصرخون
اتذكر ذلك السلم الحديدى الذى اصعد عليه الان .. رأيته منذ عامين و كنت اجلس امامه منتظر انهاء اجراءات الافراج و كان المعتقلين الاسلاميين و الشباب الملتحين يصعدون عليه على ارجلهم و ينزلون عليه محمولين و فاقدى الوعى ... و لكن.. لماذا انا صاعد عليه الان.
. ينتهى السلم و الكعبله.. ثم ادخل فى طرقه ثم مصعد
يرافقنى ثلاث على ما اعتقد .. ضاط امن الدوله و الاثنين الغلابه من القسم
- هاتودوه لمين
- عمرو بيه
- مش عارف هو فين .. اطلع بيه الاداره على طول ...هو احزاب ؟؟؟ انت تبع حزب ايه؟؟؟
* كله زى بعضه
- انت ردودك مستفزه على فكره .. خف شويه
- اقف هنا
تمر الدقائق و استمع لحوار العساكر و المخبرين و ضحكهم و كلامهم عن البنات و الحشيش و الدنيا و الحياه
اضحك و اشترك فى الحوار .. و اهو كله يفيد التانى بخبراته
فجأه يصمتون .. و اسمع اقدام ثقيله تقترب ... و يصيح بصوت رهيب
- انت بقى اللى عمال تسخن الناس
و تنهال الضربات و الصفعات و اللكمات.. و فجاه يتركنى و يكمل طريقه
- معلش يا أحمد مفيش فى ايدى حاجه اعملهالك هنا
* ............
اسمع الكثير من الاقدام التى تقترب .. شكلها هاتبقى حفله .. استر يا رب
- انت بقى اللى عاملى فيها زعيم و مش هامك امن الدوله .... هاتولى ابن ال**** ده على جوه
كثير من الايادى تسرع لتلبية النداء .. مع بعض المجامالات بكام ضربه على كام شلوت ... و لزياده فى المجامله يتم جرى على الارض .. إلى أن أدخل مكتب واسع مكيف به موكيت على الارضيه تنبعث منه رائحة الفخامه .. ده شكله مكتب حد من البشاوات الكبار قوى
- بص يا باشا .. احنا نطلعله أمر إعتقال و نخلص منه
- وليه ... هو هايخر بكل حاجه دلوقتى
- يا باشا دا صنف ابن **** .. الاشكال دى لازم تتربى علشان يعرفوا احنا مين ... يابنى انت حشره .. ولا حاجه..و اى حد بتتحمى فيه ولا هايعرف يعمل لك حاجه... الاحزاب بنت ال**** و شوية ال**** اللى عاملين مراكز حقوق انسان دول نلمهم فى عربيتين
بالطبع لم ينسى هذا الضابط الطيب ان يدعم أقواله ببعض السباب لجميع الشخصيات السياسيه فردا فردا من جميع التيارات من اقصى اليمين لأقصى اليسار ايمن نور, جميله اسماعيل , امير سالم , اسامه الغزالى حرب , مجدى احمد حسين , محمد عبد القدوس , جورج اسحق ... بالاضافه الى اهلى اللى ماعرفوش يربونى
و جلس الباشا الكبير على مكتبه .. و سمعت ازيز الكرسى و جلس حوالى 4 او 5 ضباط اخرين بإختلاف اصواتهم.. بخلاف بعض المخبرين عند الحاجه لأى مساعده
- قوللى بقى يا بتاع الفيس بوك انت ... ازاى يجيلك استدعاء من 10 ايام و ماتجيش
* انا مجاليش اى استدعاءات
- رد على الباشا عدل .....
و تبدأ مسابقة الضرب و الركلات
* آآآآآآآآه
- هاسألك السؤال تانى .. ازاى يجيلك استدعاء بك..... و ماتجيش يابن ال****
* دا كان مجرد تليفون اللى جالى ... ماكانش استدعاء رسمى ..و كان الكلام عن دردشه مش استجواب
- لأ .. ده اسمه استدعاء ... انت بقى ماجيتش لييييه؟
- يا باشا سيبنى عليه شويه دا عيل لبط .. سيبنى اعدلهولك شويه
* ماكنتش شايف أى فايده أو هدف من حضورى هنا
- احنا بس اللى نحدد ايه المفيد و ايه غير المفيد ... مش انت
- يا باشا دا عيل مش متربى يا باشا ... سيبنى اظبطه شويه ... الكهربا جوا جاهزه
- و ليه الكهربا ... هاتتكلم عدل ياد ولا نخليك تخر بكل حاجه لوحدك؟؟
و تبدأ مسابقة الضرب و الركلات كأنى كره فى ملعب واسع
* أآآآآآآآآآآآآآآآآه .... آآآآآآآآآآآآآآآآآآآآآآآآآآه ...
- ايه بقى باسوورد الجروب
* مش فاكر اصلى كنت كاتبه فى ورقه و ناسيها (صفعه قويه)..... آآآآآآآه
- يا جماعه انتوا إزاى تجيبوهولى مش متظبط ... ظبطوه الاول قبل ما يدخلى ... هاتوهولى جاهز علشان الوقت و تعب القلب
انقض على الجنود و الضباط الاشاوس المغاوير حماة الوطن .. حماة الامن و الامان فى مسابقه جديده للركل و الصفع و السب ... و بدأ البعض فى تقشير ملابسى .. و تطوع احد الضباط المحققين بسحبى على وجهى و صدرى على الارض و خرج بى خارج المكتب ابو موكيت الى الطرقات ام بلاط وسخ .. مسحولا على وجهى يجرنى هو و يساعده أخرون عندما يتعب
اتذكر اننى فى المرحله الابتدائيه كنت اسمع احدى المدرسات تهدد الفصل .... إللى هايتكلم هامسح بيه البلاط .... و كنت اتعجب وقتها .. كيف يكون ذلك ... و اخيرا جائنى الجواب بعد عشرين عاما ... هذا هو مسح البلاط .. اديك جربت ازاى يتمسح بيك البلاط .. مبسوط؟؟
و لكن ماذا اقول للباشا الذى يتتظر الباسوورد
- افتكرت ياد يا ***** ولا نجيب العصايه ... هاتولى اتخن عصايه عندكوا
* افتكرت ... اعتقد كان مكتوب كمان فى رساله على الموبايل.. مش فاكر مسحتها ولا لأ
- استنى كده ... موجوده .. دى مبعوتالك من رقم اسراء ... هى لسه بتدخل؟؟؟
* لا يا باشا مابتدخلش على الجروب
- احنا عارفين من غير ما تقول
يا رب محدش منهم يجرب الباسوورد .. بس الغريبه ان كمان محدش سألنى عن الايميل ... شكل الظباط اللى بيفهموا فى النت لسه ماجوش
- مين بقى مشيره؟؟
* مشيره؟؟
- انت هاتستعبط ... يا جماعه قولنا ظبطوه
تعود مره اخرى لمباراة الصفع و التنكيل .. لم اكن اعرف من اى اتجاه تاتى الضربات.و اللكمات .. و لكنى متأكد اننى لو كنت حر اليدين و ارى وجوههم ما استطاع احد او جرؤ على ذلك
* آآآآآآآآه ... ايوه ايوه عارفها ... مالها؟؟؟
- اسمها ايه بالكامل و ساكنه فين؟؟؟
* ماعرفش
- لا تعرف
* هاعرف منين ... ماعرفش ....(ضرب) آآآآآآه ... ماعرفش ....(ضرب) أأأأأأأأأه
- طب و فاطمه
* هاعرف منين ... ماعرفش .... آآآآآآه ... ماعرفش .... أأأأأأأأأه
- طب و ايناس
* هاعرف منين ... ماعرفش .... آآآآآآه ... ماعرفش .... أأأأأأأأأه
- طب و عمر
* هاعرف منين ... ماعرفش .... آآآآآآه ... ماعرفش .... أأأأأأأأأه... محدش يعرف حد ... كله من على النت
- طب و ...... طب و .......
- ايه علاقتك بجميله اسماعيل .. و ليه بتبعتلك رسايل
* ماهى بتبعت للناس كلها ... كل الاحزاب و القوى ايه المشكله لما تبعت لى
- نجلاء بدير .. احمد محسن .. فهمى هويدى ...اسئله .. اسئله .. اسئله
* اجوبه متناثره يتخللها اصوات ضرب و صراخ
يكتفى الباشا بهذه الاسئله و اجوبتى التى تشبه المهلبيه ..و يصمت لفتره و انهض لأقف مره اخرى .. و اسمع وقع خطوات تاتى من بعيد تقترب منى .. ثم قجاه اتلقى صفعه على اذنى اليمنى فأرى نورا مبهرا رغم الظلام الدامس .. و فجاه اسمع تصفير غريب .. كأنهم جميعا ابتدئوا فى الصفير .. و لاول مره فى حياتى اتأكد من صحة ما كنت اراه فى كارتون توم و جيرى من عصافير و نجوم تدور حول من يتم ضربه على رأسه .... لقد رأيت تلك العصافير الصغيره و النجوم بالفعل.. ... هل زار مخرجوا تلك الافلام مبنى امن الدوله فى مصر من قبل؟؟؟

- خلاص خدوه .. و إحمد " ربنا" انك وقعت فى ايد حد حنين .. ممكن بعد كده تقع فى ايد حد ما بيرحمش
ما هذا .. لقد نطق الباشا كلمة " ربنا" ... هل يقصد " ربنا"؟؟ هل " ربنا" هو " ربه" ام يقصد "رب" اخر
و لكن على اية حال واضح من كلامه انه له "رب" و قد كنت اعتقد ان هؤلاء البشاوات يعتقدون انهم هم الالهه .. لابد انهم مقتنعون انهم ارباب متفرقون يجمعهم " رب" كبير فى وزارة الداخليه او فى رئاسة الجمهوريه
و لكن ربنا نحن يأمرنا بالرحمه و سوف يحاسبنا على ما نفعله .. بالتاكيد لم يأمرهم ربهم بذلك و بالتاكيد هم مقتنعون انه لن يحاسبهم
يا ربى حمدا لك انى اعبدك انت وحدك .. لا شريك لك .. و لا اعبد رب هذا الباشا و من معه . فانت الرحيم . و انت المنتقم
يقتادنى العساكر و الامناء للادوار السفليه ... انزل على نفس السلم الحديد لا تقوى رجلى على حملى.. اتذكر شكل ذلك الشاب الملتحى من سنتين
يتم استبدال الكلابشات باخرى قديمه مؤلمه و يتم ربطى فى باب حديد .. تمر الدقائق و ادخل فى النوم
- انت يا ابنى ياللى نايم و انت متكلبش .. انت ازاى نايم كده؟؟ .. انت تبع ايه؟ ... شكلك كده عيل روش و جاى غلط
* فيس بوك
- مين؟؟؟
* مش مهم ... ممكن بس تفك الكلابش من الباب او تربطنى عدل علشان عايز انام شويه
تمر الساعات و انا نائم بالكلابشات و الغمامه على عينى و ملقى على الارض
اتذكر محمد الشرقاوى منذ سنتين .عندما كان يتعجب قائلا يابنى انت ازاى بتعرف تنام كده فى اى حته و اى زنزانه و اى وقت
- مش انت اللى الظابط كلمك فى التليفون من عشرتيام
* اه
- طب هو اجازه انهارده .... انا كلمته و جاى دلوقتى و اكيد مش هيوافق على اللى حصل
* يا رااااااجل ههههههههههه
- بتضحك على ايه ... انا غلطان ... خليك كده مرمى لحد ما يبان لك صاحب
اصعد معه بعد قليل للضابط الذى يقولون انه قطع اجازته لإنقاذى ... يؤنبنى بسبب دماغى الناشفه ثم يصطحبنى للمدير و تبدأ النصائح الابويه الحنونه
- احنا مش ضدكوا .و لا سفاحين زى ما جرايد المعارضه ما بتصورلكوا ... و البلد قطعت شوط كبير فى طريق الديمقراطيه ... بس الشعب المصرى هو اللى مش مهيأ للديمقراطيه
* امال ايه اللى حصلى انهارده ... يعنى كل الضرب ده و كان مثلا بيتهيألى؟؟
- معلش .. اعتبرنا زى والدك
* *********
- احنا و الله مش بننجح الفاسدين فى مجلس الشعب ولا بنساعد الحزب الوطنى .. بس هى البلد كده .. و احنا برضه بنكشف قضايا فساد كتير
* *********
- فكر فى حزب او جمعيه اهليه او مركز دراسات ... لكن الفيس بوك لأ لأ لأ
بالطبع لم يكن النقاش مثمر او مفيد و لا اعرف ما الذى دفعنى للنقاش معهم ... استعنت بسلاح الصمت مره اخرى و جلست استمع مع هز رأسى بين كل فتره و اخرى كدليل على الاقتناع التام .. رغم ان رقبتى كانت قد تسمرت على اتجاه واحد و رفضت اى حركه يمينا او يسارا
تزداد الالام فى جسمى بمرور الوقت ... تزحف ببطء و ثقه تامه من الوصول لجميع انحاء جسدى .. يدى اليمنى لا استطيع تحريكها .. اذنى اليمنى ايضا و ياللصدفه لا استطيع ان اسمع بها .. أحس و ياللغرابه ان هناك من ضربنى ضربا مبرحا منذ قليل
- حاجاتك كامله؟؟؟
· لا فيه كاميرا فيديو ديجيتال ناقصه .. دى غاليه و كمان جايبها بالقسط .. لسه مشتريها من شهرين .. كان مقدمها 500 و قسطها 150 فى الشهر
- هاندور عليها ... سلام يا احمد و فكر كويس
*الو
* الو
* انت كويس؟؟
* كويس
* عملوا فيك ايه؟؟
*حاجات كتير عملوها و حاجات كتير ماعملوهاش
*كنت خايفه قوى عليك
* من ايه ؟؟ .. ماتخافيش
* ........
* بطلى عياط و متخافيش
* احمد انا حجخعبيتنبمرؤالساكنسسجخصخ
* ايه؟؟؟ .. بطلى عياط مش فاهم منك حاجه

عفوا ... لقد نفذ رصيدكم يرجى اعادة شحن البطاقه

تمت

Tuesday, 13 May 2008

الضرايب - مصلحتك عند أم التيتي

الضرايب - مصلحتك عند أم التيتي

الفيديو ده وصلني من صديق
شوفوه هنا
وبعدين تعالوا كملوا قراية
شفتوه؟
إيه رأيكم
دول مش مدونين زينا لأن إحنا بقينا خلاص نخب دلوقت والفضائيات والجرايد والأضواء بوظتنا
دول مش شباب في أحزاب ولا حركات ولا تنظيمات ولا أي حاجة ولا ليهم في السياسة
ده مجرد شباب عادي من اللي بنشوفهم في الشارع
دول الشباب اللي مش لاقي وظيفة ولا سكن ولا جواز ولا تعليم
دول الشباب اللي أي أمين شرطة بتلاته تعريفه بيوقفهم ويبتزهم في الشارع يا إما ياخدهم تحري
دول الشباب اللي الحكومة مش عاجبها المزيكا اللي بيسمعها أو الكتب اللي بيقراها
دول الشباب اللي بيشرب بانجو على النواصي وبيتجوز عرفي وبيشيل كلاشينكوف وبيبقى إرهابي أو بيشيل جيتار ويعبد الشيطان
ستوب
ده مش كلامي على فكره
دي الصورة اللي رسمها كل من النظام والمعارضة للشباب - اللاسع على رأي رفعت السعيد - علشان يكتموا حسهم ويخلوهم ما يتدخلوش في الفته اللي بين النظام والمعارضة
الشباب أكثر فئة مهمشة في مصر رغم إنها أكثر فئة بتعاني
كل الدول المحترمة في العالم بتعمل للشباب empowerment
لكن دولتنا المصرية بتعمل للشباب impoverishment
لكن الجيل ده من الشباب مختلف عن حنجورية السبعينات والستينات المازوخيين محبي الفاشية
الجيل ده بقى عنده صوته وعنده إعلامه وصحافته وفنه وأدبه وثقافته الخاصة
وأهم من ده بقى عنده وعيه
وعي مصري
يعني الواحد لو بطل تدوين أو باع القضية أو حصل له أي حاجة ها يبقى مطمئن على وعي الشباب
الشباب اليوم أصبح له درع وسيف
معلش لازم حته - سادات - كده علشان نكيد العوازل
-
هوامش
حاولت معرفة صناع هذا الفيديو
هما غالبا من الإسكندرية واللي مصور الفيديو إسمه مودي
أو محمد رزق
والجماعة مسمين نفسهم هوب النبي يللا
لو حد عنده معلومات أكتر عنهم أهلا بيه

Friday, 09 May 2008

أحدث طريقة مصرية لمعرفة باسوورد الفيس بوك

أحدث طريقة مصرية لمعرفة باسوورد الفيس بوك + تحديث

ده ضهر صاحبنا أحمد ماهر المؤسس الحقيقي لجروب الإضراب على الفيس بوك وليس البالونة الإعلامية التي نفختها بعض الصحف المستقلة وفي النهاية فست وقالت حرمت

 وده قفا صاحبنا أحمد ماهر

 وده ضهر صاحبنا أحمد ماهر من غير فلاش علشان تشوفوا اللون الأزرق الجميل اللي أكيد لم يكتسبه من حمام شمس على أحد شواطيء مصر الجميلة

 كتف أحمد ماهر

 ودي الخرابيش في ضهر صاحبنا أحمد ماهر

 ودي آثار صوابع المجرمين في ضهر معلمة في ضهر أحمد ماهر صاحبنا

 

 ودي صوابع المجرمين معلمة في رقبة أحمد ماهر صاحبنا

ودي آثار الضرب ببوز الجزمة معلمة في دماغ أحمد ماهر صاحبنا
وده طبعا قرار إنساني إتخذه الأب الإنسان حبيب العادلي في لحظة إنسانية لأن أحمد ما طلعش في الفضائيات وقال حرمت ومش هاعمل كده تاني
بعد قليل مقابلة حصرية بالفيديو مع أحمد فيها يروي كيف تم إختطافه من سيارته بالشارع بعد مطاردة من ميكروباص وثلالث سيارات وثمانية من الوحوش الآدمية وكيف تم سحله على الأرض في قسم شرطة القاهرة الجديدة ثم في لاظوغلي وكل ده علشان باسوورد الجروب بتاع الإضراب على الفيس بوك
تابعونا وإنتظرونا
-
تحديث - المزيد من صور الإعتداء على أحمد ماهر


ده التيشيرت بتاع أحمد ماهر اللي مباحث أمن الدولة قررت تخليهوله قميص يظهر موضة جديدة

 عروة بنطلون جينز طقت بسبب الطريقة الوحشية اللي رفعوا بيها أحمد وجرجروه من حزام البنطلون

 ركبه بنطلون أحمد من السحل على الأرض

 سيارة أحمد وأثار صدمة الميكروباص الذي أغلق عليه الطريق

 آثار قالب طوب أحمر من الأحجار التي قذفوها على السيارة وهو أحد الأسلحة الحديثة لمباحث أمن الدولة تيمنا بالإنتفاضة الفلسطينية


سيارة أحمد من الخلف بعد أن صدموها فإنخلع الشكمان والإكصدام الخلفي وإضطر أحمد لربطهما بالحبال
-
التحديث الثاني
 

فيديو يبين آثار الإعتداء على أحمد ماهر
إضغط هنا

شهادة أحمد ماهر حول تعذيبه
الجزء الأول
إضغط هنا
شهادة أحمد ماهر حول تعذيبه
الجزء الثاني
إضغط هنا

-
تحديث
هيومان رايتس ووتش تطالب بالتحقيق في الواقعة

إضغط هنا
-
هوامش
أحمد ماهر هو المؤسس الحقيقي لجروب الإضراب على الفيس بوك وليست إسراء عبد الفتاح كما زعموا والسبب في وجود إسمها وحدها على الجروب الآن هو أن فيس بوك أوقفت حساب أحمد ماهر لأنه كان يرسل عدد ضخم من الرسائل يوميا ليضم أعضاء للجروب وكان هذا المجهود هو سبب إنضمام أكثر من سبعون ألف عضو للجروب فإعتبره سبامر واوقفوا حسابه بينما كان كل دور إسراء هو المساعدة في الإدارة وحذف التعليقات المسيئة فقط لكن بعض وسائل الإعلام كانت تبحث عن قصة شيقة وبالونة لنفخها ولم يكن همهم أبدا الدقة في المعلومة أو البحث عن الحقيقة والقصة السليمة مما أضر بالحركة الوطنية من اجل التغيير ككل وبمصداقية نشطاء الإنترنت خصوصا وهو أمر لا يمكن التسامح فيه لأنه كاد أن يهدم مجهود إستمر أكثر من أربع أعوام على الإنترنت
وأحمد ماهر عضو سابق في حزب الغد وحركة شباب من أجل التغيير كما سبق إعتقاله في أحداث نادي القضاة في ربيع عام 2006 وبقي في سجن طره عدة أسابيع وهو متزوج ولديه طفلة رضيعة عمرها فقط بضعة أشهر وهذه لم تكن أول محاولة لإختطافه وهو يبيت في مواقع العمل وفي سيارته منذ الإضراب
ها يا معتز ها تستضيفه في تسعين دقيقة زي إسراء؟
ها يا منى ها تستضيفيه في العاشرة مساء زي إسراء؟
ها يا إبراهيم ها تخليه يكتب مقال عندك في الدستور زي إسراء؟
إيه الموضوع مش جذاب كفاية؟
بقى بايت؟
الأمن محرج عليكم؟
خلاص أستضيفه أنا

Thursday, 08 May 2008

I Won The Hellman Hammett Award

I Won The Hellman Hammett Award
وائل عباس يفوز بجائزة هيلمان هامت

الجائزة تمنحها منظمة مراقبة حقوق الإنسان
هيومان رايتس ووتش
Human Rights Watch
ومؤسسة الكاتبة ليليان هلمان التي تمنح الجائزة بإسمها هي وزميلها الكاتب داشيل هامت
وليليان هيلمان وداشيل هامت من الكتاب الأمريكيين الذين تعرضا للقمع والإستجواب في الخمسينات - الحقبة المكارثية - بسبب كتاباتهما ومعتنقاتهما السياسية وظلت ليليان بدون عمل لفترة طويلة بينما أرسل داشيل للسجن لإتهامهما بالشيوعية
عملت ليليان هلمان أيضا بالتدريس في جامعتي هارفارد وييل المرموقتين وتوفيت عام 1984 عن عمر ناهز تسع وسبعون عاما
وداشيل هامت هو مؤلف رواية الصقر المالطي اللي إتعملت فيلم شهير وكان بطولة هامفري بوجارت سنة 1941
وهو لم يكمل تعليمه وعمل كحمال في السكة الحديد وساعي وعمل أيضا كمخبر خاص - ده مش زي المخبرين بتوعنا على فكره ده حاجة زي كولومبو كده - ثم كتب عن تجربته تلك عدد من الروايات البوليسية الواقعية وحارب في الحرب العالمية الأولى والثانية وتوفي عام 1961
كلا الكاتبين هاجما فساد المجتمع الأمريكي وفساد السلطة والفاشية ورأس المال ودافعا عن الحريات المدنية
التفاصيل عن الجائزة قريبا

Tuesday, 06 May 2008

في الفضائيات وكده

في الفضائيات وكده

الدنيا غم ولو الواحد إتكلم ها يشتم ويقل أدبه على الجميع حكومة ومعارضة وإخوان وخصوصا صحافة وفضائيات نفخ البلالين وخلق ابطال من ورق بحثا عن قصة سكسي وسخنة اللي ودتنا في داهية وعرفت النظام ديتنا - واللي تعرف ديته اقتله - والنظام فعلا قتلنا بالأسعار والمعارضة العاقلة المعرصة اللي ابتدت تهاجم الشباب لانه مش معرص زيهم بعد ما نفس الشباب وقف جنبهم وحققوا مكاسبهم السياسية والاعلامية والمادية
وفي ظل هذا الغلاء وموجة الفشخ العام التي نعيشها وحتى تمر بسلام أو غير سلام ها أحط لساني جوا بقي مؤقتا
وها أسيبكم مع شوية برامج ظهرت فيها مؤخرا
وطبعا باتكلم بكل أدب وحشمة وإحترام على غير العادة
بس يمكن باقول كلام كويس
ويمكن أستاهل ضرب الجزمة

على الجزيرة
تحت المجهر
الوثائقي الجديد عن المدونين
المدونون - الصحفيون الجدد
إضغط هنا لتشاهده كاملا
-
على الجزيرة أيضا
ما وراء الخبر
وده كان على الهواء مباشرة

الجزء الأول
الجزء الثاني
الجزء الثالث
-
On AlJazeera English
طالع في حته صغيرة في آخر الوثائقي يعني في الجزء الرابع تحديدا
مع إنهم حلبوني تسجيل لمدة ساعة
A Nation in Waiting

الجزء الأول
الجزء الثاني
الجزء الثالث
الجزء الرابع
يستحق المشاهدة بس ها تلاحظوا  فيه ريحة ناصرية ونخبوية شوية
-
في تقرير إخباري لقناة الساعة
عن مصداقية الصحف الحكومية والمستقلة والإنترنت
إعداد الزميلة دينا سمك

إضغط هنا

-
ملحوظة علشان المتفلسفين ومحبي الشائعات ومروجوها
لم أتقاضى ولا مليم عن الظهور في أي من تلك البرامج

Sunday, 27 April 2008

وثائقي جديد عن المدونون على الجزيرة

وثائقي جديد عن المدونون على الجزيرة

إعلان وثائقي المدونون الجديد على الجزيرة
المدونون .. الصحفيون الجدد
الأربعاء القادم
التاسعة وخمس دقائق مساء بتوقيت جرينتش
منتصف الليل وخمس دقائق بتوقيت القاهرة
الخامسة وخمس دقائق بعد الظهر بتوقيت نيويورك
بعد برنامج حصاد الأربعاء
إضغط هنا لتشاهد الإعلان

Saturday, 26 April 2008

إعلان فودافون الجديد

إعلان فودافون الجديد

طولت شعري
قصرت شعري
ولا عبرتني
حلقت السكسوكة
ربيت السكسوكة
ولا هي هنا
وفي يوم
...
ما حصلش أي حاجة
لأني إكتشفت
إن أنا اصلا فودافون
-
هوامش
البوستر صممته منذ عدة سنوات في إطار حملة على الإنترنت ضد شركات المحمول الإحتكارية في مصر لما قرروا يقللوا فترة الصلاحية وده كمان بوستر موبينيل

Friday, 25 April 2008

الواد بلال والبيه نظيف

الواد بلال والبيه نظيف

ما سمعناش عن حاجة زي كده أيام عبد الناصر لأن النتيجة كانت معروفة ومش محتاج أوضحلكم
الراجل يعني أعدم خميس والبقري ودخل مصنع الشوربجي في إمبابة بالدبابات
يعني مافيش هزار في الحاجات دي
جه السادات
فكها شوية وساب الناس على راحتها
جرايد وأحزاب وسيما
أحلى أفلام الكرنك وإحنا بتوع الأوتوبيس وثرثرة فوق النيل
شوية حرية ما دامتش
ولأنه غير عبد الناصر فهو كان بيقعد مع الناس بجد بدون تنقية يعني لما يقعد مع طلبة بيقعد مع طلبة بجد مش بينقوله شوية معرصين
فقام عبد المنعم أبو الفتوح الطالب الإخواني وإداهومله على الهواء مباشرة
طبعا السادات زعق فيه شوية وخلصت على كده
لا الواد اتشنير ولا إتفرم زي ما الناس توقعت ولا مستقبله ضاع
وبقى دكتور قد الدنيا
الله يرحمك يا سادات
أما مبارك بقى زي ما عودنا لما قال ما تفتكرونيش زي اللي قبلي
لما بيقعد مع شباب الجامعات بيختاروله زينة شباب التعريص
والتلفزيون كده بيبقى بيلعلط من العيال اللي مصروف لها تيشرتات وترينجات
وكله بيمشي حسب الخطة المرسومة وإلا
لكن نظيف الغلبان يا عيني بتكون الإجراءات الأمنية أقل طبعا من الريس
ففلت منهم الواد بلال أبو لسان زالف
وبرضك إداهومله زي ما ها تشوفوا في الفيديو
لكن يا ترى بلال ها يكون مصيره إيه ومستقبله إزاي
هل ها يبقى الدكتور عبد المنعم ابو الفتوح تاني
ولا ها يشتغل بياع سريح
عموما زي ما قالت نوارة نجم
مالناش دعوة
الواد ده لازم ينجح حتى لو ما ذاكرش
وأي محاولة للمساس بيه إنتم أحرار
شاهد الفيديو
إضغط هنا

الفيديو من تصوير آدم طنطاوي
بلال على فكرة كان قاعد معايا على البورصة قبلها بالليل أنا والمدون أسد وعدد من الشباب
بس والنعمة ما - حرضته - ولا أي حاجة أحسن يتهموها فيا
ده هو اللي طالع كده شيطاني لوحده
وإنتم عارفين التحريض بقى جريمة اليومين دول وكل واحد لازم - يحرض - قصدي يحرّص على نفسه
المهم كان معايا سندوتش باكله وبلال قال لي هات حته وأنا حلقتله لأني كنت جعان جدا الصراحة
لكن لو كنت أعرف كنت إديته السندوتش كله حلال عليه
لكن معلش ملحوقة
ليك عندي سندوتش وبيبس كمان ياد مش خسارة فيك يا نجم

Tuesday, 22 April 2008

Mahalla Story and Photos on BBC World

Mahalla Story and Photos on BBC World
Elham Mohamed, street vendor
مقابلات مع أهالي المحلة على موقع البي بي سي
أجرى المقابلات لينا ورداني
تصوير وائل عباس

Read Lina Wardani's Mahalla interviews and see my photos on BBC World's website
Fallout from Egypt food protests
Click Here
إضغط هنا

Sunday, 13 April 2008

فيديو - شهادة والد أحد معتقلي أحداث المحلة

فيديو - شهادة والد أحد معتقلي أحداث المحلة

الدكتور اللي خيطله قال لي الواد ده مخه كان طالع بره
لما إحنا إتلمينا الرائد قال لهم شدوا الإجزاء
إنت فاتح ليه يا إبن الكلب
حيازة أسلحة نارية
للأسف لو رحتم ها تتاخدوا من هناك
سرقوا الكمبيوترات وبقوا شايلينها قدامهم على موتوسيكلات
جابوا الخراطيم بتاعة المية وغرقوا بيها الحريم
بيتعاملوا معانا كما لو كان إسرائيل مع فلسطين
-
تغطية أيضا عند مينا زكري
 
إضغط هنا

Saturday, 12 April 2008

تقرير بالفيديو حول قتيل احداث المحلة الطفل

تقرير بالفيديو حول قتيل احداث المحلة الطفل

تمكنت الوعي المصري من إختراق الحصار الأمني الذي ضرب حول مدينة المحلة الكبرى بالأمس وظفرت بهذا التقرير المصور حول قتيل المحلة الطفل وقامت بمعاينة مكان الجريمة بالصوت والصورة ومقابلة العائلة وإجراء حوار مع الأب المكلوم والخال وصورنا البلكونة وآثار الدماء والطلقات
وعرفنا أن والدة القتيل توفيت فقط منذ شهرين ولم تجف دموع العائلة عليها لتصاب بهذا المصاب الأليم الجديد
وكانت الأجهزة الأمنية قد ضربت حصارا خانقا حول مدينة المحلة الكبرى عن طريق وضع كمائن على كل الطرق المؤدية للمحلة وتمكنت أنا ومجموعة من النشطاء من إختراق هذا الحصار وهم شريف عازر ونوف سيناري ومينا ذكري وساره كار
وكانت بتجلينا رسايل الصحفي الأمريكي المحتجز في قسم أول المحلة جيمس باك على الموبايل وكمان في الطريق عرفنا إن مصور رويترز عبد الناصر النوري إتقبض عليه
أخدنا جولة بالسيارة لتفقد المدينة ولاحظنا حشود أمنية رهيبة تصل الى حوالي خمسون سيارة أمن مركزي بميدان الشون ومثلهم عند قسم اول وسيارات متفرقة على طول شارع البحر وشارع الجمهورية لكن المدينة كانت هادئة والمواصلات منتظمة لكن الأهالي الذين كانوا يتجمعون امام القسم انتظارا لأخبار عن ذويهم إختفوا تماما وعرفنا فيما بعد أن الأمن قام بتفريقهم بعنف الليلة السابقة وقام برشهم بالمياة ومعظمهم من النساء والأطفال
وانتهت صلاة الجمعة بهدوء ولم يحدث شيء على عكس المتوقع
وقد قام الكمين الأول على طريق طنطا المحلة بإيقاف موكب النشطاء والإعلاميين القادم من القاهرة عند الكيلو 22 قبل المحلة وسحب بطاقاتهم الشخصية ورخصهم ومفاتيح السيارات وايضا بعض السيارات
ومنهم الدكتورة عايدة سيف الدولة والدكتورة ليلى سويف ونوارة نجم ونورا يونس وسلمى سعيد وفاطمة رمضان والقائمة الكاملة للأسماء عند مالك
وقد حاصرهم الأمن لمدة ست ساعات على الطريق ولم يسمح لهم حتى بشراء المياه
ثم سمحوا لهم فقط بالعودة إلى القاهرة بعد مفاوضات مصحوبين بقافلة من سيارات الشرطة لضمان عودتهم
تحدثنا مع كثير من الأهالي كثير منهم خافوا يتصوروا بس قالولنا حاجات رهيبة
منها ان حرق وتخريب مدرسة طه حسين تم تحت عين وبصر الشرطة وتم سرقة حوالي ثمانين جهاز كمبيوتر وتحميلها على موتوسيكلات ولم يحاول الامن حتى ايقافهم
وقابلت الشخص الذي حاول تهريب الصحفي جيمس باك واركبه تاكسي وظن انهم لم يقبضوا عليه وعندما قابلت جيمس باك في القاهرة في المؤتمر الصحفي بمركز هشام مبارك قال لي ان ده حصل فعلا لكن الشرطة طاردت التاكسي وقالت للسائق ان اللي معاه ده - سي آي إيه - وقبضوا على جيمس
كمان قابلنا شخص من حزب التجمع اعترفلنا بان الحزب زبط مع الوطني لدرجة ان الحزب العربي الناصري اتصل برفعت السعيد حسب قول هذا الشخص ليتوسط لهم في الحصول على مقاعد
آدي الأحزاب ولا بلاش
أما في القاهرة فقد قام - بلطجية - قصدي صحفيون محسوبون على الإخوان مصحوبين باللواء مصطفى بكري بغلق أبواب النقابة بالعصي والشوم - أي والله حصل بشهادة شهود العيان - لمنع عقد مؤتمر مصريون ضد التمييز الديني
وفي حين كان الطلاب من كل التيارات السياسية في الجامعات يقيمون المعارض لصور قتلى ومصابين المحلة ويتظاهرون من اجلهم كان طلاب الإخوان ولا هما هنا خالص وعاملين معرض لصور غزة
والغريب هو موقف الإخوان من الإضراب ونعتهم له بالفوضى على عكس موقفهم من إقتحام حدود مصر عنوة وبفوضوية غير مسبوقة - منذ إنسحاب عبد الناصر المنهزم من سيناء - وبقوة السلاح من بلطجية وقبضايات حركتهم اللقيطة حماس
وآدي كمان الإخوان ولا بلاش
وعليه العوض ومنه العوض
كما أخبرنا بعض شهود العيان أن الأمن أفرج عن بعض البلطجية المعتقلين في الأحداث والمعروفين للأهالي بالأسماء وأخبرونا بعض اسماءهم وشوهدوا في الأسواق صباح أمس بينما لم يفرج عن بقية المعتقلين من الأهالي الأبرياء المقبوض عليهم عشوائيا
كما أخبرونا أنهم قبضوا على بعض اصحاب المحلات من محلاتهم وتعدوا عليهم بالضرب وتكسير محلاتهم وإتهموهم بانهم مخربين لتلك المحلات رغم أنها محلاتهم
يعني موت وخراب ديار
وعلمنا اخر اليوم بإطلاق سراح ناصر نوري أما جورج إسحاق فقد أخلي سبيله بكفالة عشرة آلاف جنيه مما يعني أن في الأمور أمورا
والنكتة بقى هي إن وإحنا خارجين من المحلة لقينا لسه الكمين الأول والثاني بيوقفوا السيارات وفارضين الحصار فوقفنا عند الكمين اللي كان موقف الوفد بتاع القاهرة وسألنا الظباط
هو القاهرة منين

Thursday, 10 April 2008

وثائقي قصير - المحلة ليه - إنتاج الوعي المصري

وثائقي قصير - المحلة ليه - إنتاج الوعي المصري

ليه المحلة - إنتحار - الأحداث - الجنازة - ده بلاستيك - فول أشرف البغل - عمرو أديب - عبد الحي أديب - المستعمرة
كل ده ها تلاقيه في هذا الوثائقي
ليست أول محاولة
ولن تكون الأخيرة إن شاء الله
تجربة هاوي متواضعة
الفيلم من تصوير وإخراج ومونتاج العبد لله
مدة العرض حوالي ثمانية دقائق
معلش دي نسخة مضغوطة علشان المساحة والسرعة
-
دلائل لتورط الأمن في بدء العنف بالمحلة

أنا كنت في المحلة إمبارح
حبيت أتطقس واتقصى الحقائق بدل ما أتكلم كده عمياني
وسمعت حاجات غريبة وعجيبة من الأهالي
الأهالي قالوا إن كل حاجة كانت هادية
وفجأة لقيوا ناس مجهولة بتحدف القطار بالطوب
لكن القطار ما وقفش وكمل في طريقه
قوم إيه
العجيب
الأمن هو اللي أوقف القطار
والأمن نزل سواق القطار وضربوه
الأهالي غضبت علشان الأمن ضرب السواق من غير سبب
والسؤال هنا مين الناس اللي حدفت القطار بالطوب
وليه الأمن وقف القطار
وليه الأمن كان عاوز القطار يقف لما المجهولين ضربوه بالطوب

*
المستعمرة التي قيل عنها في الاعلام انها عشوائيات وفيها دعارة ومخدرات
قمت بزيارتها بنفسي لقيتها من احسن مناطق المحلة تنظيما وفيها شوارع مرصوفة وجناين بين البيوت وبنيت اصلا خصيصا لاسكان العمال
والاهالي هناك هم من العمال وارباب المعاشات والموظفين
لكن يبدو ان هناك حملة لاخراجهم من منازلهم
الاهالي كانوا غاضبين جدا من عمرو اديب ومفيد فوزي واتهموهم بالكذب
شركة مصر للغزل والنسيج رافعة على الناس دول قضايا لطردهم
وجايبة عليهم مبالغ تحت مسمى ريع تصل الى مائتين الف جنيه
ومعظمهم من العجائز واصحاب الامراض المزمنة
وهما اصلا ساكنين في اوض او حجرات
فيبدو ان منطقة المستعمرة مستهدفة لسبب او لاخر حكوميا واعلاميا واستثماريا
الناس بيقولوا لعمرو اديب عيب ده انت ابوك كان بييجي يتفسح في جناين المستعمرة اللي انت بتقول عليها عشوائيات دي
*
شفت فيديوهات للأمن بيقبض عشوائيا على المواطنين لمجرد إنهم ماشيين في الشارع
والأمن كان بيستسهل كمان مش بيروح بعيد
يعني أي حد معدي في الشارع بتاع القسم بيقبضوا عليه
منهم واحد كان راكب فيسبا الأمن نزله من على الفيسبا وأخدوه وأخدوا الفيسبا
بدون اي حد من دول ما يكون مشارك في اي حاجة
والاهالي واقفين عند القسم والقسم مش بيقولهم قرايبهم فين
والناس عمالة تروح طنطا والمنصورة ودمنهور ومش لاقيين عيالهم وبيعيطوا
ومافيش محامين هناك خالص
فيارات اكبر عدد من المحامين يروح
ومش عارف ازاي النائب العام يصدر اتهامات لناس اتقبض عليها عشوائيا
الامن شكله فشل في القبض على اشخاص شاركوا في الاحداث بالفعل فكالعادة قبض على اي حد علشان يقفل ويفبرك محاضر ويبقى شكلهم كويس ويتجنبوا الجزاءات ويقبضوا
*
كمان القسم بيقبض على اي صحفيين بيكلموا الاهالي
كنت مستخبي في مدخل العمارة اللي فيها حزب الجبهة
وشفت بعيني تلات بغال في ثياب مدنية ومعاهم لاسلكيات بيقبضوا على الصحفية امينة عبد الرحمن
وبيقبضوا على اي وكل صحفي بيكلم الاهالي بدون تفريق
اين نقابة المتنيلين الصحفيين
كيف تسمح لقسم شرطة بالتعامل مع الصحافة بهذه البلطجة والاجرام

Wednesday, 09 April 2008

فيديو نادر لسقوط صنم مبارك في المحلة

فيديو نادر لسقوط صنم مبارك في المحلة
 

ولا سحر ولا شعوذة
ولا إحتجنا للأمريكان ييجوا يحتلونا
ولا حتى مبارك هرب وإستخبى في حفرة وضرب دقن
على حياة عينه أهه
وأمام عيون قوات حراسته وتثبيت نظامه
أروع فيديو يمكن أن تشاهده لأحداث المحلة حتى الآن
وده فعلا الفيديو اللي بيقول المصريين أهمه
إتفرجوا على كل فريم وإسمعوا كل ثانية في الفيديو كويس
إتفرجوا لأن ده مش ها تشوفوه عند منى الشاذلي ولا معتز ولا عمر أديب
علشان تعرفوا إن شعبنا صاحي
مش بينضحك عليه
ولا سينما طباخ الرئيس والرئيس الطيب إبن الحلال
اللي بيقول وديتوا الشعب فين يا حازم
ولا إخوان بيقولوا إن الريس هو ولي الأمر
ولا أحزاب تقول ده رمز مصر
ولا معارضة معارصة بيلوموا الفساد على الحكومة والوزراء فقط
الشعب ما إشتراش ولا بلع ولا صدق ده كله
الشعب بيقول أنا أهه فاهم كل حاجة كويس ومحدش يقدر يضللني
الفيديو وصلني من مجهول

Tuesday, 08 April 2008

مازلنا نتابع المحليات ومجزرة المحلة على الهواء مباشرة

مازلنا نتابع المحليات ومجزرة المحلة على الهواء مباشرة

لا تفرك عينيك
نعم الصورة صحيحة
وليست صورة من العراق بعد سقوط الطاغية المجرم صدام حسين
وهذا ليس الشعب العراقي
ولم يتم تعديلها جرافيكيا بوضع صورة مبارك بدلا من صدام
إنها صورة حقيقية
إنها بالفعل صورة لمبارك
وشعب المحلة المصري الثائر يعبر عن مشاعره الحميمة لرئيسه

الصور هي لمصور رويترز الرائع والصديق عبد الناصر النوري
-
ما زلنا نغطي إنتخابات المحليات ومجزرة المحلة
تابعونا عن طريق رسائل تويتر
على العامود الأيمن للمدونة

Sunday, 06 April 2008

تابع أخبار الإضراب على الهواء مباشرة

تابع أخبار الإضراب على الهواء مباشرة

بث حي عن طريق رسائل المحمول
من الوعي المصري
Misr Digita@l SMS

    !ذا واجهتك مشاكل تقنية في قراءة الرسائل هنا
    أنظر على العامود الأيمن في المدونة
    -
    صور من مظاهرات وإضراب السادس من أبريل

    خصتنا بهذه الصور الزميلة المدونة شاهيناز عبد السلام والتي واجهت مصاعب كثيرة هذا اليوم منها محاولة الأمن مصادرة تليفونها المحمول وكاميرتها الديجيتال ولكن الله سلم
    الصورة لحصار نقابة المحامين

    أحد المتظاهرين إرتدى الخيش ليرمز لأوظاع المواطن المصري المتدنية

    على سور نقاية المحامين

    جانب من إحدى التظاهرات

    مصور الأمن

    سيارات الأمن المركزي في شارع رمسيس

    المتظاهرون فوق سطح احد مباني نقابة المحامين

    المواطنون إهتموا وتفاعلوا مع المظاهرة من الشارع

    تجمع من المواطنين العاديين خارج النقابة

    تغطية إعلامية

    الامن المركزي عند حزبي التجمع والغد

    ميدان طلعت حرب وقد خلا تماما

    القوات الامنية في ميدان التحرير

    سيارات الامن المركزي متمركزة في اول شارع طلعت حرب من ناحية ميدان التحرير
    -
    فيديو من اليوم

    تصوير شاهيناز
    إضغط هنا
    -
    تجميع لرسائل تغطية اليوم من خدمة الوعي المصري للمحمول

    الساعة تلاتة وعشرة وانا ها انام واقفل تويتر بس واضح في المحلة مافيش نوم about 10 hours ago from web
    فرض حظر التجول في الميادين الكبرى بالمحلة ومن يخالف ذلك يتعرض لإطلاق النار والسكان يضطرون لسلوك الشوارع الجانبية ... about 10 hours ago from web
    شهود عيان: نقل جرحى من المحلة للعلاج بمستشفى المنصورة بعضهم فقد عينه كما تم نقل جثث لمشرحة المنصورة لا يعلم عددها ... about 10 hours ago from web
    لا يمكن دخول المحلة الا سيرا على الاقدام لمسافة 12 كيلو متر وشهود عيان يقولون عنف واطلاق نار في قرى الهياتم وعياش وصفط ... about 10 hours ago from web
    اطلاق سراح طالبات الجامعة الامريكية سارة وسارة ومها وهن الوحيدات اللائي اطلق سراحهن من المعتقلين ال 26 بقسم قصر النيل ويبقى 23 يبيتون للصباح ... about 10 hours ago from web
    اطلاق سراح مالك مصطفى وثلاثة من اعضاء حزب العمل ويقضي 26 معتقل اخر ليلتهم في قسم قصر النيل ومنهم نادية مبروك واسراء عبد الفتاح ... about 11 hours ago from web
    دعوات لاستمرار الاضراب حتى يوم الخميس ودعوات لتكراره اول مايو about 14 hours ago from web
    بي بي سي العربية تعرض صور متظاهرين بالمحلة يحملون ارغفة الخبز about 14 hours ago from web
    اوربت مستضيفة احمد موسى وكاتبة عليه الخبير الأمني - هاهاها - صدقتم والله about 14 hours ago from web
    صور وكالات الانباء من المحلة تشبه صور المصادمات بين الفلسطينيين والاسرائيليين دماء ودخان واطارات وحجارة ... about 15 hours ago from web
    أنباء عن قطع التيار الكهربائي عن مدينة المحلة الكبرى about 15 hours ago from web
    يا جماعة اذا كان على عبد المنعم فهو شخصيا كان موجود في الاضراب اما سؤاله عن غياب قيادات كفاية انفسهم الا عن الظهور التلفزيوني فهو سؤال وجيه ... about 15 hours ago from web
    وتغطية باهتة جدا للناصرجية منى الشاذلي في العاشرة مساء للإضراب about 15 hours ago from web
    بس خلاص كده خلصت فقرة وتغطية الاضراب وكان المتحدث فيها مجدي الدقاق بس ! معتز الدمرداش بينتحر على الهواء مباشرة ! ودلوقت مستضيف احمد زكي بدر ... about 15 hours ago from web
    اهه ابتدا يتكلم عن الاضراب بس جايب مجدي الدقاق about 15 hours ago from web
    يظهر الكلام اللي سمعته من اعلاميين مصريين كبار وانا في الاردن صحيح وان امن الدولة خلاص بقى لازم يوافق على كل الفقرات وكل الضيوف ... about 16 hours ago from web
    أحه معتز الدمرداش بيتكلم عن الخماسين ومتجاهل الاضراب تماما وكل فقرات البرنامج ها تبقى هيافة ... about 16 hours ago from web
    اغلاق كل الطرق المؤدية الى المحلة - طريق طلخا سمنود وطريق كفر الشيخ وطريق المحلة طنطا وتحويل القطارات بعيدا عن المحلة ... about 16 hours ago from web
    بي بي سي العربية عرضت لقطات للامن يضرب المتظاهرين ويعتقلهم في المحلة الكبرى about 16 hours ago from web
    عبد المنعم ابو الفتوح ايضا على الحرة تهرب من موضوع الاضراب ودخل في المحليات about 16 hours ago from web
    الكتاتني يتهم الاحزاب الشرعية بالتوافق مع النظام من اجل كراسي المحليات about 17 hours ago from web
    مجدي الدقاق يمسح جوخ للاخوان ويقول ان عدم مشاركتهم بالاضراب تصرف عاقل وواعي about 17 hours ago from web
    الكتاتني يقول الاضراب له قواعد واصول واهداف ويجب اختيار التوقيت المناسب about 17 hours ago from web
    امين اسكندر بيقول كنا موجودين في الاضراب! طب فين يا عمو؟ about 17 hours ago from web
    مجدي الدقاق - الدعوة للإضراب مشبوهة ومجهولة about 17 hours ago from web
    الكتاتني يقول لم يتم مشاورة الإخوان بصورة كافية حول الإضراب about 17 hours ago from web
    الكتاتني يقول لم نشارك في الاضراب حرصا على تماسك الدولة! about 17 hours ago from web
    بحسب علاء سيف المعتقلين في معسكر الامن بسندوب بالمنصورة وصلوا 33 about 18 hours ago from web
    عاجل - إسراء عبد الفتاح تم نقلها للتحقيق معها في قسم قصر النيل about 18 hours ago from web
    القبض على 19 من حزب الغد بالبحر الاحمر ومصادرة لافتات من سيارة جميلة اسماعيل ومحاولة منعها من الخروج من المنزل ... about 18 hours ago from web
    هو فين قيادات كفاية في الاضراب - سؤال غير بريء about 18 hours ago from web
    احد القتلى في المحلة الكبرى طفل عنده تسع سنوات وشهود عيان يقولون ان الامن يستخدم قنابل تصيب الاشخاص بشلل مؤقت في الاطراف ... about 18 hours ago from web
    الشرطة تعتقل المصابين الذين يذهبون للعلاج في العيادات الخاصة بالمحلة about 19 hours ago from web
    بحسب جميلة اسماعيل الامن يمنع مقر حزب الغد في طلعت حرب من فتح ابوابه ويعتقل اثنين من موظفي الحزب وينقلهم الى معسكر الدراسة ... about 19 hours ago from web
    عاجل - أنباء غير مؤكدة عن سقوط قتيلين في أحداث المحلة about 19 hours ago from web
    عاجل - الشرطة في المحلة تستخدم الرصاص الحي ووصول مصابين بطلقات نارية الى مستشفى المحلة الى جانب المصابين بالاختناق من الغازات ... about 19 hours ago from web
    سائقي التاكسي والميكروباص في القاهرة لم يعملوا لأنهم خائفين من أحداث عنف - هكذا قال بعضهم ... about 19 hours ago from web
    إشتباكات بين الأمن المركزي وعمال المحلة إستخدم فيها الأمن الغاز المسيل للدموع والرصاص المطاطي ومستمرة حتى الآن بشكل عنيف واصابات كبيرة ... about 19 hours ago from web
    تابع البحيرة مسعد الديب عماد العطار محمد عبد الوهاب حلمي الجندي طارق السعيد حسام حسنين يونس بهاء عبد العظيم البسطويسي أيمن الحوفي عصام جويدة ... about 20 hours ago from web
    المعتقلين في البحيرة هم رضا صالح علاء فخري سعيد عبد المقصود عادل العطار هشام الجندي محمد برانية أحمد ميلاد جمال منيب عمرو الحصاوي - يتبع ... about 20 hours ago from web
    الامن يحبط مظاهرة بميدان الساعة بدمنهور والقبض على عدد من نشطاء البحيرة من تيارات مختلفة ليس منهم الإخوان ... about 20 hours ago from web
    الشكوى متكررة في كل محافظات مصر حول اختفاء وسائل المواصلات العامة والخاصة خاصة في المنصورة والاسكندرية ... about 20 hours ago from web
    انباء غير مؤكدة عن مظاهرات في مدينة السلام ومصادمات مع الشرطة هناك about 20 hours ago from web
    يبدو ان سائقي الميكروباصات في المنصورة مضربين او خائفين من العمل اليوم حتى ان الشرطة اضطرت لجلب ميكروباصات من خارج المدينة للعمل ... about 21 hours ago from web
    أنا مع شاهيناز عبد السلام الآن وهي في أمان about 21 hours ago from web
    مظاهرة ضخمة في ميدان الشون في المحلة الكبرى والقاء القبض على القياديين كمال الفيومي وطارق السنوسي ... about 21 hours ago from web
    اعتقال سامح العروسي واعتقالات في المحلة ومظاهرات يقمعها الامن المركزي في المحلة الكبرى ... about 21 hours ago from web
    اعتقال خمسة وعشرين متظاهر بالمنصورة منهم دكتور سالم سلام about 21 hours ago from web
    نقل المعتقلين من مركز تدريب الامن المركزي بحلوان الى احد مقرات امن الدولة بالدراسة ... about 22 hours ago from web
    الشرطة في البساتين تجبر اصحاب المحلات على فتحها بالقوة واعتقال عدد من العمال الصعايدة تجمهروا بميدان العرب ... about 22 hours ago from web
    حركة المرور في المنصورة بالدقهلية قليلة والمحلات مغلقة والغريب انه لا زحام على افران الخبز اليوم ... about 23 hours ago from web
    شاهيناز عبد السلام بخير واستعادت تليفونها وكاميرتها about 23 hours ago from web
    قوات الامن المصرية تصادر شريط كاميرا فريق البي بي سي العربية في ميدان الجيزة about 23 hours ago from web
    شرطة قسم البساتين تستخدم عدد كبير من الميكروباصات للتجول في الحي ومراقبة الاوضاع ... about 23 hours ago from web
    @NoraYounis: غادة محمد هي ام الطفلين اللي قبضوا عليها لانها كانت بتدافع عن بنات الجامعة الامريكية اللي اتقبض عليهم وجوزها جه ياخد الولاد ... about 23 hours ago from web in reply to NoraYounis
    مظاهرة في نقابة المحامين ومظاهرات صغيرة في شارع الجلاء ولا أثر للإخوان برغم إعلانهم المشاركة أمس ... about 23 hours ago from web
    اسماعيل الشاعر يرتدي تي شيرت Boss فاخر وبنطلون جينز كاجوال وحذاء شمواه فاخر أيضا ... about 23 hours ago from web
    شوارع المعادي الجديدة خالية ونصف المحلات مغلقة وتواجد امني كثيف في الشوارع يسالون أي تجمعات من الشباب عن سبب وقوفهم ... about 23 hours ago from web
    شاهيناز عبد السلام كانت معايا على الموبايل وسمعت ظابط بياخد منها الموبايل وبيزعقلها علشان بتصور وبعدين الخط فصل ... about 23 hours ago from web
    الشرطة تتحرك في مجموعات من 5 افراد بالزي المدني مع ضابط بزي الشرطة وتفتش المواطنين المتجهين لمحطتي مترو منشية الصدر وكوبري القبة والدمرداش ... about 23 hours ago from web
    الشوارع خالية تماما في حدائق القبة وغالبية المحلات مغلقة وبوكسات شرطة تمر وتنادي على اصحاب المحال الساكنين بالمنطقة لفتح محلاتهم ... about 23 hours ago from web
    رسالة وصلتني من مواطن بان امتحانات اطفاله بالمدرسة تاجلت لان المدرسين شاركوا بالاضراب ... about 23 hours ago from web
    محمد علي محمد سلامة محمد محمود احمد فوزي حازم المليجي رامي يحي عبدالله عبد الناصر هيثم عبد النبي مجدي احمد حسين محمد عواد ... about 24 hours ago from web
    اسماء جديدة للمعتقلين في حلوان : مجدي قرقر ياسر اسماعيل احمد صلاح عبدالحميد وليد صلاح حاتم شعلان ابراهيم السيد ... about 24 hours ago from web
    خبر تواجد المعتقلين في معسكر تدريب الامن المركزي بحلوان خبر مؤكد ونحن على اتصال بهم ... about 24 hours ago from web
    والد الطفلين جاء لإستلامهما من ميدان التحرير وهو ممثل مسرحي يعمل مع محمد صبحي ... about 24 hours ago from web
    عاجل - المعتقلين حوالي 30 منهم موجودين الآن في معسكر تدريب الأمن المركزي بحلوان من مختلف التيارات والأحزاب اعتقلوا من اماكن مختلفة ... about 24 hours ago from web
    شهود عيان: شوارع كبرى بالقاهرة والاسكندرية خالية ومعظم المحلات مغلقة ومواقف الميكروباص خالية وسيولة بالمرور ونسبة غياب كبيرة للموظفين ... about 24 hours ago from web
    القبض على أحد الأمهات التي جاءت للمشاركة في الإضراب في ميدان التحرير وترك طفليها وحدهم في الشارع ! ... 01:11 PM April 06, 2008 from web
    فتيات الجامعة الأمريكية المقبوض عليهن وقفوا امام اسماعيل الشاعر بارغفة خبر يقضمونها ويبصقونها احتجاجا على رداءة الرغيف فقبضت عليهم الشرطة ... 01:06 PM April 06, 2008 from web
    القبض على مجدي أحمد حسين وضياء الصاوي وعدد من نشطاء حزب العمل بمصر القديمة 01:02 PM April 06, 2008 from web
    اسماء جديدة للمقبوض عليهم من البورصة - المدون احمد بدوي ومحمد فؤاد ومحمد عبد الوهاب - وسارة فكري وسارة عبد الرزاق من ميدان التحرير ... 12:58 PM April 06, 2008 from web
    قوات الامن تعتدي بالضرب على ثلاث فتيات من الجامعة الأمريكية وتلقي القبض عليهم والقاء القبض على عدد من نشطاء الغد من ميدان التحرير وطلعت حرب ... 12:49 PM April 06, 2008 from web
    اسماعيل الشاعر يجلس في ميدان التحرير بنفسه مرتديا ملابس مدنية وتشويش واضح وضعف في اتصالات المحمول في ميدان التحرير برغم كل محطات التقوية ... 12:40 PM April 06, 2008 from web
    القبض على حوالي ثمانية نشطاء من قهوة البورصة والقهاوي المحيطة وهم الان في سيارة ترحيلات ومنهم محمد عواد واسراء عبد الفتاح وشادي العدل وحازم ... 12:28 PM April 06, 2008 from web
    مصدر في وزارة الداخلية - 900 سيارة أمن مركزي في شوارع مصر اليوم - بدء العمل المنتظم بالوردية في مصانع المحلة ... 12:19 PM April 06, 2008 from web
    اعتقال المدون احمد الجيزاوي والامن يجبر عمال المحلة على العمل بالضرب وانباء عن اعتقالات في صفوف العمال ... 12:16 PM April 06, 2008 from web
    قوات كثيفة من الشرطة على رصيف قطار محطة المحلة الكبرى 11:50 AM April 06, 2008 from web
    خبر مؤكد - قيادات العمال تعلن الغاء اضراب المحلة واحمد السقا يوقف تصوير فيلمه اليوم تضامنا مع الإضراب ... 11:49 AM April 06, 2008 from web
    يارب تويتر يبطل يعطل النهارده ورجاء موافاتنا بالأخبار لكل من يعلم أو يشاهد شيئا ... 11:46 AM April 06, 2008 from web
    يوجد تجمع من حوالي خمسون شخصا أمام هارديز ميدان التحرير ناصية الجامعة الأمريكية ... 11:44 AM April 06, 2008 from web
    قسم شرطة الشيخ زايد يرفض تحرير محضر باختطاف الشرقاوي وينفي وجوده في حجز القسم ... 11:37 AM April 06, 2008 from web
    رجاء عدم التوجه فرادى إلى ميدان التحرير والتوجه في جماعات ذات اعداد 11:23 AM April 06, 2008 from web
    امن بملابس مدنية يسيطر على بوابات مصانع المحلة ويمنع تجمع العمال 11:16 AM April 06, 2008 from web
    القبض على الناشط فتحي فريد وتهديد كل من يقف في ميدان التحرير 11:15 AM April 06, 2008 from web
    شهود عيان: محمد عبد القدوس كان بيشتري جرايد في ميدان التحرير تم جرجرته وخطفه في سيارة ... 11:14 AM April 06, 2008 from web
    عاجل - القبض على محمد الأشقر من مكتبه الهندسي بالجيزة 11:13 AM April 06, 2008 from web
    عاجل - القبض على محمد الشرقاوي من منزله بالشيخ زايد 11:13 AM April 06, 2008 from web
    مالك ها يتعرض على النيابة بكره عشرة صباحا في مجمع محاكم الجلاء 03:26 AM April 06, 2008 from web
    مالك ها يتعرض على النيابة بكره عشرة صباحا 03:25 AM April 06, 2008 from web
    اما مالك مصطفى فلم يعرض على النيابة حتى ساعته 03:22 AM April 06, 2008 from web
    سيتم اعادة عرض اكرم الايراني وشباب العمل على النيابة مرة اخرى غدا 03:21 AM April 06, 2008 from web
    القي القبض على المدون مالك مصطفى وعلى الصحفية رشا جدة بمصر القديمة 08:35 PM April 05, 2008 from txt

     

    Tuesday, 01 April 2008

    حرب العصابات بجوار بيت وزير الداخلية

    حرب العصابات بجوار بيت وزير الداخلية

    العدد ده يا جدعان أنا ما بذلتش فيه أي مجهود
    لا جريت ورا مظاهرات ولا نطيت أسوار ولا إتشعبطت فوق عامود نور ولا شجرة ولا إنضربت من الأمن المركزي ولا رشوا في عينيا فلفل ولا أي من الإتهامات اللي بيتهموني بيها علشان يثبتوا إني مدون فشيخ
    كل اللي عملته المرة دي هو إن أنا رفعت الصور والفيديوهات
    لأن العدد ده من إعدادكم إنتم
    قصص هذا العدد كلها قام بإعدادها قراء الموقع وصوروها بكاميراتهم سواء بالموبايل او الكاميرا الديجيتال
    ودي مش أول مرة أنشر تدوينات ساهم بيها القراء
    ودي حاجة أنا دايما أركز عليها لما اتكلم عن تجربة التدوين في مصر في كل المؤتمرات اللي بأحضرها حول العالم
    وهي إن أي حد ممكن يدون
    الشعب ممكن ولازم وضروري يدون
    مش مفروض يكون فيه كام نفر معروفين ومشهورين وزهقنا منهم هم بس اللي بيدونوا
    وشكرا لثقتكم الغالية والتي هي النجاح الحقيقي للمدونة بصرف النظر عن تقولات الحاقدين
    -
    حرب العصابات بجوار بيت وزير الداخلية

    القصة دي بعتهالي مواطن من سكان منطقة ميت عقبة بالمهندسين
    وهي تثبت فشل جهاز الداخلية في توفير الأمن والأمان للمواطنين
    ولا تختلف كثيرا عن مأساة التحرش الجماعي التي نشرناها من قبل
    وبيقول رغم إنهم ساكنين قريب من منزل وزير الداخلية إلا أنهم لا يشعرون بالأمان أو الراحة ويخافون على أولادهم من النزول إلى الشارع حتى لشراء بعض الإحتياجات
    فالمنطقة أصبحت مرتعا لعصابات البلطجة وفرض النفوذ وتجار المخدرات
    والمشاجرات يومية بالأسلحة النارية والسنج والمطاوي والزجاجات الفارغة والحجارة
    وينتج عن ذلك ايضا تدمير للممتلكات والمحلات
    والغريب أنه عند الإتصال بشرطة النجدة لا تاتي غير بعد هروب البلطجية
    ويتهم المواطن أمناء الشرطة بقسم شرطة العجوزة ونقطة شرطة المهندسين بتلقي الرشوة من تجار المخدرات بالمنطقة
    ويخص بالإسم الأمين ع ف والأمين ع
    ويتهم رئيس المباحث بالتقاعس

    الفيديو الأول
    لقطة واضحة من المشاجرة
    إضغط هنا

    الفيديو الثاني
    لقطة من المشاجرة
    معلش ضلمة شوية لكن مازال بإمكانكم سماع الأصوات
    إضغط هنا

    الفيديو الثالث
    لقطة أخرى من المشاجرة
    معلش ضلمة شوية برضه لكن مازال بإمكانكم سماع الأصوات
    إضغط هنا

    الفيديو الرابع
    لقطة واضحة من المشاجرة
    ويمكنكم فيها رؤية المتشاجرين وهم يحملون أحد المصابين
    ثم يمكنكم بوضوع سماع صوت إطلاق نار
    مرة من مسدس
    ومرة من سلاح آلي
    وقبل إطلاق النار تسمعون صفارات تحذيرية من بعض الأشخاص ومعناها ظهور أسلحة نارية في الخناقة وهو الشيء المتعارف عليه في الثقافة الشعبية في تلك المشاجرات
    إضغط هنا

    الفيديو الخامس
    سكان المنطقة وأصحاب المحلات يكنسون الزجاج المكسور الناتج عن التقاذف بالزجاجات بعد المشاجرة
    إضغط هنا
    -
    هو ليه العادلي لا يقال ولا يستقيل رغم إنه فاشل
    Impeach Habib el-Adly!
    هو الوزير ده بس فالح في تأمين موكبه اللي قارفنا بيه
    وأخرتها يقولوا للمذيعة الجميلة القديرة آمال فهمي الباب يفوت جمل علشان ناقشت موكب الوزير بكل أدب
    أنا شخصيا إشتغلت في المهندسين في شركة كمبيوتر لمدة ستة أشهر
    وكان ييجي وقت المرواح أنزل على محطة الأوتوبيس أستنى الأوتوبيس
    لكن يصادف إن الوزير ده مروح
    قوم إيه بيلف من عند الملف اللي بعد ناصية ويمبي وإنت رايح عالعجوزة
    قوم يوقفوا أمين شرطة يعمل إيه
    يمنع الأوتوبيسات النقل العام من إنها تقف في المحطة الرسمية اللي الناس مستنياها فيها لحد ما جنابه يعدي
    طبعا لك أن تتخيل ناس تعبانة وشقيانة نازلة من شغلها
    واقفة تستنى أوتوبيس مش بييجي كتير أصلا علشان يروحها بيتها
    قوم لما ييجي يقوم أمين الشرطة يهشه !!!
    طبعا الناس كانت بتدعي على أمين الشرطة
    لكن أنا إتنرفزت مرة وقمت شاتمه وشاتم الوزير بتاعه البلطجي
    لأن ما يقومون به هو من أعمال البلطجة على المواطنين
    وبلطجي دي مش سب وقذف بالمناسبة
    دي صفة حقيقية وأصيلة في ممارسات هذا الوزير ومساعديه الكذابين أمثال اللوا أحمد ضياء الدين الشهير باللوا أحمد ضياء الصحاف اللي الريس - المبارك - شاف فيه حاجات إحنا مش شايفنها علشان كده رقاه مساعد أول بالعند فينا وده برضه بيدل على ريسنا بيفكر فينا إزاي
    ولأول مرة يصعب عليا الأمين لإنه برغم إني شتمته إعتذر لي وللناس اللي واقفة وقال لهم أنا عبد المأمور
    وتاني يوم شالوه وجابوا أمين تاني جبلة
    بيتشتم وما يردش
    -
    هوامش

    إضغط هنا
    راجع الوصلة لتتعرف على أحمد ضياء الصحاف
    وليه لما أقول عليه كذاب وبلطجي يبقى مش بأشتمه
    وإضغط هنا أيضا
    لتفاصيل أقدم
    -
    ونش الشرطة القاتل

    القصة دي جاتلي من صعيد مصر
    من أسيوط
    بعتهالي مواطن مش عاوزني أذكر إسمه
    والحادثة هي إن ونش الشرطة كان طالع من شارع المساحة بيحود علشان يخش شارع الجمهورية
    لكن على الناصية كان فيه إشارة مرور ديجيتال بتعد عد تنازلي
    أعتقد دي فيه منها دلوقت في الدقي والمهندسين
    المفروض العد التنازلي ده بنعرف منه إمتى نقف وإمتى نمشي زي الناس المحترمة
    يعني لو مافيش وقت كفاية قبل قفل الإشارة لازم نقف
    لكن سواق الونش كان رأيه غير كده لأنه فرد من أفراد الشرطة
    مش مواطن زينا غلبان كده يعني
    وعلشان هو حاكومة وعلشان هو ونش الحاكومة يبجى ما يصحش يوجف يابوي
    جوم إيه
    جام داعس بنزيم ومزود سرعته وبالفعل نجح في تخطي الإشارة
    وهنا حدثت المأساة
    لأنه بإضطراره ياخد الملف ده بالسرعة دي طبعا لازم يفقد السيطرة
    وقد كان
    طلع على الرصيف اللي هو رصيف عالي أصلا حوالي 30 سم
    وإصطدم بعمود إنارة
    وعمود الإنارة سقط فوق دماغ مواطن راكب بسكلته
    والمواطن ده حاولوا الناس يسعفوه وياخدوه مستشفى
    الشرطة منعتهم !!!
    وقالولهم محدش ييجي جنبه !!!
    لحد ما توفاه الله في دقائق
    والمواطن ده إسمه أبو بكر الصديق أحمد
    ودي ما كانتش بارجة أمريكية ضربت عليه النار هو كمان
    رقم الونش بالمناسبة هو محافظة 950
    الشرطة كانت بتمنع التصوير لكن القاريء تمكن من التصوير بدون فلاش علشان ما ياخدوش بالهم

    دراجة القتيل

    عامود النور المقتلع من جذوره

    دماء القتيل على الأرض مغطاة بالجرائد

    الدفاع المدني بيفك لحام العامود



    الونش راكب فوق العامود



    -
    تحديث هام جدا
    بحسب أحد شهود العيان أمر أحد الضباط في مكان الحادث
    أمر السائق بقطع خرطوم الفرامل حتى يظهر الحادث كأنه قضاء وقدر
    والسائق إسمه ربيع ورتبته صف ضابط
    وخرج بكفالة 300 جنيه

    Saturday, 29 March 2008

    إفهموها بقى يا ***

    إفهموها بقى يا ***

    صورة لبن لادن ملتقطة عام 1998 ويظهر فيها سلاحه الكرينكوف الروسي دليل إنه حمار وما بيفهمش في السلاح وإلا مكانش يختار رشاش عرة وأخيب من العوزي زي ده ولو لاحظنا في صوره الأحدث أصبح يضع رشاش كالاشنيكوف 74 ربما بعد أن نصحه من يفهمون بالسلاح
    نخش في الموضوع
    شريطين لبن لادن في بضعة أيام
    وشريط كمان للظواهري يطالب صراحة بعمليات ضد المصالح الأمريكية
    الصراع الإنتخابي الأمريكي بدأ
    ماكين والديمقراطيين
    وشريط لبن لادن لو نفتكر حسم المعركة الإنتخابية الماضية لصالح بوش
    وأنا من موقعي هذا أتوقع شرائط جديدة في يوليو ونوفمبر
    وربما عملية إرهابية خايبة أو فاشلة أو يمكن إتنين
    القاعدة والتيار السلفي الجهادي عموما كانوا يؤيدون صراحة على منتدياتهم على الإنترنت نجاح بوش بحجة أنهم يريدونه أن يستمر في الحكم ليتمكنوا من تصفية حسابهم معه
    وخلي بالك من زوزو
    المنتديات السعودية التي تخضع للإشراف الحكومي أيضا كان لها نفس التوجه
    ولم ولن يصفوا هذا الحساب
    فهل آن الأوان بقى علشان نفهم أن شرائط بن لادن والظواهري ما هي إلا شرائط دعاية إنتخابية لجون ماكين والجمهوريين عموما
    هل يفهم الأمريكان أيضا هذا فيحسنوا الإختيار هذه المرة
    بعد ما بوش وعميل السي آي إيه أسامة بن لادن أكلوهم البالوظة المرة اللي فاتت بحجة إن أمريكا في خطر ومحتاجة بوش الجامد يخلصهم

    Friday, 28 March 2008

    تسريب صور عارية لمشاركات في ستار أكاديمي

    تسريب صور عارية لمشاركات في ستار أكاديمي

    فضيحة إعلامية بكل المقاييس
    رغم أني غير مهتم بالبرنامج في أي من دوراته
    ولم أكن أبدا من متابعينه
    حتى عندما كتبت عنه المقال التالي لجريدة عرب تايمز في مايو 2004
    برامج الدعارة الفضائية
    لماذا تحدد مواعيدها بتوقيت مكة المكرمة؟

    بالمناسبة المقال ده عمرو خالد سرق منه أفكار كتير

    إلا أن ما حدث لفت إنتباهي بعد أن إنتشرت على المنتديات العربية هذه الصور الفضائحية التي صورتها كاميرات البرنامج وتم تسريبها لتصل إلى جريدة عرب تايمز
    حوالي 24 صورة ننشر منهم إثنين فقط
    ولا أعرف حتى أسماء المتسابقات اللائي يظهرن في الصور
    ويرجح البعض ان القائمين على البرنامج أنفسهم تعمدوا تسريب تلك الصور لرفع شعبية البرنامج بعد إنخفاضها بشدة
    فأين الحرفية وأين أخلاقيات المهنة وأين إحترام الخصوصية

    Tuesday, 25 March 2008

    ننفرد بنشر صورة السفينة جلوبال باتريوت

    ننفرد بنشر صورة السفينة جلوبال باتريوت

    ننفرد بنشر صورة السفينة جلوبال باتريوت والتي حصلنا عليها من مصادرنا لنكون أول من ينشر صورتها ولا أعرف هل هناك حسن نية أو سوء نية في أنه لم تنشر صورتها أي من وكالات الأنباء أو الصحف التي غطت الموضوع حتى الآن
    وهي السفينة التي أطلقت النار على أحد البمبوطية في قناة السويس أمس وأردته قتيلا وجرحت إثنين آخرين
    وده بحسب المصادر الأمنية المصرية
    بينما أنكرت السفارة الأمريكية الواقعة
    وأكدتها قيادة البحرية الأمريكية ولكنها لم تذكر وقوع ضحايا
    فقد نشرت سي إن إن في موقعها صورة أرشيفية لسفينة أخرى تعبر قناة السويس
    ونشرت الفرنسية صورة لسفينة أخرى أيضا تعبر قناة السويس
    ونشر موقع قناة الجزيرة صورة حاملة طائرات
    ونشرت لوس أنجلوس تايمز خريطة لقناة السويس
    ولم تنشر وكالتي أسوسيتدبرس ولا رويترز أي صور مع الخبر
    وعلى عكس ما ذكرت كثير من المصادر من أنها سفينة حربية ومنها وكالة أنباء الشرق الأوسط المصرية
    فالسفينة مدنية كما ترون بوضوح في الصورة
    ولا تحمل أي علامات عسكرية مما يثير كثير من التساؤلات
    خصوصا وأن البمبوطية معتادين على الإقتراب من السفن المدنية ويعرفون خطورة الإقتراب من السفن العسكرية
    وهي تتبع شركة خاصة إسمها جلوبال كونتينر لاينز
    وترفع العلم الأمريكي
    وتصنيفها سفينة رولو متعددة الأغراض
    RoLo
    ورولو تعني أنه يمكن تحميلها بالروافع أو عن طريق بوابة تحميل
    وهي مصممة خصيصا للعمل في منطقة الخليج والبحر الأحمر
    ولا أعلم كيف يتم إطلاق نار منها والمفترض أنها غير مسلحة
    بدأت هذه السفينة العمل أول مرة في 30 يناير 2005
    ونحتفظ بعنوان الشركة المالكة ويقع في نيويورك بالولايات المتحدة وكذا أرقام تليفوناتها
    وتعمل السفينة بعقد خاص مع البنتاجون
    وتتبع قيادة الأسطول الخامس في البحرين
    ونتساءل أين الحقيقة
    لماذا تقول الفرنسية أن القتيل إسمه محمد مختار عفيفي
    وتقول رويترز أن إسمه محمد فؤاد جعفر
    ولماذا قالوا أنها سفينة حربية ولماذا لم ينشروا صورتها
    ولماذا لم يصدر تعليق رسمي مصري على الحادثة حتى الآن
    وتركت السفينة لتستمر في رحلتها عبر القناة نحو بورسعيد
    فيه حاجة غلط هنا
    المفارقة بقى إن رئيس رابطة البمبوطية في السويس إسمه عباس الأمريكاني

    Sunday, 23 March 2008

    My Blog is Blocked in China

    My Blog is Blocked in China
    الوعي المصري محجوبة في الصين يا جدعان

    والله العظيم مش نكتة
    ده بجد وحق وحقيقي
    ولو إن الأمر فعلا بدأ بنكته
    كنت قاعد مع صديقة سويدية في أحد مقاهي القاهرة وبعدين عرفتني على صديق صيني أمريكي بيشتغل في شنغهاي
    فمن ضمن التعريف قالت له إن أنا مدون وبتاع والكلام أخدنا عن التدوين في الصين وكده وإنتم طبعا سيد العارفين عن أحوال التدوين في الصين
    وبعدين الصراحة مش عارف مين اللي قالها
    بس هي إتقالت
    يا ترى الوعي المصري محجوب في الصين؟
    المهم إن الصديق الصيني وعدني إنه بمجرد ما يروح شنغهاي ها يجرب ويقول لي إيه النظام
    طبعا انا ما أخدتش الموضوع بجدية ونسيت تماما
    وقلت هو الصين يعني ها تحجبني ليه
    لا من دينهم ولا من لغتهم يعني ولا عمري إتكلمت عنهم علشان يحجبوني
    المهم من كام يوم بعتلي رسالة بيقول لي فيها إن المدونة بتاعتي طلعت فعلا محجوبة في الصين!
    طبعا إترميت على الأرض ورفصت من كتر الضحك
    كلمت واحد صاحبي مصري بيسافر الصين يعمل بيزنس وقلت له يجرب
    جرب وطلع بنفس النتيجة
    قلت لا يا جدعان أكيد بتضحكوا عليا
    طب أنا بقى مش مصدق
    إبعتولي سكرين شوتس
    screenshots تثبت الكلام ده علشان أتأكد

    وبعدين جربوا كذا عنوان
    misrdigital.blogspirit.com
    وكمان
    www.misrdigital.com
    ونشوف كده
    وبالفعل بعتولي الإسكرين شوتس
    وزي ما إنتم شايفين

    وبالفايرفوكس

    طبعا أنا لسه باضحك وباقهقه لحد دلوقت
    بس بجد مش فاهم ومستغرب
    الصين ؟ طب ليه ؟
    يظهر ياد يا وائل إنك واد خِطِر وإنت مش عارف
    حتى الصين خايفة منك على أمنها القومي
    أو يمكن الشعب الصيني بيتأذى من الألفاظ اللي بتكتبها
    أو ما يصحش حكومة مصر الصديقة تتفضح في الصين
    أو يمكن زعلانين لما لبست فانلة حمرا وشاركت في المظاهرة الإلكترونية إحتجاجا على مذابح بورما
    عموما دي حاجة ما تزعلش
    بالعكس
    ده وسام وشهادة وجائزة دولية جديدة أفخر بيها

    ودائما للأمام يا وعي يا مصري
    وإطلبوا الوعي ولو في الصين

    Saturday, 22 March 2008

    التدوين مش سبوبة ولا ستار أكاديمي

    التدوين مش سبوبة ولا ستار أكاديمي

    تأبى الأقدار أن أستمتع بأجازتي في سلام
    إلا ولازما ولابد حد يبعتلي حاجة تحرق دمي
    ألا وهي هذا الإعلان الغريب العجيب المريب

    إعلان

    ستة مدونين مبدعيين 3 ايام تدريب عملى
    علشان تبقى مدون مشهور
    انضم إلى الآلاف المدونين في العالم
    وعبر عن آرائك وأفكارك وأحلامك بحرية كاملة للعالم كله
    ومش بس كلام لأ ده صوت وصورة وفيديو كمان
    مش كده وبس كمان هتعرف ازى تسوق المدونة بتاعتك وتطلع منها فلوس
    بس ابعتلنا على -
    طبعا مش ها أحط إيميلهم يعني - واحجز مكانك
    كل الكلام ده بـ 400 جنيه ولو انت طالب او خريج كلية اعلام
    هتاخد 10% خصم يعنى مفيش احسن من كده
    وكمان فيه مسابقة لأحسن مدونة
    الكورس هيبقى من 27-29 مارس 2008 فى -
    برضه أكيد مش ها أحط المكان
     

    يا عالم إختشوا عيب
    التدوين مش بيزنس ولا سبوبة
    ولا مسابقة ستار أكاديمي
    إسمعوا
    أنا مش بازايد على حد ولا باتكلم بإسم حد
    ولا معتبر نفسي الملا وائل عباس أمير المدونين
    بس نبص كده للجيل الأول من المدونين
    ناس تعرضت لكل أنواع المخاطر علشان تعبر وعلشان تقول وعلشان تغير
    منهم اللي إتحبس واللي ها يتحبس واللي لسه محبوس واللي إنتهك واللي إتهدد هو وأهله واللي إترفعت عليه قضايا واللي طلعت عليه إشاعات واللي إتحارب في أكل عيشه واللي إتقطع اكل عيشه خالص واللي اتلصصوا على حياته الشخصية واللي إتهاجم إعلاميا وناس خسرت كتير أوي أوي في سبيل إنها تدون
    محدش فيهم لما بدأ بدأ علشان يبقى مشهور
    محدش فيهم فتح مدونة علشان يسوقها ويكسب من وراها فلوس
    محدش فتح مدونة علشان يخش بيها مسابقات
    الشهرة والجوايز جاءت بعد سنوات وبعد عناء مازال مستمرا
    فيه ناس كانت بتدون من السجن وناس بتدون وهي هربانة وناس إتحدوا الخوف والترهيب ودونوا في أصعب وأحلك الظروف
    المدونين حركوا الشارع وفرضوا أجندتهم على الإعلام وغيروا كتير وكسروا خوف المجتمع
    المدونين كانوا في وسط المعمعة
    اللي إتكسر له ضلع واللي إتكسرت له كاميرا واللي إترش في عينه فلفل
    المدونين مش رقاصات ولا زي تامر حسني
    مش ده أبدا الأصل في التدوين
    إتقوا الله
    التدوين مش كده
    التدوين ببلاش وحر ومجاني ومفتوح
    وفيه كورسات لتعليمه ببلاش
    وفيه شرح موجود على الأنترنت للي عاوز
    واي حد ممكن يبدأ يدون من مافيش وبدون أي خلفية خالص
    بلاش تأمركوا وتعولموا وتسلعوا التدوين
    قد يختلف البعض مع كلامي هذا
    ولكنه وجهة نظري ورؤيتي الشخصية في التدوين
    والله أعلى وأعلم

    Friday, 21 March 2008

    المولد النبوي وصور من أرشيف الوعي المصري

    المولد النبوي وصور من أرشيف الوعي المصري

    أنا لسه في أجازة
    بس قلت آجي أسلم عليكم
    كل عام ومصر بخير
    مسلمين وغير مسلمين
    لأن حلاوة المولد واحدة من الحاجات القليلة اللي بتوحد المصريين
    يعني الحلواني القبطي بيبيع حلاوة المولد للمسلمين وبيهنيهم
    والطفل القبطي أكيد لما يشبط في الحلاوة أبوه مش ها يقول له دي بتاعة المسلمين
    والمسلمين بيدوا جيرانهم حلاوة
    عادات بلدنا حلوة
    وإحتفالاتنا جميلة
    عروسة وحصان
    عروسة ترمز لتكريم المرأة الذي جاء به الإسلام
    بعد أن ألغى وأد - قتل - البنات بسبب الفقر
    وحصان يرمز لفرسان الإسلام
    واخلاق الفروسية والكرم والشهامة والعزة
    وليس أخلاق الإرهاب والإنتحار والحقد والتدمير والتكفير وكره المجتمع
    حلاوة تدخل السرور على لسان وقلب الإنسان
    وعادة حميدة إختص بها المصريون ذوي الثقافة العريقة فرعونية وقبطية
    يبقى ليه بقى المناقشات والأسئلة والفتاوى السخيفة بتاعة كل سنة من عينة الإحتفال بالمولد واكل الحلاوة والعروسة والحصان حرام وبدعة وشرك
    الإنسان ربنا إداله مخ يعرف بيه الصح من الغلط
    وإيه اللي يضر وإيه اللي مالوش ضرر
    وإدعس على شيوخ الوهابية والسعودية والسلفية المصرية
    ربنا ما يقطع لنا عادة
    ولو كره الكارهون
























    Friday, 14 March 2008

    أجازة من التدوين

    أجازة من التدوين

    بقالي كتير ما أخدتش أجازة من التدوين
    فقلت أرتاح شوية وأريحكم مني
    يمكن أطول شوية المرة دي ويمكن لأ
    عندي مشاكل وضغوطات كتير على كل المستويات محتاجة حلول وتفكير وقعدة مع النفس ومش طالبة تشتيت بالتدوين والدخول في خناقات مع ناس ما تستاهلش تضييع الوقت بمحاولة جعلهم أقل غباء لأن ربنا خلقهم كده
    واللهم لا إعتراض
    والدنيا ربيع والجو بديع
    وأنا محتاج أسترخي شوية
    فقلت أسيبكم مع شوية الصور دي اللي ما نشرتهاش قبل كده
    مع إنها متصورة سنة 2006
    وكلها متصورة جوة مصر مش براها
    آه والله
    الجمال ده كله جمال مصري
    ده غير جمال إبن سوزي اللي ربعه بريطاني زي ما إنتم راسيين
    على الله صوري تسعدكم
    بس نصيحتي ليكم قبل ما أمشي
    دونوا عن مصر وعلشان مصر وما تبقوش زي القرع تمدوا لبره
    لما مصر بتصرخ محدش بيمدلها إيده غير علشان ينهبها ويشتري فيها بالرخص وهي بتقع يتساوى في ذلك العرب والغرب
    لكن لما أي حد بيصرخ مصر بتمدله إيدها
    مصر بتقطع من قوتها وتديله حتى لو مش محتاج وعايش أحسن مننا
    لأن ده طبع مصر وطبع شعب مصر اللي بينسى الإساءة والإرهاب وخطف السفن والطيارات ويتعاطف
    لكن إحذروا من اللي بيتاجروا بكل القضايا
    إحذروا من اللي بيوتهم مفتوحة ومليانة خير من التجارة بدم الشعوب
    إحذروا من اللي من مصلحتهم عدم حل المشاكل
    لأن حل المشاكل معناه إن بيوتهم هما تتخرب
    وها تلاقوهم بيزعقوا وينعقوا على الخراب ويعادوا ده ويشتموا ده
    وجيوبهم دفيانة بالمال الحرام
    دايما شغالين على القضايا اللي تجيب فلوس
    لكن مشاكل مصر فقرية محدش بيمول علشان يتبنوها
    ولا حد ها يدفعلهم علشان يكتبوا عنها
    يا شباب ما تخلوش كبار حيتان الإسترزاق السياسي يضحكوا عليكم ويستغلوا همتكم وعزيمتكم في تكبير نفوذهم وفلوسهم وانتم فاكرين انكم انصار قضية في حين انكم مجرد توابع
    لأن بكره ها تكبروا وها تفهموا وها تعقلوا
    ساعدوا مصر الأول تقف على حيلها
    تبقى قوية
    ساعدوها حتى تتمتع بالعزة والمنعة على العدو وعلى اللي عامل أخ أو صديق
    ساعدوا شعبها يكون عنده كرامة ومحترم جوه بلده وبراها
    حلوا مشاكل مصر الأول
    رجعوا حقوق مصر الأول
    وبعدين نبقى نفكر في حل مشاكل غيرنا
    محدش بيسيب إبنه يتخطف وينقذ إبن غيره
    محدش بيسيب بيته يولع ويطفي بيت غيره
    محدش بيسيب الحرامي في بيته ويطارد لصوص الحي
    محدش بيسيب مراته تغتصب ويعمل شهم مع مرات غيره
    مصر حلوة
    وأحلى من غيرها بكتير
    حتى شوفوا


































































    Saturday, 08 March 2008

    هيه هيه أنا بحب إسرائيل قوي بقى الله مالكم بينا

    هيه هيه أنا بحب إسرائيل قوي بقى الله مالكم بينا

    يا حبيبتي يا إسرائيل
    وباحبك أكتر لما بتموتي في الفلسطينيين
    أيوة إفعصيهم كمان شوية والنبي
    عارفة باموت فيكي بالذات لما بتفعصي البيبيهات بالقنابل
    والناس بقى تبتدي تتبادل الصور الرائعة لسلطة لحوم الأطفال المهروسة
    أيوة أصل الصور دي موضة وإحنا بنتلذذ بيها
    ليه بس إنسحبتم بدري كده مش عوايدكم يعني
    ويا سلام بقى لما تموتي مصريين كمان على الحدود
    بتزيدي غلاوة بشكل غير محدود
    الرصاص الإسرائيلي على قلبي زي العسل
    مش زي الرصاص الفلسطيني البلدي البيئة الوحش ياي
    تخيلوا لثانية واحدة إن ده مثلا بجد هو اللي بيدور في عقلي حاليا
    لكن تخيلوا هكذا يحب أن يصورني البعض
    وربما لضحالة عقلهم
    اللي هو عندهم يعني عضمة الجمجمة مليانة لربعها مية وسخة بتلق فيها وبيعوم فيها صراصير بتغرق
    فبيحبوا يتخيلوني كده
    ها
    إيه النظام
    حد إبتدى يحس إنه إبن هبلة وحب يزايد عليا فطلع عبيط
    لسه
    طب نكمل
    أصل الحكاية وما فيها إنه إبتدت تجيلي إيميلات وتعليقات شتيمة بعد ما الإسرائيليين قتلوا بنت مصرية على الحدود بتحتوي كم لا بأس به من الشرمطة المعتادة من الحنجوريين والمزايدة المطلوبة لإبقاء ربع المية الوسخة اللي بيلق في دماغهم في  مكانه لأنه لما بيلق بيوجعهم وبيحسوا بعقدة نقص مخ
    وده طبعا بدل ما يهاجموا الإسرائيليين
    بيقولولي بقى فينك يا عم الشرموط من قتل البنت المصرية ما بتتكلمش ليه لما حبايبك الإسرائيليين إعتدوا على السيادة المصرية ولا هو إنت بتزعل بس لما الفلسطينيين يعتدوا على السيادة المصرية
    مسخرة
    منتهى المسخرة
    وكأن العملية خيار وفقوس

    طب يونيفورم مين ده يا عرصات ياللي بتقولوا مش حماس
    وفيه ناس لازم نظيط ونفرح لما يعتدوا على سيادتنا ونعتبرهم بيناضلوا وبيحررونا
    ونفلقسلهم طيازنا كمان علشان ينيكونا
    الناس دي بجد مش بيحسوا إنهم ببساطة معرصين
    حقيقي مكسوفلهم
    العملية مش الهجوم عليا انا بس
    لا
    ده الهجوم على كل من تجرأ وفتح بقه وقال حدودنا وسيادتنا حتى من المعارضة نفسها
    الهجوم يتبناه عدد من الصحفيين والسياسيين المعرصين الأممجية القومجية والإسلامجية والشيوعجية القبيضة والمتاجرين بدماء الشعوب واخيرا بدم الفتاة المصرية القتيلة ليس لا سمح الله للتنديد والتشهير بإسرائيل لكن عوضا عن ذلك التشهير بكل من يدافع عن سيادة مصر وحدودها ضد البلطجية والعواطلية والصيع والإرهابيين
    الله أعلم بالنيات وبالسبوبات وبالتمويلات وبالبحث عن وظيفة في بلاد النفط والبحث عن شنطة جاية من ليبيا أو تمويل لجرنال أو حزب أو محطة فضائية أو البحث عن جهاز مخابرات من اللي بيتبنوا الأفاقين لتنفيذ أجنداتهم اللي ياريتها ذكية لكن غبية زي حكام الدول اللي منها الأجهزة دي أو حتى البحث عن زعيم سياسي حنجوري يحطهم تحت باطه
    مش ها نتكلم في الحاجات السرية دي
    خلينا نتكلم عن الحاجات الواضحة للجميع

    في ماذا إختلفت حماس عن الغزاة الهكسوس وعن إسرائيل

    البلدوزرات دي
    تقدر تهوب ناحية الحدود الإسرائيلية ولو من بعيد لبعيد
    تقدر تهوب ناحية سور الفصل العنصري
    طبعا لا يا مغفلين
    ليه
    علشان اسرائيل دولة محترمة ذات سيادة
    ده مش أنا اللي باقول
    ده لسان حال عرصات حماس واللي بيتشددولهم من عرصات مصر الأممجية على مختلف الألوان على الرغم من إن الإسرائيليين لما بيعملوا توغل بيبقوا زي السكينة في الحلاوة وما بيتكبدوش أي خسائر تذكر على يد أسود أو بالأصح لبؤات حماس ولبؤات مصر اللي بيتشددولهم وعاملين أسود بس على حق الشعب المصري أن يكون في دولة ذات سيادة حتى لو فرط النظام الحاكم في هذه السيادة لان ده مش معناه ان الشعب ووطنيته تسمحله هو كمان يسكت على التعدي على سيادة بلده ولو حتى بصنعة لطافة تحت أي مسمى معرص مغرض ولو رضينا بصنعة لطافة نسوانجية حماسجية لما حماس زقوا النسوان على الجنود في المعبر أكيد ما نرضاش بشرمطة بالسلاح والقنابل والبلدوزرات ولما عمال غلابة يصلحوا الحدود ينضرب عليهم رصاص
    وسواء بقى اللي بيقولوا طز في مصر وأبو مصر وعاوزين رئيس ماليزي
    أو العرصات بتوع قومية إشتراكية وحدة
    اللي قلبت بقت قومية رأسمالية خليجية وحدة في المشمش
    أو بتوع نضالات الشعوب ضد الإمبريالية
    فمصر بقى من وجهة نظرهم فهي مثل خرقة المطبخ والمفروض تتحمل كل أنواع الوساخات من كل الأطراف وما تقولش لأ
    اللي يمسح فيها حمامته ماشي واللي يمسح فيها طيزه ماشي
    والإسم دور مصر وواجب مصر اللي محدش له واجب ناحيتها
    طب تعالوا نشوف مواقف العرصات دول
    هل هم فعلا مع حرمة الدم المصري
    وهل الدم المصري حلال لناس وناس
    طب تعالوا نشوف عملوا ايه العرصات دول لما كان صدام حسين بيقتل في المصريين ويبعتهملنا في توابيت
    كانوا العرصات بيروحوا يقبضوا من فلوس ودماء الشعب العراقي وبتروله وبتجيلهم هدايا مرسيدس من القائد العرص ذابح شعبه
    العرصات دول بيكتبوا في جرايد الخليج اللي ما بيقراهاش حد ويقبضوا بالعملة الصعبة في حين إن المصريين بيتعاملوا في الخليج معاملة العبيد وبتتسرق فلوسهم وبيعتدى على أعراضهم ولو إشتكوا هما اللي بيتسجنوا
    العرصات دول بيشتغلوا في فضائيات دول فاتحة أراضيها على البحري لقواعد القوى الإمبريالية اللي بينبحوا ويزعقوا ضدها في تلك الفضائيات
    وإشي مكاتب تمثيل تجاري إسرائيلي
    وإشي سياحة وتنس إسرائيلي
    هؤلاء صفقوا لذبح السفير المصري في بغداد
    ولذبح مواطن مصري أيضا بدون محاكمة
    ولضرب وزير خارجية مصر بالجزم
    ولما خولات وشراميط الخليج بيدوسونا بعربياتهم الفارهة في شوارعنا وعلى أرض بلدنا
    بيطلعوا يقولوا العلاقات المصرية الخليجية
    والصلح خير
    وإقبلوا الدية
    وكلب وراح
    المهم الإستثمارات والسياحة التعريصية الخليجية ما تتضررش
    أحه يا إستثمارات وأحه كبيرة يا سياحة بين قوسين
    إسرائيل ليست فقط هي الدولة الوحيدة التي تعتدى علينا وعلى سيادتنا وعلى شعبنا وإن كانت أكبرهم إعتداء عبر كل الحروب التي خضناها ضدهم وتورط فيها نظامنا بسبب تسخين الأخوة والمزايدات برضه - راجع تسخين البعثثنجية بتوع سوريا والعراق للبكباشي عبناصر قبل وكسة سبعة وستين - ونظامنا الذي فرط في أراضينا في أم الرشراش وفي إسترجاع عظام أسرانا وفي حقوق الجنود والمدنيين المقتولين على الحدود في زمن السلم
    لكن إسرائيل لا ينتطح عنزان في كونها عدو لا نتوقع منه الخير والحنية
    يعني يا ولاد الزانية مش متوقعين إن إسرائيل تدي الطفلة شكاليطة مثلا
    لكن لما تيجي ممن يدعون الأخوة والبطيخ والكلام المعرص الكبير قوي
    يبقى ايه الوضع يا منايك

    لكن نقول ايه في الشراميط والعرصات المأجورين يتعمدون دائما الغفران لكل من يسمونه أخ في العروبة أو في الإسلام أو في البطيخ مهما إعتدوا على بلدنا وشعبنا لا يختلفون في ذلك قيد أنملة عن النظام الحاكم
    الإعتداء هو الإعتداء مهما كانت جنسية المعتدي
    مصريين كثر رجال ونساء قتلوا في بغداد والقيت جثثهم على عتبات السفارة المصرية مع بداية الغزو الأمريكي للعراق
    مصريين كثر قضوا نحبهم في جيش صدام في حروبه الحمقاء مع كل جيرانه أدخلوا الجيش قسرا
    سائقين وعمال مصريين قتلتهم الفصائل العراقية المتناحرة بدون جريرة
    عملتوا ايه في المصريين اللي خاطفاهم امريكا وحاطاهم في جوانتانامو
    والمصريين اللي بتخطفهم امريكا من مطارات العالم على انهم ارهابيين
    ثلاث جنود مصريين قتلهم الفلسطينيين في الإقتحام الأول للحدود عام 2006
    ومعروفة جيدا شخصيات من أطلقوا عليهم الرصاص
    لماذا لا نطالب بتسليمهم ومحاكمتهم
    لماذا لا يطالب العرصات بالأمير القطري الذي داس خمسة مصريين بسيارته
    راحوا فين الأميرتين السعوديتين اللي ضربوا دكتورة مصرية في بيتها في مصر على أرض بلدها
    حصل إيه للأمراء السعوديين اللي كلابهم بتنهش لحم أطفال وكبار مصر في الفنادق الخمس نجوم
    حصل إيه للأردني اللي خلا المصريين ينزلوا يسلكوا بلاعة صرف صحي في مصنع فراخ واتخنقوا وماتوا
    حصل ايه مع البوليس الاردني اللي مصريين راحوا اشتكوله قاموا قبضوا عليهم وخلوهم يسيقوا القسم
    حصل ايه في موضوع العمال المصريين اللي اتجلدوا في السودان
    حصل ايه في جرائم هتك عرض الاطفال المصريين في دول الخليج
    حصل ايه في موضوع اعدام المصريين في ليبيا
    عملتم ايه في قضايا نصب الخليجيين على المصريين في الخليج
    ده إحنا بقينا ملطشة
    بسبب اللي زيكم
    كفاية بقى
    الواحد زهق ومش ها يسكت ولا يتكسف خلاص
    المفروض إنتم اللي تتكسفوا على دين أمكم بقى
    ومن هنا ورايح أي عرص يسيب قضايا مصر بلده ويتكلملي عن غزة والعراق وبلاد تركب الجمال يبقى هو اللي خاين وعميل وصهيوني ومعرص وبياخد فيها
    أي حد يسيب حديد عز وقزازة الزيت وكيلو السكر وطابور العيش يبقى مش مصري وأمه زانية فيه
    -
    أنا مش ها أدافع عن نفسي ضد ما يقال
    لأنه أتفه من أن يرد عليه بالحجة
    واللي عاوز يعرف وائل عباس ها يعرفه كويس
    واللي عاوز يشتم وائل عباس برضه اكيد ها يلاقي حاجة يشتمه بيها ومش ها يغلب
    واللي عاوز يعمل حاجة كويسه لبلده ها يعمل
    واللي عاوز يكسر مقاديف اللي بيعمل فهو بيعمل كده لأنه فاشل مش لاقي نفسه

    Saturday, 01 March 2008

    مدونة أمنية سعودية لتشويه صورة فؤاد الفرحان

    مدونة أمنية سعودية لتشويه صورة فؤاد الفرحان
    Sign the Petition
    صورة من المدونة تصور الفرحان في ملابس بن لادن وتطالب بعدم الإفراج عنه
    تونس ومصر برعتا في هذا التكنيك الأمريكاوي الجديد
    وهو الذي إستخدم في عهد الجمهوريين في السبعينات ضد الهيبز واليسار الأمريكي وحتى الديمقراطيين
    تشويه المعارضين والنيل من شخصياتهم تحت مظلة الديمقراطية والرأي والرأي الآخر
    فتونس مثلا تسمح لرسامي الكاريكاتير الموالين لها برسم المعارضين كراقصات وداعرات
    وفي مصر شهدنا مدونات امنية تنشأ خصيصا لتشويه صورة المدونين الذين يفضحون أفعال النظام
    وقد بدأت السعودية مؤخرا لكن بغشومية إستخدام هذا التكنيك الجديد
    فلا يكفيهم أن المدون السعودي فؤاد الفرحان محبوس لا يستطيع الرد
    فأنشأوا مدونة تتهمه بالإرهاب وتشوه صورته
    http://dontfreefouad.blogspot.com

    Wednesday, 20 February 2008

    بيان HRINFO حول التحقيق مع وائل عباس

    بيان HRINFO حول التحقيق مع وائل عباس

    وائل عباس يدلي بأقواله كشاهد أمام النيابة العامة
    حول فيديو هتك عرض فتاة وإجبارها على خلع ملابسها

    القاهرة في 19 فبراير 2008م

    قالت الشبكة العربية لمعلومات حقوق الإنسان ، أن النيابة العامة قد استكملت اليوم الجلسة الثانية لأخذ أقوال المدون المصري المعروف "وائل عباس" مدير المدونة الشهيرة الوعي المصري http://misrdigital.blogspirit.com في البلاغ الذي تقدم به محاميي مجموعة المساعدة القانونية لحقوق الإنسان ، في ديسمبر الماضي ، حول فيديو تم تصويره بواسطة جهاز تليفون محمول ، يصور شخص يعتدي على فتاة بالضرب ويجبرها على خلع ملابسها ، وهو يرتدي جراب لمسدس ،في إشارة أنه قد يكون ضابط شرطة ،و تم نشره في مدونة وائل عباس في شهر ديسمبر الماضي 2007م ، والعديد من المدونات مواقع الانترنت الأخرى.

    وكانت نيابة وسط القاهرة قد استدعت وائل عباس في القضية رقم 1560لسنة 2007م ، لسماع أقواله كشاهد في القضية وسؤاله عما اذا كان يعرف أي من الأشخاص الذين يظهرون في فيديو التعذيب أو الشخص الذي أرسل له شريط الفيديو عبر البريد الإليكتروني .

    وفي التحقيق الذي حضره جمال عيد المحامي ومدير الشبكة العربية لمعلومات حقوق الإنسان ، والمحامي أسامة عبدالمنعم ، قرر عباس أن بدء التحقيق في هذه الواقعة من قبل النيابة العامة هو خطوة إيجابية ، وأنه يتمنى أن يساعد بنشره لهذا الفيديو في الوصول إلى هؤلاء الجلادين الذين كانوا يجبرون فتاة على خلع ملابسها ويعتدون عليها بالضرب بأعصاب باردة وعدم مبالاة بحجم وفظاظة هذا الانتهاك الصارخ.

    يذكر أن مدونة وائل عباس كانت هي المدونة التي ساهمت في كشفت واقعة تعذيب لسائق وتم تصويرها عبر جهاز تليفون محمول ، حيث تم الكشف عن الضابط الذي ارتكب الواقعة المشينة ، وهي القضية التي عرفت باسم الضحية "قضية عماد الكبير" ، حيث حكمت المحكمة بسجن الضابط ثلاث سنوات قبل أشهر قليلة.

    والفيديو الأحدث الذي تتولي النيابة العامة التحقيق فيه هذه الأيام ، يظهر بوضوح ثلاثة أشخاص بالإضافة إلى الفتاة التي تم الاعتداء عليها ، وتظهر صور الجميع على مدونة وائل عباس ، حتى يتمكن أي مستخدم للانترنت من المساعدة في التعرف سواء على الفتاة أو على الأشخاص الذي اعتدوا عليها وإبلاغ النيابة العامة عنهم.

    وقالت الشبكة العربية لمعلومات حقوق الإنسان " إن المدونين يثبتون مرة أخرى أنهم داعم أساسي لحركة حقوق الإنسان ومواجهة الانتهاكات المختلفة ، مما يوجب دعمهم و تهيئة المناخ لأن يعملون ويطرحون أرائهم ومواقفهم دون تخويف أو رقابة".

    جدير بالذكر أن وائل عباس الذي يبلغ عمره 33 عاما ، قد حصل على جائزة المركز الدولي للصحفيين لعام 2007م ، كما تم ترشيحه من قبل شبكة الـ CNN كشخصية العام ، تكريما له وتدعيما لجهوده كمدون ساهم في كشف العديد من الانتهاكات وتعرض لحملات تسعى للتشهير به بسبب جهوده في رفع سقف حرية التعبير في مصر والعالم العربي.

    البيان على موقع الشبكة إضغط هنا

    Tuesday, 19 February 2008

    حقيقة فيديو المسيحية التي أسلمت

    حقيقة فيديو المسيحية التي أسلمت

    قالو مسيحية مصرية وأسلمت واهلها بيقتلوها
    وقالو مسلمة مصرية وإتنصرت وأهلها بيقتلوها
    وقالوا بنت غزاوية مش لابسة طرحة وحماس بيقتلوها
    وركبوا على الفيديو قرآن
    حقيقي مش عارف ليه العالم فيه ناس بنت دين كلب كده
    وليه بالذات المسيحيين والمسلمين في مصر بيعملوا الحركات الوسخة دي أو مين بيعمل فيهم كده وهما بيصدقوه ولمصلحة مين نشر فيديو زي ده على انه كده وازالة الصوت الاصلي من عليه وتركيب قرآن مكانه
    مش ممكن كمية الناس اللي بعتولي الفيديو ده علشان أنشره ولا حد فيهم عارف حقيقته رغم اني شفته من سنة تقريبا وطالما العملية بقت كده يبقى لازم أوضح حقيقة هذا الفيديو الذي يتناقله المصريون بمنتهى الغباء الطائفي
    من الآخر الفيديو ده مش مصري أساسا
    ده فيديو من العراق
    من مدينة الموصل
    متصور يوم 7 أبريل 2007
    ودي بنت اسمها دعاء خليل أسود
    عندها 17 سنة
    من الطائفة الكردية اليزيدية
    حبت ولد مسلم سني وهربت علشان تتجوزه
    أهلها ما عجبهش طبعا
    وفي جو الوساخة الطائفية الموجود في العراق بسبب أمريكا والسعودية وإيران
    والحرب بالوكالة بين السعودية وإيران على أرض العراق
    قاموا عملوا فيها زي ما شفتم كده في هذا الفيديو المؤلم وهو ليس أكثر الفيديوهات التي وصلتني إيلاما بالمناسبة
    فقد وصلتني فيديوهات لنساء تذبح كالشياه وتفصل رأسها عن جسدها وكله في العراق ربنا يعفي عنه ويحرس مصر من كل إبن كلب مسلم أو مسيحي أو يهودي أو أي كان عاوز يولع فيها بنشر فيديو زي ده
    ودي صورة البنت العراقية

    دعاء خليل أسود
    بالمناسبة السنة العراقيين ما عجبهمش اللي حصل للبنت قاموا خطفوا أوتوبيس عمال يزيديين فيه 23 عامل ونزلوهم من الأوتوبيس وضربوهم بالنار بعد الحادثة بتاعة البنت بشهر تقريبا

    Monday, 18 February 2008

    أقوى من سنجام وسوراج وقمر أكبر أنطوني

    أقوى من سنجام وسوراج وقمر أكبر أنطوني

    معلش
    ما عودتكمش أكون ناقل للأخبار من أي مصدر خارجي
    عودتكم اخباري كلها طازة وحصرية
    وإن غيري هو اللي ينقل أو يسرق من عندي
    وآخرهم جريدة الفجر لسه من كام يوم
    ينقلوا موضوع من عندي بدون ذكر ليا وكمان يهاجموني
    لكن ما علينا مش ده موضوعنا النهارده
    بجد برغم كل اللي شفته وكل اللي وريتهولكم هنا على الموقع بما فيهم فيديو عماد الكبير لكن اللي ها تقروه دلوقت فاق كل حاجة وفاق في قسوته وغرابته وتعقيده أقوى الأفلام المأساوية الهندية بدون أي ذرة كوميديا أو موسيقى تصويرية حزايني أو إستعراضات أو ألوان مبهرة
    والبطل ضابط شرطة فاق في قسوته وجبروته وكفره - بكل ما هو إنساني - هولاكو وجنكيز خان وهتلر وموسوليني وجاك ذا ريبر وتشارلز مانسون جمعاء حتى ليمكنهم جميعا خلع قبعاتهم والإنحناء لعبقريته الإجرامية وحتى أن الشيطان في قعر جهنم ليقهقه فرحا بإنجازات تلميذه النجيب وإستهانته بمقدرات حياة بشر مثله لهم عائلات ومستقبل وأحلام أطاح هو بها
    لهذا أنقل لكم هذه القصة التي هي للأسف حقيقية ومصرية مائة بالمائة من الصحافة المصرية المطبوعة
    شقيقين
    واحد فيهم لقى جثة في مقلب زبالة
    راح بلغ
    راحوا قبضوا عليه هو وأخوه
    ولبسوهم التهمة
    وخدوا مؤبد
    وهما في السجن
    بعد ما قضوا فيه تمن سنين
    لقيوا القتيل حي يرزق معاهم في السجن
    اومال مين القتيل
    شخص مجهول
    طب ليه ما ظهرش وقال انه حي
    رئيس المباحث خوفه وبعده من البلد
    أحد الأخين أصلا كان خارج البلده
    اهل القتيل اصلا قالوا انها مش جثته ورفضوا التسلم والدفن
    اتنين شهود يعرفوا ان القتيل صاحي ومن التعذيب قالوا انه هو الجثة
    القصة اللي كتبها الظابط انهم قتلوا القتيل وداسوا عليه بعربية وخدوا الفلوس اشتروا بيها بانجو واحتفلوا
    تقرير الطبيب الشرعي لم يجد مخدرات في دماء الشقيقين
    الظابط فقط هو من حدد شخصية القتيل ولم بتعرف عليه أحد من البلد
    الظابط كمان لفق لزوجتيهما قضايا
    واحدة منهم طلبت الطلاق علشان تخلص من تحرش الشرطة
    أمهم ماتت بالغرغرينا من السكر قبل ما يحكموا عليهم
    أبوهم مات بعد الحكم من الحسرة عليهم
    جدتهم جالها عمى من كتر البكاء عليهم
    الاسرة باعت كل ما تمتلك واستلفت من اجل القضية
    أحدهما له ابنة عمرها ثمان سنوات لم يرها من قبل
    الشقيقين ضربا بالكرابيج وصعقا بالكهرباء حتى خرج الصديد من جروحهم وعاشت فيها الديدان واخوهم الثالث عرف بالصدفة لما لفقوله سرقة مواشي
    راح اشتكى للنيابة علشان تفتش عالقسم
    النيابة راحت مالقتهمش والظابط قال هربوا
    وبعدين ظهروا تاني
    والظابط قال قبضت عليهم تاني
    الظابط قبض على زوجة واحد فيهم وطفلها اللي عنده سنتين
    الظابط وصل في الطفل اسلاك كهربا وهددها يكهربه لو ما قالتش ان جوزها قتل
    الزوجة لقيت القتيل وخدته علشان يشهد انه حي
    الظابط اجبر القتيل يتهمها بخطفه
    ويقول انا مش القتيل
    أنا دماغي لفت
    إقروا القصة بالتفصيل في الوصلات التالية
    المصري اليوم تكشف وقائع تلفيق قضية قتل لشقيقين والقتيل حي يرزق
    اعترافات شكمان نصياً من واقع محضر سجن طنطا الذي حرره المقدم خالد الشرقاوي

    أسرة ضحيتي التلفيق في طنطا تؤكد تعرضها للتنكيل والملاحقة من المباحث لإرغامها علي الصمت