Wednesday, 26 January 2011
the martyr of Suez
فيديو شهيد السويس من داخل المشرحة
وصلني الفيديو ده عن طريق الإيميل
مصحوبا بالرسالة التالية أنشرهما معا
فيديو للشهيد مصطفى رجب محمود من داخل المشرحة والممرض بيبلغ فى التليفون وبيقول
والنبى ابعتلى حد علشان مفيش حد معايا وده مات برصاصة فى المظاهرات واسمه مصطفى رجب محمود
ارجوا نشر هذا الفيديو حتى يتبين للعالم مدى حقارة هذا النظام الذى يقتل الشباب العزل
تخيل ان هذا الشاب اخوك الصغير او ابنك ماذا ستفعل
حسبى الله ونعم الوكيل
14:23 | Permalink | Comments (32)
videos of yesterday's protests
فيديوهات صورتها إمبارح
دي العربية اللي الأمن ولعها بعد ما فرق المظاهرة علشان يتهم المتظاهرين بيها
دي لقطات للأمن بيستفرد ببعض المتظاهرين وبيعزقهم
دي لقطات للقبض على بعض الأشخاص
الأمن يطلق الرصاص الحي في الهواء
الغاز المسيل للدموع
هتافات
-
للمزيد من المتابعات
تابعوني على تويتر waelabbas
14:01 Posted in صفحات الغلاف, وائل عباس | Permalink | Comments (31)
videos of yesterday's protests
فيديوهات صورتها إمبارح
دي العربية اللي الأمن ولعها بعد ما فرق المظاهرة علشان يتهم المتظاهرين بيها
دي لقطات للأمن بيستفرد ببعض المتظاهرين وبيعزقهم
دي لقطات للقبض على بعض الأشخاص
الأمن يطلق الرصاص الحي في الهواء
الغاز المسيل للدموع
هتافات
-
للمزيد من المتابعات
تابعوني على تويتر waelabbas
06:34 Posted in صفحات الغلاف, وائل عباس | Permalink | Comments (0)
Sunday, 23 January 2011
riots in alexandria
مصادمات في الإسكندرية
وصلتني هذه الفيديوهات من قاريء في الإسكندرية نحتفظ بإيميله وأنشرها مع تعليقه بدون تعديل
وأطرح سؤال هل هي البداية ؟؟؟
السلام عليكم .. دي أول مره ابعتلك حاجه يا وائل وفعلا سعيد لان في مكان الكل بيبعتله اي فضيحة تعملها قوات الإحتلال على الأراضي المصرية
بص يا باشا .. كان عندنا في اسكندرية مشكلة من فترة بين شرطة الإزالة وبين بياعين الهدوم والحزمه وكل ماليه علاقة باللبس اللي فارشين في منطقة الساعة
المنطقة دي حيوية جداا ومليانة ناس طول اليوم بيشتروا من البياعين دول تقدر تقول سوق يعني
المهم الازالة جت من ييجي سنه كده ازالت كووول اللي عالشارع الرئيسي وحصل شد جامد بينهم وبين البياعين واتدخل فيها النائب مصطفى محمد بتاع الاخوان وكانت الحكومة مصرة ان العيال دي تمشي في اي داهية ومصطفى محمد مصر على انهم عيال سوابق بيدوروا على لقمه شريفة ولو اتزالوا هيرجعوا مجرمين ووصل لاتفاق يرضي الحكومة والبياعين في نفس الوقت وهو انهم يدخلوا في الشوارع الجانبية ويسيبوا الشارع الرئيسي .. وخلاص الكلام على كده والكل مبسوط .. جت الحكومة مؤخرا بقى وفجأة كده وفي موسم العيد اللي البياعين بيعيشوا عليه وقاموا داخلين الشوارع الجانبية اللي البياعين واقفين فيها وقاموا مدورين فيهم الضرب عشان يزيلوهم
ولإن الاسكندرانية دمهم حامي قاموا البياعين قالعين قمصانهم ولفوها على وشوشهم عشان ما يبانوش وقاموا ماسكين الضباط بتوع الازالة والمخبرين ورنوهم علقة محترمه قلعوهم فيها هدومهم وبدأت المعركة يا باشا
الفيديو الأول ده فيه المواطنين لما تضامنوا مع البياعين ووقعوا ضابط كان داخل بالموتسكل بتاعه يفض الناس وولعوا في الموتسكل
هتشوف منظر جميل للناس ملمومين حوالين الموتسيكل وهو بيتحرق زي قبائل الموا موا الافريقية وعمالين يهتفوا هتافات ابيحة
الفيديو الثاني ده بقى كانت العربيات المصفحة وصلت والناس واقفين ورا تلة زلط من بتاع السفلته ده وقعدوا يرموه وبعد كده الحكومة طلقت الجرايه عالناس بالكلاب
الظريف ان الناس طلعت تجري وهي لسه بتهتف هتافات ابيحة
تحياتي يا وائل
11:14 Posted in صفحات الغلاف | Permalink | Comments (29)
Saturday, 22 January 2011
On Riz Khan with Sami And Naser
مع ريز خان وسامي وناصر عن تونس
حلقة من برنامج ريز خان على الجزيرة إنجليش الذي إستضافني أنا والمدون التونسي سامي بن غربية والمدون الموريتاني ناصر ودادي للحديث عن السوشيال ميديا وما جرى في تونس
11:12 | Permalink | Comments (11)
Tuesday, 11 January 2011
blocked in Tunisia and proud
محجوبون في تونس ولنا الفخار
بعد حجب هذه المدونة في الصين
تفاصيل هنا
نفخر بأن حساب تويتر الخاص بي محجوب الآن في تونس
وهذا وسام على صدري
12:03 Posted in صفحات الغلاف | Permalink | Comments (28)
Monday, 10 January 2011
Prove di democrazia
من برنامج عن الإنتخابات على التلفزيون الإيطالي
بعض اللقطات من برنامج إخباري على التلفزيون الإيطالي الإخباري
Rainews 24
بعنوان Prove di democrazia
يمكنكم مشاهدة الحلقة كاملة هنا
Prove di democrazia
يظهر في الحلقة إلى جانب العبد لله
أحمد عز - إبراهيم عيسى - عبدالله كيمو - منى مكرم عبيد - عصام العريان - جمال عيد - علاء الأسواني - عادل السيوي
-
وفي حلقة من برنامج إنسايد ستوري
على قناة الجزيرة الإنجليزية
مع روبرت فيسك وآدم ويستبروك عن ويكيليكس
Inside Story - Aljazeera English
Wikileaks - Robert Fisk - Adam Westbrook - Wael Abbas
ما تآخذونيش مكنتش مركز تماما
كان عندي برد وواخد أدوية تضيع تركيز جبل
I was a bit out of focus as I was on flu medication
-
ومقابلة صوتية مع راديو مونت كارلو
التدوين نوع من الإعلام البديل في مصر
-
YLVP Social Media Cafe
سوشيال ميديا كافيه - ساقية الصاوي
ONTV coverage
برنامج بلدنا بالمصري
11:42 Posted in صفحات الغلاف | Permalink | Comments (20)
a comment i liked
تعليق عجبني على التدوينة اللي فاتت
كتبه Hossam
بس بص قلبها يا جدع .. يعني واحده كاتبه مقال من غير مصادر وفي موضوع اطرافه متعددة جدا مش تقوم مثلا مخبطه في مدونة مش معروفه مثلا او قريبه من اللي بتقوله نوعا ما او صاحبها متدين مثلا وهيرد عليها بـ"اتق الله يا اختي" لأ دي سايبه المدونات كلها وماسكه فيك !! هي دي غلطتها على فكره استشهادها بيك في غير الموضوع يعني حسيت انها لما جابت سيرتك طلعت بره سياق المقال نوعا ما ورجعت تاني وكإنها بتضرب فيك انت لإن مفيش مدون او صحفي او سياسي مش بينزل على مدونته او موقعه اخباره ياراجل ده اوباما واحمدي نجاد الاتنين بينزلوا اخبارهم في مدوناتهم وحتى حمو بازوكا المدون السكندري المغمور بيتكلم عن خناقته مع حماته على حلقات وباستنى اشوف عمل ايه مع الولية السو دي برغم انه بيكتب حاجات حلوه من وقت للتاني بص هي صحفية بتكتب مقال بالطريقة المصرية التقليدية لم كام اسم بتتوقع كلامهم وحطه تصريحات وكام شخص تتوقع تصرفاتهم وحطها ردود افعال واقققققلب وعاوزها باللحمه ولا بالسكرررررررررررر
09:42 Posted in صفحات الغلاف | Permalink | Comments (7)
Tuesday, 04 January 2011
in reply to Alhayat report
أيوة ها نعلمكم الصحافة وإحنا وداننا مش بتنقرص
إستفوجئت - حلوة إستفوجئت دي - كلام مدونين بقى ما تآخذوناش
إستفوجئت ب - مش عارف أسميه إيه - مقال رأي؟ تقرير صحفي؟ تقرير رأي؟ بين البينين؟ حاجة كده خنثى مشكل زي أنثى التنين؟ إفتكاسة جديدة في عالم الصحافة يمكن علشان دي النسخة السعودية مش اللندنية - المهم نبتعد عن المصطلحات الأكاديمية والتعريفات المتعارف عليها علشان إحنا شوية عيال مدونين سيس ولاد حرام ما بنفهمش صحافة وخلينا نتكلم بالهجايص
المهم إستفوجئت كده ببتاع ما منشور على جريدة الحياة - فرع السعودية - زي ما باين من الموقع بعنوان
خفوت صوت المدونات الرقمية وارتفاع صراخ فيسبوك مصريا
يللا روحوا اقروه وتعالوا نتكلم هنا حيث الفضاء التدويني الفوضوي الغير محترم صحفيا
بصرف النظر بقى عن دقة محتوى - البتاع - وإفتراضات الست أمينة مع نفسها اللي قالتلي على التليفون إنها بتقول رأيها وإن مش أنا - بالذات - اللي ها أعلمها صحافة - الله يكرم أصلها طبعا على الذوق والأخلاق والمهنية - خصوصا الإفتراض بتاع الطبقة الوسطى والناس اللي معاها فلوس - رغم اني اعرف مدونين مشردين ومطرودين من بيت ابوهم وبيدونوا من الانترنت كافيه
وبدون أي تكليف خاطر من الست امينة ترفع سماعة التليفون تتصل بقدامى المدونين - حلوة قدامى المدونين - وتطمن على احوالهم وتشوفهم بطلوا فعلا ولا لا وهل هم كمان موجودين على فيس بوك وتويتر ونشطين عليه ولا اعتزلوا تماما وإيه رأيهم في رأيها الهلس ده
قوم إيه الست أمينة قررت تدلي - بجردلها - في الأمر خبط لزق كدهون من خير إحم ولا دستور
وأثبت بما لا يدع مجال للشك - في دماغها طبعا - وبدون براهين وإستدلالات ولا معادلات فيزيائية ولا كيميائية - ماهو برضك الموضوع مش علم صواريخ يعني - أثبتت إن قرص الأمن لودان المدونين - الكلمة حزت فيا طبعا إنتم عارفين عندي عقدة من وداني - أثبتت لا فض فوها إن قرص الودن للمدونين جاب نتيجة والمدونين بقم بيعملوا ما شالله رقابة ذاتية على نفسهم
إفتراض كده جالها من عند ربنا ما أنزل به من سلطان
مش عارف ليه ناس كتير حابة تزايد على المدونين : لورانس بنتاك - يسري فودة - عمرو الكحكي واخيرا الست أمينة خيري
رغم إن عمرنا ما روحنا لحد قلناله شغلنا في جورنالك أو قناتك أو إدونا عضوية نقابة
وأنا كاتب على مدونتي كما قالت أمينة برضه : ما باشتغلش عند دين أم حد
يعني مش مطالب بشيء قبل أي حد
يعني أدون ما أدونش أنا حر
أتبنى قضايا أو ما أتبناهاش أنا حر
أحط فيديوهات ليا وأنا باترقص او بانكش شعري أنا حر
اللي بيدفعلي من جيبه يقطع عني المعونة او الصدقة !!!
أصل لما تزايد على المدونين مش ها يبان إنك صحفي جامد بالعكس إنت ها تعمل نفسك مسخة لو المدونين حطوك في دماغهم
وبعدين ده بيدي إنطباع عنك انك شخص تافه منفوخ ومصدق نفسه انه صحفي
ولا انت مش منفوخ ؟؟؟
وبعدين يعني يا سيدي ما احنا اشتغلنا صحفيين
ولقيناها من جوه شلل ومخوخة وبايظة والناس بتهر على روحها لو جالها تليفون امن دولة او مخابرات
وإشتغلنا كمان مراسلين وكالات اجنبية قد الدنيا ولقينا الجو هوه هوه
وخدنا كمان جوايز صحافة دولية من المراكز اللي بتدربكم أصلا تبقم صحفيين
وخدنا جوايز في حقوق الإنسان والتدوين
يعني بروحين أهه بنشتغل من الناحيتين مش ناحية واحدة - نقطع نفسنا يعني ؟؟؟
يمكن ده اللي قاهركم ومفلفلكم؟
محكوم عليا حكمين غيابي حبس مجموعهم إتناشر شهر السنة اللي فاتت
مقبوض عليا في أول السنة في نجع حمادي علشان رحت أعزي ومبيت في سلاحليك مديرية أمن قنا عالبلاط في عز البرد
فقدت واحدة من أسناني الأمامية
فتشوا طيزي في المطار وصادروا الكمبيوتر بتاعي وبيفتشوني كده كل مرة أسافر
بعتوا ورايا حد من المخابرات في مطار براج واتنين في واشنطون
متهم بالعمالة والإسترزاق والإلحاد وكل اللي نفسكم فيه
زمايلي المدونين بيقطعوا عيشي وبيبوظولي شغلي وهم مرتاحين وعندهم شغل لا وبيروحوا يشتغلوا في الأهرام كمان ويدعوا النضال على دين أبونا وهي حياتهم عبارة عن وسايط وعلاقات وواحد منهم كان بيقبض اربعتلاف جنيه من حركة كفاية علشان يدير الموقع رفضتهم انا علشان رأيي ان ده عمل تطوعي ودلوقت البيه بيزايد على نضافتي
زمايلي المدونين بينموا عن حياتي الخاصة ويتندروا على فشلي
ومع ذلك إستمريت مش على المدونة بس لكن على تويتر وفيس بوك ويوتيوب
قناتي على يوتيوب شافها 40 مليون شخص - الرقم صحيح ما تفركوش عينكم
ولما باطلع في التلفزيون مش باطلع اترقص ولا اتكلم عن عمليات التجميل اللي عملتها في بزازي
باطلع أتكلم عن مواضيع الساعة ومواضيع مهمة وباقول رأيي فيها
يمكن سيادتك شايفاني تافه باقول كلام تافه بس ده مش رأي الفضائيات اللي بتستضيفني غالبا ومهتمين إن عندي حاجة أقولها تهم جمهورهم
إلا إذا كان فيه ناس شايفة إن ظهوري في التلفزيون مزعج بصريا ليهم لدرجة انهم مش بيسمعوا اللي باقوله مهم ولا لا
طلعت في برامج محترمة ومتشافة ومسموعة علشان أوصل صوت القضية وصوت بلدي
لا عمري تاجرت بنفسي ولا طلبت حاجة لنفسي ولا إتفاخرت بمنجزاتي ومشروعاتي - اللي غيري عمال يعمل مشروعات مجتمع مدني دلوقت ويسترزق منها وأنا بس اللي يتشتم ويطلع ديني
باسافر بره أدي محاضرات في جامعات مرموقة عن التدوين والسوشيال ميديا وأعمل دعاية للتجربة المصرية الناجحة اللي العالم حابب يسمع عنها
باسافر أدرب الناس في الدول العربية وأوروبا الشرقية والدول النامية إزاي يستخدموا التدوين زي ما إستخدمناه إحنا
ما دورتش على وظيفة ثابتة ولا جوازة مستقرة ولا مشروع أسترزق منه وأدعي النضال في نفس الوقت
إعتزلت جو وسط البلد الوسخ ورحت قعدت في الصحرا
صحتي إضطربت والله أعلم إيه العلل اللي ها تظهر عليا
آدي حصادي بتاع 2010
حلو كده يا ست أمينة
حصادي بقى ولا حصادك؟
عايزة حصاد أقدم ولا عارفاه ؟؟؟
تقومي بعد كل ده تقوليلي مش انا اللي هاعلمك الصحافة !!!
مدونين كتير سافروا وهاجروا واتجوزوا وخلفوا ودوروا على وظايف ثابتة حتى ولو في جرايد حكومية
وأنا اللي قاعد لسه أهبل قال إيه باناضل علشان البلد تتغير
ومع ذلك الست أمينة زنقت معاها وما جابتش سيرة أي حد غيري أنا في البتاع بتاعها
وتتهكم عليا وعلى شعار المدونة : اللي ما بيشتغلش عند حد
وتقول اني مش بانشر غير أخباري !!!
خلاص ما لقتش غيري تعمله السايد كيك بتاع الريبورت
والله واتهزقنا
مافيش احترام ولا أدب خلاص
كنت طالع في الدوحة ديبيتس أتكلم عن نفسي؟ في هارد توك؟ باطلع عالجزيرة والبي بي سي والسي إن إن أقدم وصلة رقص؟ باقدم طبق اليوم شوربة كوارع بالتوم؟
يا ستي إعتبريني باعمل فيديو بلوجينج
مش فيه ناس بتعمل بلوجنج بالفيديو وتقول رأيها في المواضيع
هو الواد زعيم الهجانة أحسن مني ؟؟؟
بس أنا أصلا مش باحب الكاميرات ولولا باطلع لأمر مهم مكنتش طلعت
أنا قبل وثائقي الجزيرة مكنش حد يعرف شكلي أصلا من اللي بيزوروا المدونة ومكنتش مهتم
بالعكس بعد ما بقيت مشهور كده بقى الامن يتحرش بيا اكتر في المظاهرات
وبقوا يجولي مخصوص يرشوا سبراي الفلفل في عيني ويقولولي منور يا أستاذ وائل
حتى شرطة المرور !!!
قضيت ليلتين في حجز قسم الخليفة بسبب مخالفة مرورية السنة دي بشكل تعسفي
وإتحطيت في عربية ترحيلات غير ادمية مربوط من ايديا الاتنين مع اتنين مجرمين مبرشمين ضربوا بعض علشان علبة كبريت وكدت أصاب بازمة قلبية في العربية
وعربيتي كانت محجوزة ولما رحت استلمها كانوا مسمينها عربية الصحفي !!!
ده محدش يعرفه أصلا لأني مش باتاجر بنفسي
نزلنا وصورنا المظاهرات وانضربنا واتسحلنا وشهرنا ناس ما تستاهلش وعملناهم ابطال
وخلاص قررت ما انزلش تاني انا حر
باعمل حاجة تانية وباسافر بره الفت النظر لقضية بلدي اللي محدش مهتم بيها هناك لأن مبارك صاحبهم
ولأن مصر مش إيران ولا سوريا ولا كوريا الشمالية ومحدش مهتم بحريتها من عدمه
وأنا مؤمن إن ده شيء مهم جدا واللي مش عاجبه يتفلق
وبانشر تجربة التدوين في الدول اللي محتاجاها
ده دوري اللي مؤمن بيه دلوقت وانا حر برضه
وحر لو غيرته وقررت اربي حمام عالسطوح واقف كل يوم المغربية بعلم أحمر أصفرلهم
تيجي بعد ده حتة صحفية بتقبض آخر الشهر أو بتاخد بالقطعة تقوللي قرص ودن وبيتكلم عن نفسه
ولما اتصل بيها تقوللي مش إنت إللي ها تعلمني الصحافة !!!
علشان باقولها تقريرك من غير مصادر !!!
لا طبعا ده أنا أعلمك وأعلمك وأعلمك
أنا باعلم الصحفيين اللي اكبر منك ازاي يستخدموا الانترنت والسوشيال ميديا أصلا
ويظهر كمان ها أعلمكم صحافة لأنكم ما بتعرفوش صحافة
يعني كاتبة تقرير من غير مصادر وكمان بتتنفخي عليا !!!
وإحنا كمان ما بيتقرصش لنا ودان زيكم لا مؤاخذة
إحنا اللي شايلين خراكم وبنتحمل المسئولية وبنتحبس وبنطلع نكمل
وعمر ما حد قرص ودننا
وفي الختام
أحب أقول لما صديقك يتنفش عليك ويشوف نفسه ما ينفعش يبقى صديق
وإحنا لو إتنفشنا محدش يقدر على نفشتنا وعندنا اللي ننفش بيه بس ربنا خلقنا متواضعين بنحب الناس نعمل إيه
مافيش صاحب يتصاحب كما قال بيسو
وكختام تاني نحب نقول
لو كان الصحفيين شايفين شغلهم مكانش بقى فيه مدونين أصلا
19:21 | Permalink | Comments (22)