الوعي المصري

افاد السيد/ العماوى وزير العمل أنه لا يوجد عماله مصريه فى اسرائيل !!!!! ماشي
و افاد سيادته بأن العاملين الأجانب فى مصر لا يتجاوز عددهم 18 الف عامل فى تخصصات لا مثيل لها فى مصر

يعنى سيادته يقصد - على قد تفكيرى المحدود الجاهل - 18000 يعملون فى تخصصات نادره

يا جماعه اول مره اعرف ان الرقص البلدى و لعب الكوره و فتح عينك تاكل ملبن دى تخصصات نادره
يعنى مثلا ممكن سيادته يتكرم و يتعطف و يفهمنا
مديرى الفنادق 99% منهم اجانب
مديرى الأغذيه و المشروبات بالفنادق 99.5 % منهم اجانب
معظم الراقصات و ملاحظى الشواطئ و نوادى الغطس فى الغردقه و شرم الشيخ اجانب

هما دول النوادر و الخبرات العظيمه

طيب ماشي .. طب و النقاش و السباك و اخصائي التبريد و التكييف الأمريكان اللي مرتب الواحد منهم 8000 دولار شهري بالأضافه الى السياره و السكن المفروش الراقي ... دول برضه نوادر ؟

السيد وزير الداخليه اعتقل بعض المشاركين فى المظاهرات بتهمة تعطيل المرور!!! يعنى خمسمائه أو ألف بنى آدم عطلوا المرور ... والداخليه قلقانه جدا على تعطيل المرور !! ماشي

طيب العشرة الآف عسكرى أمن مركزى و مئات المركبات المصفحه اللي نزلت الشوراع كانوا بيسلكوا المرور ؟
و لما موضوع تعطيل المرور ده خطييييييير جدا و يستاهل الأعتقال ... ليه بنعطل البلد كلها و ليه بنوقف الناس بالساعات زى الكلاب و بنقفل الشوارع و حتى الناس اللي ماشيه على رجليها
بنوقفهم .. و العيان يموت و اللي عنده امتحان يولع - يعني لو نجح حيعمل ايه - و المسافر يدور له على طياره تانيه و اللى وراه اي مصلحه طظ فيه و في مصالحه
كل ما الباشا أو الهانم أو احد الأنجال أو احد الساده الوزراء فكر - مجرد التفكير- انه يخرج من بيته


يا جماعه أرحمونا ... و اذا كانت الرحمه صعبه .. على الأقل أحترمونا و احترموا عقولنا
و الله و الله و الله ان ربنا خلق لنا عقل زيكم بالظبط ..و بيشتغل برضه مش حتة طوبه