الوعي المصري

إقرار

قبل ما تخش هنا خش برجلك اليمين وسمي اسم الله
لازم تعرف إن دي مدونة تمليك مش إيجار ولا مفروش
يعني محدش شريكي هنا
نخش بقى على الإقرار
أقر أنا الزائر لهذه المدونة أن الوعي المصري هي ملك خاص للسيد وائل عباس يبرطع فيها زي ما هو عاوز وان انا مش بادفع له من جيبي علشان يكتب في المدونة دي واقر اني استحمل سخافته وقلة أدبه ونرجسيته وحتى تغطيته للحمامات في بلاد بره واقر ان انا باجي هنا علشان اخنق على نفسي وان مش ضروري وائل يغطي كل حاجة بتحصل في مصر وان فيه مدونين غيره بقوا بيصوروا ويغطوا بالفيديو كمان وانا مش مزنوق اجي عند وائل عباس علشان اعرف ايه اللي بيحصل في البلد لاني ممكن اروح اي مدونة تانية او ببساطة اقرا جرايد الحكومة وانام مرتاح البال واقر ان انا مش من مدمنين الفرجة على فيديوهات التعذيب والعنف الامني والمظاهرات والتحرشات ومصمصة الشفايف من غير ما اعمل حاجة واقر ان وائل عباس من حقة يريح ويأنتخ ويكتب او ما يكتبش باختياره هو الشخصي هو حر ان شالله يارب يقفل المدونة حتى او يعملها قراطيس لب واقر ان ماليش عند وائل حاجة واني داخل هنا على مسئوليتي الشخصية وان لو وائل باع القضية او ما باعهاش يبقى منه لربه لان وائل ما اخدش قرض من البنك بفلوس الناس وعمل بيه المدونة وهرب على بره واقر بان وائل عباس مش شخصية عامة ولا نجم سيما وانه بيمشي على رجليه وبيركب الاوتوبيس وان حياته الخاصة ملك ليه وان ماليش دعوة هو مصاحب مين ولا مرافق مين واخلاقه عاملة ازاي وبيتسرمح ولا مستقيم واقر ان وائل عباس عمره ما قال انه بطل ولا عمل نفسه بطل وان وائل عباس عمره ما زعم انه قدوة للشباب وان اللي يقلد وائل عباس ها يروح النار او المعتقل
هذا الإقرار قابل للحذف والإضافة والتعديل
وهذا إقرار مني بذلك
إمضاء
زائر المدونة