الوعي المصري

- اطلع ياهندزة انت وهو.. محدش يقف لى ع السلم..
- حاسب ياسيدى انت دايس على رجلى!
- يا عم انا واقف على رجل واحدة!

- طيب وفين الرجل الثانية؟!
- شايلها لوقت عوزه!!
- حاسب يا اسطى.. كعب عالى!
- وسعوا يا اخوانا.. اطلع يابركة أدام شويه..
- بس ما تقولش بركة!
- ليه لامؤاخزه؟!
- أصل الراجل مننا قبل الأربعين مراته تقول "سبعى راح.. سبعى جه"!
- طيب وبعد كده؟
- وفى الخمسين مراته تقول "بعلى راح.. بعلى جه"!
- يا رايق!.. قسٍم يا وحيد!
- ولما يبقى فى الستين مراته تقول "البركة راحت.. البركة جت"!
- على كده كلنا بقينا بركة!!
- طيب وبتجيب بضاعتك منين؟.. ومين بيوصلك بيها؟
- أنا مليش دعوه بحاجة!.. أنا أروح أستنى فى المكان وبس!
- مش فاهم!
- إنت مش بتشوف عربية وعليها برتقال وموز من غير حصان؟!
- أيوه..
- أهو فيه واحد بيوزع العربيات على الشوارع بحصان أو اثنين!
- يعنى انت تستلم العربية فى الشارع؟!
- قبل الفجر!
- ومفيش حد م الحكومة يقول لك حاجة؟!
- صاحب البضاعة بيصًرًف!!
- ياولاد الجنية!!
- يا عم وسع شوية!
- أروح فين بس؟!
- يا عم العربية فاضية أدام!
- فا ضيه فين؟!.. دا زى ما يكون العربية ماليهاش أدام!!
- ما تخلى عندك دم يا قليل الأدب!!
- هو انا جيت جنبك يا ستى؟!
- فعلا اللى اختشوا ماتوا..
- يا راجل دى أد أمك!
- أد أمه؟!.. أد أمه إيه ياراجل ياناقص.. أما انت صحيح معندكش نظر!!
- يا عم اطفى السيجارة دى.. دا احنا مش عارفين نتنفس!
- أنا حر يا أخى!!
- هى دى بأه الحرية؟!
- مش عاجبك انزل خدلك تاكس!
- رجلى.. رجلى!.. حاسب ياعم فرمت رجلى!!
- هى باب اللوق ماجاتش يا ابنى؟
- لأ لسه يا حاج..
- أمال احنا فين دى الوقت؟
- فى باب الشعرية..
- حد له باقى يا اخوانا؟
- وسع لى يا خويا أنا نازل المحطة الجاية..
- دنا لما كنت فى برلين كان الأتوبيس حاجه تفرح..
- وبرلين دى يا خويا على خط المناشى؟!
- برلين دى يا وليًه فى بلاد برًه..
- هو فيه بلاد بره وبلاد جوًه.. والله حاجه تلخبط!!
- أيوه يا حضرات.. معانا امشاط وفلايات..
سرًح شعرك بربع جنيه.. فلاية عضم بربع جنيه..
دستة دبوس مشبك بربع جنيه.. نوته قلابه بربع جنيه..
قلم فرنساوى بربع جنيه.. كل حاجة بربع جنيه!..
- حاسب ياابنى.. رايح فين؟!
- هو الأتوبيس ناقص؟!
- أصل التجارة دى حسب المكان..
- إزاى يعنى؟
- فى الشارع يبيعوا مناديل.. وفى الأتوبيس امشاط وفلايات!
- الواد ياختى مش عايز يرضع!
- يااختى افطميه وأكليه مهلبية وصفار بيض..
- صفار بيض؟!.. انت عارفه البيضه دى الوقت بكام؟!
- واللبن.. دا الكيلو يااختى أكثر من تلاته جنيه!
- ما تشتريله معزة يا خاله عشان يطلع زى غاندى!
- فال الله ولا فالك! أنا محبش ابنى يطلع إرهابى! آل غاندى آل!!!
- صلوا ع النبى يا اخوان.. حسنة قليلة تشيل بلاوى كثيرة!..
لا ينقص مال من صدقة.. والحسنة بعشرة أمثالها..
اتبرع لمسجد الرحمن..
- الراجل ده بيجمع للمسجد من عشرين سنة!!
- تفتكر الإيصالات اللى معاه دى مضروبة؟!
- طبعا مضروبة.. هو فيه مسجد ينبنى فى عشرين سنة؟!
- والله حاجه تجنن.. دا كل حاجة يا جدع بأت مضروبة!
- أمال إنت بتسرح بإيه الأيام دى؟
- أنابيب غاز!
- بتوصلها بكام؟
- مرات بستة جنيه ومرات بسبعة!!
- ياابن المحنونة!
- ماهو فيه أفندية مش عارفين إن ثمنها أقل من أربعة جنيه!!
- تذاكر.. اللى طلع من أدام.. ابعت..
- لسه باب اللوق ياابنى؟!
- انت يابا بتسأل على باب اللوق م الصبح.. تنزل هنا!
- هى دى باب اللوق؟
- لأ.. دى باب الخلق.. تحب تنزل!.. أهو كله هــ ـ باب!!
- حلوة!.. الأخ بيشتغل فران لامؤاخزه؟!
- اطلع أدام شوية عشان تقرب م الباب..
- دا على بال ميقرب م الباب يكون وصلنا الجيزة!!
- أنا متهيألى الراجل ده من أيام هوجة عرابى!
- ياعم سيب الناس فى حالها.. حرام عليك..
- ماهى حاجة تفلق.. الواحد كره عيشته!
- وحد الله.. وحد الله..
- الشقة أوده وصاله.. أبويا وامى فى الأوده على سرير..
وجدى لسه ماسك فى الدنيا على سرير.. مع إنه قلب العداد!!..
وانا وأخويا بنام ف الصالة.. طيب اتجوز واكمل نص دينى ازاى؟!
- غريبة!.. أمال الناس دى كلها بتيجى منين؟!!
- زحمه يا دنيا زحمه.. زحمه وتاهوا الحبايب!
زحمه ولعدش رحمه.. مولد وصاحبه غايب!
- ياعم شوف لنا حاجه لشعبولا!
- المحفظة؟!!!
- حاسب ياعم بترفـًص ليه؟!
- محفظتى ياولاد الكلب!!
- أقف يااسطى..
- يقف ازاى.. على القِسم يااسطى!
ــــــــــــ المراجع:
1- خط أتوبيس 990 (مساكن عين شمس – ميدان الجيزة)
2- الموارد البشرية وذبح التنمية فى الدول النامية (باب: أفواه وأرانب)
3- رفع المعاناة عن الجماهير (باب: الدعم يصل إلى مستحقيه)
4- التنين يبتلع الطبقة المتوسطة (باب: عليه العوض منه العوض)