Thursday, 19 August 2010
حكاية مروة والشنكل !
حكاية مروة والشنكل !
فاكرين الفيلم ده بتاع فؤاد المهندس وشويكار؟
أرض النفاق؟ عن رواية ليوسف السباعي الله يرحمه؟
فاكرين اللقطة دي بتاعة عويجة أفندي وحكاية الشنكل؟
لو فاكرين مش ضروري تشوفوا الفيديو خشوا في الموضوع على طول
لو مش فاكرين يبقى ضروري تشوفوا الفيديو الأول !
مروة موظفة حكومة في الإسكندرية
أخدت أجازة علشان تسافر مع جوزها اللي بيشتغل في روسيا
بعد ما أخدت الأجازة وسافرت خلاص إكتشفوا إن طلب الأجازة بتاعها ناقص طابع مهن زراعية بعشرة جنيه
فبعتولها الجواب اللي إنتم شايفينه فوق ده
واللي إستلمته زميلة ليها في الشغل وصديقة ليا
الجواب اللي إنتم شايفينه ده تاني جواب من هذا النوع وربما لن يكون الأخير
شايفين كام موظف همام ماضي عليه وكام ختم وكام تاريخ ؟؟؟
كل ده علشان عشرة جنيه !!!
طب سيبكم من الوقت المهدر علشان يكتبوا ويطبعوا ويمضوا ويختموا جواب زي ده
والتكلفة اللي بتنتج عن ضياع وقت الحكومة في وساخة زي دي
تعالوا نشوف تكلفة ملموسة إندفعت بالفعل من خزانة الحكومة
زي ما إنتم شايفين ده المظروف اللي إنبعت بيه الجواب
طبعا حذفت الإسم والعنوان بتوع مروة
وزي ما إحنا شايفين فيه طابعين فئة جنيه
وطابع فئة ثلاثون قرشا
وطابعين فئة عشرة صاغ
يبقى المجموع إتنين جنيه ونص
ونخللي بالنا إن ده إخطار ثاني يعني فيه إتنين جنيه ونص قبل دول
يبقى المجموع خمسة جنيه
ولو فيه إخطار تالت ها يبقى المجموع سبعة جنيه ونص
أما بقى لو فيه إخطار رابع فيكون المجموع عشرة جنيه للطوابع فقط بالتمام والكمال
وذلك لتحصيل مبلغ عشرة جنيه فقط لاغير
وهو المطلوب إثباته
والكلام ده بتاريخ 2009
مش في الستينات ولا في السبعينات
إيه العبث ده ؟؟؟ دول موظفين عاوزين ربنا يفرجها عليهم ؟؟؟
ده شعب عايز حياته تبقى أحسن ؟؟؟
ودي كانت حكاية مروة والشنكل ... قصدي مروة والطابع
12:18 Posted in صفحات الغلاف | Permalink | Comments (14)