الوعي المصري

الأمن يفرق مظاهرة أمام مبنى جامعة الدول العربية
قبل قراءة التغطية عاوز بس أفهم حاجة
هم مش قالوا الاخوان والناصريين والاشتراكيين ها يحشدوا علشان أم المظاهرة دي؟
يبقى ازاي اروح ما الاقيش غير صحفيين ومصورين
ثم بعض المخلصين من المستقلين؟؟؟ لم يتجاوز عددهم العشرة!!!

فين بقى اللي خلونا خرمنا وداننا وعملوا هم صفقات مع الأمن



كانت سيارات الأمن في كل مكان لدرجة إن وانا جاي قلت تلاقي الإخوان مكسرين الدنيا ومش قادرين عليهم علشان كده عمالين يجيبوا في عربيات أمن

ممنوع الوقوف

الأمن فضل يهشنا بجلافة من أول الجامعة العربية حتى نقابة الصحفيين









تظاهر البعض في صمت رافعين علامات النصر



محاولة إختطافي
كنت ماشي مع الناس عادي على الرصيف الغربي لشارع طلعت حرب ففوجئت بالضابط التخين ابو نضارة ده جاي جنبي وبيزقني بكتفه بغلظة وجلافة ويمسك بي وهو يقول لي:

تصوير عبد الناصر النوري
إنت عندك حساسية ... تعالى بس ... مش مفروض تمشي في الشمس ... الناحية التانية ضله احسن علشانك !!!
مش عارف ايه سيناريوهات الخطف العبيطة دي !!!
بدأت أقاومه وأفلفص منه لقيت اتلم عليا حوالي خمسة كمان من البلطجية اللي بملابس مدنية ولقيت نفسي الناحية التانية من الشارع فعلا مش عارف ازاي افتكرت انهم بيفرقونا عن بعض وخلاص لكنهم لم يكتفوا بذلك بل حاولوا أخذي بالقوة إلى ممر بهلر بعيدا عن الشارع الرئيسي والناس فقلت خلاص واضح انهم ناويينها

بس كده محدش ها يعرف اني اتقبض عليا وهاروح فطيس فصحت بعلو حسي يا جماعة انا بيتقبض عليا فصرخت الزميلة سلمى التي تنبهت الى الموقف وجرى نحوى النشطاء ونجحوا في تخليصي منهم والحمد لله
وشكرا جزيلا للزميلة سلمى التي أنقذتني من براثنهم
بس هو جاب حكاية الحساسية دي منين؟
يمكن علشان الوحمة اللي في ودني؟
ولا يمكن علشان كنت حالق دقني ومعورها يوميها؟
هاهاها
الحمد لله على كل حال ...
وإليكم المزيد من صور اليوم من تصوير عبد الناصر النوري









ثم وصلنا إلى نقابة الصحفيين حيث كانت مظاهرة هزيلة وإليكم صورها من تصوير العبد لله





البيان الذي قدم للجامعة العربية يستنكر ما يحدث في غزة



وفي المساء نجح بعض الشباب في تنظيم مظاهرة مفاجئة في ميدان طلعت حرب بدون أن يعلم الأمن لأن التبليغ بها تم شفهيا







 وفضوها قبل أن يحضر الأمن الذي وقف مذهولا





-
شكر خاص لضيفتنا هذا العدد المصورة الهولندية إيمان ناجي

وهذه إحدى لقطاتها
-
سر الموقف السعودي من أحداث لبنان

يا جماعة لماذا تتعجبون من الموقف السعودي مما يحدث في لبنان
يا جماعة حقهم
إنتم ترضوا تبقوا بتصيفوا في بيروت ومقضيين أحلى ليالي حمراء مع المومسات بعد حرمان عام كامل في دولة متزمتة
وبعدين ييجوا شوية عيال عاوزين يهزروا زي بتوع حزب الله ويعملولي رجالة ويخطفوا اتنين عساكر صهاينة
طب مش كانوا يستنوا لما تتعمل حفلة المطرب المهم محمد عبده اللي كان ها يحضرها أثرى أثرياء بدو الجزيرة وقطاع الطرق وتجار المانيفاتورة سابقا
دي قلة أدب
هم اللي إستفزوا إسرائيل تعمل كده في بيروت
ذنبهم إيه السعوديين المساكين يقطعو أجازتهم ويرجعوا ولا يروحوا يكملوها في سوريا ولا الأردن
خمستاشر ألف سعودي
مش كفاية طول السنة هاريين نفسهم يتفرجوا على روتانا والآرت والمزز اللبناني المعتبرة
ولما ييجي الصيف وقت التطبيق العملي يحصل كده
وسبعة آلاف مومس مسكينة ها يقف حالهم ومش ها يلاقوا ياكلوا
وكرخانات شارع الحمرا والأشرفية اللي فاتحة بيوت عمرانة ها تتقفل
ده إيه النحس ده يا ربي
مش معقول كده يا ناس
يا جماعة لازم نقدر ونتفهم الظروف الخاصة التي يمر بها السعوديون خصوصا العائلة المالكة والأمراء ورجال الأعمال
عاوزينهم يقضوا السنة الجاية كمان محرومين؟
ثم إن العيال بتوع حزب الله دول شيعة يعني روافض يعني كفرة وخونة زي بتوع العراق بالزبط ولازم يتبعتلهم واحد زي أبو مصعب الزرقاوي السلفي الوهابي المتسعود أمير الذباحين علشان يخلص على هؤلاء الخونة
وائل عباس
-
أونكل أونكل
هو يعني إيه صور مسيئة لمصر
أمس لم يكن يوما لذيذا ... تقريبا أخذت ضربة شمس ... بأغطي مظاهرة الصحفيين أمام مجلس الشعب ... وللأسف لم ينجح الصحفيين حتى في الوقوف أمام مجلس الشعب فإكتفوا بناصية الشارع ... على عكس الفرارجية الذين تسلقوا بوابة مجلس الشعب ووضعوا لافتاتهم عليها عندما تظاهروا وقت أزمة إنفلونزا الطيور ...

الصورة من مظاهرة تجار الطيور - أرشيف الوعي المصري
وتذكرت العام الماضي عندما إعتصم الشباب من أجل الصحفيين وحريتهم ولم ينضم الصحفيين إلينا وفضلوا الإعتصام في نقابتهم في التكييف ومن جاء منهم لم يطق الشمس لخمس دقائق ...

الصورة من أرشيف الوعي المصري
حقيقي لن ينصلح حال الصحافة في البلد إلا بزوال النجاسة الموجودة في النقابة ... وزوال النجاسة التي يفعلها بعض الصحفيين من مدعي النظال ... تعجبت من زميل جاء يلومني على تفتيت الصف لأني هاجمت هيكل في العدد الأخير من الوعي المصري
ولا أعرف لماذا لم يتهم هيكل بنفس الاتهام عندما لم يترك تيار في مصر لم يهاجمه وادعى الزميل أن الوعي المصري هي جريدة الناس وليست جريدة وائل عباس مش عارف معنى هذا الكلام ايه؟ ... أطبطب وأدلع يعني ... طب بالأولى أطبطب وأدلع الحكومة بقى! ... على الأقل ها يبقى فيها مصلحة ... وأنا لا أنشر أبتغي مصلحة من أحد سواء حكومة او معارضة ... ولا هم صحيح التيار القومي عنده توازنات ومسيطر على الإعلام والفضائيات ومحدش بيتعين ولا بيشتغل الا لما يكون واد قومي بيبصم على صورة عبد الناصر ... ولازم الوعي المصري تبقى قومجية ناصرجية عروبجية علشان تبقى وطنية بجد ... هو الوطنية حد إحتكرها كمان؟ مش كفاية كاس العالم يا عالم!... الحمد لله لم أسعى لها ولن أسعى لها وكاذب من يقول إني فعلت وفي يدي صنعة تغنيني عن تقبيل المؤخرات ولعق الأحذية حتى لو كان حذاء هيكل ... أنشر اللي على كيفكم؟ ... هو أنا بابيع حشيش بيكيف الناس؟ ... هو وائل عباس ده إنسان آلي المفروض يكيفكم وخلاص ومالهوش رأي هو كمان ... هيكل هاجم الإخوان والوفد والشيوعيين ولازم يترد عليه ... هيكل ليس مقدس ولا بركة ولا أراه أنا شخصيا أستاذ علي بل هو أستاذ في الكتابة المؤيدة للسلطة وصاحب مدرستها الأوحد ... ييجي واحد يقوللي مشهور ... أقول له أشهر من جوزيف جوبلز يعني؟ ... أول مشهد يغم النفس كان مشهد اللواء مصطفى بكري وهو يدعو المتظاهرين لعدم رفع لافتات كفاية ورفع لافتات الصحفيين فقط ...

الصورة من أرشيف الوعي المصري
ثاني مشهد يدعو للقيء هو إقحام هتافات الشماتة في موت السادات مرة أخرى وبدون أي داعي مع أن أصحاب تلك الهتافات هم من المنتمون لتيار عبد الناصر أول من أمم الصحافة واغلق الصحف وحبس وعذب ونكل وأعدم أصحاب الرأي والصحفيين وصاحب إختراع الصحافة القومية اللي عايشين فيها حتى الآن ولا إيه يا أستاذة نور !!! ... يا ناصريين ... خلوا عندكم شوية إتساق مع نفسكم ... وإذا بليتم فإستتروا ... واللي على راسه بطحة يحسس عليها ... واللي بيته من قزاز ما يحدفش الناس بالطوب ... تليفون من الزميلة دينا سمك ببشرى سعيدة ... مبروك يا وائل ... ها تتحبس ... قانون الصحافة الجديد من أول بنوده الحبس سنتين لمن ينشر صور مسيئة لمصر سواء في الصحافة المطبوعة أو على الإنترنت أو حتى بالتليفون المحمول! ... المعضلة هنا هي يا إما هذا النص مبهوق قوي وواسع زي الجلابية اللي بيلبسوها للمجانين في السراية الصفرا ... يا إما أنا اللي بيستعصى على فهمي المتواضع إستخلاص الحكمة في نص مثل هذا ... ساعتها كان نفسي ألاقي حد كبير أكلمه وأساله ... عمو يا عمو ... لو سمحت حضرتك ... هو يعني إيه صور مسيئة لمصر ؟؟؟ ... يعني لما أنشر صورة صحفية وبلطجية الحزب الوطني بيمسكوها من صدرها على سلم نقابة الصحفيين يوم الإستفتاء ولا لما أنشر صورة هيفاء وهبي وهي مطلعالنا صدرها على المسرح في حفلة في مصر؟ ... لما أنشر صورة الأمن المركزي وهو عمال بيعجن في المتظاهرين ولا لما أنشر صورة نانسي عجرم وهي بتعجن الغسيل في الطشت؟ ... لما أنشر صورة قزاز عربية دينا سمك المتكسر على اللي فيها بفعل هجمة أمنية عنترية

ولا لما أنشر صور قزاز فتارين المولات الخمس نجوم اللي محدش بيقدر على تمن اللي وراها؟ ... لما انشر صور الفلاحات اللي بيغسلوا على شط الترعة وبيملوا ويشربوا من نفس الميه ولا لما انشر صورة الكورنيش اللي فندق الفور سيزونز عاوز ياخده؟ ... لما انشر صور المشردين اللي بياكلوا ويناموا ويتناسلوا في الشارع ولا لما أنشر صور السواح العرب وبيعملوا إيه في غرفهم الفاخرة وشققهم المفروشة؟ ... لما انشر صورة بلطجية الأمن وهم بيقطعوا علم مصر وقت فض إعتصام المتعاطفين مع إعتصام نادي القضاة؟ ولا لما أنشر صورة ماما سوزان بتلوح بالعلم في مباريات كاس افريقيا وهي ولادها لحمهم لسه ما إتهضمش في بطون سمك القرش في البحر الأحمر بعد غرق العبارة ... لما أنشر صور العمال العيانين المضربين المشردين ولا لما أنشر صور الوزراء بكروشهم المتخمة وبذلاتهم القشيبة وذقونهم اللميع محنتفين ودانهم ومناخيرهم بالملقط لزوم الكاميرات وبرفاناتهم من ثقلها تشعرك برغبة في القيء؟؟؟ حد يفهمني ويرسيني يا كبار سواء كنتم من البر ده ولا من البر التاني ... أنا قربت أفقد الثقة في جدوى ما افعله ... هو أنا بادافع عن بلدي ولا بأشوهها ... ولما يبقى المعارضة فيها وساخة هي كمان مفروض اطرمخ عليها؟؟؟
ويسقط هيكل
وتخلص من حمامك القديم
مع تحيات جرافينا ...
وائل عباس
-
صور مظاهرة الصحفيين

بعد قليل
-
الوعي المصري تفتح ملف خاص حول عك هيكل

هؤلاء ردوا على هيكل

ردود من الإخوان والوفد والشيوعيون وأنصار القومية المصرية
لقراءة الملف الخاص إضغط هنا
-
قديمة يا مبارك

هذا أسلوب مبارك منذ تولى الحكم
لم يقل يوما يا شعبي الحبيب ها نغلي عليكم العيش ولا ها نشيل الدعم
زي سابقه العبيط السادات المش حويط في أمور التزبيط
فالرجل يعمل في صمت
لا يحتاج الى جعجعة ولا يحتاج ان يخاطب شعبه ويصارحه
ويعمل فضيحة في مجلس الشعب وتاني يوم الشعب ينتفض عليه
فاكرين اول ما مسك كان رغيف العيش بكام
والراجل دحلبنا وخدنا حلوانا في سلوانا واشي رغيف طباقي واشي سياحي وواحدة واحدة سرقتنا السكين واختفى الرغيف ابو قرش وقرشين وبقى احمد زي الحاج احمد وكله ملسوع ومتاكل قبل كده
الأوتوبيس أبو بريزة عملوا جنبه الخدمة المميزة ام ربع جنيه قلنا مافيش مانع
نستنى ابو بريزة بيتاخر وما يجيش
طب نعمل ايه عاوزين نروح اشغالنا ومدارسنا
مش ها يخسر نركب النهاردة بربع جنيه ما يجراش حاجة
والسكينة تسرقنا وننسى ابو بريزة الله يرحمه
وقريب ها ننسى ابو ربع جنيه بنفس الطريقة
مستعجل يا بيه
اركب ابو جنيه
اما ابو ربع جنيه
فالله يعوض عليه
هذا شعبنا المصري الطيب
الاهبل ان جاز لي وانا ابنه ومنه
لو كنت حويط ودحلاب ولئيم ها تعرف تزبطه من غير ما ياخد باله من الملعوب
خصوصا وان الملاعب كترت اليومين دول
واخرها ملعوب قانون الصحافة
لكن هل صحفيو مصر بهذا الهبل؟
رفع مبارك سقف العسف في قانون الصحافة فضج الصحفيون
ثم جاء كما المزين في ثقافتنا الشعبية وعمل عملية - خفض - لقانون الصحافة لما شال موضوع الذمة المالية
لكن الحدق أكيد عارف ان عملية - الخفض - لا تؤثر على الأداء
فعل سيبلع صحفيو مصر الطعم؟؟؟
ويا أم المتطاهر رشي الملح سبع مرات ...
وائل عباس
-
وفيما يلي رد وصلني على هذا الموضوع بعدما نشرته بالبريد
بسم الله الرحمن الرحيم
عزيزي وائل عباس
كونك تريد ان تظهر خفة ظلك ، و اسلوبك الساخر في النقد لعموم القراء فاعتقد ان ذلك شئ ليس فية ما يعيب ، اما كونك تتطاول علي زعيم بحجم محمد انور السادات و تصفة بالعبيط ، فباعتقادي الشخصي ان ذلك لا يرضيني و لا يرضي اي مواطن مصري غيور علي سب زعيم سابق لدولتة و يالة من زعيم ...!! .. الزعيم الذي اعاد لمصر كرامتها و عزتها بعد سنوات من الانكسار و الاهانة ، اعتقد ان نقدك للسادات يجب ان يكون في حدود معينة بعيدة عن السباب ، اما نقدك لة باسلوب الشلق هذا فهو غير مستحب علي الاطلاق ، و اعتقد ان السادات لو هو علي قيد الحياة ما كانت جاءتك الشجاعة علي كتابة اى سطر من تلك الاسطر شديدة القباحة و البذاءة و الابتذال ، للنقد حدود يا سيد وائل..يا مناضلنا الكبير بالكلمات
عمرو مجدي دمنهور
-
وفيما يلي ردي عليه
هاهاها
والله مقلوب على ضهري من الضحك
طب يا عم ما تستعجلش
وإسأل عن وائل عباس بس الأول وشوف رأيه في السادات
مشكلتك انك ما فهمتش النقد اللذع للناصريين والشيوعيين المستخبي في الموضوع
بس ليك حق ما تفهموش لان مفروض هما بس اللي يفهموه ده الى جانب انك واضح ما تعرفنيش كويس
وحيث انك طلعت بتحب السادات زي حالاتي
هدية ليك المقال ده
http://www.arabtimes.com/writer/abas/doc7.html
وائل عباس
-
صور مظاهرة غزة أمام نقابة الصحفيين

بعد قليل
-
رسالة من كريم الشاعر من سجن طره



إضغط هنا للتكبير

إضغط هنا للتكبير

إضغط هنا للتكبير
-
مقلب على الهواء مباشرة على إحدى قنوات الهلس

إتصل أحدهم بقناة إنفينيتي الإماراتية المملوكة للشيخ هزاع بن زايد آل نهيان والتي تقدم برامج منوعات منها برامج لما يطلبه المشاهدون تقدمه مذيعات لبنانيات ضحلوات الثقافة وعندما طلبت منه المذيعة إهداء الأغنية القادمة قال:
وأريد أن أُهدي تلك الأُغنيه الى زميلاتي في الجامعه من الدول العربيه أولاً أُهديها الى زميلتي سوزان في مصر والى زميلتي سبيكه في البحرين والى فاطمه في الإمارات والى رانيا في الأُردن والى الجوهره في السعوديه والى لطيفه في الكويت والى موزه في قطر
ولم تفطن المذيعة إلى الأسماء أو إلى المقلب الذي شربته محطتها ومالكها وحكامها على الهواء مباشرة
هذا المقلب عمله كاتب وصحفي إسمه سعود السبعاني
فما رأيكم
هل نستطيع ان نفعل مقالب مثل تلك مع المحطات التي تذيع أغاني ومنها يكون لنا صوت معارض على قنوات الهلس
وحق الملكية الفكرية للمقلب بالطبع مملوك لك يا أستاذ سعود
وائل عباس
-
وائل عباس الإرهابي المتطرف

على موقع الوعى المصرى .. كان للزميل وائل عباس تعليقا على فيلم " عمارة يعقوبيان" اختتمه بتحريض المشاهدين على التصفيق عند مشهد قتل ضابط أمن الدولة فقال : " المهم الأمانة اللي عاوز أحملهالكم لما تشوفوا الفيلم ... موقف مش ها يكلفكم حاجة .. أول ما يتقتل ضابط أمن الدولة سقفوا " ..
ومن وجهة نظر الاعلام المصرى الذى صدع رؤسنا على مدار عشرين عاما بالارهاب والارهابيين فإن الزميل وائل عباس يكون ارهابى متطرف يحرض على العنف واراقه دماء الابرياء من المواطنين ..
والحقيقة أن نفس الشعور الذى انتاب وائل عند مشاهدة هذا المشاهد انتابنى ايضا .. ولكننى لم استطيع التصفيق .. ولكنى كنت متحمس جدا كلما اقترب مشهد قتل هذا الضابط ثم انتهى الحماس بشعور بسعادة وراحة بعد مشهد القتل .. خاصة عندما استكمل طه " محمد إمام " اطلاق الرصاص عليه بعد موته ..
يا سلام على الغل والحقد والضغينة ... الواحد بيستريح لما يطلع طاقة الغل اللى جواه ...
وهنا اتوقف عند منظور جديد لاحداث العنف التى شهدتها مصر فى نهاية الثمانينات وحتى منتصف التسعينات والتى مع الاسف تأثر بها كثير من السياسين والمثقفين تأثرا بالاعلام الحكومى الذى سوق لنا فكرة الارهابيين الذين يقتلون ضباط الشرطة الابرياء ..
وكان الإعلام المصرى يتبع اسلوب التأثير النفسى .. هل تذكرون قضية مقتل ضابط الفيوم الذى اطلق عليه النار فى سيارته وكان معه أبنه الصغير .. وقتها ظل التلفزيون المصرى يذيع علينا مشاهد الحزن والغم مع موسيقى تصويرية حزينة ومشاهد لزوجة الضابط التى تبكى زوجها وابنها .. ولعنات على الارهابيين المتطرفين ..
هذا المشهد الذى يتحدث عنه وائل مقتبس من قصة هذا الضابط مع بعض التعديلات .. فالضابط المتقول هو ضابط مكتب أمن الدولة بالفيوم .. و القاتل هو أحد الملتزمين دينيا فى الفيوم .. قام الضابط بالقبض عليه وتعذيبه لمدة اسبوع ولما فشل فى الحصول على معلومات من التعذيب قام بالقبض على زوجته وهى منقبة واحضرها أمام المعتقل وقام بتجريدها من ملابسها وتحريض المخبرين على اغتصابها أم زوجها .. هذا الرجل بعد خروجه من أمن الدولة لم يكن له شاغل سوى البحث عن هذا الضابط وعندما وجده قرر القصاص على الطريقة التى صورها فيلم عمارة يعقوبيان ..
هذه أحد قصص القصاص التى صورها لنا الاعلام على انها ارهاب وتطرف .. ولدينا معلومات عن قصص اخرى كثيرة معظمها تم بالقصاص نتيجة تعريض زوجات المعتقلين للتعذيب أو هتك العرض أو التجريد من الملابس أمام ازواجهن المعتلقين المعلقين على ابواب مكاتب ضباط أمن الدولة ..
فهل حان الوقت لفتح هذه الملفات لنستطيع التمييز بين احداث العنف أو ما يسميه البعض بالارهاب .. وبين القصاص والانتقام الذى هو حق لكل من اعتدى عليه أو على شرفه وعرضه ؟؟ أم ترى أننى على خطاء وأن وائل عباس ارهابى ومتطرف وزميل لى فى التنظيم الارهابى الذى يستحل دماء الضباط الذين يسهرون على خدمة الوطن ؟ هل يمتلك أحد الجراءة لفتح هذا الملف .. ولدينا المعلومات موثقة من اصحابها .
أحمد حلمى
المحامى
-
واحد قال لي إتجوز يا وائل
أتجوز؟؟؟
هاهاها
ياسيدي هو فيه حد في البلد دي معاه يتجوز
ولو اتجوز معاه يجيب شقة ويدفع مية وغاز وكهربا
ومرتبه ها يكفيه لآخر الشهر
وها يكفيه يجيب بامبرز للعيل ويوديه للدكتور
اللي يتجوز في عهد مبارك ها يظلم نفسه ويظلم البنت اللي ها يتجوزها ويظلم العيال اللي ها يجيبهم هما كمان علشان ها يتولدوا في ظل قانون الطواريء ...
وائل عباس
-
عيب يا بلد
شعر أميرة قسطور

إضغط هنا للتكبير
-
سأشارككم بعض رسائل تصلني بسبب غرابتها أو طرافتها
كما رأيتم كان هناك من ينتقدني لأنه إعتقد أني أسخر من السادات
إليكم هذه الرسالة التي تنعتني انا العبد الفقير لله بالكاتب الكبير
والله عنيا دمعت من الضحك مع كل إحترامي وتقديري لمن أرسلوها
الكاتب الكبير الأستاذ وائل عباس
نتشرف بدعوة سيادتكم لحضور عرض مسرحية حكايا لم تروها شهرزاد على خشبة المسرح القومي بالقاهرة يومي 17 و 18 يوليو في تمام التاسعة مساء حيث تمثل البيت الفني للمسرح في مسابقة المهرجان القومي الأول للمسرح المصري
الممثلون: رغدة  -  سامي عبدالحليم -  أحمد صلاح السعدني
تأليف علاء عبدالعزيز سليمان
إخراج حسام الشاذلي
المسرح القومي 5917783
مع تحيات أسرة المسرحية
والله شكرا يا جماعة على حسن ظنكم ويسمع من بقكم ربنا
أما الرسالة العجيبة بالفعل التي وصلتني كان هذا هو فقط نصها
من فضلك أريد معرفة كيفية صنع قنبلة تقليدية و جهاز detonateur
ومن طريقة كتابته لكلمة ديتونيتور شكله كده في فرنسا وربنا يكون في عون الفرنسوية من البلاوي اللي بنحدفها عليهم
-
يوميات طالب جامعي مع مكالمات أمن الدولة
هاي
مش عارف اقول ايه انما الموضوع يطول شرحه
الموضوع بدأ من تلت شهور لما كنت لسه في الجامعه لما تليفوني " الموبايل " رن ولقيت مكتوب كلمة
call ورد عليه واحد كده عرفت بعد كده انه من اخوانه البعده وكعادتهم رد علي لما سئلته انت مين ..وقال انا واحد خايف علي مصلحتك
وقعد يسئل شويه اسئله من نوعية ايه اللي بينزلك وسط البلد وليه بتقعد علي قهوه عم فتحي ..." وانا كل ده فاكر ان حد من إصحابي بيرخم " لكن لما استرسل في الكلام بكلام اهوج ليس له محل من الاستيعاب من نوعية يابني الناس دي مش خايفين عالبلد ..دول كلهم ليهم مصالح شخصيه ...وقعد يقول كلام مش فاكره من سذاجته
المهم ...انا كان رد فعلي متأخر ....لاني مكنتش مصدق انهم وصلت بيهم الهيافه لغاية كده .....هاويدته في المره دي ...وكانت المكالمه التانيه بعديها بحوالي خمستاشر يوم ..لما كان فيه شغل قوي في الجامعة بسبب مجموعه أزهريون من أجل التغيير وقال ما نصه الاتي " وانت مش ناوي تلم نفسك ولا ايه ...انت هتعملي فيها بطل كمان جوه الجامعه يا روح ***...في الوقت ده انا رديت عليه بشويه حده وقولتله " احترم نفسك او اقفل السكه "...بس الحقيقه كان صوتي واطي..يعني مكانش بزعيق ..رد عليه " يميدويندو" وقال ....انا اصلي خايف عليك ..هتستفاد ايه من ناس زي دول .......واستمر الكلام وهاويدته لغايه ماانتهت المكالمه
بعد كده حصلت أزمة القضاه ....وكان كل معاد لمظاهره بيتصل ويهدد ويقولي اوعي تروح ..ولو روحت هتكون اول المعتقلين .....في الوقت ده انا كان عندي امتحانات اصلا ومكنتش بحضر كل المظاهرات لكن كان فيه مظاهرات بحضرها
ووصلت بيه الجرأه انه يبطل يتصل علي التليفون الشخصي " الموبايل " وبقي بيتصل علي الارضي ..ولما قولتله انت بتوفر ولا ايه رد عليه وقالي " انت عارف احنا مبنصرفش حاجه "
وللاختصار ...كان فيه صحفيه من الراديو الفرنسي اتفقت معايا علي اجراء مقابله في جروبي ..الكلام ده كان يوم اتنين ...والمقابله كانت يوم التلات6/6 ..اتفقت معاها يوم الاتنين علي الموبايل وكان المعاد في جروبي
لكم ان تتخيلو انه اتصل بيه التلات الصبح وقالي انت عندك معاد النهارده مع صحفيه فرنسيه في جروبي ..متروحوش احسن لك ..ولو هوبيت نحيه وسط البلد هتتحبس
قبليها كنت عرض الموضوع علي أربعه من المقربين ليه في حركة شباب من أجل التغيير ..وهما جهاد عبد الرحمن ونرمو وضياء الصاوي والواد مدحت
والنصيحه جت من مدحت وقالي قبليها لو الك متنزلش وسط البلد تاني قولوه ليه هوه انتو هتقفلوها ؟؟!!..هو كان ساعتها قصده عالمكالمه الاولانيه ....فلما جت بقي المكالمه دي جه في دماغي جمله مدحت المأثوره وعلطول قلتهالو " هو انتو هتقفلو سط البلد ولا ايه ...وزود انا... اول ماتقفلوها أوعدك مش هنزلها ..قالي براحتك بس متندمش وانتهت المكالمه ...وروحت وتمت المقابله من غير اي مشاكل والحمد لله
بعد كده اتصل بيه وقالي ..اديك روحت وعملت المقابله ..لم نفسك بأه ....هنا انا كنت اتغظت ....هو ايه عايش معايا ....قولتله لو سمحت ماتتصلش هنا تاني ....ولو عايزين تاخدوني اهلا وسهلا انما متصدعونيش
قعد فتره طويله مايتصلش لكن النهارده الجمعه 14/7 وفي معاد مظاهره السفاره الصهيونيه ..انا كان عندي شغل في البيت ..مقدرتش انزل ...اتصل بيه السعه 2 اول ماطلعت من الصلاه تقريبا وهدد وقال اوعي تروح مظاهره النهارده ...في الحقيقه رديت عليه بجمله كان نفسي اقولهالو من أول مكالمه .....وهي "لا سبيل من تقييد الحريه الا الاعتقال" ايه رايكو ؟ جامده ولا لاء ...طبعا علشان هو مثقف اوي ..قالي ايه ؟؟؟ قولتلو ياستاذ لا سبيل من تقييد الحريه الا الاعتقاال ولو عايزين تعتقلوني ...اهلا وسهلا ..انما انا تليفوني مش سبيل لسعادتكم ..كل شويه تتصلو....انا بصراحه مش عايز ازعاج...وانتهت الماكلمه
شويه ملاحيظ :
ملحوظه واحد : انا محبيتش ابعت الموضوع ده من الاول ....علشان ميتقلش احنا في ايه ولا ايه ..لان كان فيه ناس معتقله فعلا ..يعني هو اينعم لسه فيه مطلعوش وهمه الشرقاوي والشاعر ربنا يخرجهم بالسلامه ..لكن انا حسيت ان الوقت دلوقتي مناسب
ملحوظه واحد مكرر : انا مش باعت ده علشان ابين نفسي ولا حاجه ..بس الحكايه كلها اني زهقت من ام التليفونات دي ..ولقيت ان ده ممكن يكون حل علشان تخلص ..ما اهو كمان بصراحه يبقو معندهمش ولا دم ولا احساس لو اتصلو تاني
ملحوظه اتنين : التليفونات اللي كانت بتجيلي علي الموبايل كانت بيظهر كلمة call
واللي كانت بتيجي عالتليفون الارضي كان بيتكتب ppp
وفي مره من المرات سئلته وقولتله يعني ايه ppp
قالي علي حد كلامه هوه انها اختصار لكلمة profisional polic peroson
ملحوظه تلاته : اللي مضايقني ياجدعان ..هوه هل انا الي هذا الحد مراقب ..ولاد الكلب دول خلاص بقم هايفيين اوي كده ...انا مش شايف نفسي مؤثر اوي يعني علشان يحطوني في دماغهم للدرجاتي ...انما تقول ايه في الهيافه بأه
مع تحياتي : محمود صابر - شباب من اجل التغيير بالعند في اي حد
كونت دي مونت حرنكش
-
عالم السجن

عندما تجد نفسك في عالم مختلف ... به ضجيج و صخب ... تحكمه قواعد خاصة صارمة لا يستطيع احد مخالفتها .....
عالم مختلف اختلاف كبير عما تعودنا عليه وقد لا يمت بصله للواقع الذى نعيشه
عالم خيالى يجعلك تعتقد لوهله انك فى حلم مزعج تنتظر الافاقه منه فى اى وقت
عالم اشبه بدوله داخل دوله ...
. فتأكد انك في عالم السجون .
فالسجون عالم كبير له قواعد خاصة به يتشابه بعضها مع قواعد العالم الخارجي ويختلف معظمها ... له لغة يجب تعلمها أولا.
وأكثر قواعده ليست قواعد مصلحة السجون ... بل تم الاتفاق عليها وممارستها خلال عقود وأعوام طوال من التعاملات بين المساجين.
فقد يتم مخالفة بعض قواعد مصلحة السجون أحيانا إما من الضباط أو المساجين ولكن كلاهما لا يجرؤ علي مخالفة قواعد المساجين التي ترسخت منذ عشرات وربما مئات السنين.
علي سبيل المثال ... كل زنزانة لها نوبتجي أو " نبطشي " ويكون من أقدم من فيها ويحترمه الجميع ولا يخالفه احد مهما كان خارج السجن بلطجيا أو مجرما ... وتتكاتف كل الزنزانة لتطبيق أوامر النوبتجي لعدة أمور منها لترسيخ قواعد الغرفة والمحافظة عليها وكذلك لمنع أي تدخل من إدارة السجن والتي بما أنها من الشرطة المصرية فستلجأ للحلول السهلة وهي تكدير الزنزانة كلها ظالما ومظلوما.
وفي السجن ممنوع الظلم ... فقد ظلم أكثر النزلاء المسجونين خارج السجن حتى أتوا إليه ولذلك يحاولون قدر الامكان عدم ظلم بعضهم البعض .
وللأقدمية عامل كبير في السجون وكذلك فائدة كبيرة ... فالأقدم يمكنه الاستئثار بمساحة كبيرة ونمرة مميزه بعيدا عن الضوضاء ( النمرة هي الفرشة أو البطانية التي ننام عليها فسجن المحكوم أو طره تحقيق للحبس الاحتياطي لا توجد به سراير) وأحيانا يشارك في اتخاذ القرار.
والعملة المستخدمة داخل السجون هي السجائر فكل سلعة نستخدمها خارج السجن يمكن شراؤها بالسجائر أيا كانت ... كل الخدمات سواء غسيل أو كي ملابس أو حلاقة أو نظافة أو علاج أو حتى رشاوى ومخدرات.
ولو كنت مسجون جديد فلابد من دفع سجائر حتى يستطيع النوبتجي إيجاد مكان ملائم وبطانية ... وتلك السجائر يتم إعادة بيعها مرة أخري وتحويلها إلي نقود.
والملاحظ بالفعل أن قانون الحبس الاحتياطي تم وضعه للتنكيل بالناس وتعذيبهم ... فهناك من امضي سنوات من عمره محبوس احتياطيا علي ذمة التحقيق ثم يحكم له بالبراءة ... فمن يعوضه بعد ذلك عن سنوات عمره التي ضاعت وأعماله التي خسرت وأبناؤه الذين حرم منهم فهناك الذي يحبس احتياطيا لسنوات للتحقيق البطئ أو للتقاضي البطيء وقد يحكم له بعد سنوات بمدة اقل من التي تم حبسه فيها احتياطيا علي ذمة التحقيقات كما يدعون ... فمن الذي يعوضه عن ذلك.

هناك كثيرون من المحبوسين احتياطيا من الفقر بحيث لم يستطيعوا توكيل محام يدافع عنهم ومن الوحدة بحيث لم يجدوا من يزورهم ... وبسبب عدم وجود محاميين لهم لا يستطيعون الخروج من الحبس أو دفع كفالة أو إثبات البراءة
.
هناك من لا علاقة لهم بالقضية أو الجريمة بل وأحيانا يكون المجرم الحقيقي معترف بالجريمة لكن لبطء الإجراءات أو لعدم وجود محامي يظل البرئ شهورا وسنوات محبوسا احتياطيا
.
وهناك من تشردت أسرته واضطرت زوجته لممارسة البغاء لكي تصرف عليه وعلي أولادها أو لكي توكل له محام يدافع عنه
.
هناك من كان يبيع المخدرات في شبابه وعندما قرر التوبة رفض موظفوا الأقسام ذلك وأرادوا أن يكون مرشدا لهم يرشدهم عن من يشتري ليلفقوا له القضايا رغم علمهم بمن هو التاجر الكبير ولكنهم يحتاجون التجار الكبار لمخطط تغييب الشعب ويقبضون علي البائع الصغير أو من يشتري
.
وهناك كذلك من النماذج الأسويه الحقيقيه للأسف من كان يود خطبة فتاة تحبه رفضت ضابط شرطة من اجله ولكن هيهات ... كيف يجرؤ هذا العبد أن يحب فتاة يحبها سيدنا ضابط الشرطة ... فقام الضابط بتلفيق حرز للشاب حتى يبعده ويسوئ صورته أمامها وبعد ذلك يهدد أهله ...
وقد يخرج الشاب براءة بعد سنوات من الحبس الاحتياطي والتحقيقات ولكن بعد ضياع كل شيء
.
وهناك من حاربوا الفساد ورفضوا الاشتراك في مؤامرات فتم عقابهم بتلفيق أي قضية مضروبة يخرج بعدها براءة بمجرد عرضه علي المحاكمة ولكن بعد تعذيبه بالحبس الاحتياطي لسنوات.

وهناك من عارضوا النظام وقالوا قول الحق وخرجوا في المظاهرات للتعبير عن رأيهم بطريقة سلمية أو عبروا عن رأيهم في الصحف أو صحفيين فضحوا الفساد فيتم تلفيق أي قضية تافهة ليعاقبوا بها أيام أو شهور وربما سنوات من الحبس الاحتياطي
و لكن ذلك كان فى غياب القوانين المقيده للحريات فما بالك و اليوم قد وافق مجلس الشعب الموقر على قانون يعطى صلاحيات اكبر لحبس الصحفيين و يمنع أى كتابات عن المسؤلين الفاسدين بل و يحميهم و يتستر عليهم
و لكن الملاحظ رغم غرابة ذلك العالم ان الناس جوه آدب و أحسن و أكثر خوف على بعض من ناس كتير بره
م/أحمد ماهر
معتقل سابق بسجن المحكوم بطره
-
يا فرحتي يا فقي بماتش النهائي

أجبر ملك السعودية صالح كامل على إذاعة مباريات كأس العالم في السعودية وكذلك فعل ملك المغرب وأخذ الفلسطينيون حقهم غصب عن عينه وما يقدرش يعملهم حاجة أما مصر التي تستضيف إستوديوهات هذا الجشع وتمده بالخبرات والكفاءات ليكون قادرا على العمل ترضى بعضمة إذاعة ماتش النهائي !!!
ياللهوان ولكنه ليس هوان الشعب الذكي الذي يستطيع أن يحصل على ما يريده غصب عن عين التخين ولو بالذكاء والتحايل ولكنه هوان من يحكموننا
والآن يا مصريون هل تريدون إستديوهات هذا الرجل على أرضكم؟؟؟
وائل عباس
-
قاطعوا شركة ويسترن يونيون العنصرية

التفاصيل إضغط هنا
-
مـارينــا ... و الكـوارث المتوقعـه

الصورة من أرشيف الوعي المصري
عناية السيد الاستاذ / رئيس التحرير
مارينا اجمـل منتجع علي الساحل الشمالي و مؤهله لان تكـون من المنتجعـات العالميه لما لها من طبيعه جميله بما تحتويها من بحيرات مائيه جارية المياه تدخل و تخرج الي البحـر و امامها بحر ازرق تركوازي ... و مكان مناسب لهـواة صيد الاسماك – و بعـد انشـاء بورتا مارينـا وأوش بلو و ما يستجد من فنادق يجعلها تنافس اسبانيا و اليونان و منتجعات البحر الابيض الشهيره و لكـن للاسف ليس بها قانون أو نظـام يحمي حياة الناس فيها و علي سبيل المثال و ليس الحصر :
· حتي صيف 2005 كانت بحيرات مارينـا تضم مايقرب من 150 لنش spead boat يملكها الملاك من مارينـا و الان في مصيف 2006 زاد عدد المراكب الا مايزيد عن300 مركب موجوده بالبحيره بالاضافه الي مايقرب من 1000 موتوسيكل مائي jetskey و سوف تتزايد هـذه الاعداد في السنوات القادمه و من هنـا ننبـه علي وقـوع كـوارث بسبب هـذا العدد الهائل من المراكب و الموتوسيكلات التي تجـري في البحيرات دون نظام أو قانـون .
ونوضح أن قيادة مركب أو موتوسيكل تخضع في كـل انحـاء العالم لنظام جـاد للحفاظ علي ارواح الناس .
قيادة المراكب يجب أن يكون قائد المركب مدرب و حاصل علي رخصة قياده مركب و لكـن في مارينـا أكثر من 90% من قائدي المراكب لاتحمل رخصة قياده مركب بل في بعض الاحيان قـد تري طفل لايتعدي 10 أو 12 سنه يقود المركب ووالده سعيد بذلك.
جميع المراكب لاتحمل ارقام عليها – فأذا لاقـدر الله حدثت حادثه أودت بحيـاة انسان كان يسبح في المياه كيف نتعرف علي صاحب المركب التي احدثت هـذه الكارثه .. كل المراكب ماركات واحـده و متشابهه ولايمكـن معرفة المتسبب أو من هـو الجاني في هذه الحاله – وسوف تنتهي الحادثه بلا جاني " الجاني مجهول "
حركة المرور في البحيره و بها عشرات الكباري .. لايوجـد خريطـة لاتجاهات السير فنجـد أن بعض الكباري عرض الممر المائي قد لايتجاوز عشرة امتار و علي منحني ويتقابل في لحظة مركبين في اتجاهين مضادين و كثيرا ما يستر الله .. و لكـن ليس كل مره يسترها الله ..فيجب ان تتخيل الكارثه التي قـد تحدث .
ومثلا في فينسيا بايطاليا نجـد ان الكباري حتي الواسعه العرض معلق عليها مرايات دائريه كبيره لمشاهدة القادم من الاتجاه الاخـر لاخـذ الحذر اللازم – كما ان في فينسيا ممرات مائيـه ذات اتجاه واحد وممرات مائيه ذات اتجاهين مثل Grand canali ولكـن عندنا في مارينـا المسئله عشوائيه و لن نتحـرك الا بعـد حـدوث كارثه كبري كالعاده
وهل نسينا علي سبيل المثال و ليس الحصر حادثة ابن رجـل الاعمـال محمد ابو العينين – و حادثة اخـري لطالبة الجامعه الامريكيه التي دمـر رأسها و نقلت بطائره خاصه اسعاف Cross air الي انجلترا و عمل لها عمليه كبري و الحمدالله سترها ربنـا و اصبحت في حاله جيـده – و هنـاك عشرات الحوادث كل عـام تحدث و العام الماضي امام عيني كان رجـل اعمال معروف يقود مركب و يجر ابناءه الثلاث علي ظهر Banana خلف المركب و لمجرد مرور مركب اخـري بجانبـه ولم تصدم بهـا بل حدث تفريغ هوائي لمرور المركبين بجوار بعضهم في آن واحـد ادي هـذا التفريغ الهوائي الي اصطدام الاطفال الثلاث رؤوسهم بعضهم ببعض بقـوه شديده مما اثر علي احدهم تأثيرا شديد و اخـذه والده فـورا بسيارته الي مستشفي الفؤاد و اجـري له عمليه بالمخ و انقـذه من مـوت محقق
وهنـاك شباب يقـود المركب او الموتوسيكل الي حـد الجنـون يقوموا بأعمال خطيره جـدا في البحيره يعرضوا فيها حياة الناس للموت – كما يعرضون حياتهم ايضـا للمـوت.
ويجب ان نعرف ان القياده في البحيرات مثلها مثل القياده علي الارض.
وهـل تتخيل ان قيادة سياره بدون رخصـه للسياره و رخصة قياده و لوحـات عليها ارقـام السيارات و قامت هـذه السياره بقتل انسان حتي لو قتلته قتـل خطـأ دون قصـد .. كيف نتعرف علي هـذه السياره ؟؟؟
الامـر مماثل تماما لما يحـدث في البحيره كيف يسمح بذلك دون نظـام أو قانون.
ويجـب استدعاء خبير بحـري فـورا و ليكـن من القوات البحريه متخصص في دراسة القياده البحريه و يعمل دراسه سريعه في اتجاهات السير – اتجاهات الرياح – الممرات المائيه – الكبـاري لوضع خريطه تحرك في البحيره بشكل امن و الالتزام بها بكل جـديـد من قبل الاداره او المـلاك – و لن يتأخر قائد القوات البحريه عن ارسال خبير فـورا لعمل هـذه الدراسه اذا ما طلب منه ذلك و بلا مقابل .
واقــدم لكــم روشـتة العــلاج وهـي :
{1} يجب علي ادارة مارينـا أن تتحرك فـورا و بـلا تأخير أن تسجل كل المراكب و الموتوسكيلات و عمـل تراخيص لها مبين في هـذه التراخيص كل البيانات اللازمه.
{2} تحديد خريطة مسار و اتجاهات يجب الالتزام بها و عـدم الالتزام بها يلغي الترخيص أو دفـع غـرامه لاتقل عن 1000 جنيه للمـره الاولي و المره الثانيه 5000 جنيه و الثالثه سحب الترخيص .
{3} الابتعاد عن مناطق شواطئ الاستحمام خارج الشمندورات الموضوعه بما لايقل عن 10 امتار .
{4} غرامه 5000 جنيه لكل من يقطع احبال الشمندورات و استخدام اماكن الاستحمام الي مرسي للموتوسيكلات و مصادرة أي موتوسيكلات داخـل حـدود الاحبـال و الشمندورات .
نظرا لان بعض المـلاك تعدوا علي اماكـن الاستحمام و استخدموها مراسي للمراكب والموتوسيكلات.
{5} وضع ارقام كبيره و ظاهره للعيـن بسهولة لكل مركب او موتوسيكل .
{6} عمل امـن بحـري يتحرك دائما في البحيره للقبض علي أي مخالف أو الشباب اللذيـن يقومون بأعمال خطيره تعرض الاخرين للمـوت .
ويمكـن أن يسدد كل ترخيص مبلغ مالي بسيط يغطي مصاريف الامـن و الاداره في هـذا المجـال .
هـذا و أنني قـد ابلغت الاستاذ / فؤاد بـدر رئيس مجلس ادارة مارينـا بما جـاء في هـذا المقال و الرجل حقيقة تفهـم كل ما اقـول ووعـدني بأنه سيعمل اللازم و لكـن كالعاده و نظرا لكثرة مشاكل مارينـا قـد ينسي الرجـل أن يفعل شيئا حتي تقـع الكارثـه .
وأنني أود ان كـل انسان يتمتع بحياته كما يشـاء و لكـن لايهـدد حيـاة الاخـريـن للخطر لاننـا جميعـا نذهـب الي مارينـا أو المصايف للاستجمام و التمتع بشواطئ بلدنا الجميله و ليس لنعكـر صفـو حياتنـا من جـراء بعض المتهوريـن .
مهندس / مصطفي عبيــد
رئيس مجلس ادارة شركة عبيـد الهندسيه
مالك احـدي الفيــلات
-
هجوم إلكتروني على الوعي المصري الأسبوع الماضي

نعتذر عن إختفاء جريدتكم الوعي المصري والذي ظنه البعض حجب للموقع أمس بسبب هجوم إلكتروني عليها لم أكن موجودا لأتصدى له لكن اليوم والحمد لله عادت الوعي المصري تعمل بكامل طاقتها ويمكنكم زيارتها على عنوانها كما تعرفونه
-
آخر تحديث لهذا العدد تم بتاريخ
Saturday, 15 July, 2006 11:05:04 AM