Ok

By continuing your visit to this site, you accept the use of cookies. These ensure the smooth running of our services. Learn more.

Friday, 18 March 2005

قصة حمادة ودودو - د. محمد حلمي

قصة من وحي الخيال العلمي للعبد لله

كان ياما كان
حمادة واد روش و بيشتغل في الفن ...ودودو بنت ناس و ماشية بشرفها من صغرها ...حمادة ابوه فنان في الخمرة و النسوان ...ودودو ابوها استاذ في الجامعة وبيقبض بالدولار ...حمادة امه فنانة من الخمرة صوتها اندبح ...ودودو امها استاذة في الجامعة هي كمان

تشاء الصدف حمادة يقابل دودو في ماكدونالدز وهم بيروشنوا ...ويدور بينهم هذا الحوار القصير

دودو : هاي مش انت حمادة الممثل الروش
حمادة : ايوة يا مزة اسمك ايه؟
دودو : انا دودو مهندسة ديكور و تعليم خوجاتي و بعد الضهر بمشي بشرفي ...اصل انا بنت ناس
حمادة : شوفي الصدف يا مزة ...انا عندي شقة على المحارة ماتيجي تظبتيلي العواميد
دودو : وماله يا حمادة نظبطلك عواميدك ...تعالى و انت حليوة كدة ...ده صحباتي في النادي بيموتوا فيك

وبعد تظبيط العواميد في الشقة و الذي منه ...تجري دودو على صحباتها في النادي

دودو : اسكتي يا شيري ...مش انا ظبت العواميد في شقة حمادة الفنان؟؟
شيري : لا انا مش مصدقة ...دا انت حتى مش منظر يا دودو ...والواد حمادة ده موز خالص و فنان ابن فنان ...هيبصلك انت على ايه؟
دودو : وحياتك ده اللي حصل ...انت بس غيرانه عشان من زمان نفسك تظبطي عواميده و مش طايلة
شيري : مش هصدقك الا اما تجيبيلي قطر منه
دودو : و شرفك هيحصل

و بعد تظبيط العواميد على مراحل مع مراعاة التأكد من "تحميل" المواد الخام في خلاط الاسمنت ...تجري دودو على النادي باختبار حمل نتيجته ايجابية و ترميه في وش شيري وسط حسد باقي بنات الشلة

دودو: بابي انا حامل
ابو دودو : تااااااااااااااني؟ روحي خدي من امك مصاريف العملية
دودو : بس انا عايزة اخلف المرة دي ...دا هيطلع واد فنان زي ابوه
ابو دودو : تعالي يا ام دودو شوفي بنتك بتقول ايه
ام دودو : البت كبرت يا ابو دودو و محتاجة تخلف حتة عيل يملى وقت فراغها...احنا ربيناها تربية امريكاني و في امريكا و الدول المتقدمة مافيهاش حاجة
ابو دودو : طيب هنقول ايه للعالم المتخلفة اللي عايشين معانا ...مش كل الناس نسيت اصلها زينا و سكنوا في المهندسين و شبعوا من بعد جوعة
ام دودو : مش البت بتقولك ان ابو اللي في بطنها فنان؟ تبقى قضية رأي عام و نطلع في ال تي في انا وانت نعمل منها بطلة و مثال يحتذى لبقية طبقات الشعب العامل و شوية كلام اهبل على حبة نحنحنة و نبقى خدناهم بالصوت
ابو دودو : والله فكرة مش بطالة و اهي تبقى دعاية كويسة لينا في الجامعة

وبعد انتشار الخبر في الصحافة و التي في و حوارات و لقاءات و مناقشات ...يتضطر حمادة يعترف بالمولود و دودو تبقى اشهر من نار على علم ...وابو دودو و امها يبقوا مقررين علينا في برامج الفضائيات كنماذج لاولياء الامور موديل 2000

انتهت القصة ...

ملحوظة ...حمادة و دودو مش قضية ...دا ياما فيه منهم كتير بس احنا اللي بنصهين...القضية اننا في زمن اصبحت فيه الدعارة تساوي شهرة ...والمجون فن ...والاستعباط قمة النجاح

Comments

it is step toward fake superiorty....now they propagate the ugly side of western society on us and we are prevented from gaining any of its useful sientific side...if the saudis turned to madana and christina agulara...to teach us chracters...any way, dr mohamed I did see in your story more than you tried to say...good luck.

Posted by: DR MONIR | Sunday, 26 June 2005

thank you

Posted by: mostafa | Wednesday, 23 November 2005

The comments are closed.