الوعي المصري

بعد صدور الأحكام في تفجيرات عبدالمنعم رياض

الآن وبعد صدور الأحكام في قضية تفجيرات عبد المنعم رياض وخان الخليلي والسيدة عائشة من الواجب تذكير القراء وخصوصا الجدد ممن لم يتابعوا الوعي المصري عام 2005 بالأحداث كما غطتها الوعي المصري في وقتها حيث تواجد الوعي المصري في ميدان عبد المنعم رياض بعد الإنفجار بدقائق فقط كما قمنا بزيارة شبرا الخيمة حيث يسكن المتهمون وإلتقطنا هذه الصور النادرة

وكان البطل هنا هو هذه الكاميرا أكرم الله مثواها

Trust Power Cam 350 FS
وهي بطلة كثير من الأحداث في عام 2005 ومن بينها أحداث الإستفتاء الشهيرة وهي الكاميرا التي ضربت يومها وإختطفتها الشرطة مني وصاحبة قصة البطاريات الشهيرة التي تسمعونها في وثائقي قناة الجزيرة عن المدونين
أحداث الإستفتاء - وصلة أولى
أحداث الإستفتاء - وصلة ثانية
وقد إنتهى بها الأمر مباعة لأحد الأصدقاء من النشطاء والتي سرقتها الشرطة منه هذه المرة للأسف بلا رجعة
رحمها الله
-
التغطيات

للبيع
كاميرا ذات تاريخ أيضا
Sony H1

هذه الكاميرا أيضا شهدت كثير من الأحداث الهامة وكان أهمها أحداث نادي القضاة
وإستخدمت لقطات صورتها بها في قناة الجزيرة وقناة الحرة

إضغط هنا
للبيع لأعلى سعر
5.1 ميجا بيكسل
حجم الصورة 2592 في 1944 بيكسل
12x زووم بصري
شاشة بانتالا 2.5 بوصة
عدسة سوني
Super Steady Shot
تسجيل فيديو صوت وصورة MPEG
تلتقط فيديو بسرعة 30 فريم في الثانية
مجهزة للعرض على شاشة التلفزيون
ذاكرة داخلية 32 ميجا
تقبل كروت الذاكرة سوني ميموري ستيك
بروسيسور داخلي
تعمل ببطاريات الألكالاين العادية أو بطاريات الشحن
ومميزات أخرى كثيرة

صور قتيل جزاري الشرطة الطفل

أحدث ضحية لجزاري الشرطة عمره إتناشر سنة فقط
تحذير لضعاف القلوب - الصور صادمة جدا

الوعي المصري تكشف كذب تقرير الطبيب الشرعي
وكذب مساعد وزير الداخلية إياه معتاد الكذب

التقرير قال جثة الطفل محمد ممدوح ليست بها أثار تعذيب
وأن محمد مات بالسكتة القلبية

ونحن نخرم عينهم بصور إصابات تعذيب محمد
حروق وكسور وجروح قطعية وكهرباء في المؤخرة والخصية

الصور وصلتنا من مصادرنا بالمنصورة
مع حوار مع أم القتيل
الصور أخذت قبل وفاته بإتناشر ساعة وكان ما زال حيا يتأوه

أم محمد تقول
ابني كان رايح القسم سليم زي الحصان
ابني فتحوله جنبه في القسم
الكابتن سيد بتاع المركز هو اللي واخده من هنا وكان معاه اربع مخبرين تبع قسم المنصورة
قعدت أصوت في القسم قام المأمور بعته مستشفى الصدر
في مستشفى الصدر الدكتور قال لي ده عامل عملية
ابني عملوله عملية في المركز
الواد كله محروق وظهره مكسور
وديته الجامعة قالولي دي مش عملية دي مفتوحة غلط
وبعدين طردوه من المستشفى

المستشفى عرصت على المأمور بتاع المركز
خدوه بعربية مخصوص ورموه على الكوبري
رموه عند موقف المنصورة بتاع الدراسات
كان مرمي خلصان خالص والناس الله يصلح حالهم جابوه
بقاله يومين في البيت
أعمل إيه يابا مانا ماليش ضهر وبعت اللي ورايا واللي قدامي
ممكن ادخل السجن في اي وقت وعليا فلوس قد كده وباجري على خمسة
اخوه ابراهيم ممدوح لسه في المركز
خدوه علشان ما يتكلمش
دول قلبهم بقى يهودي وها يعملوا في اخوه زي ما عملوا فيه
كل اللي جوه في المركز بيعملوا فيهم كده
ابني وابن غيري
اقول ايه بس بعد ما عيالي راحوا
من يوم ما جوزي مات محدش بيجري عليا واتداينت واتهانت

ده حرق كهربا
سلسلة ضهره مكسوره اهه
وجنبه مخروق
هو فيه عمليات بتتعمل في المركز
مستشفى الصدر طردوه
الدكتور في الجامعة قال لي عملية رئة ايه يا حاجة
دي مش عملية ده حد خابطه بحاجة يا حاجة
وباقول يا رب ربنا ينتقم منهم ربنا ينتقم من الظالم
ربنا ينتقم من اللي في المركز بتاع المنصورة كله
ما حلتيش حاجة علشان ابيعها
معندناش حمام وبنملا المية من بره

لما انا سبته في المستشفى ومشيت طردوه
قالوا طردناه علشان كان بيقطع في المراتب
هو بيتحرك اصلا علشان يقطع في المراتب
بيقولي التمرجية حطوني في عربية ورموني في الموقف
وواحد ابن حلال ركبه عربية محلة دمنة
وواحد تاني جابه بتوك توك لحد البيت
جالي مرسال ابنك في مستشفى الصدر
رحت التمرجية قالولي ممنوع تقعدي معاه علشان هنا قسم القلب

الصور بدون علامة مائية
وندعوكم لسرقتها ونشرها في كل مكان
إفضحوا الفجرة الجزارين
إستقيل بقى يا فاجر أكرملك
الناس كلها بتلعنك
وأبو طلعة جوية ما بيتكلمش ليه وساكت هو كمان

تقرير خاص لقناة الحرة عن المدونين المصريين

تحدث في التقرير كل من خالد البلشي وجمال عيد ومالك مصطفى وشاهيناز عبد السلام وعبد المنعم محمود وآخرون بالإضافة إلى العبد لله
شاهد الجزء الأول

إضغط هنا
-
الجزء الثاني

إضغط هنا
-
الجزء الثالث

إضغط هنا
-
الجزء الرابع

إضغط هنا
-
الجزء الخامس

إضغط هنا
-
الجزء السادس

إضغط هنا

هوجة - دقن - عرابي

هاجت الدنيا وماجت وقامت ولم تقعد وإنبرى الإسلامجية إزاي جامعة الزقازيق تحلق دقن أحمد عرابي اللي في الشعار بعد كل السنين دي وتخليه أقرع كده من غير دقن وإنبرى عظماء الكتاب يتحدثون عن المؤامرة الأمنية لحلق دقن عرابي لأنها تحرض على الإرهاب من وجهة نظر الأمن وتوالت ردود الأفعال الأتفه من بعضها سواء من المتأسلمجية أو من إدارة الجامعة التي طلعت أهبل من الجميع وهل هذا بسبب موضوع فتحه موقع تافه لا ينشر الا الاخبار المفبركة والامنية والهجوم على المعارضة المصرية وهو موقع من المعروف ان الامن قام بإنشاؤه من أجل دحض مصداقية أخبار المواقع الإلكترونية وإختار القائمين عليه القيام بدور الأراجوزات الأمنيين رغم إنتماؤهم السابق لأحد الجماعات الإسلامية الراديكالية العنيفة وأكثر من مرة أقوم أنا أو أحد الزملاء بمحاولات للتحقق من أخبار هذا الموقع خاصة ما يتعلق منها بوقائع تعذيب فيثبت أنه لا أساس لها من الصحة وان حتى الشخصيات وأرقام المحاضر غير موجودة بالمرة

والسؤال هنا هو صحيح عرابي كان بدقن
طب وها نتعب نفسنا ليه
ماهو فيه صور كتيرة اترسمت له في هذا العصر من رسامين مصريين وأجانب
بل كمان كانت فيه صور فوتوغرافية ليه



محاكمة عرابي

عرابي - على اليمين - في المنفى
طب خدوا دي بقى
صورة فوتوغرافية نادرة لأحمد عرابي نفسه ومش رسمة

طب مش يمكن ياد يا وائل عرابي كان مربي دقنه في فترة ما
آه صح معاكم حق هو فعلا كان مربيها
بس الكلام ده بعد ما كبر وعجز ودقنه إبيضت والملكة فيكتوريا اصدرت عفو عنه ورجع مصر

وبرضه ما كانش شكله زي ماهو في الشعار حتى شوفوا
مش نفس حتى تقاطيع الوش والجمجمة

سبحان الله
أما والله حاجة تحير
أومال اللي في الشعار ده يطلع مين
أقولكم الغلطة التاريخية اللي وقع فيها المصمم من تلاتين سنة وبيصلحوها دلوقت
اللي في الشعار ده طلع الخديو إسماعيل

وتوته فرغت الحدوته
ورجاء لا تنشغلوا بالتوافه عن ما هو هام وحيوي ولا تتبعوا المواقع الأمنية

البوسطجية إشتكوا من فتح مراسيلي

بقت عادة وشيء متوقع كل ما يجيلي جواب خاصة لو جاي من بره الاقيه مفتوح
يعني دي مثلا مجلة الأمريكان بورد أسوسييشان - حاجة زي نقابة المحامين عندنا كده - اللي أنا عندي عضوية شرفية فيها رغم إني مش محامي فبيبعتولي المجلة دي في كيس شفاف أهه لكن يظهر الشفافية مش بتعجب البعض برضه

وده جواب من نفس الجهة المفروض فيه كارنيه العضوية وطبعا شايفين الظرف مفتوح منين وطبعا الكارنيه وقع أو الله أعلم مين أخده وإضطروا يبعتولي واحد تاني

وده الواشنطون بوست باعتالي العدد اللي إتنشر مقالي فيه وزي ما إنتم شايفين علشان يعرفوا ايه اللي جوه ويبصوا قطعوا الظرف إزاي
بس ده أرحم من اللي حصل لظرف منظمة العفو الدولية اللي جايلي من سويسرا

زي ما انتم شايفين تم اتخاذ الاجراء الامني المعتاد وقطعوا الظرف من فوق ومن الشمال لكن يظهر ما اتكيفوش من منظمة العفو اللي كانت باعتالي عدد من مجلتهم ناشر حاجة عني قاموا فتحوا الظرف من تحت وخدوا راحتهم بقى وطلعوا المجلة بتاعة المنظمة المشبوهة زي ما انتم عارفين وكأنهم مثلا باعتينلي مجلة سكس وبعدين لما حبوا يلموا الليلة ربطوا الظرف بدوبارة زي ما انتم شايفين كده

ويظهر الإخوة الأمريكان هما كمان إتعدوا من حلفاؤهم المصريين
ده جواب مستعجل بالفيد إكس من المركز الدولي للصحفيين علشان جايزة نايت اللي كسبتها ووصلني مفتوح وملزوق بالشريط الأخضر اللي انتم شايفينه ده بتاع إدارة الأمن القومي الأمريكي

قلة أدب من الأمريكان هما كمان
بس على الأقل عندهم ذوق وقالوا إن إحنا اللي فتحنا الجواب
يا حرام يظهر خايفين عليا من الجمرة الخبيثة

تحالف الإتصالات وأمن الدولة















-
وبمناسبة البوسطجية

تصوير أسد وأبو شنب وأحمد سعد
دي صور لإعتصام عمال البريد اللي اتفض من فترة وما كنتش نشرت تغطية ليه بسبب الإنشغال
وبسبب تغطيتنا إحتجزونا في قسم الشرطة ساعتين وأخدوا البطايق الشخصية والله أعلم عملوا بيها إيه لأنهم أرفقوها باوراق الله أعلم بمحتواها ومش بعيد يلفقولنا قضية زي بتاعة عبد المنعم كده ويقولك تنظيم بتوع البريد

كان معايا عمر أسد المدون ومحمد الطاهر المدون وأبو شنب من إذاعة حريتنا وواحد من المدونين الإخوان ودي صورة بعد ما منعونا من التصوير وإحنا بنتكلم مع واحد من الهيئة وكان الوقت بعد منتصف الليل وأنا ما اكلتش طول اليوم فتلاقوني في إيدي باكو بسكويت وحتى ده ما إتهنيتشي عليه لأني إديته للعمال المعتصمين اللي قالولنا انهم مجوعينهم رغم اننا لما رحنا القسم وقابلنا اتنين من نواب رئيس الهيئة قالولنا جبنالهم وجبات من كنتاكي !!!

بعد ما أخدونا القسم وقعدنا مع سيادة اللوا ونواب رئيس مجلس الإدارة كانت الكلمة اللي في بق الظباط تأمينا على بهوات جمال مبارك والليبرالية الفاشية الجديدة هو فيه حد بيتعين دلوقتي وهو فيه حد بيتثبت دلوقتي والدنيا إتغيرت وأنا مسكت نفسي بالعافية أشرشحلهم واقولهم وإنتم بروح أمكم شغالين بعقد في الشرطة برضه !!!

بيحطوا ايديهم قدام الكاميرات لمنعنا من التصوير

أحد العمال المحتجزين داخل المبنى



صورة من أسفل الباب الحديدي ويظهر أحد العمال راقدا على الأرض مريضا
هؤلاء هم العمال الذين قال عنهم نائب رئيس الهيئة جبناهم من الشارع ومبالهمش يومين وعاوزين يتثبتوا

صورة أخذناها من موبايل أحد العمال من داخل المبنى حيث لم نتمكن من الدخول

فوق كوبري مشاه رمسيس نجمع الصور على جهاز أسد وبالمصادفة وجدنا إشارة واي فاي بحالة جيدة ودخلنا على الإنترنت على الهواء مباشرة من ميدان رمسيس
-
تغطيات أخرى غير منشورة

الوعي المصري في رفح
إنتظرونا العدد القادم علشان العدد ده زحمة قوي
ناس كتيرة بتعتب وتلوم علينا إننا مش بنغطي كل حاجة
وفي رأيهم فيه حاجات مهمة كان مفروض الوعي المصري يكون موجود فيها
زي أحداث المياة في قرى الدلتا
وأحداث التلبانة والمواطن اللي موتوه من التعذيب
وخروج طلعت السادات
لكن باقول لهم مهلا يا سادة
الوعي المصري ميزانيته محدودة لإنها من جيب حظرتنا فقط
يعني مشوار زي بتاع رفح ده كان فيه كعاية محترمة وزي ما إنتم عارفين محدش بيمولنا وتجوع الوعي المصري ولا تأكل بثدييها ولا عاوزيننا ننشر مواضيع تسجيلية عن معمر القذافي إحنا كمان
وبعدين دلوقتي ما بقاش فيه الوعي المصري بس زي زمان
إعطوا المدونين الآخرين فرصة وأنا كمان فرصة أشم نفسي وشكرا على الثقة الغالية دي
لكن ما شاء الله بقى فيه مدونين كتير بتنزل وبتعمل تغطيات صوت وصورة زي نوارة نجم ومحمد الطاهر وأسد وبعض مدونين الاخوان المحترمين
ودول طبعا غير مدونين الاخوان المهلساتية اللي مالهمش هم غير شتيمة المدونين القدام من غير الاخوان ومحاولة نشر الفضيلة في عالم التدوين ولما تكملهم يوقولك انهم احتكروا الجنة ومحدش ها يروحها غير الإخوان
لكن دول الكلام عنهم يطول
خليه بعدين
-
مصر هبة النيل
في عصر ملاعب الجولف المروية مية مية









-
تعرف على سيدة مصر الأولى القادمة

صور ارسلها لنا مجهول ولا أعلم هل نشرت من قبل أم لا
ونذكركم بأن الوعي المصري هي أول من نشرت صورة سيدة مصر الأولى العام الماضي
ونقلتها عنا وكالات الأنباء بدون ذكر المصدر
فعلشان كده معلش ها نقرفكم بالعلامة المائية المرة دي



خديجة مع والدتها

وهنا مع والدة كل المصريين
-
منوعات صيفية









-
وأخيرا
إضحك مع الشرطة والكلبشة

ما تفركش عينيك
أيوة اللي انت شايفه صح مظبوط
دي عربية شرطة متكلبشة
الله أعلم إيه القصة
الصورة دي بعتهالنا القاريء معتصم الشافعي

والصورة دي برضه بعتهالنا أحد القراء وتوضح حالة رشوة لرجال الشرطة من أجل عدم الكلبشة
وفعلا تركت السيارة صف تاني بدون كلبش بعد ما الشرطة أخدت المعلوم