Ok

By continuing your visit to this site, you accept the use of cookies. These ensure the smooth running of our services. Learn more.

Friday, 15 April 2005

مواطن درجة أولى - أحمد فؤاد

في لحظة تجلي كده .. حست إن احنا ظالمين الحكومة .. المشكلة بس اننا مش بنبص من وجهات نظر مختلفة .. يعني مثلاً أنا المفروض مواطن من الدرجة الأولى .. يعني المفروض يكون عندي بطاقة انتخابية ويكون عندي حق انتخاب , فكرت إني أطلع بطاقة انتحابية .. بس بصراحه قعدت أفكر هأعمل بيها إيه .. طيب ماهي الحكومه موجوده الحمد لله .. ربنا رزقنا بيها علشان تختار لينا .. نتعب نفسنا احنا ليه بقا , وبعدين هو انا يعني هأعرف أحسن من الحكومة .. بالعكس ديه الحكومة بتريح الشعب و بالتالي أنا هارتاح , وأفكر بقا في نفسي وفي شغلي و أهلي و إزاي أجيب شقه علشان اتجوزو هيا ديه الساقية القلابة بتاعت الواطن المحترم من الدرجة الأولى , وأسيب الحاجات التانيه ديه اللي يفهموا فيها .





و بكده هنضمن مستقبل أحسن لبلادنا .. ليه لأننا مش هنرشح حد أو نختار بغبائنا طبعاً , لأني هأكون و الشعب الجاهل عبط , لأن ممكن ببساطه شديده عم عبده المعفن بتاع الفول اللي واقف على محطة مصر في رمسيس يرشح نفسه و ممكن اتهبل في عقلي وأرشحه عن جهل وكل ده علشان عنده شعبية وعارف ناس كتير بياكلوا عنده علشان الدقه اللي بيحطها على الفول حلوه , ويضحك علينا كلنا , وساعتها بقا مش هيكون فيه أي أمل في تغيير بقية بنود الدستور زي إيجاد فرص عمل لكل مواطن و دفع إعانة بطالة و كده , يعني بعد ما الحمد لله بعد ما انتهى عهد التفكير و التخطيط الدقيق وبدأت أولى خطوات الإصلاح بعد خمسة وعشرين سنه بتعديل بند واحد ما شاء الله .. نروح نبوظ كل ده , ونبدأ تاني من الأول .





يااااااااه .. الحمد لله ده ربنا رحيم بينا والله وبيحبنا أكيد لأن ربنا عايزنا نرتاح ونموت بالسكتة القلبية بدري







و في النهاية قررت أن أدع الخلق للخالق و أن أكون راضياً جداً لأن الوضع كده هيريحني جداً وهيريح كل الشعب وخلينا بقا احنا نركز في البوس و الأحضان و الساقطة اللي خلفت من أراجوز , و ما الذي قاله أفلاطون عن المدينة الفاضلة , وعن قبول السنيورة الممثلة العظيمة لبطولة فيلم إيدني خاذوق و أنا بآكل برقوق .






إمضاء .. مواطن .. درجة أولى

Comments

المواطن درجة اولى في مصراليوم هو الخسيس بلا قيم وبالبلدي صاحب اخلاق وشخصية المعرص اي بالاحرف الابجدية م ع ر ص
متى يعود لنا الرجل المصري الشهم رجل الكلمة والقيم والمبادىء
انقذوا المصري رحمكم الله

Posted by: حمار كبير في مصر اسمة م ب | Tuesday, 02 August 2005

تلبية لدعوة السيد الرئيس للمشاركة فى إنتخابات الرئاسة ثبت أنها حلم بعيد المنال لمن لا يملك بطاقة إنتخابية و فى نفس الوقت أقسام الشرطة تفيد أنه لا يمكن إستخراجها فى الوقت الحالى و هى متاحة فقط خلال الشهرين الأخيرين من كل عام و لمعت لى فكرة سهلة و هى السماح بالمشاركة مستخدمين الرقم القومى و هو أصعب فى التزوير من البطاقة الإنتخابية نفسها و بالتالى إتاحة الفرصة أمام الملايين للتعبير عن رأيها و إلا فإن هذه الإنتخابات لن تمثلنا أنا و من مثلى فى إختيار الرئيس و سيمثل نسبة محدودة جدا من الشعب أم أن الموجودين كفاية و اللى نعرف رأيه أحسن من اللى ما نعرفوش

مهندس / طارق سليمان
القاهرة

Posted by: Tarek Soliman | Sunday, 28 August 2005

موقع الشباب الاول فى الانتخابات المصريه ادخلوا ولا تتردوا

Posted by: Ahmed Khalifa | Sunday, 28 August 2005

والله وجشنا كلامك ياجدع مصرى اصيل

Posted by: علاء | Wednesday, 31 August 2005

اخواني الاعزاء
مجنون مين اللي اتلحس في نفوخه واتجنن في مناخيره اللي صدق ان الانتخابات اللي حصلت دي ممكن تكون نزيهه او شريفه او نوال حتي
دا بفرض انها انتخابات من اصله
هو احنا حنشتغل بعض؟ منتوا عارفين اللي فيها ، مبارك زهق من اللعبه بتاعته زي الاهلي لما ياخد 5 دوري ورا بعض اللعيبه بيحبوا يهرتلوا شويه ، فالريس قال اما اهرتل مع الشعب الحبيب شويه ، قوم عمل ايه ؟ قام عدل الماده 76 ودي قبل عيد ميلادي بسنه يعني انا اصلا مليش في القصه دي ومحدش يسألني عن رأيي فيها ، المهم الراجل عاوز يلعب حيلعب لوحده مثلا؟ ميصحش ، قوم عمل ايه ، قام جايب اخواته وحبايبه الحلوين من علي قهوة الاحزاب لزوم ما القعده تحلو المشكله بأه ان في لعيبه صدقت نفسها ولعبتها جد، وكانت حتقلب بغلاسه ، قوم عمل ايه قام الريس لبس الكرافته والشعب طبعا لبس اسود لزوم السواريه اللي حتعمله الحكومه علي شرف الشعب - حاجه كده زي الاستفتاء علي الملابس الداخليه - فاكرينه؟
والي لقاء قادم بعد 6 سنوات لما الواد يزهق من اللعبه ويعوز ينده صحابه يلعبوا معاه - وياعيني الواد بيعيط ، والواد طالع لابوة
محمود

Posted by: محمود زكي | Thursday, 08 September 2005

no no no no no

Posted by: waleed | Friday, 09 September 2005

The comments are closed.