الوعي المصري

حد يحط كمين مرور في منزل كوبري - تعالوا نشوف

الصورة ليست مشهد من فيلم أكشن أمريكاني
الصورة هي نتيجة فساد بعض رجال شرطة المرور ووضع كمين في المكان الخطأ مما نتج عنه تدمير ممتلكات عدد من المواطنين وتعريض حياتهم للخطر مقابل سبوبة قذرة لرجال الشرطة الشرفاء
السيارة الألفا روميو الفضية هي سيارة الصديق فؤاد رؤوف منصور
كان رايح شغله الصبح في المعادي عن طريق الدائري
وبعد كارفور وعند المنزل المؤدي إلى الأوتوستراد فوجيء بكمين واقف عند منزل الكوبري
المفترض من هذا الكمين منع سيارات النقل من إستخدام الكوبري
يعني المفروض يبقى على مطلع الكوبري
لكن ازاي يعملوا سبوبة
يقفشوا العربيات وهي نازلة بقى ويظبطوا المصلحة في المصيدة
ويكون الضحية أبرياء
وهذه ليست الكارثة الأولى بسبب الكمائن المرورية الخاطئة أو إيقاف الطريق من أجل عبور مسئولين كما حدث العام الماضي عند مارينا وهذا العام أيضا

فؤاد كان واقف في اللجنة وقدامه خمس عربيات
قوم جات عربية نقل رينو ضخمة اللي انتم شايفنها دي محملة بلوكين رخام من المحاجر ومش واخد خوانة ونازل المنزل وواخد سرعته لانه معروف في قوانين المرور في بلاد البلالا ما ينفعش حد يعمل لجنة مرور على منزل كوبري
قوم راحت طاخ راشقة في الألفا روميو
راحت الألفا روميو داخلة تحت العربية الدودج رام لغاية ما بقت الدودج فوق سقف الالفا روميو وبعدين قلبتها على جنبها وبعدين كملت على عربية شيفروليه اوبترا قدام منها طلعت على كبوت الالفا روميو
وطبعا سواق النقل هرب
وفؤاد ضاع عليه ميت ألف جنيه تمن العربية
بالمناسبة اللجنة كان فيها عقيد شرطة
علشان محدش يقول فساد أمناء الشرطة والعساكر بس
فؤاد راح للعقيد وقال له حد يحط كمين مرور في حته زي دي وهوب إختفى العقيد تماما من موقع الحادث
فؤاد عموما عمل محضر في نقطة شرطة صقر قريش

السيارة النقل فوق الجزء الخلفي من سيارة فؤاد

الدودج رام مقلوبة على جنبها بعد أن دفعت السيارة النقل سيارة رؤوق تحتها
نسيت أقولكم إن ربنا سترها قوي مع رؤوف وكل الناس اللي كانت في الحادثة ومحدش حصل له حاجة