Ok

By continuing your visit to this site, you accept the use of cookies. These ensure the smooth running of our services. Learn more.

Saturday, 15 September 2007

فيديوهات مدون في أمريكا

فيديوهات مدون في أمريكا

فعاليات كتير حصلت وحضرتها وغطيتها وما نشرتهاش
ومش عارف راكنها ليه
أنا بقيت كسلان يمكن ولا ده من الإكتئاب والإحباط على المستويين الشخصي والعام
ولا يمكن بأشاور عقلي أخش التقفيصة أنا كمان زي غيري
وإشمعنى أنا يعني اللي لازم أبقى نشيط وباعمل حاجة وهو أصلا مافيش حاجة بتحصل
خليني كده أحسن بدل ما أخش هوجة المزايدات الناتجة عن حالة الفراغ اللي بيعاني منها الكل
خصوصا إني معبي من الإخوان اللي مدونينهم بيشتموني
وبرنامج حزبهم الجديد الذي لا يقال عنه إلا أنه برنامج وقح خصوصا فيما يتعلق بالحريات
وحتى عبد المنعم صديقي طلع في قناة الحرة يقول المدونين العلمانيين
عموما كل سنة وانتم طيبين بمناسبة رمضان
مش طالبة أتكلم في السياسة كمان وانا صايم علشان كده قلت أنشر حاجة خفيفة وان كانت برضه غصب عني لن تخلو من السياسة لان كما يقول المثل يموت الزمار وصوابعه بتلعب
وفي حالتي أنا بتدوس على زر - الشاتر - بتاع الكاميرا
طبعا فيه ناس كالعادة ها تدخل تشتم وتلعن كانها مدونة ابوهم مش مدونتي وانا حر فيها زي ما عملوا لما غطيت رحلة إسطنبول
وناس تانية ها تخش تزايد وتقول لي ليه مش بتتكلم عن قضايا الصحفيين اللي بيتحاكموا وصدر ضدهم أحكام
وها تلاقي الناس كلها بتهاجم قضاء مصر النزيه الشريف العفيف اللي ما يصحش حد ييجي جنبه كما يزعم اللواء الكذاب احمد ضياء وكما زعم محامي اسم النبي حارسه وصاين - عصايته - من العين سي اسلام نبيه باشا بيه
مش عارف ايه الصحوة دي كلها وكانت فين لما قضاء مصر طلع الواد بتاع شها العفريت الحبرتقي اللي بيتشاقى هو اللي كهرب نفسه وحرق نفسه وبعد كده انتحر ولا مش كده بس ده الراجل الارهابي بتاع حدايق القبة ابو دقن طلع هو كمان كهرب وحرق نفسه وبعد كده انتحر علشان يرمي بلاه على ظابط امن الدولة الشريف العفيف المكافح ابن الناس - شوف يا اخي الافترا بتاع الارهابيين وصل لحد فين - لا وكمان الارهابي مخلف ارهابيين اطفال صغيرين سابهم وراه من غير ما حد يصرف عليهم علشان يطلعوا ارهابيين على اصله بقى وعارفين ان البوليس قتل ابوهم والواد بتاع امبابة طلع هو اللي كان بيلطع نفسه بالقفا كمان والظابط طلع براءة وجالي يطلعلي لسانه في محاكمة إسلام نبيه ويوريني ازاي انه بره
وما سمعناش حد إعترض بجيصة أو حتى فسية
دلوقتي بس بننتقد قضاء مصر ومش عاجبانا الاحكام
يا ترى لما الدور ييجي علينا ها يبقى معانا فلوس الغرامة والكفالة
اللهم إني صائم
علشان كده قلت مش ها اتكلم في السياسة الأول بس أعمل إيه إنتم اللي إستدرجتوني في الكلام
ما علينا
نرجع لموضوعنا
أنا قلت أسلي صيامكم وآخدكم في جولة سياحية في بلاد الشيطان الأكبر أمريكا على رأي أحمقي نجاد - ودي بالمناسبة مش من عندي ده الإيرانيين هما اللي بيسموه كده والله
ودي مش تغطية كاملة للسفرية لكن دي بس الفيديوهات المتاحة اللي انا صورتها هناك
والتغطية الكاملة بقى ربنا يسهل وعليكوا خير وربنا يدينا ويديكم طولة العمر ويدينا الحرية من الوطني والإخوان ومن امريكا والسعودية الوهابية ومن مبارك وولده جمال
لكن قبل ما نروح امريكا ودونا أسبوع عمان في الأردن
ويا أخي ما يختارولناش أوتيل نقعد فيه غير سبحان الله راديسون ساس اللي كان فيه التفجيرات اللي مات فيها مخرج فيلم عمر المختار مصطفى العقاد
وده كان فيديو من شباك الغرفة اللي كنت قاعد فيها

إضغط هنا
وإستقبلتني واشنطون بالأمطار والجو البارد وحمدت الله إني ما جيتش في التلج لأن طلع إن الهدوم اللي عندي كلها حتى لو لبستها فوق بعض ما كانتشي ها تنفع لأني كنت لابس جاكت جلد وتحتيه جاكت بزعبوط وتحتهم بلوفر وبرضه مافيش فايدة
الملابس الشتوي اللي عندنا في مصر دي ورق الصراحة
ودي جولة بالأوتوبيس في شوارع واشنطون الماطرة

إضغط هنا
وبما إني في واشنطون كان لازم أمسي على حبيب الكل الحاج بوش أعظم حشاش حكم امريكا واكبر أفيونجي بيعرف يتكلم في السياسة أمام الإعلام وعارف الفرق كويس بين استراليا واوستريا او النمسا

إضغط هنا
وكان لي نصيب أغطي المظاهرات حتى وانا هناك ودي مظاهرة نظموها الناس بتوع حركة ماس او مسلمي أمريكا قدام السفارة المصرية في واشنطون وفي الفيديو ها تشوفوا نورا يونس وهي بتخطب وتهتف

إضغط هنا
وده راجل طيب كان واقف يغني قدام البيت الابيض اغاني عن السلام وعلى فكره ده مش شحات ده متظاهر والاغاني كانت جميلة وحزينة لدرجة ان عنيا دمعت وقلتله شكرا انت جميل

إضغط هنا
وده ميدان دوبونت سيركل اللي سكنت فيه لمدة اسبوع وبالنسبة لي انا شخصيا هو احلى حته في واشنطون المملة وده يوم كده نزلت لقيت الناس بيرقصوا في الشارع ولحد دلوقت ما اعرفش ليه وما سالتهمش ليه بس صورتهم

إضغط هنا
ومن نافورة ميدان دوبونت سيركل لما الجو ابتدى يدفي ونخش على الصيف لفت نظري البط المهاجر وبالذات ذكر وانثى البط دول لانهم كانوا مع بعض على طول وكانوا مستمتعين بالشمس ومياة النافورة في ذلك اليوم فحسدتهم على راحة البال والحب المتبادل وبرضه صورتهم
على فكرة في عالم الحيوان دايما الدكر احلى من النتاية

إضغط هنا
وده برضه حمام من دوبونت سيركل كان فيهم دكر دبور عامل نفسه بياكل بس هو بيحرجم على الحريم لكن على مين لقطته برضه

إضغط هنا
وأنا في واشنطون زرت ستوديوهات الجزيرة إنجليش بناء على دعوة الزميل عماد موسى وكان على الهواء برنامج ريز خان مستضيف هبة قطب من القاهرة

إضغط هنا
وده مؤتمر صحفي للمتحدث يإسم الخارجية الأمريكية من اللي بتشوفوهم في التلفزيون منقولين على الهواء بالقمر الصناعي ومحسوبكم بقى كان هناك

إضغط هنا
وده مؤتمر صحفي كنت بأرد فيه على أسئلة الصحفيين عن التدوين والحريات في مصر
شفتوني وانا ماسك الميكروفون
هاهاها

إضغط هنا
ما قدرتش ما أروحش نيويورك - ذا بيج آبل أو التفاحة الكبيرة - خصوصا وإن الحياة مملة جدا في واشنطون فأخدت اوتوبيس من الحي الصيني بيروح نيويورك وقعدت هناك يومين وللأسف مكانش معايا ولا رقم تليفون حد اعرفه في نيويورك واضطريت ابات في اوتيل - يعني اللي وفرته في الاوتوبيس الصيني وعملت ناصح كعيته في الاوتيل - وده فيديو من فوق مبنى الإمباير ستيت أعلى مبني في نيويورك واعلى مبنى في العالم سابقا

إضغط هنا
ومن أهم الأماكن في نيويورك ميدان تايمز سكوير اللي بيحسسك كأنك عايش جوه إعلانات التلفزيون وللأسف الجيش الأمريكي كان حاطط مركز تطوع متنقل للجيش الأمريكي في وسط الميدان منظره عكنن عليا ولو إني كنت باركب المترو في واشنطون من المحطة اللي تحت البنتاجون وباشوف العسكريين والاشكال الوسخة دي كل يوم

إضغط هنا
ودي جولة بالأوتوبيس في شوارع نيويورك أو بالأصح شوارع مانهاتن

إضغط هنا
بعد ما قعدت في دوبونت سيركل أسبوع سكنت في اليكساندريا - أو الإسكندرية - في ولاية فيرجينيا لمدة أسبوع برضه وبعدين بقية المدة قضيتها في مقاطعة أرلينجتون برضه في ولاية فرجينيا وكنت بأنزل شغلي في مجلة سليت كل يوم في واشنطون بمواصلتين أولهم أوتوبيس لحد مبنى البنتاجون وبعدين باخد المترو من تحت البنتاجون زي ما قلتلكم
أي والله محطة المترو تحت البنتاجون ما نقلوهاش والغريب ان محدش بيوقفك يقولك بطاقتك يا كابتن او باسبورك يا كابتن ولا بيفتشوا شنطتي رغم اني كنت بابقى شايل شنطة ضهر فيها لابتوب كل يوم مش زي عندنا لو ولية شايلة بطة رايحة بيها السوق يفتشوا تحت جناحاتها أحسن تكون حاطة متفجرات تفجر مترو الأنفاق
وده فيديو من مهرجان إسمه مهرجان أرلينجتون للتذوق يظهر بيتعمل كل سنة علشان الناس تجرب مطاعم المنطقة وأحلى حاجة فيه جنب الأكل هي العاب الاطفال والتسلق وساعتها اتمنيت لو كنت لسه طفل

إضغط هنا
وده فيديو تاني كنت باحاول اصور فيه نظام المرور في فرجينيا وبأشرح وبأعلق بصوتي وما كنتش واخد بالي إن الهوا كان ضارب جامد في ميكروفون الكاميرا فكل الصوت اللي طلع كان عبارة عن وش

إضغط هنا
ودي زي ما قلت كانت شوية فيديوهات على ما قسم كده مش كل التغطية بتاعة أمريكا كنت قاعد باسلي صيامي إمبارح ورفعتهم

Comments

و الله يا عم وائل انت اتأخرت كتير
بس جولة لذيذة
أمال الهارد اللي شيع كان عليه إيه بأه ؟

Posted by: AntiZionism | Saturday, 15 September 2007

Ya ragel, tegi America spcially NY wa mat2olsh fel blog beta3ak meen fe Ny ye7b yastadeefak? Da kalam. Da fee 1000 masri hena yetsharraf be zyartak. Da ana saken lewa7di fe beat 4 rooms. If that happen in the future please let us know. here you have my email. If I have your personal email I would send you my phone #. Safwat, NY

Posted by: Safwat | Saturday, 15 September 2007

هى مش نورا يونس دى هيثمية ولا بهائية ولا مش عارفة ايه ؟؟ اتمحكت فى المسلمين وعملت خطيبة وسطهم ليه ؟؟؟ ولا هو اى هبل وطحينة

Posted by: dalia | Saturday, 15 September 2007

لأ يا داليا، نورا يونس مش بهائية. دي غلطة جورنال المصري اليوم.

طحينة؟ أهلا وسهلا.

Posted by: عمرو غربية | Sunday, 16 September 2007

يا مفجاءاتك عاوزين كل يوم من دا متطولش علينا

Posted by: peter | Sunday, 16 September 2007

طيب وايه المشكلة يا وائل لما منعم يقول المدونين العلمانيين
هو انت تنكر انك علمانى

Posted by: أحمد | Sunday, 16 September 2007

المشكله فى فهم كلمة علمانى لان الكتير من الناس بيعتبر العلمانى لادينى والعياذ بالله لكن ممكن العلمانى يكون بيفهم الدين ويطبقه احسن من المتشدقين الذين يتمسكون بالقشور والمظاهر فقط

Posted by: واحد | Sunday, 16 September 2007

hi wael

i'm so hapy to see a egyptian like you ,if i was strong like you ,i was now with my family in egypt.
anyway i will send you some news from Paris

but can i ask you ,do you have a amircan nationalty ???

c u

Posted by: bardesy | Sunday, 16 September 2007

الصحوه موجوده بس الغلبان غلبان وبنص لسان واجره عند الديان

Posted by: المحروسه | Sunday, 16 September 2007

سؤال بره جوهر الموضوع
مين هما المدونين الاخوان اللي بيشتموك
انا متابع كتير من مدونات الاخوان و مش لاقي حد فيهم بيشتمك

Posted by: مدونة ايام و بنعيشها | Sunday, 16 September 2007

Well done wael.Keep up the good work

Posted by: Dr A Samieh, UK | Sunday, 16 September 2007

يا عم وائل منا قلت ليك انا مش قصدي شتيمه ده وصف انا مش شايف فيه عيب وخصوا لناس مؤمنة بأفكارها فليها بأه الناس تتبرأ من أفكارها
ثانيا دنا قلت انهم مدونين رواد لانهم هم أشاعوا ثقافة التدوين في مصر
ثالثا بأه كل سنة وانت طيب
ومش عايزين مشاكل وكل واحد يدخل يداري في بيته اليومين دول
وربنا يسترها علينا وعليك يا عم وائل

Posted by: عبدالمنعم | Sunday, 16 September 2007

يا مسهل كمان 600 سنة كده مصر تتقدم شوية وتوصل لشوية من الي وصلتله امريكا

Posted by: الشاب الفاهم | Sunday, 16 September 2007

اشطاه يا عم وائل هحسدك انا بحسدك فعلا رحت اموركا وشفت نسوان امروكا الي تشرح القفلب اللهم اني صايم
على فكرة انا بتكلم بعد الفطار احسن حد يخش يهذق فيا
مبروك يا وائل وان شاء الله من تقدم لتقدم وتبقى حته صحفي كبير كدا واجي اتعلم منك لما اخش الكلية
سلاموز ورمضان كريم

Posted by: TAFAHA | Sunday, 16 September 2007

ايام و بنعيشها
ياعم تعالي عندي و شوف بنفسك الشتايم في الاخ وائل
اصحاب المدونه عاملين اعلانات ترويجيه لمدونتهم و كلها متخصصه في سب وائل
يعني فيه حدا يعمل مدونه اسمها حقيقة وائل عباس!!!!!؟
كل شغلها سبه و شتيمته

Posted by: ذو النون المصري | Monday, 17 September 2007

حمدا لله على السلامة ياوائل

وكويس جدا انك وثقت الزيارة ونقلتها لنا

وبالتوفيق دائما

Posted by: حسن مشالى | Tuesday, 18 September 2007

.

Posted by: حسن مشالى | Tuesday, 18 September 2007

اي لاديني كلب بيقول ان هو علماني وبيتستر بالعلمانية عشان يحارب الدين

Posted by: كائن حي | Thursday, 20 September 2007

Hi ,

Wael Abbas , Your Really So sweet .. i love your ways when you try to keep us updated with your infos,

Your's SAM

Posted by: Sam | Sunday, 07 October 2007

وائل انا حابب اعمل معاك تبادل اعلانى " بنرات "

بعت ليك اميل على الاميل ده
wa2el_3abbas@yahoo.com

بس موش عارف بقا وصلتك ولا لا ..

لكن تقدر تراسلنى على ...ولا بلاش

انا هحاول ابعتلك اميلات تانى لكن بليز اهتم بالموضوع ده

Posted by: Sam | Sunday, 07 October 2007

The comments are closed.