الوعي المصري

 عدد تذكاري نادر بمناسبة أربعين الوكسة

كان ياما كان
كان عندنا انقلاب عسكري سميناه ثورة
وكان فيه محمد نجيب وجمال عبد الناصر وكمان السودان كانت لسه حته مننا

وكان نجيب الريس
بس يا خسارة
طلع قال ايه
عايز ديمقراطية
ديمقراطية في عينه طبعا
ازاي يقول من يشتغل بالسياسة يخلع رداءه العسكري

فكان لازم يتعفي من منصبه هو كل اللي ساعدوا الانقلاب العسكري
حتى الاخوان
ويتقال ان نجيب كان على اتصال بالاخوان

بس كان لازم يخلصوا منهم بفضيحة

ويقولوا عليهم كانوا ها يقتلوا الزعيم
واتفقوا مع الانجليز على احتلال البلد
ومعارك دموية مع البوليس في شبرا
ومخازن ذخيرة في الاسماعيلية
ومطبعة سرية وأوراق ومفرقعات

أيوه كده خلي البلد تنضف
ويبقى عندنا أقوى جيش في الشرق الأوسط

ويبقى عندنا - صاروخ - بس يظهر علشان نلبسه
وبرضه علشان نبني السد العالي

بفلوس أمريكا ؟؟؟

ولا بفلوس القنال ؟؟؟

ولا بفلوس الإتحاد السوفيتي ؟؟؟
ويبقى عندنا ديمقراطية مشالله
بس مش من بتاعة التعددية والأحزاب والبرلمان والاخوانجي محمد نجيب

ديمقراطية محترمة يتم فيها اختيار اعضاء مجلس الامة من اعضاء الاتحاد القومي
مش انتخابات وكلام فارغ

وهي كده الديمقراطية
الريس يعين الوزرا كمان

ولو ضاعت مننا السودان
ربنا يخلي لنا عبحكيم عامر

ويخلف علينا بسوريا

والعراق كمان

يعني بالصلاة على النبي بقينا زعما في المنطئة
واللي يفتح بقه يتهزق هو وامه وننتفله دقنه

أومال ايه بقى
اعلام قوي
يهزق أي حد

ونتخانق مع الجيران لان الغجرية ست اخواتها
وكمان نعلن الحرب
لا مش على اسرائيل لا سمح الله
على السعودية !!!







انما اسرائيل
فطبعا كنا محضرينلها ومستعدين من بدري

خمستاشر مايو

ستاشر مايو





تسعتاشر مايو





تلاتة وعشرين مايو

والاتحاد السوفيتي ورطنا
ونطرح هنا سؤال عن العمالة للسوفيت

لا تعليق

تسعة وعشرين مايو
والريس نفسه بيقول الاتحاد السوفيتي في جيبنا !!!

ومازال الاتحاد السوفيتي يورطنا اكثر واكثر
والهبل والعملا بس يصدقوا السوفيت

تلاتة يونيو
ومافيش مانع البنك الأهلي يسترزق

والمثقفين يسترزقوا برضه





والمسئول عن الوكسة يتنحى
ويرجع في سبعتاشر ساعة بس
يا بلاش





ومن هنا يبتدي المد الديني وصور الريس اللي بيصلي

وهدايا آيات قرآنية

وشركات الأدوية برضه لابد تستغل الموقف

ودي بقى الدول الصديقة
سينما الستار الحديدي ونعم الاصدقاء

ولسه بندور على السوفيت اللي سابونا باطنا والنجم
بس تقول ايه في العمالة
كان لازم حد يطرد الانجاس دول بقى من مصر بيعملوا فيها ايه

واول المثقفين المسترزقين طبعا مين غير هيكل
هيكل الذي أثبت ان النكسة لفظة أشد من لفظة الهزيمة
فهو لم يستطع ان يلطف من وقع الهزيمة
بل خلق للهزيمة لفظ جديد متفرد يعلق بالذهن ويخلد فضيحة آلهته

وكان لابد من كباش للفداء

وابتدت نوعية اخبار الصفحة الاولى تتغير

ومحاكمة المسئولين عن الهزيمة كانت محاكمة بلاستيك



وطبعا ما قامتش انتفاضة الخبز هنا
بسبب سياسة انتهاز الفرص وانشغال الناس في الهزيمة



لا تعليق



وبدأ عصر التغلب والتحايل على المعايش

وشعراوي جمعة بقى وكده



وطلع بيقرا كتب الشيوعيين اهه
وبيقول ثورة مضادة
أومال كنت بتحبسهم ليه ؟؟؟

ونحاول بقى ننسي الناس ونفرفشهم
ننشر الاخبار الهايفة في والمثيرة في مانشيتات عريضة بعد أخبار الزعامة طبعا
طلاق ملكة جمال السيقان بعد قطع ساقها

تاجر يذبح زوجته وابنتها لان الزوجة خانته مع خطيب الابنة

ويستمر المد الديني كرد فعل للهزيمة
وتصبح الكتب الدينية ذات شعبية مرة أخرى

الطبقية القبيحة تطل في محاكمة إسلام نبيه

صدق أو لا تصدق كانت هذه أول مرة أقابل فيها عماد الكبير وجها لوجه وإلتقطت نوارة نجم هذه الصورة لنا
أمور تبعث على الضحك وأمور تبعث على البكاء وأمور تدفعك لثورة عارمة من الغضب ومواقف تمنع نفسك بصعوبة من التصفيق والتكبير لها
كل هذا في محاكمة إسلام نبيه الضابط الذي يهوى إدخال العصي في البشر
مواطن عادي من منطقة بولاق الدكرور حضر المحاكمة وحكى لي هذه الحكاية الغريبة عن إسلام نبيه قائلا أن هذه ليست اول مرة يفعل فيها إسلام نبيه شيئا مماثلا
فقد سبق له أن أراد القبض على شخص ما وعندما لم يجده قبض على أخته ولكنه لم يحتجزها ولكن ماذا فعل هذا المريض
قام بخلع ملابس الفتاة تماما وجاب بها عارية تماما شوارع بولاق الدكرور !!!
اللهم عليك بالظالمين

في جلسة يوم الخامس من يونيو دخلت القاعة لأجد إسلام نبيه يجلس خارج القفص وهو المتهم بهتك العرض والتعذيب الخ
مش عارف ازاي متهم بتهم خطيرة زي دي يتدلع
يعني ما شفناش ايمن نور مثلا قاعد بره القفص قبل المحاكمة
نظام خيار وفاقوس صحيح
أحدهم قال لنا أن المتهم اللي يدفع خمسين جنيه بيقعدوه بره
مش عارف الصراحة بيدفعها لمين وهل ده إجراء معتمد ولا تبع نظام الهلاهوءا
وياريتهم سكتوا على كده

لكن عماد الكبير كان قاعد قدامه بصفين
قوم إيه حرس المحكمة قوموا عماد الكبير من مكانه ونقلوه الناحية التانية علشان البيه قاعد ما يصحش
ملحوظة
اللي بتشاور دي نوارة مش أمن المحكمة
هاهاها

ثم قبل مجيء القاضي أدخلوا سي إسلام بيه القفص حيث ينتمي أمثاله

وبدأت النيابة بعرض كليب هتك عرض عماد الكبير وكان واضحا على ملامح النيابة الإمتعاض الشديد حتى ان بعضهم أدار وجهه لدى عرض المشهد

ثم عرض فيديو مصور لقسم الشرطة حيث حدثت الواقعة لمقارنته بالمشهد

ثم قدم دفاع المتهم إسلام نبيه إسطوانتين للقاضي عليهما نفس المشهد
واحد بمصاحبة الموسيقى !!!
والثاني يظهر فيه صوت مختلف يقول يا كلب يا حمار يا قليل الأدب !!!

محدش يضحك
لسه وقت الضحك ما جاش
نوادر الدفاع العبقري لإسلام نبيه لم تبدأ بعد
ثم تبدأ مرافعة النيابة

وأكاد أجزم أن هذه أروع مرافعة نيابة أراها في حياتي

شاهد فيديو للمرافعة هنا
فدائما ما كانت مرافعة النيابة مقيتة مفتعلة مليئة بالمغالطات
لكن هذه المرافعة تحديدا منعت نفسي بصعوبة من التصفيق لها حتى لا أخل بنظام المحكمة
وقارنتها بمرافعة النيابة في محاكمة محمد عصام غنيمي العطار المتهم بالجاسوسية
وكانت مرافعة عنصرية بغيضة تحض على التمييز ضد الأقباط وكراهيتهم وتحرض على البروتستانت منهم تحديدا وتتهم الطائفة البروتستانتية في مصر بموالاة الولايات المتحدة وإيمانهم بضرورة قيام دولة إسرائيل

صورة للعطار من أرشيف الوعي المصري
ثم تلتها مرافعة اخرى رائعة للأستاذ ناصر أمين تستحق أيضا التصفيق

وقد تحدث فيها عن قضايا سابقة مماثلة
ومنها قضية مأمور البداري الذي قتله الضحايا جزاء وفاق لفعلته
ثم رفعت الجلسة

ناصر امين يتحدث مع المدونين بعد الجلسة
تغطية جلسة الخامس من يونيو بالفيديو عند نوارة نجم
إضغط هنا
وعند مراقب مصري
إضغط هنا
وعند زنزانة
إضغط هنا
وعند سكوت هانصوت
إضغط هنا
أما جلسة السابع من يونيو فقد كانت من نصيب دفاع المتهمين
وقد نالني منها قسط وافر من الضحك والمقت في ذات الوقت

جلسة سبعة يونيو كانت مختلفة شوية
إسلام نبيه كان جوا القفص من الأول

إسلام نبيه هناك أهه واقف في آخر القفص
والباقي دول متهمين في قضايا أخرى
بعضهم قال أنه من ضحايا تعذيب وتلفيق إسلام نبيه
راجعوا تغطية نوارة السابقة

الصور اللي جاية دي بقى مش زي ما انا ها أشرح كده بالضبط
بس تعالوا نتخيلها كده
تعالوا نتخيل القضية دي إتعملت فيلم
يا ترى المخرج ها يصور اللقطات إزاي

دي لقطة لعماد الكبير ينظر لجلاده داخل القفص

ودي لقطة لإسلام نبيه يشعر بالعار والخزي داخل القفص ويحاول الإختباء خلف العساكر اللي هما فعلا حاطينهم علشان يستخبى وراهم من المصورين الحشريين اللي عاوزين يهدروا كرامة وزارة الداخلية وعيالها

وبعدين من شدة تفكيره في عقاب الآخرة وحر جهنم إبتدا يعرق
ودي بقى لقطة فيديو من الفيلم لإسلام وهو بينشف عرقه

إضغط هنا
لكن معلش
تعالوا نفوق من الفيلم شوية ونرجع لقاعة المحكمة في دار القضاء العالي ونشاهد لقطة فيديو تجمع بين الضحية والجلاد

إضغط هنا

التغطية الإعلامية كانت مكثفة لأنهم كانوا فاكرين ها يصدر حكم المرة دي
وبرضه حضر الظابط بتاع كليب ميدان الجيزة والبياعين



لكن الظابط التاني ما شفتهوش المرة دي

بدأ الأستاذ حمدي من محاميي عماد الكبير
وإتكلم كلام كبير قوي عن الإسلام وإنه إزاي كرم الإنسان قبل كل جمعيات حقوق الإنسان

وبعد كده محاميين إسلام نبيه

أنور عبد الله
وجميل سعيد
وهنا تبدأ الكوميديا

مش ها أطول عليكم لأنهم فعلا رغوا رغي كتير قوي
بس ها أطلعلكم الخلاصة من كلامهم
إسلام نبيه ده إبن عيلة محترمة
وعماد الكبير ده ابن عيلة كلها صيع ومجرمين
ده ظابط وده سواق ميكروباص
ده ضابط عمل في سنة واحدة فوق التمانين قضية مخدرات
همس في أذني أحد المحامين بعد المرافعة ان تمانين منهم باظوا اجراءات
ولما قضية مخدرات تبوظ اجراءات يبقى البيه الظابط ملفقها
يبقى سو ماتش فور بطولة البيه في مكافحة المخدرات
والقضايا ها تبقى غالبا عيل واقف على ناصية في جيبه جوان بانجو او مسمار حشيش
مش تجار ولا مهربين يعني
وتذكرت قصة حكاها لي احد الصعايدة عن ان المامور كل شوية يقبض عليه بتهمة حيازة سلاح ويطلب منه يسلم السلاح فبيضطر يروح للمطاريد في الجبل يشتري منهم حتة سلاح ويسلمها للبيه المأمور علشان يخلص من قرفه

وبالمناسبة النيابة كانت قرعت اسلام نبيه في الجلسة السابقة
وقالت له انت فين من الشهيد المتناوي
قوم ايه محامي اسلام يقول اللي قتل المتناوي كان سواق ميكروباص
وكأن فيه تنظيم سري إسمه سواقين الميكروباص
وان اسلام برضه لما ها يطلع ها يموت شهيد
وانه ها ييجي يفكرنا
هاهاها
طبعا انا مش ها اعلق ولا اقول الكلام الخنيق المعتاد حول ان سواق الميكروباص مواطن له حقوق مساوية لباقي المواطنين بما فيهم الريس حسونة أبو لغد ريس المركب اللي بتغرق بذات نفسيته

بس هوا سواقين الميكروباص بس هما اللي مش عاجبين البيه المحامي ؟؟؟
لا
الباشا اتريق على بياعين الفول وقال على خبير الاصوات انه صايع
خبير الاصوات ده راجل كبير
معاه دبلوم صنايع يعني شهادة متوسطة
وبيشتغل بقاله ديشيليون سنة في التلفزيون والسينما ومعتمد كخبير
غير كده الراجل كمل تعليمه واخد بكالوريوس اعلام !!!
ومع ذلك المحامي ابن بارم ديله اعتبره صايع
واستخدم في وصفه الفاظ مثل
كهربائي
جاهل
نصاب
حاقد
مخادع
مزور
ملفق
بجح
الخبير الأهبل حمدي
وكله متسجل بالفيديو
ولم ينس ان يهزأ بلقب عائلة عماد قائلا انه الكبير والعظيم في الاجرام
وناله أيضا نصيب من الفاظ البيه مثل
ممثل مأجور ومفضوح
واد بتاع ميكروباص وبلطجي
مجنون
قبض
ها يلم فلوس
مجرم آثم
وما نسيش يسبغ ويكيل المديح لاسلام بيه كعب الغزال فوصفه بانه
الولد الجميل
الفتى اليافع
إتربى مع أولادي
ضابط شريف
أغيثونا
أنقذوا هذا الفتى

خدو بقى الحتة الكبيرة الجعلوصة دي
الموضوع مؤامرة
أه والله مؤامرة
ده المحامي اللي بيقول
مع إنه مش ناصري
هاهاها
قال إيه ياخويا
مافيا تجارة المخدرات اللي اسلام بيه نبيه خرب بيوتهم قرروا ينتقموا منه بسبب التمانين قضية الفشنك اللي عملهم فاتفقوا مع منظمات حموم الانسان - قصدي حقوق الانسان - معلش اتخلبطت زي ما المحامي اتلخبط وسأل حقوق ايه قاموا ردوا عليه بقية المحامين الانسان - اي والله ده حصل حتى شوفوا فيديوهات نوارة - ومش دول بس لا دول اتفقوا مع القنوات الفضائية اللي ما وراهاش حاجة الا تشويه سمعة مصر اللي زي البرلانت وخص قناة الجزيرة التي وصفها بالمنحطة بالقسط الوفير من السباب وخصوصا هويدا طه
واكمالا للمسخرة قال ان اسلام نبيه دخل لقى عماد الكبير قالع بنطلونه لوحده من غير ما حد يقلعه !!!
وسال المحكمة طب يعمل ايه؟؟؟
ردوا انتم بقى علشان الناس بتزعل لما اقبح على المدونة
الحاجة بقى اللي كان نفسي اصورها بس كنت بعيد هي لما المحامي جاب عروسة لعبة ونيمها على ترابيزة المحامي ورفعلها رجليها علشان يستشهد بيها ان عماد الكبير كان بيتسلبط مش بيغتصبوه ولا حاجة !!!
تقريبا كان شاري عروسة من اللي هيا البوي فريند بتاع باربي ده اللي اسمه كين ولا ما اعرفش ايه
يعني المرة اللي فاتت سي دي اغتصاب بالمزيكا والمرة دي عروسة باربي !!!

والله بس الجلسة كان ناقصها عبارة مسرحية زي ان المحامي يقول انظروا لهذا الحمل البريء ولو إن الأمر لم يبتعد عن هذا - الفارس farce  - كثيرا !!!
وفي النهاية دي لقطة فيديو لخروج إسلام نبيه من القاعة في رعاية الشرطة

إضغط هنا
المحاكمة إتأجلت للشهر الجاي يوم أربعة
إقروا كمان تغطية نوارة نجم
إضغط هنا
ومراقب مصري
إضغط هنا

إتفضلوا معانا شوية كآبة على ما قسم

دي تدوينة ملحقة بالتدوينة السابقة
المدونين وسنين المدونين
هو الواحد مش من حقه يتبضن ويخبي
لازم أبضن على الناس بمشاكلي الشخصية علشان الناس تحس إني متضايق
طب انا رجعت مصر لقيت البضان في وشي
انا وصاحبتي اتخانقنا وسبنا بعض
وعربيتي اللي كانت مركونة في أمانة الله تحت بيتنا عربيتين طقشوا في بعض ودخلوا فيها لدرجة انها طلعت على الرصيف
اهلي صلحوها بس لسه محتاجة تصليح وانا معاييش فلوس
رجعت مصر لقيت الهارد ديسك بتاع اللابتوب اللي كان معايا في امريكا مش شغال وعليه كل صور وحاجات امريكا
وانا لما يعطل عندي هارد ديسك اكتر من لو مات لي عيل من عيالي
حلو كده
اتبضنتم ولا لسه

بني آدمين والله وضعفاء وبنتبضن مش أبطال
ولا حلالين العقد والمشاكل
الناس عملت مننا حاجة كبيرة وإحنا ما طلبناش ده
لدرجة ان الناس بقت تبعتلنا عشان نرجعلها حقوقها ونشوف لعيالها وظايف
اه والله
احنا اللي الامن بيطردنا من وظايفنا تخيلوا
وعلى قد الحاجة الكبيرة الوهمية اللي الناس عملتها مننا الناس ابتدت تحاسبنا على اساس وهمي وهو اننا حاجة كبيرة
والمعارضة والصحافة اللي كلها دلوقتي دخلت العشة وسابت المدونين باطهم والنجم دخلت الهيصة
وتلاقي واحد من المعارضة بيعيب على المدونين تراخيهم في تغطية المشكلة الفلانية او الاعتصام العلاني او الاضراب الترتاني وكاننا شغالين عند اللي خلفوهم
رغم ان محدش واقف جنب المدونين المرفوع عليهم قضايا ومهددين بغلق مدوناتهم وبالحبس ولا حتى بيغطي القضايا
وصحفي غر في جريدة اصبحت امنية الهوى وخاضعة لاجندة الامن بعد ان صالت وجالت في وجه الحكومة لكن الان اصبحت مدجنة يقوم ويقولك المدونين دول مش قدوة
هو مين يابن الحلال اصلا اللي قال اننا قدوة
عملتونا ابطال غصب عننا ودلوقت بتحاسبونا على اساس اننا ابطال
فين المنطق
وطبعا فيه شوية معارضة معرصة من القبيضة اللي على كيفك بتقول علينا عملا للغرب وخونة ودول معروفين مين هما من فرط ولعهم بنظرية المؤامرة وشوية تانية برضه عاملين معارضة وهما اصلا معارصة ابتدت تخوض في اعراض الناس مع انهم محسوبين على تيار بيدعي التدين والسعي الى الجنة ومش باقصد الاخوان المسلمين - اللي فيهم مكفيهم - علشان محدش يفهم غلط ولكن اقصد النسخة الراديكالية الوسخة اللي بتطبل لاسامة بن لادن وشراميط القاعدة وبتتمول من المخابرات السعودية لنشر العقيدة الحنبلية الحجرية الوهابية التيميية وسط الخلايا النائمة في مصر المنتظرة لاشارة من الرياض مع ان الظواهري نفسه طلع بيتابع الوعي المصري وفيديوهات التعذيب اللي نشرناها
وسواء الأمن أو غيره من الاخوة السفليين نسبة الى السفالة
علشان ما نظلمش كل السلفيين ومنهم اصدقاء
انا مش ها اخضع للابتزاز ولا التهديد
ومش هاقفل التعليقات
برضه هاسيبها مفتوحة
وهامسح اللي على مزاجي واسيب اللي على مزاجي
بيتي واللي يجيه يقعد بأدبه ويقبلني زي ما أنا إنشالله أقعد هنا بلبوص
والمدونة ان شاء الله ها تفضل شغالة
زي ما فضلت شغالة الثلاث سنوات اللي فاتت
من حر مالي
بدون وصاية من حد

Wael Abbas writes for the Washington Post

مقال العبد لله في العدد الأسبوعي للواشنطون بوست
Help Our Fight for Real Democracy
إضغط هنا لقراءة المقال على موقع الواشنطون بوست

إضغط هنا أيضا للتكبير Click here to enlarge

Good news & bad news

مقال العبد لله عن احوال التدوين في مصر
في مجلة سليت الأمريكية
Big Brothers
In Egypt, blogging can get you arrested—or worse
الجزء الأول من المقال
http://www.slate.com/id/2166146
الجزء الثاني من المقال
http://www.slate.com/id/2166146/pagenum/2
-
لكن فيه خبر مش كويس
Bad News

للمرة الثانية في أقل من شهرين
ياهو حذفت بريدي الإلكتروني الجديد
wa2el_3abbas@yahoo.com
للأسف لن يمكنكم مراسلتي عليه
ويمكنكم فقط مراسلتي على الياهو القديم
wa2el3abbas@yahoo.com
ولا أراكم الله مكروه في عزيز لديكم
For the second time in less than two months
Yahoo did it again
deleted my new account
wa2el_3abbas@yahoo.com
this is incomprehensible
!!!
so for the time being you can only send to the old account
wa2el3abbas@yahoo.com

أنا في أموركا

هام - يوجد تحديث للبوست بأسفل
الأصدقاء الأعزاء
أنا في الولايات المتحدة
لذا لن يمكنكم الإتصال بي على رقمي المعروف لديكم
لكن مازال يمكنكم إرسال الرسائل القصيرة على نفس الرقم المصري
وهذا هو رقم تليفوني المحمول الجديد في الولايات المتحدة لمن يريد الإتصال بي
0017033140980
ويمكنكم أيضا الإتصال بي على رقم المكتب
0012022611310
وهو مكتب مجلة سليت المملوكة للواشنطون بوست حيث أعمل كمتدرب حاليا
www.slate.com
وذلك فيما عدا يومي السبت والأحد
والرجاء مراعاة فروق التوقيت
هاهاها
-
تحديث
قراء الوعي المصري في أمريكا
معلش اعذروني الميزانية محدودة

-

-
I'm in the USA

Dear Friends
I'm in the USA right now
So you can not reach me by the Egyptian phone number you have
You can only send SMS messages to this number
If you wanna call me you will have to call my US cellular number
0017033140980
or call Slate Magazine's Washington DC office
0012022611310
I'm an intern there at the moment
www.slate.com

Asshole!

I have a question
Is it punishable by American laws to insult a federal officer on a blog?
Because if it is not I'd like to insult the federal officer who stopped me in JFK airport in New York because the mother fucker did not like my name and because of that I missed my flight to Washington DC.
Obviously the mother fucken police is the same everywhere.

أنا متضامن مع عبد المنعم محمود

للتفاصيل إضغط هنا

شاهد هذا الفيديو

أنا مش هربان

إشاعات كتيرة عمالة تطلع وناس بتسألني لما عرفوا إني بره البلد
اللي يقول هربان واللي يقول ماعرفش إيه
خصوصا مع القبض على منال وعلاء وجمال عيد والقضية اللي عملهالهم القاضي إياه
ومؤخرا مطاردة مدون الإخوان عبد المنعم ومهاجمة بيته
أنا بخير الحمد لله
وحتى الآن ما سمعتش إني مطلوب في قضايا أو مطلوب القبض عليا
كل ما في الأمر إنه تم إختياري في منحة للتدريب في أحد الصحف الأمريكية وحضور دورة تدريبية في مجال المشاركة المجتمعية
قضيت منها اسبوع في عمان بالأردن
والآن أنا في واشنطن بالولايات المتحدة الأمريكية
بس برضه حابب أقول لكم إن الأمن مش سايبني في حالي
وعمال من ساعتها أتلقى رسائل تحذير من التعامل مع منظمات حقوق الإنسان بالخارج وتهديدات بتلفيق قضية تجسس من إيميلات مجهولة
أنا بس مش حابب أنشر تفاصيل علشان محدش يقلق خصوصا أمي اللي قلقانة خلقة علشان سفري
بس هو عموما حتى قبل ما أسافر كانت بتوصلني معلومات قريبة من مصادر في أمن الدولة وطراطيش كلام عن إن وائل عباس ده بطة سمينة وإحنا بنسمنه علشان نلبسه قضية كبيرة وحاجات من دي
ومصطلح بطة سمينة ده بالذات قيل
وربنا يستر

ميت صورة وصورة من إسطنبول

مش سر إن أنا كنت في إسطنبول
كنت بأحضر سيمينار إسمه دايالوجيكال
وموضوعه كما هو واضح من الإسم الحوار
ولكن الحوار بين الشباب من أوروبا ومن الشرق الأوسط
كان فيه شباب من مصر ولبنان وتركيا وسوريا والأردن وفلسطين والدنمارك والنرويج وفنلندا وألمانيا ودول أخرى بس ما تقلقوش مكانش فيه حد من إسرائيل أصل أنا عارف نيتكم والإشاعات اللي بيحب يطلعها القومجية عن المؤتمرات المشبوهة والناس اللي بتروح تركيا تعمل تطبيع وأمركة
بس للأسف كان فيه ناس من الحزب الوطني المصري وحزب البعث السوري - إخص - ودي الشبهة الوحيدة في الموضوع
هاهاها
والسيمينار كان عبارة عن ورشات عمل وبانلز وأنا إتكلمت في واحدة من البانلز دي بصفتي التدوينية
أنا مش ها أتكلم كتير عن السيمينار لكن عاوز أتكلم عن تركيا وإسطنبول
والصورة اللي فوق دي صورة متحف أيا صوفيا أو حاجيا صوفيا أو الحاجة صفية

ده كان كنيسة في العصر البيزنطي
ومش اي كنيسة
ده كان مركز العالم
وحتى الإمبراطورية الرومانية في وقت من الأوقات كانت بتتحكم من هنا

لحد ما جه محمد الفاتح وقلبه جامع
وبعد كده لما تركيا بقت علمانية أصبح متحف
لكن ما زال المبنى من جوه فيه كل عناصر المسجد والكنيسة مع بعض







وبمناسبة العلمانية والحاجات دي
فالقريبين مني عارفين إني من المؤيدين لقيام دولة إسلامية ومن الداعمين لهذا شريطة أن تكون دولة معتدلة منفتحة ولهذا فأنا لا أرى في اي من التيارات الدينية الحالية في مصر من يصلح وبالتالي فقيام دولة إسلامية حقيقية في مصر غير ممكن حاليا الا ان يقوم نموذج شائه كالسعودية أو أفغانستان طالبان أو الجزائر
وده لأن نماذج المسلمين ذوي الفكر المستنير ماتت زي الإمام محمد عبده والأفغاني ورفاعة الطهطاوي واصبح شيوخنا من المؤلفة قلوبهم باموال آل سعود والبترودولار وحتى الإخوان المسلمين أصبحوا يبتعدون أكثر فاكثر عن الوسطية والصوفية - وان كنت انا ضد الطرق الصوفية تماما - التي كانت تميز الإسلام في مصر حيث أن حسن البنا نفسه في مذكراته يتحدث عن شد الرحال إلى أضرحة اولياء الله الصالحين وخاصة الدسوقي وأصبح الإخوان يميلون أكثر نحو إسلام الخليج السلفي الوهابي ويدافعون عن إبن تيمية ويتبنون الفكر الحنبلي بدلا من الحنفي
ما علينا
ايه اللي خلاني أرغي كده
هو إني شفت إن الإسلام في تركيا أصح منه في مصر حاليا
مش علشان تركيا بقت بلد علماني
لكن علشان بقت بلد فيه حرية وكل واحد في حاله
اللي بيبوس صاحبته ويحضنها في الشارع جنب اللي لابسه خمار ونقاب
بلد نظيفة أنيقة كما يجب ان يكون المسلم
والإسلام تجده في المعاملة ولا يغشك ولا ينصب عليك أحد حتى لو كنت سائحا وحتى لو كنت تدفع بالدولار
مش تلاقي واحد دقنه قد كده وحرامي بيغش في الميزان ويسرقك عيني عينك في عز الضهر الأحمر ولا واحد برضه بدقن عيره فاتح مطعم تاكل من عنده وتاني يوم يجيلك تسمم ولا نزلة معوية علشان البيه المتدين ما بيغسلش الخضار ولا واحدة محجبة أو حتى منقبة في حتتها وبين عيلتها وبالليل بتشتغل في ملهى ليلي وتقلع كل الزيف اللي لابساه
هناك اللي بتشوفه هو الحقيقة
شرموطة يبقى بتلبس شرموطة
ملتزمة يبقى بتلبس ملتزمة
محدش هناك بينافق المجتمع ولا بيستتر بالدين علشان يداري إجرامه والمجتمع يتقبله
إسلام تركيا العلمانية أحسن من إسلام مصر الحزب الوطني اللي حبس كريم عامر والإخوان في نفس الوقت

وده المبنى من جوه
وزي ما إنتم شايفين لفظ الجلالة جنب أيقونات مسيحية

على قمم الأعمدة التي تحمل القبة الرئيسية زخارف تحمل الفاظ الله محمد أبوبكر عمر عثمان علي حسن حسين





الإسلام التركي فيما يبدو كان إسلام وسطي متسامح سني لكن يحب آل البيت وبه الكثير من العناصر الصوفية من أضرحة ودراويش الخ

أعمدة المبنى أعمدة بيزنطية لا يمكن أن تخطؤها العين الخبيرة وهي تشبه أعمدة بعض المعابد والكنائس في مصر من نفس الفترة

قبة المبنى كانت تخضع للصيانة وقت زيارتنا

القبلة





نسيت أقول لكم
تذكرة المتحف بتسعة ليرة تركي
والليرة التركي بأربعة جنيه مصري تقريبا أو أقل قليلا
ولو معاكم حامل كاميرا ها ياخدوه منكم على الباب
بس اوعوا تنسوه زي ما انا نسيته ورجعت أخده تاني مخصوص بعد المتحف ما قفل وصحيت الحراس من نومهم



أيقونات مسيحية تمثل إما العائلة المقدسة أو الأباطرة البيزنطيين القدماء









لوحة تخيلية تصور أيا صوفيا وكيف كان شكله في العصر البيزنطي

هذه يبدو أنها كانت مدرسة لتحفيظ القرآن داخل ايا صوفيا
كان معانا مرشد سياحي بيشرحلنا كل الحاجات دي بس أنا حلقتله علشان كنت عاوز أصور براحتي
وعموما الشرح مالي الإنترنت للي عاوز يعرف تاريخ المكان

كل الشعوب يظهر عندها تخاريفها
ودي واحدة من تخاريف الأتراك اللي على رغم إن دولتهم علمانية إلا إن ثقافة الشعب حافظت على نفسها والحمد لله لسه ما وصلهمش الغزو السعودي الوهابي التيميي الحنبلي اللي وصلنا في مصر
ده بيسموه ثقب جبريل وهو في أحد أعمدة أيا صوفيا
والثقب ده لو حطيت صباع الابهام فيه وعرفت تدور ايدك دورة كاملة يبقى أمنيتك ها تتحقق
لاحظوا ان النحاس اللي محطوط حوالين الخرم ده بيتبيض اوتوماتيك بايدين الناس بينما باقى النحاس المحيط بالعامود أخضر ومزنجر زي ما انتم شايفين كده
ودلوقتي الكل بيعمل الحركة دي سواء أتراك أو سياح أجانب



ده بقى بيسموه الجامع الأزرق ودي تسمية سياحية
لكن إسمه عند الأتراك سلطان أهميت أو السلطان أحمد
وده لسه جامع ولسه الناس بيصلوا فيه ولازم تقلع الجزمة وإنت داخل
بس معندهمش بقى النصابين اللي عندنا في الجوامع اللي بيطلبوا منك فلوس علشان يحفظولك الجزمة في الامانات
وانت داخل فيه صندوق اكياس بلاستيك بتحط جزمتك في واحد من الأكياس دي وتاخدها معاك وبعدين ترجع الكيس وانت خارج







نادر قوي لما تلاقي شحاتين في اسطنبول
والشحات الاسطنبولي غلبان لابس هدوم متواضعة بس نظيفة وهو كمان ذوق ومش سئيل ولا رزيل
ما شفتش غير تقريبا ثلاث او اربع شحاتين
وده كان قاعد على باب الجامع الأزرق

الجامع الأزرق ليلا

دي مسلات فرعونية في ميدان سلطان أهميت
بيقولوا كان فيه منهم كتير وما فضلش منهم غير اتنين
لان كل ما حد يحتل البلد ياخد شوية معاه
هما احتلوا مصر واخذوهم
وبعدين اللي احتلوهم أخذوا منهم

مش عارف ده اعلان مسرحية ولا ايه بالضبط
بس هو عن ليلى والمجنون

هو سور مجرى العيون ايه اللي جابه هنا

شوية لقطات من الأوتوبيس اللي جابني من المطار
إسمه هافاس
وهافاس جاية من الهوا أو الطيران يعني أوتوبيس شركة الطيران













طبعا عندهم سميط زي ما عندنا
بس هما بيبيعوا السميط في سرايات زي دي مش على الكورنيش في قفص زي عندنا
هاهاها
بس عندهم بياعين بيقفوا بعربيات صغيرة حمرا شبه عربيات الفيشار عندنا بيبيعوا سميط برضه وساعات يبيعوا ابو فروة او حلوى اسمها بورم واعتقد ان الحلوى دي هي اللي احنا اخدنا منها لفظة انت فاكر نفسك واد بورم
يعني انت فاكر نفسك واد حليوة يعني
وهي عبارة عن عجين مقلي على هيئة مبرومة مغموس في الشيكولاته السائلة

الحمام هنا زي أوروبا سايبينه في حاله وبيأكلوه كمان
وفيه واحدة ست عجوزة بتديك تأكل الحمام
علشان كده الحمام مألوظ وصحته كويسة

ده ترماي شكلهم بيشغلوه للسياحة كده شفته في شارع واحد بس في منطقة تاكسيم او تقسيم في الجزء الجديد أو الأوروبي من إسطنبول

لكن ده الترماي الحقيقي اللي بيوصل الناس من حته لحته في اسطنبول
ما ركبتوش ولا حتى لحقت اصوره من كتر سرعته زي ما انتم شايفين
والصراحة يضرب مترو الانفاق عندنا على قفاه



الشوارع في إسطنبول طالعة نازلة لان البلد شكلها مبنية على هضاب زي روما كده
إفتكرت عربيتي المسكينة وإزاي جالها شحار علشان مش عارفة تطلع المطلع الغبي بتاع جراج البستان في وسط البلد

شارع عادي وناس عادية في إسطنبول

دي اللغة التركية الجديدة بتتكتب بحروف أوروبية
بس قبل أتاتورك كانت بتتكتب بحروف عربية
أنا باحب طريقة الكتابة القديمة أكتر ولو انك نادر لما ها تلاقيها على بعض المباني والاثار القديمة

أتوبيس نقل عام
بدورين وبشاشة الكترونية كمان
مش حتة صفيح كاتبها واحد أمي ما تفهمكش بيروح فين وبيرجع منين زي عندنا

الدنيا كانت برد قوي على سفينة أخدتنا في كروز ليلي في مضيق البسفور
السفينة فضلت ماشية اربع ساعات نحو الشمال والجو عمال يبرد لدرجة اني تخيلت اننا وصلنا البحر الاسود وروسيا

قلعة لم أعرف إسمها على مضيق البسفور



ده القصر اللي كان بيحكم منه أتاتورك وعاش ومات فيه
وقبله عدد من السلاطين والخلفاء العثمانيين

بقية القصر

مسجد على البسفور

هذا واحد من كوبريين ضخمين يصلان قارتي أوروبا وآسيا
وإسطنبول نفسها تقع على قارتين
نصف في آسيا ونصف في أوروبا
والنصف الأوروبي به نصف قديم ونصف حديث
والنصف الحديث حيث كنت أقيم وبه الفنادق والتسوق وحياة الليل
والنصف القديم به المساجد والكنائس والاثار
كنت مبهور بنظافة النصف الحديث لدرجة اني اتضايقت من كتر النظافة
وكنت متشوق لزيارة النصف القديم لان كنت فاكره بقى زي الحسين والقلعة كده زبالة واهمال وبياعين سريحة
لكن للاسف وجدته قمة في التحضر والنظافة
سفلته وتبليط والبياعين ما يغشوكش علشان سايح حتى لو دفعت بالدولار
والآثار هناك بتبرق كأنها لسه مبنية إمبارح
ومحدش بيبيع تذكارات يطاردك ويلح عليك تشتري

في أحد حانات إسطنبول والعياذ بالله

الجروب اللبناني كان ألذ حاجة في الموضوع بتناقضاتهم وخلافاتهم ومشاكلهم وإزاي بيعرفوا يعيشوا حياتهم ويهيصوا برغم كل ده

كان معانا كل ألوان الطيف السياسي اللبناني من أول الحزب الشيوعي لحد الليبراليين ومن أول الأحزاب الفلسطينية لحد الكتائب المارونية اللبنانية
كنت أصحى الصبح أجيب الفطار من البوفيه أنقي ترابيزة هادية كده أقعد عليها
وأستفوجأ بإن فيه مناقشة لبنانية حامية جدا على الترابيزة
لكن كل الأطراف بتتكلم بذوق وأدب ومحدش بيزعق ولا بيشوح بإيده للباقي ولا بيقول للتاني انت عميل ابن كلب ولا انت كافر زنديق ولا الحاجات اللي بنقولها لبعض على طول عندنا دي
الترابيزة كانت مكهربة مناقشات وأنا اللي كنت فاكرها ترابيزة هادية
أما ليلا فكله بينسى كل الكلام ده وبيهيص ويرقص مع بعضه وينسى المناقشات ويشرب ويفرفش ويعيش حياته
ده إحنا عقد وإقفال ومكلكعين قوي يا جدع
قال وكنت فاكر المصريين مدردحين وفهلوية
كل المصريين اللي كانوا معايا بيتكسفوا ولخمة ووشهم بيضرب ألوان بنات وصبيان
ده إحنا طلعنا محافظين وأنا مش واخد بالي

دي البنت - المزة - اللي كانت بتقدم المشروبات هناك
والصينية بتاعتها مجهزة بجرس بسكليته علشان الناس توسعلها السكه لأن المكان زحمة جدا

وده مطعم تقليدي بيقدم أكل تركي تقليدي لكنه مشابه جدا للأكل المصري
شايفيني أنا في آخر الترابيزة هناك اهه
كفته ورز ولبن رايب وحاجات من دي وعندهم بيقطعوا اللحمة شرايح رقيقة قوي وبيسموها دونر ممكن تاكلها كده زي في المطعم وممكن تاكلها في سندوتشات تيك اواي من المطاعم السريعة

ومرام مازن من حزب الغد كانت مجنونة بالدونر ده

أما الحلو في المطعم فكان مهلبية

وعجبتني لمض الجاز دي

صورة أمام المسجد الأزرق

وداخله

على السفينة في مضيق البسفور

إيثار الكتاتني من مصر - من عيلة الكتاتني بس مش إخوان

ومناقشة جادة جدا عن التاريخ الفنلندي مع - القمر - بيترا نايستين



وده البانل اللي أنا اتكلمت فيه
كان عن دور الاعلام في تفعيل دور الشباب في المجتمعات
واللي جنبي ده كان من السي ان ان
واللي جنبه من وسائل الاعلام التركية
وأنا إتكلمت عن التجربة المصرية في المدونات وإزاي إن الشباب لم يعتمد على وسائل الإعلام التقليدية وخلق وسائل إعلام بديلة ناجحه وفعالة خاصة به هو
وإتكلمت عن المشاكل اللي بنتعرض لها في مصر واللي بيحصل للمدونين واعتصام نادي القضاه واللي حصل لشرقاوي وكريم عامر
لكن زي ما قلتلكم كان معانا ناس من الحزب الوطني المصري ما يخلصهمش طبعا إن واحد زيي يتكلم
واحد فيهم قام إعترض على كلامي وقال إن الصورة مش سوداء كده في مصر وطلب من منظموا المؤتمر دعوة ممثلين من الشباب أكثر من الأحزاب الحاكمة ليعبروا أكثر عن بلادهم
هاهاها
لا تعليق

دي غرفة الفندق اللي كنت قاعد فيه
فندق اربع نجوم بس أحسن من أبو خمسة اللي عندنا
تصميم الغرفة مبني على فلسفة الفانج شواي الصينية
مش ها ازعجبكم بشرح ايه هي الفلسفة دي لكن اللي عاوز يعرف أكتر يدور على النت
بس الكركبة المصري تكسب طبعا





الفندق كان حديث جدا تكنولوجيا
الفندق كله فيه واي فاي او انترنت لاسلكي
والتلفزيونات كلها بلازما

بتفتح الأوضه بكارت إليكتروني مش بمفتاح

وبتولع النور برضه بنفس الكارت علشان محدش ينسى النور والع ويخرج

والثلاجة فيها كل أنواع المنكر والعياذ بالله

وكمان كان فيها ده
لزوم الشقاوة علشان محدش يتزنق وما يلاقيش أو يضطر ينزل يشتري مخصوص
وللي ما يعرفش ده ايه فده كاندام أو عازل طبي والعياذ بالله
وبالمناسبة الدعارة في تركيا عادي جدا
وعندهم القوادين والخرتية موجودين زي عندنا
مجرد واحد بس يشوفك شايل شنطة وشكلك سايح يفضل يطاردك ويحاول يكلمك انجليزي وعربي ويعرض عليك نسوان من روسيا ومولدوفا الخ
يع يعني بجد
دي الحاجة الوحيدة اللي ضايقتني هناك بس
مش إن فيه دعارة
لكن إن حد يمشي وراك في الشارع يعرض عليك كده

ونختتم زيارتنا لتركيا بالحمامات
ده بقى حمام ظريف قوي كان في المطعم التقليدي اللي كنا فيه
القاعدة مغطاه بالبلاستيك علشان الناس اللي بتقرف وبرضه علشان الامراض
قبل ما تقعد بتدور الدراع اللي على اليمين ده في اتجاه السهم علشان يشد البلاستيك القديم ويحطلك بلاستيك جديد علشان تقعد وانت مطمئن

وده بقى لا مؤاخذة السيفون
بيشتغل بالاشعة تحت الحمراء - الإنفرا
مجرد ما يشوف إسم الله على مقامك سيادتك بتقوم من على الكانيف بيقوم مشدود لوحده من غير تدخل من سعادتك

حمام في أيا صوفيا
وده أقرب مكان في إسطنبول بيفكرك بمصر
بس الفرق إن الحمامات من النوع ده في مصر ما فيهاش ورق تواليت

وده طبعا مش ماركة الطوفان الشهيرة اللي موجوده عندنا في مصر

مطار أتاتورك وزي ما انتم شايفين زي باقي المطارات الأوروبية وبعض المطارات العربية بتخرج من المطار إلى الطيارة مباشرة عبر ممر بتقف الطيارة في آخره مش زي عندنا أوتوبيس بياخدك لحد الطيارة

أخوكم وهو مروح من مطار أتاتورك
والخلاصة إن أسطنبول بقت من المدن اللي أحب أعيش فيها بعد الإسكندرية لولا بس فرق اللغة اللي ما اتعلمتش منها غير كام كلمة بس
-
إسطنبول وجولة بالفيديو

شاهدها هنا
-
هذا العدد لم يكتمل بعد
إنتظرونا
لدينا المزيد
-
آخر تحديث لهذا العدد بتاريخ
Thursday, 15 March, 2007 12:43:51 PM

أنا في أجازة من التدوين

بعد إذنكم جميعا
أنا بخير الحمد لله ولا داعي للإشاعات
أنا بس واخد أجازة من التدوين
أمور كتيرة في حياتي أهملتها الفترة اللي فاتت وفرص كتير ضيعتها وحبايب كتير خسرتها ولازم أظبط تاني وأرجعلكم
-
إعملوا الواجب على ما أرجع

الفيديو ده
وزارة الداخلية قالت انها بتحقق فيه علشان تعرف مين البنت دي
ولحد دلوقتي لا حس ولا خبر
!!!
إعملوا الواجب اللي عليكم
إوعوا تسيبوهم يكفوا على الخبر ماجور
إوعوا تسيبوهم يطرمخوا على المواضيع
إوعوا تسيبوهم يتوهوكم بين الوهم والحقيقة
المدونون ليسوا هم العدو
العدو هو من يسيء لسمعة مصر بفساده وليس من يكشف هذا الفساد
ليس المطلوب ضوابط ومعايير تحكم المدونين
المطلوب ضوابط ومعايير تحكم تعامل الشرطة مع المواطنين
ضوابط ومعايير تحكم الفساد وليس من يكشفونه
التدوين والانترنت يتعرضان لحملة شرسة على وسائل الاعلام الرسمية بغرض تهيئة الرأي العام لفرض قيود على التدوين والنشر الالكتروني وربما التمهيد لحملة أمنية تستهدف المدونين
والحملة على رأسها وزير الداخلية بنفسه والذي قرر الظهور إعلاميا ليدافع عن زبانيته ويهاجم من يكشفهم
لسنا نحن المتهمون يا عادلي
ضباطك يا عادلي وبعلمك يا عادلي والفضيحة في وشك يا عادلي
استقيل بقى يا عادلي

كل هذه الفيديوهات مطلوب التحقيق فيها
كل هذه الفيديوهات لدى النائب العام نسخة منها
وزارة الداخلية تقوم بتسريبات مدروسة للصحف والمواقع المشبوهة تفيد بأن هذه الفيديوهات مفبركة بغرض تضليل الرأي العام وتتويهه بين الوهم الحقيقة
وقبضوا على صحفية الجزيرة لهذا الغرض أيضا
عماد الكبير لم يكن وهما بل كان حقيقة
عماد الكبير لم يكن تمثيلا بل حقيقة
عماد الكبير لم يكن فبركة بل كان حقيقة
الضابط إسلام نبيه حقيقة
الضابط مصطفى شحاته حقيقة
الحقيقة أمانة في أعناقكم لا تتركوهم يدفنوها

 آخر تحديث
إحالة ضابط كليب الصفعات إلي محاكمة تأديبية

أمر المستشار سعيد عبدالمحسن، المحامي العام لنيابات جنوب القاهرة، بإحالة مصطفي شحاتة ضابط قسم الهرم المتهم بضرب أحد المواطنين داخل القسم علي وجهه بصورة متتالية متسارعة - إلي محاكمة تأديبية داخل مديرية أمن الجيزة التابع لها محل عمل الضابط بتهمة استعمال القسوة.
أعد أمر الإحالة بكر أحمد بكر مدير نيابة الحوادث الذي كشفت تحقيقاته استعمال الضابط القسوة مع متهم في قضية اغتصاب طفل صغير، واعترف الضابط في التحقيقات بأنه يتذكر المتهم لكنه أنكر ضربه،
وقال: إن الصور الموجودة في الكليب أجريت لها عملية مونتاج أظهرتها علي خلاف الحقيقة، لكن تقرير الخبير الفني نفي ادعاء الضابط.
وعلمت «المصري اليوم» أن النيابة أرسلت مذكرة بقرارها للواء مساعد وزير الداخلية مدير أمن الجيزة، لمحاكمة الضابط وإعادة الأوراق بنتيجة المحاكمة للنيابة لأخذ رأيها في تناسب العقاب مع الجرم.
كان النائب العام قد تلقي بلاغاً من ناصر أمين مدير المركز العربي لاستقلال القضاء والمحاماة، طالب فيه بملاحقة عدد من الضباط ظهروا علي شبكة الإنترنت في ثلاثة كليبات عن التعذيب
للمزيد إضغط هنا
-
تحديث
اللوا أحمد ضياء يخشى مواجهتي على الهواء مرة أخرى
إتصل بي معدو أحد البرامج في قناة فضائية مصرية مستقلة أحتفظ بإسمها وقالوا لي أنهم سيستضيفونني على الهواء كضيف لأتحدث عن فيديوهات التعذيب
فوافقت
ثم فوجئت بتأجيل البرنامج لمدة يوم
ثم فوجئت باتصال هاتفي يخبرني بانهم سيقومون بالتسجيل معي ويذاع التسجيل في البرنامج الذي سيستضيف ضيوفا اخرين على الهواء
ساورني الشك
ثم سالت عن الضيوف لافاجأ بانهم اللوا أحمد ضياء الدين مساعد وزير الداخلية للشئون القانونية وضيف آخر
ففهمت اللعبة ورفضت التصوير والاشتراك في البرنامج من أساسه
واعتقد أنكم جميعا الآن فهمتم لماذا تراجعوا عن إستضافتي على الهواء مباشرة وقرروا فجأة التسجيل معي فقط
لقد منع التلفزيون المصري دخولي مبناه
وهاهي القنوات التي من المفترض أنها مستقلة تتصرف بتلك الطريقة
وترضخ للضغوط الأمنية
ولا تتحمل مسئولية ما نقوله من كلام على مسئوليتنا الخاصة وتتدخل بالحذف والمونتاج
والآن يتهموننا بأننا نتعامل مع وسائل الإعلام الغربية

وائل عباس
-
فضيحة العادلي جيت
تقرير قناة الحرة عن فضيحة العادلي جيت

http://www.youtube.com/watch?v=apZFpzg-AmQ

وفضيحة العادلي جيت في برنامج ساعة حرة

http://www.youtube.com/watch?v=lppZUlpv6FI

وشهدت الحلقة ثاني مواجهة على الهواء مع مساعد وزير الداخلية للشئون القانونية بعد حلقة 90 دقيقة على قناة المحور

يرجى ملاحظة التهديدات المبطنة للمدونين التي يحرص أحمد ضياء على إلقائها كلما أمكنه
ومحاولة الإيحاء بان التدوين جريمة مؤثمة يعاقب عليها القانون
ويرجى أيضا ملاحظة عودة نغمة الوصاية على الرأي العام
نغمة تصدر من الشرطة التي تنتهك الحريات
كما يرجى ملاحظة ان سيادة اللوا الظابط يدلي بدلوه دائما فيما يخص الصحافة وبدلا من أن يحدثنا عن ميثاق الشرف الشرطي ياللعجب يحدثنا عن ميثاق الشرف الصحفي
لاحظوا ان هذا يشمل أيضا الصحف الحزبية والمستقلة لأن كل من يكشف فسادا من هذه الصحف له أجندة مخفية واغراض خفية مشكوك فيها ويقوم بإثارة الجماهير القاصرة المغرر بها
وهي نغمة خطيرة جدا
نحن لا نخبر اللواء كيف يقوم بتفكيك مسدس بيريتا المعادي كما يقوم هو بتعليم الصحفيين كيف يقومون بعملهم

لا لتدخل الشرطة في الصحافة
الصحافة سلطة رابعة دستوريا
لا للتهديدات المبطنة للمدونين
-
ملحوظة هامة
حول عدم ظهور الفيديوهات مباشرة

نظرا للمحتوى العنيف لبعض الفيديوهات التي يقدمها الوعي المصري وإحتواؤها على مشاهد تعذيب فإن موقع يوتيوب قد يتطلب منكم الإشتراك فيه كي تتمكنوا من مشاهدة تلك الفيديوهات وهذا ينطبق على بعضها فقط وليس كلها
-
فضيحة العادلي جيت على قناة المحور
برنامج 90 دقيقة

http://www.youtube.com/watch?v=9owXUQsxnsU
-

-
ليبراسيون ولوفيجارو الفرنسيتان تنشران عن الفضيحة أيضا

Une vidéo pirate relance le débat sur la torture en Egypte
by
Claude GUIBAL
إضغط هنا

Torture : des policiers piégés par Internet en ةgypte
by
Tangi Salan
إضغط هنا
-
واللوموند أيضا

Tortures en Egypte : des images accablantes circulent sur le Net
إضغط هنا
-
وعلى الكورييه إنترناسيونال

La torture policière dénoncée sur un blog
إضغط هنا
-
وترجمة مقال جريدة الليبراسيون
من لولا لحام
لقطات فيديو تعيد طرح قضية التعذيب في مصر
لقطات فيديو صورت خلسة تم وضعها على مدونة أحد الصحفيين وبفضلها تمكنت صحيفة مصرية مستقلة من إجبار السلطات على إجراء تحقيق انتهى بالقبض على اثنين من رجال الشرطة، بينما أرسل الشاب الذي تم تعذيبه إلى السجن.
من كلود جيبال
مراسل جريدة ليبيراسيون الفرنسية
القاهرة في 12 يناير 2007
على أرض قذرة يزأر شاب من الألم ويصرخ باكيا في اتجاه شخص لا تراه الكاميرا: "يا باشا يا باشا، أنا آسف". وتقترب كاميرا التليفون المحمول من وجه الشاب فتظهر تقاطيعه مفككة من الألم ثم يغيب عن الكادر. ونراه ثانية ينثني إلى الأمام ويديه مربوطتين، وقد فتح البنطلون الذي يرتديه وهو واقف على قدميه. نستمع إلى أصوات سخرية منه ثم إلى صرخاته حينما يتم إدخال عصا في فتحة شرجه.
نعرف أن الشاب اسمه عماد الكبير (21 سنة) ويعمل سائق ميكروباص. وكان قد قبض عليه في يناير 2006 ثم أفرج عنه بدون إدانة، بعد أن تدخل في مشادة بين أفراد عائلته وبعض رجال الشرطة. لكن أثناء الاحتجاز هذه المرة، قام بعض رجال الشرطة بتعذيبه في أحد مراكز الشرطة بالقاهرة، وهذا ما قدمته لقطات الفيديو التي يتم تداولها منذ عدة أسابيع.
هي واقعة تعذيب "كلاسيكية ومعتادة" كما تذكر مجموعة من التقارير التي تصدرها المنظمات الحقوقية المصرية والدولية منذ عدة سنوات. ففي 2004 لاحظت هيومان رايتس واتش أن التعذيب الذي عادة ما تم ممارسته ضد المتطرفين من الإسلاميين الذين يعتقد انتمائهم إلى الجماعات الإرهابية، يتم ممارسته الآن على مواطنين بسطاء متهمين بجرائم بسيطة أو بحجة الضغط عليهم للإبلاغ عن معلومات أمنية عن أقربائهم. وقامت مؤسسات حقوق الإنسان المصرية بحصر 4 حالات وفاة إثر تعذيب، وذلك فقط في الفترة من سبتمبر إلى نوفمبر 2003.
هذا وقد أثارت صور تعذيب عماد الكبير التي نشرها الصحفي وائل عباس على مدونته صحيفة الفجر المستقلة التي قامت بدورها بإجراء تحقيق صحفي صعب لإعادة سرد أحداث لقطات الفيديو، والبحث عن عماد الكبير بغرض تأكيد ما حدث فعليا.
تردد الشاب كثيرا قبل أن يوافق على تقديم شهادته وكذلك تقديم بلاغا للجهات المختصة. وطبقا لهيومان رايتس واتش، تلقى عماد مكالمات تليفونية تهدده هو وعائلته بالانتقام إذا لم يتنازل عن بلاغه. وقد أجبرت القضية التي طرحت على صفحات الجرائد المستقلة والفضائيات الجهات المختصة على القيام بتحقيق رسمي في هذا الموضوع.
وفي هذا تم إلقاء القبض على رجلي الشرطة إسلام نبيه ورضا فتحي وحدد يوم 3 مارس للنظر في ممارسات التعذيب التي قاما بها. ويعتبر هذا ترضية هزيلة للمدافعين عن حقوق الإنسان لأن عماد الكبير، الذي لم يتم إدانته من الأصل، قد تم إرساله إلى السجن لمدة ثلاثة شهور بسبب "مقاومة السلطات". وقد فوجئ محامي عماد الكبير بهذا القرار وهو يخشى حاليا من حدوث الأسوأ لموكله، لذلك أعلن أنه يحمّل وزير الداخلية "مسئولية الحفاظ على أمن وسلامة عماد الكبير".
وفي رد فعل عاصف، أعلن ناشط الانترنت وائل عباس (32 سنة) والذي تراقبه السلطات أن هذا القرار هو بمثابة فضيحة لأن رسالة السلطات واضحة: "الذي يجرؤ على الاعتراف بحدوث التعذيب سيدفع الثمن غاليا". وهو غير متأكد من أن بطلي هذه القضية سيتم إدانتهما بالفعل: "أنا أحاول فقط إيقاظ ضمير الناس وهذه مسئولية ضخمة. وأعرض نفسي لتوابعها".
وحاليا، توجد على موقعه الالكتروني عدة لقطات فيديو لحالات تعذيب، من ضمنها حالة سيدة شابة متهمة بارتكاب جريمة قتل. ويصور الفيديو ذراعي وقدمي السيدة مقيدتين في عصا خشبية موضوعة أفقيا على ظهر كرسيين. وتصرخ السيدة قائلة: "أعترف أني قتلته، أرجوك يا باشا أرجوك .. دراعي بيتكسر، مش قادرة"
-
ترجمة مقال الفيجارو
من ماريا فرنانديز
تعذيب: رجال الشرطة وقعوا فى فخ الانترنت فى مصر
اعتقال اثنين من رجال الشرطة بعد عرض فيديو عن التعذيب على موقع على الانترنت تمثل أول انتصار للcyberactivistes المصريين
يبدو انه انحدر من سلالة قوية (كاملة): جسد نجم سينمائى و وظيفة واعدة، فقد أصبح عقيداً فى الشرطة وهو فى ال29 من عمره.
ومع ذلك فهو (اسلام نبيه) يرقد فى السجن منذ أسبوعين. وسوف يقدم للمحاكمة فى الثالث من مارس بتهمة التعذيب بالاشتراك مع ضابط آخر من قسم شرطة بولاق أحد الأحياء الشعبية بالقاهرة. فقد عرض موقع مصرى فيديو يظهر فيه الضباط وهما يقومان بتعذيب سائق مينى باص جنسياً. والضابطان معرضان للسجن لمدة تتراوح بين 3 الى 10 سنوات.
وقد تم احتجاز الضحية عماد الكبير لمدة ثلاثة أشهر بتهمة "مقاومة السلطات" وكان قد أطلق سراحه بعد القبض عليه فى يناير 2006 دون توجيه تهم اليه. ووفقاً لما ذكره محاميه أنه كان قد تدخل فى مشاجرة بين قريب له وأحد الضباط تم على اثرها القبض عليه منذ أسبوع وذلك بعد أن تقدم بشكوى ضد الضابطين الذين قاموا بالاعتداء عليه متمنياً أن ما حدث (حالته) "تجعل الضباط الآخرون يفكرون".
المسألة كانت يمكن أن تمر مرور الكرام (أن تظل فى الخفاء) وذلك فى بلد يوصف التعذيب فى أقسامه بأنه "منهجى" من قبل منظمات حقوق الانسان. انها حالة الاهانة الجنسية وهى ممارسة ندد بها الكاتب علاء الأسوانى صاحب أكبر توزيع لروايته عمارة يعقوبيان (. وهذه الممارسات (الانتهاكات) تمر عادة بدون عقوبة. أما فى حالة عماد الكبير، فى البداية تكلم متحدث رسمى من وزارة الداخلية عن "اتهامات بدون دليل" وذلك قبل أن يسلم بأن الوزارة " سوف تمتثل لقرار العدالة ايا كان".
وتجد السلطات صعوبة فى انكار الحقائق حيث أن الضباط قاموا بأنفسهم بتصوير الانتهاكات التى قاموا بها عن طريق التليفون المحمول. ووفقاً لمحامى عماد الكبير ، تم تداول الفيديو فى حى بولاق حتى يشعر الضحية بالخزى ولكى "يكون عبرة لمن يعتبر". ما لم يتوقعه الضباط هو أن ينتهى هذا التصوير على موقع للصحفى المصرى وائل عباس وأن تقوم جريدة يومية مستقلة "الفجر" بالتحقيق فى الموضوع.
ويعترف وائل عباس وهو عضو معروف بالمدونات المصرية على الانترنت أنه لم يكن يتوقع أن تأخذ هذه القضية هذه الأهمية. "ينحصر دورى فى نشر المعلومات وحث الناس على أن يقوموا بالشهادة" ذلك ما حدده الصحفى ذو الـ32 عام حيث أن الخبر مكتوب بلهجة مصرية عامية لكى "تؤثر فى أكبر عدد من الناس ولتذكير اخوانى المواطنين أن لهم حقوق".
اختيار ناجح: تخطى زائرى الموقع اليوم المليون شهرياً بعد أن كان العدد 30 الف زائر فى أواخر عام 2004.
تهديدات مجهولة
لم تكن هذه هى أول محاولة لوائل عباس ، ففى أواخر شهر أكتوبر كان قد نشر صور لاعتداءات جنسية ضد السيدات حدثت فى شوارع وسط القاهرة فى عيد الفطر المبارك، وقد استمرت هذه الهيستريا الجماعية لعدة ساعات بدون أن تتدخل الشرطة. ورغم شهادة العديد من الأفراد إلا أن السلطات أنكرت تماماً وقوع هذه الاعتداءات.
هذا الاسبوع كرر المدون عرض فيديو لسيدة تبدو و أنها تعترف بجريمة تحت وطأة التعذيب، حيث كانت معلقة من قدميها على قضيب من الحديد مثبت بين مقعدين. وقد أعلن وزير الداخلية هذه المرة فتح التحقيق.
وبعيداً عن التمتع بالقبض على رجال الشرطة؛ فإن وائل عباس الذى تلقى بالفعل هو وأسرته تهديدات مجهولة سابقا يشعر بالقلق من عواقب هذه المسأله بالنسبة للcyberactivistes " إن ما يحدث اليوم يمكن أن يكون نقطة تحول للأحسن أو للأسوأ" على حسب تقديره.
"فيمكن أن يبدأ النظام (نظام الحكم) بالشعور بالخوف من عملنا ولكن يمكنه أيضاً مهاجمتنا عن طريق إصدار قانون يمنع تماماً كافة الأنشطة على الانترنت". كذلك مع سقوط حركة كفايه المدنية التى تألفت من المعارضين من كل الاتجاهات فى الانتخابات الأخيرة، فإن المدونين يشعرون أنهم يقفون وحدهم فى مواجهة السلطة.
ويعترف وائل عباس قائلاً: انها مسئولية ضخمة ، لقد شعرت أن هناك أشياء قد بدأت فى التحرك عام 2005 ، ولكننى أدرك اليوم أنه تم استخدامنا آنذاك من قبل الجيل المعارض القديم ، فما ان انتهت الانتخابات لم يعودوا يهتموا بنا ولهذا لا أريد أن أعترف بالاخفاق".
-
وجريدة الجارديان البريطانية أسمتها العادلي فيديو جيت

YouTube exposes torture in Egypt
إضغط هنا
-
وتقرير على راديو السويد الرسمي

إضغط هنا لتذهب إلى الصفحة على الإنترنت
الصفحة مكتوبة باللغة السويدية لكن يوجد ملف صوتي يمكن سماعه بالضغط عليه والمذيعة تتحدث السويدية بالطبع لكن توجد مقاطع بصوتي بالإنجليزية
ويمكنكم الإستماع إلى حلقة كاملة عن الموضوع على الوصلة التالية
إضغط هنا
وبالحلقة حوار مع طفل إسمه محمد بيلم زبالة ومقارنة بينه وبين رواد مقهى سيلانترو من الشباب حاملي الكمبيوتر المحمول ومزيد من المقاطع بصوتي
كما يمكنكم تنزيل تلك الملفات والإستماع إليها على أجهزتكم
تقرير قصير مدته ثلاث دقائق

إضغط هنا
تقرير طويل مدته تسع دقائق

إضغط هنا
-
والبي بي سي نشرت عن فضيحة حبس عماد

Torture victim jailed in Egypt
إضغط هنا
-
ومنظمة العفو الدولية تطالب بحماية عماد

protection of torture victim is key for justice to be done
إضغط هنا
-
وتقرير من هيومان رايتس ووتش

Police Who Sexually Assaulted Prisoner Should Be Prosecuted
إضغط هنا
-
هذه الفيديوهات لم يتم التحقيق بها بعد
لا تنسوها ولن ننساها

والضرب على القفا لا يمكن التغاضي عنه بإعتباره أمر عادي
وكل تلك الفيديوهات هي لتعامل الشرطة مع مواطنين عاديين لا علاقة لهم بالمظاهرات والسياسة
-
إنتظروا المزيد

 البي بي سي تختار وائل عباس
كأحد أكثر الشخصيات العالمية تأثيرا
في عام 2006

حددت البي بي سي مجموعة مختارة من الشخصيات العالمية الرائدة من السياسيين والأكاديميين والعلماء والكتاب والفنانين كأهم الشخصيات تأثيرا في عام 2006 المنصرم وتضمنت المجموعة العبد الفقير لله إلى جانب عدد من رؤساء الدول ورجال السياسة والمناضلين ورجال الدين وشخصيات من المنظمات الدولية كالأمم المتحدة وغيرها
وتم إختيار العبد لله كأحد المفكرين المؤثرين في العالم العربي الحديث إلى جانب فطاحل وقامات ضخمة مثل كوفي عنان الأمين العام للأمم المتحدة

 والرئيس اللبناني إيميل لحود

 والرئيس الأوغندي يوري موسيفيني

 والشيخ حمزة يوسف والقس ديزموند توتو

 والكاتب النيجيري الحاصل على جائزة نوبل في الأدب وول سوينكا الذي كنت أدرس كتاباته في مادة الأدب الأفريقي في الجامعة بالإضافة إلى عدد آخر من الكتاب العالميين والمؤرخين والنشطاء في مجال البيئة وحقوق الإنسان وكل مناحي الحياة
إضغط هنا للذهاب إلى الصفحة الخاصة في موقع البي بي سي
وقامت البي بي سي بتسجيل رسائل خاصة بمناسبة العام الجديد مع هؤلاء المجموعة المختارة من الشخصيات لتذاع إحتفالا بنهاية العام على خدمة البي بي سي العالمية واسعة الإنتشار والتي تصل إلى 163 مليون شخص حول العالم
وهذا هو نص الرسالة التي تلقيتها من البي بي سي قبل تسجيل رسالتي للعام الجديد

وهذا هو نص رسالتي بمناسبة العام الجديد

ويمكنكم الإستماع لها كملف صوتي على موقع البي بي سي

إضغط هنا
-
عندما يغضب الشعب المصري من الشرطة

هذا الفيديو يصور أحداث مهاجمة المصريين الغاضبين لقسم شرطة المنتزه بالإسكندرية إثر قيام الشرطة بإطلاق النار على شاب سكندري فقتلته بطلقة في الرأس
http://www.youtube.com/watch?v=TsA6gciTdEc
-

-
بمناسبة ميليشيات الإخوان
فيديو نادر يصور ميليشيات الوطني في إنتخابات دائرة الرمل البرلمانية في الإسكندرية تحت سمع وبصر وحماية الأمن ولم يقبض على أحد منهم

http://www.youtube.com/watch?v=WZ3Ppoy4c1w
أما في دمياط لم يحتج الأمر إلى ميليشيات فقد قام الأمن بالواجب وحده لمنع الناخبين من الإدلاء بأصواتهم
وإليكم هذا الفيديو النادر أيضا والذي سبق ونشرناه

http://www.youtube.com/watch?v=YVxeyq__KD4
-

-
وقفة إحتجاجية
في ذكرى مذبحة اللاجئين السودانيين

-
جديد قضية تعذيب عماد الكبير
http://www.youtube.com/watch?v=4iez20eP-ic
بعد قليل


-

-
الوعي المصري تحصل على فيديو نادر
لحادث قطار قليوب

شاهد الفيديو هنا
http://www.youtube.com/watch?v=GoIBNBYbz_k
-

-
فرفش مع الوعي المصري بمناسبة العام الجديد
-
بمناسبة نهاية العام ... هدية من زمن فات
أشهر فيديو كليب من إنتاج الوعي المصري
شعبولا ما بيحبش الكراسي

http://www.youtube.com/watch?v=x78Tg_j8TBg
-

-
وهدية ثانية
عريس الدولة للفاجومي

http://www.youtube.com/watch?v=czFyjzGaoE8
-

-
ومذيعوا ومذيعات قناة العربية بيفرفشوا خارج التصوير

http://www.youtube.com/watch?v=oW1vppV-JRs
-
والملك عبد الله كومبارس في مسلسل أمريكي

لقد ظهر الملك عبد الله في إحدى حلقات مسلسل الخيال العلمي الأمريكي ستار تريك ككومبارس غير متكلم وبالتحديد في الحلقة 35
ستار تريك فوياجر
عنوان الحلقة: تحقيقات
واذيعت عام 1995
Star Trek - Voyager, Episode 35: Investigations - 1995
وذلك كاحد طاقم مركبة الفضاء فوياجر ويمكنكم شراء هذه الحلقة بالذات من موقع امازون الشهير
http://www.youtube.com/watch?v=Uu3l4Szo15E
-

-
هدية للقومجية المصريين على قائمة مرتبات المخابرات السورية
قريب بشار الأسد في سطو مسلح على بنك سوري

هذا الفيديو أرسله لي أشخاص من المعارضة السورية
الفيديو يصور عملية قامت بها مافيا نمير الأسد أحد أقارب بشار الأسد للسطو المسلح على أحد البنوك السورية والتي لحسن الحظ بها كاميرات مراقبة من كل الزوايا سجلت العملية كاملة ووجوه كل من قاموا بها ولكن رغم كل هذا بقي نمير الأسد حرا طليقا بسبب النظام السوري الفاسد !!!
http://www.youtube.com/watch?v=NyXrru5zQA4
-

-
ربنا يبتليك بوابور زلط ياللي في بالي

http://www.youtube.com/watch?v=7KIRTEjcKKE
حدث هذا في موقف سيارات كلية الهندسة بجامعة عين شمس وقام بالتصوير أحد طلبة الكلية
-

-
موظفين كويتيين أثناء الدوام

http://www.youtube.com/watch?v=LWC4pVYdTzQ
-
شكر خاص لموقع الدفترخانة

www.id3m.com
على توفيره أرشيف رائع لما نشر في الصحافة عن حادث التحرش الجنسي
إضغط هنا لتشاهد الأرشيف
-

-
فيلم تسجيلي يفضح إستغلال أمراء دبي للأطفال الآسيويين
الجزء الأول

http://www.youtube.com/watch?v=PdmfSUoQyds
والجزء الثاني

http://www.youtube.com/watch?v=l9qc9XYYQ3M
-
التوربيني نجم المرحلة

-

-

-

-
وفيديوهين جديدين من إنتاج الوعي المصري أيضا
بوش يثبت عكس صحة نظرية داروين

http://www.youtube.com/watch?v=AHTrgKljQdw
بينما شارون يثير الشكوك حول النظرية من الأساس

http://www.youtube.com/watch?v=OL_xG6b9rHc
-
كلاكيت تاني مرة

-
من أحداث عام 2006
إنتفاضة الفرارجية

http://www.youtube.com/watch?v=d5akLeYuE5o
إنهيار أسعار أسهم البورصة المصرية

http://www.youtube.com/watch?v=J8mJ1WW1nc8
-
هذا العدد لم يكتمل بعد
تابعونا حتى بداية العام الجديد
-
آخر تحديث للموقع بتاريخ
Monday, 25 December, 2006 10:02:28 PM