الوعي المصري

سوء سوء !!!
سوء سوء !!!
إوعي يجيلك سوء سوء ...

سوء سوء في مظاهرة دوران شبرا

من نفس المظاهرة
-
وليد الدسوقي نسبة إلى دسوق البريئة منه ومن عمايله - شلله يا سيدي الدسوقي مدد
وبالعامية وليد الدسوئي نسبة إلى السوء الحاصل منه
أما إسم الدلع فهو سوء سوء
وبصرف النظر عما إذا كان هذا إسمه الحقيقي أم إسمه البلاستيك
فهو شخصية جديرة بالإهتمام وأن نخلع قبعاتنا إحتراما لهذا التفاني منقطع النظير في الولاء للنظام
وهو يثبت وبشدة أنه النموذج المثالي لما يردده المتظاهرون من أن أمن الدولة - تراتاتا - الدولة
ومحدش يسألني مكان - تراتاتا - إيه علشان كلكم عارفين يا لؤما
وبعدين عمكم سوء سوء عملها توصيف دلوقتي واللي بيقولها بيتحبس طبقا للمادة 184 من قانون العقوبات
عموما لا شك عندي في تفاني سوء سوء بصرف النظر عن النظام الحاكم
حتى لو كان ناصريون أو إخوان أو أيمن نور أو حتى لو كنت أنا شخصيا رئيس الجمهورية فسيكون بنفس التفاني
-
صور سوء سوء يوم فض الإعتصام

سوء سوء لابس مدني ومستخبي وسط البلطجية وداخل الكردون إستعدادا لتنفيذ مهمته بكل التفاني والإخلاص المعهود

الناس اليومين دول معجبة بكتابات وتوليفات سوء سوء الجديدة خصوصا البلاغ بتاع الاعتصام يمكن علشان متعودين على الظباط اللي جابوا خمسين في المية في ثانوية عامة ودخلوا شرطة - بس يظهر هذا النشاط الدماغي المفاجيء أثر على اللياقة البدنية ومن ثم كان هذا الكرش - بس برضه ولو - كرش أيه وبتاع إيه - لسه الجاذبية موجودة - نما إلى علمى أن بعض المناضلات معجبات به خصوصا لأنه بيعرف يلفق لهم تهم يفخروا بيها - إشطه يا عم محدش قدك

بتبصلي كده ليه والغدر جوه عنيك - مع الإعتذار للمغنية الأحفورية اللي ناسي إسمها في أحد أفلام مطلع القرن العشرين

آه ... هوبا ... إبتدى ينشن جوه الإعتصام على الوشوش اللي عاوزها

واثق الخطوة يمشي ملكا - مع الإعتذار لأم كلثوم

ويتقدم بتؤدة وروية

وما زال يتقدم

ويتوغل

وينتشر ويستمر

وجالك الموت يا تارك الصلاة

وكما يتطلع الطفل البريء في ثلاجة الآيس كريم

ويقول لزبانيته أنا عاوز كيمو - بين قوسين - كمال خليل

وعاوز دولسي - بين قوسين - محمد عبد القدوس

ومن أبو كاميرا اللي هناك ده كمان

ياترى فيه إيه تاني في التلاجة

لما أروح أبص الناحية التانية
-
وقال إيه كان مطلوب القبض عليا
قوم إيه لازما ولابد أمن الدولة يصطادوا في المية العكرة
أصل بقى أنا المفروض هربان ومرعوب وكده بقى ودي فرصة سانحة وصيدة متاحة
قوم إيه والله أعلم واحد منهم يتصل بيا من رقم مخفي - ومش عارف مخفي ليه وخايفين من إيه
الصراحة أنا ما أعرفش سوء سوء صوته عامل إزاي لأني ما إتشرفتش بيه قبل كده
فمش عارف هو ولا واحد من رفاقه في النضال ضد أعداء البلد هو اللي اتصل يهددني ويجندني في نفس الوقت
المهم انه اول ما اتصل قال اسم بلاستيك ولما سألته إسمك إيه تاني كان نسي هو قال إيه الأول
ياي بيئة بلدي بلدي سوفاج إنفايرونمينت لوكال خالص
أنا أتجند من أمن الدولة
مش من مستوايا
أنا ما يملاش عيني إلا الحاجات الكبيرة اللي بيتجند فيها الزعماء والرؤساء والناس الكبار دي
زي السي آي إيه والإف بي آي والموساد والإم آي فايف والبي إم دابليو والإم بي ثري والدي في دي والدابليو سي
عموما يمكن مش هو سوء سوء اللي اتصل
فبلاش أظلمه لأنه مش ناقص تهم
ها يلاقيها من رب العباد يوم الدينونة أو في حياته في أرذل العمر في شيخوخته لما يطلع معاش كده وتداهمه نوازل القدر من سكر وضغط وسرطان أو يقعدله في عياله وعافيته
ولا ها يلاقيها من العباد نفسهم في حال النظام إتغير أو قامت ثورة وتمت محاكمته محاكمة عادلة أو غير عادلة أو قرر الشعب بنفسه سحله وتقطيعه وتنسيل لحمه حته حته وإراقة دمه في بالوعات الهيئة العامة للصرف الصحي في شارع عبد الخالق ثروت باشا
ولا ها يلاقيها من الارهابيين اللي يمكن يرجعوا تاني لصيد ونش الضباط زي ما كانوا بيعملوا في الثمانينات والتسعينات خصوصا بعد التضييق الأخير على التظاهر والاعتصام السلميين وتاني يوم تنشر جرايد الحكومة صور الأطفال الأبرياء أبناء الشهيد ضحية أداء الواجب الذين تيتموا وفقدوا الأب الحنون - آه والله حنون أوي حتى إسألوا كل من دخل السلخانة ووقع تحت يده
ولله الأمر من قبل ومن بعد
-
المزيد من صور سوء سوء عند منال وعلاء
-
وألبوم كامل لسوء سوء عند منال وعلاء برضه
-
قول يا عم الشيخ أمين

بعضكم رآه وسمعه
وبعضكم لم يسمع عنه أو يراه من قبل
عم الشيخ أمين من الإخوان المسلمين
لكن أعدكم بأن الملف الصوتي المرفق جدير بالأستماع
منذ أيام إعتقلت الحكومة المصرية الحاج أمين الديب وآخرين بسبب إنتاج شريط كاسيت فيه أشعار للحاج أمين عن قانون الطوارئ
وإليكم الشريط

بصيغة إم بي ثري
http://www.egyptwindow.net/shekhamin.mp3

بصيغة ريل أوديو
http://www.egyptwindow.net/shekhamin.rm

إستمتعوا بحاجة جديدة بدل ما الشيخ إمام ونجم حرقوا صدرنا زي الطعمية البايته عن عهود فاتت ومافيش جديد بيعبر عننا وعن العهد اللي إحنا فيه
وربنا يفك سجن على الفيل ...
-
رسالة من جبهة إنقاذ مصر
الأخ العزيز وائل عباس
السلام عليكم ورحمة الله
أعانكم الله وثبتكم في هذه الظروف الصعبة التي تمرون بها وتمر بها مصر
جميعا..
قلوبنا معكم ومع الشباب الأبطال الذين ينوبون عن مصر (للأسف) في مواجهة هذه
اللحظات التاريخية.
أرجو أن تتقبلوا تحياتي وتحيات إخوانكم في جبهة إنقاذ مصر.
أسامة رشدي
-
أخر تعديل لهذا العدد
Thursday, 04 May, 2006 01:21:09 AM