الوعي المصري

مساعد وزير الداخلية يتعمد سبي وقذفي مرة أخرى

ماهو شوف بقى يا أحمد يا ضياء
ياللي بتشتغل مساعد وزير الداخلية للشئون القانونية
من غير بيه ولا باشا ولا سيادة اللواء
آه
ماهو إنت راجل بتاع قانون
ولا إيه
وأنا وإنت قدام القانون واحد
مش البلد دي فيها قانون برضه ولا خلصتوه
ورجعتوا القزازة الفارغة لمصنع بيبسي وجبتوا بدالها لتر طواريء
آدي الفيش والتشبيه بتاعي أهه على النت
وعلى عينك يا تاجر
أبيض يا ورد
وعليه ختم بيقول لا توجد أحكام جنائية مسجلة
مش ختم وزارة الداخلية ده برضه
ولا ختم حافر الجاموسة ؟؟؟

شفت يابا
كله على المفتشر أهه
معندناش حاجة نخبيها
فمعلش يعني للمرة التانية بتقول على برنامج العاشرة مساء ليوم الإثنين الموافق 20 نوفمبر ما هو آت
والأخ وائل عباس برضه ليه القضية بتاعته اللي كان قبل كده إتهم فيها
شاهد الفيديو

وهذه وصلة خارجية للفيديو
http://www.youtube.com/watch?v=MJYsWVk8-u8
والفيش طالع أهه بتاريخ تمانية نوفمبر الشهر ده

وهذا هو بالضبط نص ما قاله اللواء الواعي المدرك الذي هو في كامل قواه العقلية وليس تحت تأثير ضغط أو ترهيب أو مفعول أدوية أو مخدرات أو مسكرات على الهواء مباشرة
ماهو حاجة من إتنين أو خليهم من تلاتة زي بعضه
يا إما إنت راجل يعني حكم السن برضه أثر فيك فمش عارف بتقول إيه ويستحسن تطلع معاش مبكر أو الأدوية برضه اللي بتاخدها بحكم السن عاملة آثار جانبية على الذاكرة ومش ها ينفع أحط إحتمالية تعاطي المسكرات والمخدرات لأنك برضه المفروض راجل بتحترم القانون
والإحتمال الثاني هو إن يكون فيه قضية معروفة فعلا ليا بس حصلت على كوكب المريخ مثلا فلسه خبرها ما وصلش كوكب الأرض وحضرتك سيد العارفين السنة الضوئية بتتفك بكام سندوتش فول ولو إن ما جاليش محضر البيت ولا حتى عمري إستدعتني امن الدولة ولا حتى إتقبض عليا أثناء تغطيتي كصحفي للمظاهرات ولا تكونوش طابخينهالي في الدرا وعلشان كده انتم بس اللي عارفينها ومستنيين تطلعوهالي في عيد ميلادي اللي عدى
يا راجل ميرسي لو بس ما كنتش تحلف
يا إما أنت بصفتك وشخصك عامدا متعمدا تقصد تشويه صورتي وسمعتي أمام الرأي العام ظنا منك أنك آمن من أي ملاحقة قضائية من طرفي بسردك لوقائع عارية من الصحة ولا أصل لها وإن صحت فهي تنال من سمعتي وتضعك تحت طائلة القانون بتهمة السب والقذف كمواطن بقى ولا تقوللي لوا ولا بطيخ ويقلعوك الرتب بقى ونبقى سون فاسون كده راس براس بعد الشر على كابك لا مؤاخذة يعني
لذا أطالبك كده وبكل بجاحة من طرفي المتواضع بالإعتذار العلني على كل القنوات التي قلت فيها ما قلت إلى جانب إعلان كده في كل الجرايد المصرية بتعتذر فيه بصفتك وشخصك عما بدر منك في حقي
ومعلش يعني أعذرني المرة دي ياخويا إني متقل عليك
وزي ما بيقول المثل الإنجليزي
put yourself in my shoes
أو حط نفسك في جزمتي !!!
بس أنا عديتها قبل كده وإنت عارف
لكن المرة دي لا ممكن تنزل الأرض ابدا
وإلا
وقد أزعر من ازعر
المواطن المصري الشريف
الغير متهم في أي قضايا تمس الشرف والسمعة
وائل عباس