Ok

By continuing your visit to this site, you accept the use of cookies. These ensure the smooth running of our services. Learn more.

Tuesday, 04 January 2011

in reply to Alhayat report

أيوة ها نعلمكم الصحافة وإحنا وداننا مش بتنقرص

إستفوجئت - حلوة إستفوجئت دي - كلام مدونين بقى ما تآخذوناش
إستفوجئت ب - مش عارف أسميه إيه - مقال رأي؟ تقرير صحفي؟ تقرير رأي؟ بين البينين؟ حاجة كده خنثى مشكل زي أنثى التنين؟ إفتكاسة جديدة في عالم الصحافة يمكن علشان دي النسخة السعودية مش اللندنية - المهم نبتعد عن المصطلحات الأكاديمية والتعريفات المتعارف عليها علشان إحنا شوية عيال مدونين سيس ولاد حرام ما بنفهمش صحافة وخلينا نتكلم بالهجايص
المهم إستفوجئت كده ببتاع ما منشور على جريدة الحياة - فرع السعودية - زي ما باين من الموقع بعنوان
خفوت صوت المدونات الرقمية وارتفاع صراخ فيسبوك مصريا
يللا روحوا اقروه وتعالوا نتكلم هنا حيث الفضاء التدويني الفوضوي الغير محترم صحفيا
بصرف النظر بقى عن دقة محتوى - البتاع - وإفتراضات الست أمينة مع نفسها اللي قالتلي على التليفون إنها بتقول رأيها وإن مش أنا - بالذات - اللي ها أعلمها صحافة - الله يكرم أصلها طبعا على الذوق والأخلاق والمهنية - خصوصا الإفتراض بتاع الطبقة الوسطى والناس اللي معاها فلوس - رغم اني اعرف مدونين مشردين ومطرودين من بيت ابوهم وبيدونوا من الانترنت كافيه
وبدون أي تكليف خاطر من الست امينة ترفع سماعة التليفون تتصل بقدامى المدونين - حلوة قدامى المدونين - وتطمن على احوالهم وتشوفهم بطلوا فعلا ولا لا وهل هم كمان موجودين على فيس بوك وتويتر ونشطين عليه ولا اعتزلوا تماما وإيه رأيهم في رأيها الهلس ده
قوم إيه الست أمينة قررت تدلي - بجردلها - في الأمر خبط لزق كدهون من خير إحم ولا دستور
وأثبت بما لا يدع مجال للشك - في دماغها طبعا - وبدون براهين وإستدلالات ولا معادلات فيزيائية ولا كيميائية - ماهو برضك الموضوع مش علم صواريخ يعني - أثبتت إن قرص الأمن لودان المدونين - الكلمة حزت فيا طبعا إنتم عارفين عندي عقدة من وداني - أثبتت لا فض فوها إن قرص الودن للمدونين جاب نتيجة والمدونين بقم بيعملوا ما شالله رقابة ذاتية على نفسهم
إفتراض كده جالها من عند ربنا ما أنزل به من سلطان
مش عارف ليه ناس كتير حابة تزايد على المدونين : لورانس بنتاك - يسري فودة - عمرو الكحكي واخيرا الست أمينة خيري
رغم إن عمرنا ما روحنا لحد قلناله شغلنا في جورنالك أو قناتك أو إدونا عضوية نقابة
وأنا كاتب على مدونتي كما قالت أمينة برضه : ما باشتغلش عند دين أم حد
يعني مش مطالب بشيء قبل أي حد
يعني أدون ما أدونش أنا حر
أتبنى قضايا أو ما أتبناهاش أنا حر
أحط فيديوهات ليا وأنا باترقص او بانكش شعري أنا حر
اللي بيدفعلي من جيبه يقطع عني المعونة او الصدقة !!!
أصل لما تزايد على المدونين مش ها يبان إنك صحفي جامد بالعكس إنت ها تعمل نفسك مسخة لو المدونين حطوك في دماغهم
وبعدين ده بيدي إنطباع عنك انك شخص تافه منفوخ ومصدق نفسه انه صحفي
ولا انت مش منفوخ ؟؟؟
وبعدين يعني يا سيدي ما احنا اشتغلنا صحفيين
ولقيناها من جوه شلل ومخوخة وبايظة والناس بتهر على روحها لو جالها تليفون امن دولة او مخابرات
وإشتغلنا كمان مراسلين وكالات اجنبية قد الدنيا ولقينا الجو هوه هوه
وخدنا كمان جوايز صحافة دولية من المراكز اللي بتدربكم أصلا تبقم صحفيين
وخدنا جوايز في حقوق الإنسان والتدوين
يعني بروحين أهه بنشتغل من الناحيتين مش ناحية واحدة - نقطع نفسنا يعني ؟؟؟
يمكن ده اللي قاهركم ومفلفلكم؟
محكوم عليا حكمين غيابي حبس مجموعهم إتناشر شهر السنة اللي فاتت
مقبوض عليا في أول السنة في نجع حمادي علشان رحت أعزي ومبيت في سلاحليك مديرية أمن قنا عالبلاط في عز البرد
فقدت واحدة من أسناني الأمامية
فتشوا طيزي في المطار وصادروا الكمبيوتر بتاعي وبيفتشوني كده كل مرة أسافر
بعتوا ورايا حد من المخابرات في مطار براج واتنين في واشنطون
متهم بالعمالة والإسترزاق والإلحاد وكل اللي نفسكم فيه
زمايلي المدونين بيقطعوا عيشي وبيبوظولي شغلي وهم مرتاحين وعندهم شغل لا وبيروحوا يشتغلوا في الأهرام كمان ويدعوا النضال على دين أبونا وهي حياتهم عبارة عن وسايط وعلاقات وواحد منهم كان بيقبض اربعتلاف جنيه من حركة كفاية علشان يدير الموقع رفضتهم انا علشان رأيي ان ده عمل تطوعي ودلوقت البيه بيزايد على نضافتي
زمايلي المدونين بينموا عن حياتي الخاصة ويتندروا على فشلي
ومع ذلك إستمريت مش على المدونة بس لكن على تويتر وفيس بوك ويوتيوب
قناتي على يوتيوب شافها 40 مليون شخص - الرقم صحيح ما تفركوش عينكم
ولما باطلع في التلفزيون مش باطلع اترقص ولا اتكلم عن عمليات التجميل اللي عملتها في بزازي
باطلع أتكلم عن مواضيع الساعة ومواضيع مهمة وباقول رأيي فيها
يمكن سيادتك شايفاني تافه باقول كلام تافه بس ده مش رأي الفضائيات اللي بتستضيفني غالبا ومهتمين إن عندي حاجة أقولها تهم جمهورهم
إلا إذا كان فيه ناس شايفة إن ظهوري في التلفزيون مزعج بصريا ليهم لدرجة انهم مش بيسمعوا اللي باقوله مهم ولا لا
طلعت في برامج محترمة ومتشافة ومسموعة علشان أوصل صوت القضية وصوت بلدي
لا عمري تاجرت بنفسي ولا طلبت حاجة لنفسي ولا إتفاخرت بمنجزاتي ومشروعاتي - اللي غيري عمال يعمل مشروعات مجتمع مدني دلوقت ويسترزق منها وأنا بس اللي يتشتم ويطلع ديني
باسافر بره أدي محاضرات في جامعات مرموقة عن التدوين والسوشيال ميديا وأعمل دعاية للتجربة المصرية الناجحة اللي العالم حابب يسمع عنها
باسافر أدرب الناس في الدول العربية وأوروبا الشرقية والدول النامية إزاي يستخدموا التدوين زي ما إستخدمناه إحنا
ما دورتش على وظيفة ثابتة ولا جوازة مستقرة ولا مشروع أسترزق منه وأدعي النضال في نفس الوقت
إعتزلت جو وسط البلد الوسخ ورحت قعدت في الصحرا
صحتي إضطربت والله أعلم إيه العلل اللي ها تظهر عليا
آدي حصادي بتاع 2010
حلو كده يا ست أمينة
حصادي بقى ولا حصادك؟
عايزة حصاد أقدم ولا عارفاه ؟؟؟
تقومي بعد كل ده تقوليلي مش انا اللي هاعلمك الصحافة !!!
مدونين كتير سافروا وهاجروا واتجوزوا وخلفوا ودوروا على وظايف ثابتة حتى ولو في جرايد حكومية
وأنا اللي قاعد لسه أهبل قال إيه باناضل علشان البلد تتغير
ومع ذلك الست أمينة زنقت معاها وما جابتش سيرة أي حد غيري أنا في البتاع بتاعها
وتتهكم عليا وعلى شعار المدونة : اللي ما بيشتغلش عند حد
وتقول اني مش بانشر غير أخباري !!!
خلاص ما لقتش غيري تعمله السايد كيك بتاع الريبورت
والله واتهزقنا
مافيش احترام ولا أدب خلاص
كنت طالع في الدوحة ديبيتس أتكلم عن نفسي؟ في هارد توك؟ باطلع عالجزيرة والبي بي سي والسي إن إن أقدم وصلة رقص؟ باقدم طبق اليوم شوربة كوارع بالتوم؟
يا ستي إعتبريني باعمل فيديو بلوجينج
مش فيه ناس بتعمل بلوجنج بالفيديو وتقول رأيها في المواضيع
هو الواد زعيم الهجانة أحسن مني ؟؟؟
بس أنا أصلا مش باحب الكاميرات ولولا باطلع لأمر مهم مكنتش طلعت
أنا قبل وثائقي الجزيرة مكنش حد يعرف شكلي أصلا من اللي بيزوروا المدونة ومكنتش مهتم
بالعكس بعد ما بقيت مشهور كده بقى الامن يتحرش بيا اكتر في المظاهرات
وبقوا يجولي مخصوص يرشوا سبراي الفلفل في عيني ويقولولي منور يا أستاذ وائل
حتى شرطة المرور !!!
قضيت ليلتين في حجز قسم الخليفة بسبب مخالفة مرورية السنة دي بشكل تعسفي
وإتحطيت في عربية ترحيلات غير ادمية مربوط من ايديا الاتنين مع اتنين مجرمين مبرشمين ضربوا بعض علشان علبة كبريت وكدت أصاب بازمة قلبية في العربية
وعربيتي كانت محجوزة ولما رحت استلمها كانوا مسمينها عربية الصحفي !!!
ده محدش يعرفه أصلا لأني مش باتاجر بنفسي
نزلنا وصورنا المظاهرات وانضربنا واتسحلنا وشهرنا ناس ما تستاهلش وعملناهم ابطال
وخلاص قررت ما انزلش تاني انا حر
باعمل حاجة تانية وباسافر بره الفت النظر لقضية بلدي اللي محدش مهتم بيها هناك لأن مبارك صاحبهم
ولأن مصر مش إيران ولا سوريا ولا كوريا الشمالية ومحدش مهتم بحريتها من عدمه
وأنا مؤمن إن ده شيء مهم جدا واللي مش عاجبه يتفلق
وبانشر تجربة التدوين في الدول اللي محتاجاها
ده دوري اللي مؤمن بيه دلوقت وانا حر برضه
وحر لو غيرته وقررت اربي حمام عالسطوح واقف كل يوم المغربية بعلم أحمر أصفرلهم
تيجي بعد ده حتة صحفية بتقبض آخر الشهر أو بتاخد بالقطعة تقوللي قرص ودن وبيتكلم عن نفسه
ولما اتصل بيها تقوللي مش إنت إللي ها تعلمني الصحافة !!!
علشان باقولها تقريرك من غير مصادر !!!
لا طبعا ده أنا أعلمك وأعلمك وأعلمك
أنا باعلم الصحفيين اللي اكبر منك ازاي يستخدموا الانترنت والسوشيال ميديا أصلا
ويظهر كمان ها أعلمكم صحافة لأنكم ما بتعرفوش صحافة
يعني كاتبة تقرير من غير مصادر وكمان بتتنفخي عليا !!!
وإحنا كمان ما بيتقرصش لنا ودان زيكم لا مؤاخذة
إحنا اللي شايلين خراكم وبنتحمل المسئولية وبنتحبس وبنطلع نكمل
وعمر ما حد قرص ودننا
وفي الختام
أحب أقول لما صديقك يتنفش عليك ويشوف نفسه ما ينفعش يبقى صديق
وإحنا لو إتنفشنا محدش يقدر على نفشتنا وعندنا اللي ننفش بيه بس ربنا خلقنا متواضعين بنحب الناس نعمل إيه
مافيش صاحب يتصاحب كما قال بيسو
وكختام تاني نحب نقول
لو كان الصحفيين شايفين شغلهم مكانش بقى فيه مدونين أصلا

Comments

تسلم ايدك يا وائل
خلي كل واحد يعرف حدوده

Posted by: nirfana | Tuesday, 04 January 2011

فكك منها يا وائل، دي نفسنة
و على فكرة معظم اللي بيشتغل على النت يعرف المدونات و يعرف وائل عباس لكن ما حدش يعرف الست امينة دي
انا ما عرفتهاش الا لما طلعت في برنامج صباح دريم غير كده عمري ما قريت لها اي حاجة
تحياتي

Posted by: محمد النجار | Tuesday, 04 January 2011

حقولك رأيى بصراحة.....المقال انا شايفه صح الى حد ما

بس المكالمة هى اللى خرا....اكيد فيه نفسنة منها او تنطيت منك او الاتنين
بس انت رديت واوفيت

Posted by: Scorpionawy | Tuesday, 04 January 2011

لن اجاملك و لكن أحييك
و لست طامعا في شيء و لكن أطمع في المزيد من الأصوات التي تتشابه مع صوتك
علنا نخرج رويدا رويدا من قماقمنا التي أكلها العفن و فاحت روائحها الكريهة لدرجة أننا أدمنا هذه الروائح و أصبحت جزءا لا يتجزأ من شخصيتنا
و أستذكر معك ماختمت به
"لو كان الصحفيين شايفين شغلهم مكانش بقى فيه مدونين أصلا"

Posted by: متعاطف | Tuesday, 04 January 2011

العالم ديه عندها استحبس في دماغها.... أنا اشتغلت في المصري اليوم ولقيت كل اللي شغالين معايا دبلومات ههههههههههه وأنا الوحيد اللي كنت ليسانس.... صحيح الصحافة لمت

Posted by: elbarck | Tuesday, 04 January 2011

إيه يا إبنى الحرقة اللى إنت فيها دى؟!!
يااااه دانتا شايل حاجات كتير جواك و ساكت.
على العموم ده كويس إنك خرجت اللى جواك، و سيبك منها زى ما إنت قلت بنفسك، إنت إديت محاضرات فى الأماكن اللى بتخليهم صحفيين!

Posted by: BeLiEvEr | Tuesday, 04 January 2011

ياااااااااه
حمد الله على السلامه ياأستاذنا الكبير وحشتنا قوى

تعرف أنا سعيد بالمقال اللى كتبته عشان حاجه واحده بس


عشان كل كلمه أنت بتقولها بحس أنك زى صبح جديد بتتولد أول ميطلع أول شعاع نور ليه

يملى الدنيا دفء يدى الناس أمل جديد فى اليوم اللى هيبتدى
شكرا ياوائل وأرجوك أنا بفتح المدونه كل يوم عشان أقرائلك بس أكتب متنقطعش وأنا هقرأ أى حاجه

Posted by: ياه حمد على السلامه | Tuesday, 04 January 2011

ياااااااااه
حمد الله على السلامه ياأستاذنا الكبير وحشتنا قوى

تعرف أنا سعيد بالمقال اللى كتبته عشان حاجه واحده بس


عشان كل كلمه أنت بتقولها بحس أنك زى صبح جديد بتتولد أول ميطلع أول شعاع نور ليه

يملى الدنيا دفء يدى الناس أمل جديد فى اليوم اللى هيبتدى
شكرا ياوائل وأرجوك أنا بفتح المدونه كل يوم عشان أقرائلك بس أكتب متنقطعش وأنا هقرأ أى حاجه

Posted by: ياه حمد على السلامه | Tuesday, 04 January 2011

محذوف :

محدش طلب رأي دين أمك في شخص حضرتي
خلوا عندكم دم بأه

Posted by: سعيد | Wednesday, 05 January 2011

تعرف يا وائل، انا شفتك ماشى فى شارع قصر العينى بالليل الأسبوع اللى فات
حتى بالامارة كنت لابس بدلة سودا وكان فيه بنت ماشية جنبك واتنين كانوا قصادك مش عارف كانوا معاك ولا لأ
وأكيد كنت انت لإنى عارف شكلك كويس
واللحظة اللى وقعت عينى عليك فيها كنت بتضحك
قلت فى دماغى يا قوة الله.. الراجل دا ازاى عايش حياته عادى ومش خايف.. لا وإيه.. بيضحك كمان!! وانا اللى ركبى بتخبط فى بعضها لو شفت ظابط بوليس معدى قدامى من بعيد
تعرف
مع انى ما اتشرفتش بمقابلتك قبل كده
بس انت واحد من اكتر الناس اللى باحترمهم فى حياتى
لانك واحد صاحب قضية عادلة بجد
ونزلت الشارع واتبهدلت واتمرمطت
وعملت حاجات ما حدش عملها قبلك
رغم انه فى بعض الأحيان بتستفزنى بعض اراءك فى الدين
بس انت بتقول كده عشان قناعاتك الشخصية مش عشان تستفز الناس وتلفت انتباههم
باذن الله ح يكونلك ثواب كبير عند ربنا لانك ما قلتش غير كلمة الحق
ربنا معاك
وسيبك من شوية الأرزقية دول

Posted by: شاب مصري | Wednesday, 05 January 2011

محذوف

انت لسه بتيجي هنا يا عرص يا سمسار اراضي وضع اليد يا بتاع الحزب الوطني

Posted by: Ehab Talaat | Thursday, 06 January 2011

يا عم انت واجع دماغك ليه، دول شوية موظفين جبناء
هو صحيح مين امينة خريي دي ؟

Posted by: معتز | Thursday, 06 January 2011

إذا ما الدنيا أقبلت باض الحمام على الوتد. وإذا ما أدبرت بال الحمار على الأسد

Posted by: Alaa Ramadan | Thursday, 06 January 2011

Bravo alik ya Mr. Wael I am very proud of you the man who dare to say the facts without no fear . You deserve to be the best example of our youth. I wish there are millions like you. I wish the best and good luck with your life and please don't sacrifice your life for kelab el solta and dirty people like Amina or others. You deserve to be the hero of Egypt. Please take care and god bless you

Posted by: allah wahed | Thursday, 06 January 2011

مدونة رائعة جداااااااااا ما شاء الله اتمنى لكم التوفيق

Posted by: ساسو | Thursday, 06 January 2011

Dear Wael

I am one of those 40 million who watch your channel, I read your reply for the Hyat article, away from the whole reply; I have one comment or let's say I blame you for talking some bad words, Please remember there are girls, women, young and all kind of peoples who follow your web.
I do expect you will amend that article ASAP with a regret from your side for that, I know you were angry but we should show our good face even in bad times.

Thank you
Haytham
Egyptian

Posted by: haytham | Saturday, 08 January 2011

بس بص قلبها يا جدع .. يعني واحده كاتبه مقال من غير مصادر وفي موضوع اطرافه متعددة جدا مش تقوم مثلا مخبطه في مدونة مش معروفه مثلا او قريبه من اللي بتقوله نوعا ما او صاحبها متدين مثلا وهيرد عليها بـ"اتق الله يا اختي" لأ دي سايبه المدونات كلها وماسكه فيك !! هي دي غلطتها
على فكره استشهادها بيك في غير الموضوع يعني حسيت انها لما جابت سيرتك طلعت بره سياق المقال نوعا ما ورجعت تاني وكإنها بتضرب فيك انت لإن مفيش مدون او صحفي او سياسي مش بينزل على مدونته او موقعه اخباره ياراجل ده اوباما واحمدي نجاد الاتنين بينزلوا اخبارهم في مدوناتهم وحتى حمو بازوكا المدون السكندري المغمور بيتكلم عن خناقته مع حماته على حلقات وباستنى اشوف عمل ايه مع الولية السو دي برغم انه بيكتب حاجات حلوه من وقت للتاني
بص هي صحفية بتكتب مقال بالطريقة المصرية التقليدية لم كام اسم بتتوقع كلامهم وحطه تصريحات وكام شخص تتوقع تصرفاتهم وحطها ردود افعال واقققققلب وعاوزها باللحمه ولا بالسكرررررررررررر

Posted by: Hossam | Monday, 10 January 2011

Really important written content. the information that you shown is hard to trust and many wonderfully i liked the way you provide things here.

Posted by: break up quotes | Thursday, 07 July 2011

Merci pour cet article

Posted by: Voiture d'occasion en Algerie | Friday, 26 August 2011

يعم متاخدش في بالك
لو كل كلب عوى القمته حجرا
لصار مثقال الحجر بدينار

Posted by: اصالة | Wednesday, 31 August 2011

thanx alot for sharing this post

Posted by: حدوتة مصرية | Wednesday, 07 September 2011

فكك منهم

Posted by: منتدى اصالة | Sunday, 18 September 2011

The comments are closed.