Tuesday, 29 January 2008
No To Hamasan Bullying
لا لشرمطة حماس
معلش انتم إتعودتم مني إني بأنقل الصورة بحياد
اللي ليها واللي عليها
وأنا مش من اللي بيهيصوا ويهللوا ومشاعرهم بتغلبهم في تغطية أي حاجة ويتعموا عن جوانب أخرى للموقف
ده خول حمساوي بيأدب عساكرنا الصعايدة الفلاحين العزل من السلاح
بلطجة وقلة أدب دي ولا لأ؟
على الأرض كلبين مصابين وإتنين عساكر مصريين
ودخان الرصاص باين
لسه باكلم واحد إخواني بيقول لي ما ضربوش رصاص
واجهته بالصور قال لي دول مش حماس
خولات حماس بيفتحوا الطريق بقوة السلاح
تكلمة الصورة اللي فوق
كلب مات برصاص حماس
وكلب بيموت
وإتنين عساكر مصريين منصابين برضه برصاص حماس
ودول من حوالي خمسين عسكري وضابط مصري إصيبوا برصاص حماس يعني اللي في الصور دي مش كل حاجة
وفي الصورة أيضا عسكري ما عجبوش اللي بيحصل فتح صدره وداخل عليهم بشومة يا عيني
ودي مش أول مرة يا حماس
سبق وقتلتم تلات عساكر مصريين لما فتحتم المعبر المرة اللي فاتت
زيكم زي إسرائيل اللي عملتكم
وأي عرص ها يقول لي دول مش حماس أو عيب تشتم المقاومة أو الكلام المعرص بتاع إن دول مجاهدين والأبعدين لحومهم مسمومة ها إحط صباع رجلي في عينيه
وطبعا الصور دي مش ها تشوفوها على صدر الصفحة الأولى للصحف القومجية الحنجورية إياها التي تنشر جانب واحد من الحقيقة
الصور من حاتم موسى أ ب
-
الرسالة
يا حمساوي يا خول منك له
إدخلوا مصر إن شاء الله مؤدبين
أنا معنديش مشكلة مع دخول الفلسطينيين على العين والراس يشتروا حاجاتهم ضيوف معززين مكرمين
لكن فيه أدب للضيوف
أنا ياما سمعت عن مذابح أيلول الأسود في الأردن للاجئين الفلسطينيين
ومذابح صبرا وشاتيلا في مخيمات لبنان
والمذابح اللي عملها حافظ الأسد برضه للاجئين
لكن يظهر إنها كانت غالبا بسبب شرمطة ورعونة وجلافة وتبجح وصلف فصيل مسلح زي اللي إحنا شايفينها في الصور دي ما راعاش أصول الضيافة
-
ملحوظة
لا يحتاج الغزاوية لمعونات وتبرعات لأنهم مش شحاتين
إحنا اللي شحاتين
وبعض الغزاوية شايفين ده كمان إهانة ليهم
الغزاوية معاهم فلوس كتير
ومحتاجين سلع يشتروها بس
نقطة ومن أول السطر
فياريت الإخوان والقومجية واليسارجية يلموا المولد ده شوية ويروحوا يدوا معونات لبتوع إمبابة ولا المطار ولا قلعة الكبش ولا كفر العلو ولا أي قرية في الصعيد ويبطلوا يبتزوا فلوس الغلابة بإسم الدين والعروبة وفلسطين ونضال دين ام الشعوب ضد الإستعمار والبتنجان والسبوبة والدعاية والذي منه
بطلوا النصب السياسي على المصريين الفقرا
ما شفناش عرص من الإخوان بيتظاهر علشان الأسعار
ودلوقت مطوقين محافظات مصر مظاهرات علشان غزة في الريف والبندر والمداين
ولا شفنا الشباب الكووول بتاع النضال الكووول اللي لابس الحطة الفلسطيني وبيتكلموا عربي مكسر وما بيجوش المظاهرات الياي بتاعة الأسعار والحاجات البلدي والبيئة دي
ولو غزة ترتيبها 98 على العالم في تقارير الأمم المتحدة للتنمية
مصر ترتيبها 120 يا بقر
واللي يزعل يزعل لأن محدش له فضل عليا ولا كاسر عيني ولكن العكس صحيح والحمد والمنة لله
-
تحديث
علشان تعرفوا إن موضوع التبرعات المفتوحة على البحري طول السنة في نقابة الأطباء وإتحاد الأطباء العرب لفلسطين ده نصباية إخوانية على المصريين الفقرا الغلابة إقروا تصريحات محمود الزهار لجريدة المصري اليوم
ومنها أنقل لكم
وعلي الجانب الآخر فإن الخبراء عندنا يقدرون الفوائد التي ستعود علي مصر في الأسبوع الأول لفتح الحدود وحده بنحو ٤٠ مليون دولار
وبالتالي فإن كانت أمريكا تهدد مصر بقطع ١٠٠ أو ٢٠٠ مليون من مساعداتها فأعتقد أن استفادة الشعب المصري خلال هذه الفترة أكبر بكثير
فيه حد لسه عنده دم يرد بعد الكلام ده
واضحه أهه
وتقرير لقناة الجزيرة إنجليش بيقول إنهم صرفوا 150 مليون دولار
أما تقرير الغرفة التجارية في العريش فبيقول إنهم صرفوا 480 مليون دولار بالتمام والكمال
يعني قربوا على نص مليار دولار
أو إتنين مليار ونص جنيه مصري وفكة
مين بقى معاه فلوس
ومين معاهوش ومحتاج تبرعات
-
تحديث 2
لو لقيتم شتائم في التعليقات إعرفوا إنها من الإخوانجية المنافقين مدعي عفة اللسان وستعرفون حقيقة تدينهم وعفة لسانهم من الألفاظ الموجودة في التعليقات
لاحظوا محاولات إظهاري بأني أشتم الفلسطينيين
بينما في الحقيقة أنا فقط أشتم حركة حماس صنيعة الموساد التي لم يرى الشعب الفلسطيني أياما في مثل هذا السوء إلا في عهدها
09:00 Posted in صفحات الغلاف | Permalink | Comments (95)
Saturday, 26 January 2008
Pictures from Gaza
صور من قطاع غزة
العبد لله عند معبر صلاح الدين
عربية نقل قبل كوبري السلام محملة معونات وشفتها بعد كده في رفح
صورة لمعبر صلاح الدين بعدسة الرؤية الليلية قبل طلوع الفجر بقليل ومازال الفلسطينيون يتدفقون على مصر
داخل غزة بعد معبر صلاح الدين جلسوا في عز البرودة يستدفئون بالحطب كما في سالف العصور الغابرة وإضطررت أنا للبس اتنين جاكيت واحد فوق الآخر
بنزين أو جاز أو سولار أو مازوت كل هذا مطلوب في غزة بكميات كبيرة
وشفت بنزينة اتحولت لخرابة والبنزين بقى بيتباع في جراكن في الشارع
وبالمناسبة سعر لتر البنزين في غزة 30 شيكل اي اكثر من 30 جنيه مصري
كميات ضخمة من السجائر دخلت غزة يمكن اكتر من اي حاجة لدرجة ان السجائر اختفت من الاسماعيلية
ذكرني هذا بأحوال المساجين في مصر وإستخدامهم للسجائر كعملة كما روى لي بعض النشطاء ممن أمضوا مدد بالحبس
والمصريين رفعوا اسعار بعض السلع على الغزاويين لمواجهة الطلب الشديد
والمصريين في العريش ورفح والشيخ زويد صحيوا في اليوم التالي ما لقيوش اكل يفطروا بيه لأن الفلسطينيين إشتروا كل حاجة ورفعوا أسعار كل حاجة
وحتى الفنادق والشاليهات والشقق المفروشة إتملت على آخرها
لدرجة إني نمت أنا والصحفيين الأجانب اللي معايا في الشارع في عز البرد
الفلسطينيون يشترون السجائر بكميات رهيبة مع الصابون وزيت الطعام والبنزين
كميات ضخمة من الموتوسيكلات دخلت غزة من مصر
الفلسطينيين بيشتروا موتوسيكلات بالعبيط وعربيات نقل محملة موتوسيكلات كانت بتعدي كوبري السلام وأنا رايح
حمار غزاوي شكله كميل خالص وعجبني علشان صغنون فقلت أصوره
عبور السور الحديدي الذي تم قصة بلمبات اللحام
منازل غزة المقصوفة
وأنا في غزة طبعا التليفون إشتغل تجوال
التليفون شوية يجيب شبكة جوال وشوية إسرائيل أورانج
الغزاويون لم ينسوا التكنولوجيا أيضا
أنا هنا باوريكم قال يعني لوحات فلسطين
بعض الغزاوية بيلعنوا أبو حماس وعاوزين عباس ودحلان تاني وبعضهم بيلعن إستغلال التجار المصريين لهم والشباب بيشتكي من البطالة وشاب قال لي إنه مدرس مبتديء وبياخد خمسميت دولار ومش عاجبينه - ما رضيتش اقول له مرتبات المدرسين المصريين - وقليل بيلعن إسرائيل والكل رفضوا التصوير خوفا من حماس وفتح حتى أني عرضت على أحدهم الحديث وهو يضع اللثام على وجهه فرفض أيضا
رغم أن العالقين سبق وسجلوا معنا مقابلات قبل فتح المعبر
شاهد في الأرشيف
وخاف الجميع من التعليق على أو إنتقاد قذف صواريخ القسام صوب إسرائيل سواء بالخير أو بالشر
للأسف بعض الفلسطينيين يستخدمون عملات مزورة
بعض المصريين والغزاوية فتحوا مكاتب صرافة على الواقف وبينادوا على الجنيه والدولار والشيكل
سعر المائة جنيه مصري تسعين شيكل كما نادى أحدهم
والغزاوية للاسف غلب عليهم التدين المظهري
وأنا في غزة حسيت اني في امبابة ايام الجماعات الاسلامية
وتلاقي واحد دقنة قد كده وبيشتم ويسب الدين بصوت عالي في الشارع
وشاهدت أكثر من خناقة بشوارع العريش بين الفلسطينيين بعضهم البعض
وبرغم كل الغلب اللي هما فيه واحد ساب كل حاجة وزعق في الصحفية اللي معايا علشان تتحجب
وواحد تاني عاكسها رغم إنها قد أمه
أسمنت سينا
برضه أحد أهم السلع الداخلة إلى غزة
قابلت واحد فلسطيني حكالي إنه اشترى اسمنت علشان يكمل اوضة ها يتجوز فيها
أنا فطرت على العربية دي
كانوا بيبيعوا سميط
الواحدة بشيكل إسرائيلي
مواشي متجهة إلى غزة
وشفت كمان حمير وخرفان ومعيز في اسواق في شوارع رفح والعريش ليصطحبها الفلسطينيون معهم
وعربيات نقل عند كوبري السلام محملة حمير وخيول وبغال للبيع للفلسطينيين
كله ملزوق على عربية واحدة
الله
الماريجوانا
وبعدين مش عارف ايه مكتوب بالعبري
ثم عدنا إلى القاهرة بعد تحرشات طفيفة من ظابط حمار مش فاهم حاجة عند مخرج العريش
-
وقناة فرانس فان كاتر تنشر فيديو الوعي المصري في غزة
Gaza: Taking Egypt by storm
Read my account of the events in English and French
and watch a video I filmed at the scene
on France 24
إضغط هنا
Click here for English
Clic ici pour le Français
-
تغطيات سابقة من سيناء
قافلة رفح 2004
تفجيرات شرم الشيخ 2005
العالقين 2007
إضغط هنا
18:03 Posted in صفحات الغلاف | Permalink | Comments (18)
Friday, 25 January 2008
الوعي المصري في غزة
الوعي المصري في غزة
بعض لقطات الفيديو التي إلتقطتها كاميرا الوعي المصري على الحدود وعلى المعبر وفي داخل غزة
وسنوافيكم بالمزيد من الصور والتعليق عليها بعد قليل
إضغط هنا لمشاهدة الفيديو
17:12 Posted in صفحات الغلاف | Permalink | Comments (19)
Sunday, 20 January 2008
On Bush and al-Farhan
On Bush and al-Farhan
عن زيارة بوش وإعتقال الفرحان في مقابلات تلفزيونية
تعليق على زيارة بوش لمصر في مقابلة مع القناة الأولى للتلفزيون الألماني
Commenting on Bush's visit to Egypt in an interview with German televisisin Das Erste
إضغط هنا
Click here to watch - German Only
على سي إن إن في حلقة عن إعتقال المدون السعودي فؤاد الفرحان
On CNN's International Correspondents on the detention of Saudi blogger Fouad al-Farhan and the situation of blogging in the Middle East
إضغط هنا
Click here to watch - English
09:52 Posted in صفحات الغلاف | Permalink | Comments (13)
Saturday, 19 January 2008
عاجل - جوجل تحجب موقع حركة كفاية
إتهمني كثير من الزملاء وما زالوا حتى الآن إني شطحت وخرفت وكبرت المواضيع وبقيت مهووس وبارانويد وغاوي شهرة وتهويل ومحتاج علاج لما ألمحت مجرد تلميح إلى وجود يد خفية للنظام المصري وراء حذف حسابي الخاص بلقطات الفيديو على موقع يوتيوب المملوك لشركة جوجل صاحبة محرك البحث الشهير والذي تصادف أيضا في نفس الوقت - سبحان الله - مع حذف حسابي البريدي من ياهو للمرة الرابعة في أقل من عام وقلت أنني أتعرض لحرب إلكترونية وتكنيك جديد يستخدمه النظام المصري لقمع صوت المعارضة على الإنترنت وللأسف كان معظم التضامن والدعم المعنوي الذي تلقيته من وكلالت أنباء أجنبية ومحطات تلفزة أمريكية ومدونين امريكان
الآن جاءت ساعة الحقيقة لتثبت وجهة نظري في وجود يد خفية للنظام المصري تعبث مع أو بالتعاون مع جوجل لقمع صوت المعارضة في مصر بإستخدام تكنيكات جديدة ولجوجل سابقة في هذا المجال وهو حذف أي نتائج للبحث عن مواقع تعارض الحكومة الصينية من محركه للبحث
الحقيقة لم أكن أنا مكتشف هذا الموضوع ولكن الفضل يرجع للزميل محمد جمال صاحب مدونة جيمي هود الذي إتصل بي تليفونيا منذ قليل ليخبرني بهذا الإكتشاف وأنه نشر تفاصيله على مدونته وفعلا رحت قريت عنده في المدونة لكن برضه قلت لنفسي إتأكد يا واد بدل ما يتهموك تاني إنك مختل عقليا وبتتوهم حاجات وبتكبر المواضيع وإن الموضوع بسيط وغلطة سبحان الله إنها تحصل مع يوتيوب وياهو كمان أربع مرات
وبالفعل ما أخدتش كلام الواد جيمي على علاته ورحت فاتح محرك البحث جوجل وكتبت كفاية
لقيت لينكات لصفحات بتتكلم عن حركة كفاية بالفعل لكن ولا لينك للموقع ذات نفسه
وبعدين كتبت حركة كفاية
برضه مافيش أي حاجة
وبعدين كتبت الحركة المصرية من أجل التغيير
ولا الهوا
وبالعنجليزي كتبت harakamasria
برضه ولا الدموع
الله
هو فيه إيه يا جدعان
برضه قلت بلاش تتسرع ياد يا وائل
يمكن موقع كفاية نفسه فيه حاجة غلط خصوصا إن الموقع بقاله فتره بيديره ناس مش محترفين علشان كده مش بيظهر في محرك جوجل مع انه حتى لو الموقع اختفى لازم يظهرله صفحات متكيشة على الأقل - حلوة متكيشة دي
المهم هداني تفكيري أشوف بقية محركات البحث
وطبعا أهم تاني محرك بحث بعد جوجل هو ياهو
برضه كتبت كفاية
وهنا لقيت موقع كفاية ظاهر وأول لينك كمان في الصفحة
كتبت حركة كفاية
نفس الحكاية
الحركة المصرية من أجل التغيير
برضة ظاهر وموجود وزي الفل
وبالعنجليزي harakamasria
موجود وتمام التمام
أومال إيه الحكاية يا جوجل
14:27 Posted in صفحات الغلاف | Permalink | Comments (20)
Thursday, 17 January 2008
متابعة إعتقالات مظاهرة السيدة زينب
صورة من أرشيف الوعي المصري
مظاهرة كنس السيدة عام 2005
اعتقلت قوات الامن كل المتظاهرين الذين حاولوا التظاهر امام مسجد السيدة زينب كما كان مقررا
ولم تفرق بين كبير وصغير وشاب وفتاة
ملأ المعتقلين ثلاث عربات للترحيلات
اعتدى الامن على الصحفيين والمصورين الاجانب
ومنهم بير بيركلوند السويدي الذي صادر الامن كارت الذاكرة الخاص بكاميرته وكارت تليفونه المحمول
وصلت انباء عن اعتقال المسيري وعدد من قيادات كفاية من داخل جامع السيدة زينب
اطلق الامن سراح الفتيات اولا
ومنهم
بيسان كساب صحفية بالدستور
ابتسام تعلب صحفية بالبديل
نوال علي صحفية بالبديل
رشا عزب صحفية بالفجر
تم القاء عدد من المعتقلين في مناطق صحراوية نائية على الطريق الدائري وطريق القطامية
استطاع البعض العودة في عربات عمال التراحيل التي تصادف مرورها في قلب الصحراء
ومنهم
هاني الاعصر صحفي بالدستور
محمد جمال مدون
عصام فضل صحفي بالشرق الاوسط
لم يطلق سراح الكل
بعض المعتقلين معروضين وقت كتابة هذا الايميل على نيابة الجلاء
ومنهم الاسماء التالية
محمد عادل مدون
عمر سعيد صحفي بالبديل
بيتر الفريد صحفي بالكرامة
ومعهم الان عدد من المحامين والحقوقيين
وسنوافيكم بمزيد من التفاصيل فور وصولها الينا
وهذه بعض أسماء من كانوا في عربات الترحيلات
ساهر جاد
سامح عيد
علاء فخري
محمود الزهيري
هشام الجندي
سيد الطوخي
سيد سعداوي
مسعد أبو لوايا
محمد دومة
سنوافيكم بالمزيد من التفاصيل حال ورودها الينا فتابعونا
| تحديث |
صور أرشيفية لمظاهرات سابقة في السيدة زينب
كنس السيدة 2005
إضغط هنا
مظاهرة فوانيس رمضان 2005
إضغط هنا
-
ذكريات إنتفاضة الحرامية
طبعا أنا ما رحتش مظاهرة السيدة زينب دي
ليس جبنا ولا حاجة
لكن إعتراضا على إختيار ناصرجية كفاية لهذا التاريخ نكاية في السادات
ودي أنا شايفها سخافة
بس نعمل إيه في أم هيافة الناصرجية اللي بيتلقوا الدعم والتمويل من القذافي والأسد وغيرهم لمجرد إنهم يشتموا السادات
وهذا التاريخ يواكب ما أسماه السادات إنتفاضة الحرامية
ويسميه البعض إنتفاضة الخبز
وهي عندما أعلن السادات صراحة في مجلس الشعب عن رفع بعض أسعار السلع الغذائية محترما للشعب ومصارحا له على عكس ما يفعل مبارك الآن من رفع للإسعار تدريجيا من تحت لتحت والناس نايمة على ودانها
ويحاول الناصرجية هباء تذكير الناس بشيء يكرهونه أساسا لأن ما حدث في تلك الأحداث كان همجية وغوغائية
ويدعي الناصرجية ويسارجية 1964 - بتوع يلا نحل منظماتنا ونخرج من المعتقل ونخش في زوارق الحكومة - المنبطحين لعبناصر أنهم قادة تلك الهبة
رغم أنها كانت هبة شعبية عفوية تماما ليس لأي من التيارات السياسية فضل فيها برغم تمويل الإتحاد السوفيتي الجامد ليهم وقتها وهو ما كشفته أشرطة فيديو سجلت وقتها لبعض قياداتهم
والكلام عن ملاعيب الإتحاد السوفيتي في مصر في السبعينات يطول
وهو يبدأ بالخبراء أو الجواسيس الروس اللي جابهم عبد الناصر يتدخلوا في كل كبيرة وصغيرة في البلد - بعد ما إسرائيل قتلت له الخبراء الألمان النازيين في حادثة فيلا الهرم الشهيرة - إنصياعا لتبعيته المقيته للسوفيت - برغم إدعاؤه عدم الإنحياز - اللي ودتنا في داهية في 1967 وأجهضت كثير من البرامج العسكرية الهامة كالبرنامج النووي وبرنامج تصنيع طائرة حربية مصرية نفاثة علشان نعتمد على التسليح الروسي في وقت صنعت فيه إسرائيل الطائرة الكافير
ورغبة السادات في التخلص من النفوذ السوفيتي بطرد الخبراء الروس وتنويع مصادر السلاح وإدارة مصانعنا بخبرات مصرية خصوصا بعد إستندال الإتحاد السوفيتي معانا وعدم إمداده لنا بالسلاح المطلوب لإسترداد سيناء بحجة أن مصر في 1967 تركت عتاد سوفيتي حديث يقع في أيدي الإسرائيليين ليسلمونه فيما بعد لأعداء السوفيت الأمريكان ولهم في ذلك بعض الحق
وبرغم ذلك نجحنا في العبور بما لدينا من عتاد في 1973 وحقق السادات المعجزة
لكن ده مش موضوعنا وسوري إني بأسرح ونعود لموضوعنا الأصلي
وهذا بإختصار هو سبب عدم إنتفاضة المصريين مرة أخرى رغم إرتفاع سعر الخبز من خمسة مليمات عند تولي مبارك إلى خمسة قروش الآن لو لقيت أبو خمسة ده أصلا
لأن المصريون لم يرضوا عن التخريب الذي حدث وقتها
ولا أعرف لماذا تحاول بعض التيارات السياسية تمجيد أعمال عنف
حوالي 300 قتيل
حرق حوالي 100 أوتوبيس هيئة نقل عام
نهب حوالي 300 محل
حرق وتدمير حوالي 200 مبنى حكومي
حرق وتدمير حوالي 200 منشاة خاصة
حرق حوالي 200 سيارة خاصة
لقد كدت أن افقد والدي في تلك الأحداث الدامية
فقد أوقف الغوغاء المواصلات
قطار باب اللوق حلوان ومترو مصر الجديدة وترام السيدة زينب وأوتوبيسات النقل العام
وإضطر والدي إلى العودة إلى المنزل سيرا على الأقدام من وسط البلد كحال كل العمال والموظفين يومها
ولم يكن يملك سيارة وقتها
والحمد لله أنه لم يملك سيارة وقتها وإلا كان حدث ما لا يحمد عقباه
ولأنه كان موظف حكومة ويرتدي بذلة فقد قذفه بعض السفهاء بالحجارة ظنا منهم أنه مسئول أو من البهوات الكبار حتى أنقذه بعض العاملين في توكيل كاديلاك بشارع رمسيس وخبأوه في الجاراج وعاد إلينا مصابا
كما أحرق السفهاء سيارات بعض معارفنا من الغلابة اللي إشتروا عربيات نصر 128 وقتها بالتقسيط
فالعنف والتخريب هنا لم يكن موجها للنظام بل كان من الشعب ضد الشعب
وأكبر مرفق تعرض للتخريب وقتها كان مرفق المواصلات اللي بيركبه الشعب العادي وتم نهب المجمعات الإستهلاكية - طبعا الأجيال الجديدة ما توعاش على مجمعات النيل والأهرام والحاجات دي - والمحلات العادية
أما عن الدور الأحمق للشرطة كالعادة
فقد إندلعت مظاهرات سلمية من جامعة عين شمس
وتوجهت كالعادة في تلك الأوقات إلى شارع مصر والسودان بحدائق القبة
وده قبل ما يعملوا مترو الانفاق في أواخر الثمانينات ويعزلوا حدائق القبة عن جامعة عين شمس بسور خرساني
وكان ذلك المكان قبلها مجرد مزلقان للقطار المتجة الى بعض محافظات الوجه البحري
وتوجهت تلك المظاهرات إلى نقطة شرطة حدائق القبة
فما كان من أحد الضباط الحمقى إلا أن أطلق النار من مسدسه في المليان بدون تلقيه لأي أوامر
فقتل على الفور إحدى الفتيات
وقد تم معاقبة هذا الضابط فيما بعد مع عدد كبير من الضباط
ولنا أن نذكر حرية القضاء في عهد السادات والذي كان السادات نفسه ينصاع لأحكامه وفي ذلك يمكن أن نورد كثير من الأمثلة
فقد أنصف القضاء من قبض عليهم في تلك الأحداث
وأدان أداء الشرطة وقتها
على عكس أحوال القضاء في عهد عبد الناصر صاحب مذبحة القضاة وقتل السنهوري باشا
وأحوال القضاء أيضا حاليا في عهد حسني مبارك صاحب مذبحة القضاة الثانية
ورغم أني كنت في الثالثة فقط من العمر إلا أنني أتذكر مشهد جنود الأمن المركزي تحت نافذة منزلي وهم يصيحون ويدبدبون على الأرض وكان مشهد لا ينسى لطفل مثلي
ويمكن دي كانت بداية علاقتي بالسياسة أساسا
ودي كانت ذكرياتي عن أحداث يناير 1977
الله يرحمك يا سادات
كنت راجل طيب وذكي
بس أعداءك كتير بره وجوه
لسه بياكلوا لحمك وإنت ميت لحد دلوقت
23:55 Posted in صفحات الغلاف | Permalink | Comments (12)
حسني مبارك يمثل مع كمال الشناوي وشادية
حسني مبارك يمثل مع كمال الشناوي وشادية
الحقيقة أنا عارف الموضوع ده من زمان
وبقالي كتير قوي بأدور على اللقطة دي
لحد ما لقيتها
اللقطة من فيلم إسمه وداع في الفجر
بطولة كمال الشناوي وشادية وعبد المنعم إبراهيم
وإنتاج 1956
دور حسني مبارك كان مدرس في مدرسة الطيران
غير متكلم
ومن أغاني الفيلم المشهورة
دور عليه تلقاه
هاهاها
أسيبكم مع اللقطة بقى
إضغط هنا
00:05 Posted in صفحات الغلاف | Permalink | Comments (15)
Wednesday, 16 January 2008
Don't Vote Republican!
Don't Vote Republican!
Use this banner on your blogs!
This is an invitation not only to Egyptian Americans, but to anybody who does not want crazy people in power positions in the world
20:45 Posted in صفحات الغلاف | Permalink | Comments (11)
Wednesday, 09 January 2008
إيلي ياتزبان يضرب مرة أخرى
كنا نشرنا قبل كده مقطع فيديو موجود على يوتيوب للمثل الكوميدي الإسرائيلي إيلي ياتزبان وهو يقلد الرئيس المصري محمد حسني مبارك
وإيلي ياتزبان ممثل كوميدي مشهور بتقليد رجال السياسة الإسرائيليين والعرب
אלי יצפאן
وله تاريخ حافل مع مبارك بالذات
وياما قلده على التلفزيون الإسرائيلي
لكن الحلقات المتاحة على الإنترنت قليلة جدا
ومنها الكليب بتاع النهارده ده
وفي 2001 كان فيه أزمة كبيرة قوي بين وزارة الخارجية المصرية والحكومة الإسرائيلية بسبب الممثل ده وتدخل فيها أولمرت علشان يحلها
ووزارة الخارجية الإسرائيلية بعتت السفير السابق ليها في مصر - زفي مازال - علشان يوضح حرية التعبير في إسرائيل
وبعدها أولمرت قال لياتزبان خلاص المشكلة إتحلت وتقدر تسافر مصر لو عايز بكل سهولة لكن ما أضمنلكش إنك تخرج منها تاني
عموما آدي الفيديو اللي إكتشفته جديد
חמש עם דינה חממי - דינה מראיינת את חוסני מובראכ
إضغط هنا
12:21 Posted in صفحات الغلاف | Permalink | Comments (46)
Tuesday, 08 January 2008
سبقناك يا هيكل بسنتين
جامع محمد على بالقلعة من جوجل إيرث
هيكل عامل قلق اليومين دول بموضوع جوجل إيرث وإزاي إننا مكشوفين كده بقواعدنا العسكرية بالأقمار الصناعية بينما إسرائيل متغطية
في حين إننا إتكلمنا في الموضوع ده على الوعي المصري من سنتين بالضبط
تحديدا في سبعتاشر يناير 2006
بالصور النادرة من مصر والدول العربية
ومقارنتها بصور القواعد العسكرية في إسرائيل
وحيث إن أنا قارش ملحة هيكل وبأعتبره من أكبر مزوري تاريخ مصر الحديث لصالح حقبة الديكتاتور عبناصر
فلو قلت إن معدين برنامجه سرقوا فكرة الموضوع من عندي الناس ها تتهمني إني متجني عليه علشان ما باحبوش
قوم إيه بقى
ها أستنهز الفرصة وأنشر وصلة للموضوع من أرشيف الوعي المصري
إضغط هنا
علشان أفكر الناس بس أنا كنت ناشر إيه وقتها
لا أكثر ولا أقل
إيه رأيكم بقى
لا ده إحنا جامدين قوي
غيرش بس هو يعني
ده أنا غلبااااااان
عموما جوجل إيرث بقى أوضح الآن فيما يخص إسرائيل والمناطق الحساسة فيها وإن لم يكن الوضوح الكافي أكثر مما كانت عليه عام 2005 وقت إعداد الوعي المصري للموضوع الذي سرقه معدي برنامج هيكل مما أوقعهم في الحرج الذي وقعوا فيه وتسبب في إتهام هيكل بإنه مش عارف بيقول إيه
يللا يا عم
أدينا عملنا خدمة لهيكل ووضحنا هو غلط إزاي
-
تحديث عن أبو زيد الهيكلالي
الصراحة لقيت شراشيح الناصرية زعلوا قوي في التعليقات وبيشتموا ويقلوا أدبهم إزاي أتطاول على سي هيكل وعلى عبناصر
قلت أحطلهم الوصلات دي من الأرشيف يمكن يهدوا
ملف خاص عن اكاذيب هيكل
وردود كتاب من مختلف التيارات السياسية عليه ومنهم إخوان وشيوعيين وحزب وفد وانصار القومية المصرية
ويحتوي المقالات التالية
هيكل والحركة الشيوعية المصرية - محمود أمين العالم
لا يا هيكل - عبد القادر ياسين
لا تروجوا الوعي الزائف - دكتور أحمد القصير
قصة أبو زيد الهيكلالي - عبد الرحمن فهمي
التاريخ البلاستيك للأستاذ هيكل - أحمد عز العرب
عزيزي هيكل لماذا تكذب - عبد الرحمن فهمي
الحياد غير الإيجابي هيكل والوفد - علي أبو الخير
معذرة يا أستاذ هيكل - عبد الرحمن فهمي
الدكتور جابر قميحة يرد على حديث هيكل في الجزيرة
محمد يوسف الجندي في مناظرة مع مؤرخ إنقلاب يوليو
أستاذ هيكل لسنا بحاجة لقائد ملهم - أحمد الحسنية
هيكل وحكاية السنوات العشر - محمد حسن أحمد
الحقيقة بين أبو الفتح وهيكل - عبد الرحمن فهمي
بين أبو الفتح وهيكل أخطر مكالمة تليفونية - عبد الرحمن فهمي
هيكل يتحدث كما لم يتحدث من قبل
من الأستاذ إلهامي الميرغني
تحية وتعظيم سلام
هيكل أبو شرايط
لغوصة هيكل في شرف النحاس باشا وزينب هانم الوكيل
ومعلش ما شفتش الحلقة اللي لغوص فيها في شرف نسوان عيلة الملك فاروق فما علقتش عليها
هيكل بيلعب البخت في تاريخ مصر
هيكل لما يعك
والهدية والمهموز الكبير
عدد الوعي المصري التذكاري بمناسبة النكسة
21:05 Posted in صفحات الغلاف | Permalink | Comments (36)
Monday, 07 January 2008
تاني يا دستور ها نعيده تاني؟؟؟
تاني يا دستور ها نعيده تاني؟؟؟
إضغط هنا لتكبير الصورة
ده خبر منشور في جريدة الدستور النهارده
الإثنين 7 يناير 2008
الصحفيين الشطورين الأمامير سرقوا صورة من عندي
لحد هنا وها تقولوا وإيه يعني
ما ياما عملوها يا وائل
ما تفوت بقى
وبعدين ما إنت الغلطان إنك ما حطيتش علامة مائية
ما إنت بتحط على طول
والحقيقة أنا كنت ها أطنش لأن الموضوع بسيط جدا
ولو كلمت الدستور يعني ها يعملولي إيه
ولا ها يدوني كام مقابل الصورة
ده لو ما قالوليش ده احنا واخدينها من أرشيف الأهرام زي ما الواد دسوقي قال لي مرة بعد نهيبة كبيرة من صوري الحصرية نشرتها الدستور بدون أي مقابل للعبد الفقير لله وكأنه سبيل أم عباس اللي بيلجأله كل صحفي محتاس
لكن اللي خلاني أنشر هو طرافة وخفة دم الصحفيين اللي كتبوا الموضوع
بصوا كده كاتبين ايه تحت الصورة
حضور كثير أثناء جلسة محاكمة ضابط الشرطة أمس
والنعمة؟
ده بجد وجديد؟
ياخي أحه
طب الصورة أهه
الصورة منشورة عندي بتاريخ سته يوليو 2007
إضغط هنا للذهاب للعدد
ومتصورة في دار القضاء العالي في القاهرة
من جلسة محاكمة إسلام نبيه
بقت بقدرة قادر متصورة إمبارح ؟؟؟
في محكمة جنايات اسكندرية!!!
ومين صورها؟
وفين صورها؟
يعني عادي إن يبقى صحفي حرامي
آه والله عادي وبتحصل في أحسن العائلات
لكن إنه يبقى عبيط كمان
أهو دي اللي جديدة بقى
17:45 Posted in صفحات الغلاف | Permalink | Comments (20)
Wednesday, 02 January 2008
القضاء الإداري يكفل حرية المدونات ويساويها بالصحف
مقتطفات من حكم القضاء الإداري في القضية رقم 15575/ 61
وهي القضية التي رفعها القاضي عبد الفتاح مراد مطالبا بغلق 49 مدونة وموقع على الإنترنت
وهي تعد مباديء قضائية أرساها القضاء الإداري
ومن حيث انه عن الموضوع فان المادة 47 من دستور جمهورية مصر العربية تنص على أن حرية الرأي مكفولة ولكل إنسان التعبير عن رأية ونشره بالقول أو الكتابة أو التصوير أو غير ذلك من وسائل التعبير في حدود القانون والنقد الذاتي والنقد البناء ضمانا لسلامة البناء الوطني، وتنص المادة 48 من ذات القانون على أن حرية الصحافة والطباعة والنشر ووسائل الإعلام مكفولة والرقابة على الصحف محظورة وإنذارها أو وقفها أو إلغائها بالطريق الإداري محظور ويجوز استثناء في حالة إعلان الطوارئ أو في زمن الحرب ، أن يفرض على الصحف والمطبوعات ووسائل الإعلان رقابة محدده في الأمور التي تتصل بالسلامة العامة أو أغراض الأمن القومي وذلك كله وفقا للقانون
ومن حيث أن الماد19 من العهد الدولي الخاص بالحقوق المدنية والسياسية تنص على أن :-
لكل إنسان حق في اعتناق أراء دون مضايقه.
لكل إنسان حق في التعبير ويشمل هذا الحق حريته في التماس دروب المعلومات والأفكار وتلقيها ونقلها إلى الآخرين دونما اعتبار سواء على شكل مكتوب أو مطبوع أو في قالب فني أو بأي وسيلة أخرى يختارها
تستتبع ممارسة الحقوق المنصوص عليها في الفقرة 2 من هذه المادة واجبات ومسئوليات خاصة وعلى ذلك يجوز إخضاعها لبعض القيود ولكن شريطة أن تكون محددة بنص القانون أو تكون ضرورية:
لحقوق الآخرين أو سمعتهم
لحماية الأمن القومي أو النظام العام أو الصحة العامة أو الآداب العامة .
ومن حيث أن المستفاد مما تقدم أن الدستور المصري مساير في ذلك الاتفاقيات الدولية المقرر لحقوق الإنسان ، قد كفل حرية التعبير بمدلوله العام وفى مجالاته المختلفة السياسية والاقتصادية والاجتماعية وبجميع وسائل التعبير
وضمانا من الدستور لحرية التعبير والتمكين من عرضها ونشرها بأية وسيلة على نحو ما جاء بالمادة 47 سالفة الذكر قد تقرر بوصفها الحرية الأصل التي لا يتم الحوار المفتوح إلا في نطاقها وعلى ذلك فان هذه الحرية لا تنفصل عن الديمقراطية وعلى ذلك فان ما توخاه الدستور من خلال ضمان حرية التعبير وهو أن يكون التماس الآراء والأفكار وتلقيها عن الغير ونقلها إليه غير مقيد بالحدود الإقليمية على اختلافها ولا تنحصر في مصادر بذاتها تعد من قنواتها بل أن تترامى أفاقها بل قصد أن تتعدد مواردها وأدواتها
كما أن الدستور بعد أن ارسي القاعدة العامة التي تقوم عليها حرية التعبير حرص على إكمالها بإحدى الحريات المتولدة عنها كإحدى صورها الأكثر أهمية والأكثر أثرا في المجتمع وهى حرية الصحافة وذلك باعتبارها من أفضل المنابع التي تكفل تدفق الإنباء والآراء والأفكار ونقلها إلى قطاع عريض من المواطنين مما يسهم في تطوير المجتمع وتدعيم الحريات فيه
ومن حيث انه بالبناء على ما تقدم ولما كان الثابت من الأوراق أن المدعى قد استند في طلبه إلى الجهة الإدارية بحجب المواقع المنوه عنها سلفا إلى قيامها بارتكاب جرائم تمس امن واستقرار الوطن : وقد سبق القول بأنه ليس للمدعى مصلحة شخصية ومباشرة في هذا الشق فضلا عن انه يستفاد من رفض جهة الإدارة الاستجابة لطلب المدعى أنها انحازت للأصل وهو حرية التعبير ورفضت الاستثناء وهو التقييد ، إذ أن حجب موقع بالصحافة الاليكترونية هو من ذات جنس حظر صحيفة مكتوبة بجانب أن كل ذلك قيد علي حرية التعبير محظور دستوريا
وكانت هذه هي هدية القضاء المصري للمدونين في نهاية عام 2007
المزيد إضغط هنا
02:07 Posted in صفحات الغلاف | Permalink | Comments (16)
Tuesday, 01 January 2008
Wael Abbas is CNN's Poll Winner
Wael Abbas is CNN's Poll Winner
وائل عباس يفوز بلقب شخصية العام من سي إن إن
أعلنت شبكة سي إن إن وبرنامج - إنسايد ذا ميدل إيست - عن الخمسة الفائزين بلقب شخصية العام لعام 2007 لمنطقة الشرق الأوسط
وكان الفائز الأول هو وائل عباس
الحمد لله
وشكرا لكم جميعا
إضغط هنا للتفاصيل
Click here for details
00:04 Posted in صفحات الغلاف | Permalink | Comments (36)