Ok

By continuing your visit to this site, you accept the use of cookies. These ensure the smooth running of our services. Learn more.

Friday, 31 March 2006

عيد أمهات ضحايا مبارك

عيد الأم في مصر حزين



فقدت إبنتها في العبارة

شاهد فيديو لليوم

إضغط هنا





محمد عبد القدوس كان أول المتواجدين كالعادة



بعض الناس توقفوا بالسيارات وعرضوا التبرع







أمهات ضحايا محرقة بني سويف أيضا كن موجودات



-
في الذكرى الثالثة لإحتلال العراق





شاهد فيديو لليوم

إضغط هنا















المظاهرة متوجهة نحو السفارة الأمريكية



أغلق الأمن الشارع تماما أمام المارة والسيارات

إحراق العلم الأمريكي



ثم توجه المتظاهرون نحو مبنى الجامعة العربية
وهتفوا ضد كل الحكام العرب



ضباط الأمن والمتظاهرين









ثم مر المتظاهرون أمام عمر أفندي
وهتفوا من ده بكره بقرشين



هذه هي الصورة المنشورة في الأهرام ويكلي
-
تابعونا لتغطية مؤتمر القاهرة بعد قليل
-
القضاة يدعون لإضراب عام يوم 25 مايو

-
دعوة لحضور محاكمة فلاحي سراندو

الصورة من أرشيف الوعي المصري
يوم أن تعرضنا للضرب لتظاهرنا أمام النائب العام من أجل سراندو
ندعوكم للتضامن مع فلاحى عزبة سراندو فى المحاكمة التى ستتم ضد 26 فلاح وفلاحة يوم الثلاثاء 18/4/2006 بمحكمة جنايات دمنهور والتي يحاكم فيها الفلاحون بتهم التجمهر والضرب والإتلاف والحريق والتى يحاكم فيها محاميهم محمد عبد العزيز بتهمة التحريض

-
جديد - قائمة مراسلات للجريدة

الآن يمكنك الإنضمام الى قائمة مراسلات جريدة الوعي المصري الإلكترونية لنخبرك بكل جديد ينشر في الموقع
فقط أضف إيميلك في الخانة المخصصة في العمود الأيسر للموقع
Newsletter
وضع علامة في دائرة Subscribe
ثم إضغط Send
-
من وحل الحديث المباشر مع جيمي

الكارتون للبهجوري
كما توقعت جمعت الحلقة بين الاسئلة الذكية والعبط
بس من الأسئلة المعدة سابقا بانت النية للغدر بالحرس القديم وخصوصا بتوع المنوفية ... وعلى خير يا حكيم على خير
أنا ما كنتش مركز أوي صراحة لأني في نفس الوقت كنت بأتفرج على فيلم The Core على إم بي سي تو لأن أول مرة أشوفه
بس الحلقة محتاجة تتشاف تاني علشان تتحلل كويس
كان فيها كام قفشة كده قلت أكتبهم الصبح لكن صحيت عندي هانج أوفر ودماغي بتلق في جمجمتي من قلة النوم ونسيت كل حاجة
بس فعلا احنا لما كنا صغيرين كنا كلنا كلنا مامتنا بتاخدنا تودينا التدريب في الناتشي
عادي يعني يا جماعة
مافيناش حد كان بينزل يلعب كوره في الشارع بالبيجامة والشبشب
وليه واحد صاحبه كسر النضاره البلاستيك فأمه ربطتهاله بأستك
ولا في حصة الألعاب زمايله بيتكسفوا يغيروا ويلبسوا لبس الألعاب علشان لابسين لباس مخروم
ولا بيتكسف يقلع الجزمة وهو داخل الجامع علشان عنده صباع رياضي بيحب الهواء الطلق وخارج من الشراب
وفعلا لازم الشباب يحافظوا على الرياضة والمخدرات والخمرة والنسوان علشان يبقوا في المستقبل في مركز زي مركزه ده
وائل عباس
-
الجنسية المصرية ونقاء العرق الآري

فوجئت بالشروط الموضوعة للحصول على الجنسية المصرية والتي عممتها وزارة الخارجية المصرية على سفاراتها في كل دول العالم لابناء المصريات المتزوجات من أجانب واحب ان انبهكم الى ان ما ستقرأون ليس من دعايات جوزيف جوبلز النازية ولا مستقى من غلاة الدعوة لنقاء العرق الآري وتطهير المجتمعات البيضاء من الشوائب ولا شعارات مرفوعة في مظاهرات الاشتراكيون القوميون ولا النازيون الجدد:
1- أن يكون سليم العقل غير مصاب بعاهة تجعله عالة على المجتمع.
2- أن يكون حسن السير والسلوك محمود السمعة ولم يسبق الحكم عليه بعقوبة مقيدة للحرية في جريمة مخلة بالشرف، ما لم يكن قد رد إليه اعتباره.
3- أن يكون ملما باللغة العربية.
4- أن تكون له وسيلة مشروعة للكسب.
والسؤال هنا:
1
معنى هذا ان حكومتنا تنظر للمعاقين المصريين على انهم عالة على المجتمع ومش عاوزة زيادة منهم ولولا الملامة كانت تعدمهم او تخصيهم علشان ما يخلفوش او تعمل عليهم تجارب علمية ؟؟؟
2
معنى هذا ان من يحكم عليه بمثل تلك الاحكام في مصر تنزع عنه الجنسية المصرية ؟؟؟
3
معنى هذا ان اهل النوبة وسيوة لا يستحقون الجنسية المصرية ؟؟؟
4
معنى هذا انه حسب الاحصاءات فان 10 مليون شاب مصري يجب نزع الجنسية عنهم ؟؟؟
وائل عباس
-
فيديو نادر
مبارك بيحط الكراسي على السادات

هذه اللقطة النادرة وان كانت جودتها ضعيفة هي الوحيدة الكاملة بدون تقطيع او حذف أو مونتاج لعملية إغتيال السادات من طقطق لسلامو عليكم والمصور الجريء حمل الكاميرا على كتفه وتوجه من يسار المنصة الى المنصة نفسها واختبأ قليلا خلف الرخام ثم صعد الى المنصة بعد توقف اطلاق النار ليصور مبارك بيشيل وبيحط الكراسي يا ترى فوق مين ؟؟؟
مبارك قال في التلفزيون كنت باحط الكراسي فوق السادات علشان الرصاص ما يجيش فيه لكن اللقطة تصور وضع الكراسي بعد توقف اطلاق النار ومبارك شخصيا كان واقف على حيله ومافيش رصاص ولا حاجة ثم تسمعون صوتا يقول - الريس فين - ولا يرد مبارك مع انه عارف وحاطط الكراسي فوقيه بنفسه زي ما هو إعترف بنفسه
طيب ها نسيبنا من الكلام بتاع - مش عاوزينك انت احنا عاوزين فرعون - والصورة بتاعة النبأ اللي بينت جثة السادات وفيها طلقات من أسفل البطن والكلام عن المسدس الخفي وغسيل الإيدين ونفكر كده لما واحد يكون مضروب بالنار وضرب النار خلص نحط فوقيه كراسي ليه ؟؟؟ بنخبيه من عين الحسود ؟؟؟ ولما حد يسألنا الريس فين مع إن إحنا عارفين مكانه ما بنردش ليه ؟؟؟ مش كل ده بيأخر من إنقاذه وبيعجل بموته ؟؟؟
بالمناسبة يزعم البعض ان هناك فيديوهات صورها التلفزيون المصري للحادث إختفت تماما من مبنى الإذاعة والتليفزيون
أسيبكم مع الفيديو

إضغط هنا

-
مقاطعة المصرية للإتصالات إحتجاجا

زيادة الأسعار
زيادة الإشتراك
خفض عدد المكالمات المجانية
زيادة تسعيرة الدقيقة الأولى
لا أعرف من وراء تلك الحملة ولكن أنا معهم قلبا وقالبا لانهم ذكروني بشيء شاركت فيه منذ بضع سنوات ونجح نجاحا مذهلا
لا أعرف هل تتذكرون وقت ان قررت شركتا المحمول تقليل فترة الصلاحية قمت مع مجموعة من النشطاء بعمل حملة لمقاطعة الشركتان بل وقمت بنشر دعوة على الإنترنت للقيام بعمل مظاهرة أمام شركتي المحمول بالرغم من معارضة زملائي النشطاء للفكرة والكلام ده كان في وقت محدش بيتجرأ يعمل مظاهرات في الشارع ونجح هذا الإعلان في إثناء الشركتين برغم أنه لم تحدث مظاهرة ولا يحزنون لكن يومها إتصل بي مصدر داخل شركة فودافون وأخبرني بحالة الرعب بين الموظفين وتغيبهم عن الحضور للعمل يوم المظاهرة وكيف أن من حضر ركن سيارته في شوارع بعيدة وكيف حاصر الأمن المركزي مقر الشركة تحسبا وكيف وضعوا الدواليب خلف النوافذ الزجاجية خوفا من الجماهير الغاضبة وخسرت الشركتان في ذلك اليوم خسائر مادية فادحة
وإليكم كاريكاتيرين من تصميمي إستخدما في تلك الحملة


-
إنفراد : حوار صحفي مع فيروس إنفلونزا الطيور

أجرى الحوار الدكتور شريف عرفة
الفيروس يصرح : جربت أدخل جسم مواطن مصري
تفاصيل المباحثات المشتركة مع الميكروبات المصرية

إذا فتحت أي جريدة أو مجلة أو قناة تلفزيونية أو إذاعية أو أي وسيلة إعلام مسموعة أو مقروءة , ستجد أن الجميع يتكلم في موضوع واحد هو : أنفلونزا الطيور.. أتعجب في سري من هذا الاهتمام غير العادي .. هم الطيور دول كانوا من بقيت أهالينا يعني ؟؟
لسبب ما أردت أن أكتب عن هذا الموضوع.. و لسبب ما أردت أن يكون الموضوع مختلفا.. الكل كتب عن أنفلونزا الطيور.. ايه الجديد اللي ممكن اكتبه ؟؟
فكرت مليا في الموضوع و توصلت للفكرة التي قرأتها أنت للتو في العنوان.. ليه لأ ؟؟ مانستضيف الفيروس نفسه و نعمل معاه حوار.. مش اشتغالة بقى ؟؟ محدش عملها قبل كده و أهو يبقى انفراد..
لن أحكي لكم عن مغامراتي المستميته في تحديد موعد مع هذا الفيروس المشغول جدا.. لكن يكفي أن أقول أنني استطعت أن أصل إليه بطريقة ما و أجريت معه هذا الحوار الممتع و المتميز جدا..
احنا : اهلا و سهلا يا عم الفيروس
الفروس: اهلا اهلا ...
احنا : لو سمحت ياريت تعرف اخوانا القراء بنفسك..
الفيروس: اسمي في البطاقة h5 .. و اسمي الفني ( فيروس انفلونزا الطيور)..
احنا : ما هو محل الاقامة ؟
الفيروس: محل الاقامة مش ثابت للأسف.. اصلي غاوي سفر بيني و بينك..
احنا : طيب ما هو محل الميلاد ؟
الفيروس: أنا اتولدت أساسا في جنوب شرق آسيا.. قول في الصين كده..
احنا : كلمنا عن نفسك شوية..
الفيروس: أنا فيروس عادي زي أي فيروس في الساحة الطبية.. بس كل ما هنالك إني وجه جديد و انت عارف بقى و سائل الاعلام بتهتم بكل ما هو جديد..
احنا : إيه الجديد اللي قدمته ؟
الفيروس: يمكن الجديد إني غاوي فراخ و بط و وز..و شهيتي مفتوحة حبتين .. بس كده..
احنا : طيب إيه اللي جابك عندنا يا استاذ h5 ؟
الفيروس: أبدا.. لقيت كل حاجه بتجيلكم من الصين و انتم فرحانين بيها.. فلت آجي أنا يمكن ترحبوا بيا أنا كمان !
احنا : نرحب بيك ؟ يعني جاي تخرب بيتنا و نرحب بيك ؟؟ تيجي ازاي دي ؟
الفيروس: يا بيه مالبضايع اللي جايالكم من الصين جايه تخرب بيتكم هيا كمان, و فرحانين بيها و طايرين بيها.. اشمعنه انا يعني ؟؟
احنا : مش واخد بالي ..
الفيروس: اسمع يا سيدي.. البضايع الصيني دي مش جاية تضرب الصناعة و الاقتصاد المصري ؟
احنا : بيحصل !
الفيروس : أنا كمان جاي أضرب الفراخ و الاقتصاد المصري.. هياها يعني !!
احنا : دانت فيروس مثقف قوي.. طيب بلاش كلام في السياسة عشان الناس ماتزهقش..
الفيروس: زي ما تحب..
احنا : انت ازاي دخلت الأراضي المصرية ؟
الفيروس : بلاش كلام في النقطة دي لو سمحت.. أنا متسلل صحيح بس مش عايز مشاكل مع الداخلية الله يخليك..
احنا : يعني دخلت ازاي ؟
الفيروس: دخلت مع بطة مهاجرة وصلتني في طريقها .. أوتو ستوب يعني !
احنا : و ناوي تعمل ايه في مصر ؟
الفيروس : أبدا.. أنا باتكاثر على البط و الوز و الفراخ و الطيور الظريفة دي..
احنا : طيب مش ناوي تنتقل للبني ادمين ؟
الفيروس : لا طبعا ..
احنا : ليه ؟
الفيروس: شوف يا بيه .. احنا الفيروسات غاويين أذية صحيح , لكن مابنحبش نقطّع على بعض .. كلام في سرك كده .. أنا جربت أدخل جسم مواطن مصري.. لقيت لما دخلت لقيت زملاء كتير قوي .. (التهاب كبدي و بائي) على (بلهارسيا) على (التهاب سحائي) على (سرطان) على (سالمونيللا).. لقيت خلق كتير قوي يا بيه.. لقوني داخل عليهم قاموا وقفوا.. و خدوني على جنب.. و رنوني حتة علقة مكن ,خلتني أزرقّ..!! شايف البشلة اللي في وشي دي ؟؟ إهي دي ضربة مطوة من الأخ (فشل كلوي) !
احنا : و بعدين ؟؟
الفيروس : أبدا.. بعد ما خدت العلقة التمام, قعدنا قعدة عرب.. و اتكلمنا كلام فيروسات من الآخر و اتفقنا على المفيد..
احنا : اتفقتوا على ايه بالضبط ؟
الفيروس: اتفقنا على إن انا مش من هنا و مش ابن بلد فلازم ألتزم بالأصول ..و ما قطّعش على الميكروبات المصرية الصميمة.. اتفقنا على قاعدة ( صباح الخير يا جاري ,انت في حالك و انا في حالي!) يعني بلاش تقطيع على بعض و خليني في الفراخ و العصافير و ما أهوبش ناحية منطقة الميكروبات التانية.. أصلها أرزاق يا بيه و غلط ناخد رزق بعض عدم المؤاخذة..و ده اللي أعلنا عنه في المؤتمر الصحفي بعد المباحثات اللي اجريناها مع بعض في أحد مقالب الزبالة..
احنا : تشرفنا بلقاءك يا سيد h5


-
دعوة لرسامي الكاريكاتير المصريين
المسابقة الدولية للكاريكاتير
International cartoon contest
أين حدود الغربيين
" حرية التعبير " ؟
أخر موعد 15 مايو (5) 2006
الموضوع الرئيسي : لماذا يجب على الشعب الفلسطيني أن يدفع ثمن قصة الهلوكوست؟
أكبر عدد للمشاركات : 5 رسوم
ترسل الأعمال بإحدى الطريقتين التاليتين :
1- ترسل الأعمال الأصلية إلى العنوان البريدي التالي :
Iranian House of Cartoon
No. 60, Golnabi(ketabi) St.,Shariati Ave.
Tehran, I.R.Iran
2- ترسل الأعمال عبر البريد الإلكتروني , على أن تكون ذات تنسيق JPG و دقة وضوح للصورة ( رزليوشن ) 200 DPI إلى العنوان التالي : info@irancartoon.com
قياس الرسم : الحد الأدنى A4 و الحد الأعلى A3
لن يكون هناك تقيد لأسلوب تنفيذ الأعمال.
الأعمال بدون إسم صاحبها تقبل أيضاً
أخر موعد : 15 مايو (5) 2006
الجوائز :
الأولى : 12000 $
الثانية : 8000 $
الثالثة : 5000 $
بالإضافة لـ 12 جائزة خاصة.
كتيب بالأعمال المختارة سوف ترسل لجميع الفنانين
-
ميكروسوفت تؤجل إطلاق ويندوز فيستا
عاجل إلى نظيف ووزيره للإتصالات ووزيره للتنمية الإدارية

قررت ميكروسوفت تأجيل إطلاق ويندوز فيستا حتى يناير عام 2007
والكلام لك يا نظيف إنت ورجالتك المتحمسين للبيزنس مع ميكروسوفت
بيان ميكروسوفت الصحفي - إضغط هنا
تعليق
مصادر داخل شركة ميكروسوفت أبلغونا بأن التأجيل بسبب وجود ثغرات أمنية في النظام لم يتم تلافيها بعد
وصلة لمقال كتبته عام 2003 ثم 2004 - إضغط هنا

ولا حياة لمن تنادي
-
صورة وتعليق

مبارك لم يذهب الى الخرطوم
لأن عنده أمور بالداخل يهتم بها
الصور من جريدة الأهرام
-
شكرا موقع عشرينات

هذه صورة خطيبة جمال وأمها كما نشرها موقع عشرينات الشبابي - الملتزم - والتابع بطريق غير مباشر للذراع الإعلامي للإخوان المسلمين
والله يا جماعة مش عارف أقولكم شكرا إنكم سترتم البنية وأمها ولا أقولكم إيه
بس هما يا جماعة رضيوا يلبسوا كده ويتصوروا كده والشعب خلاص شافهم كده ها تحشموهم بالعافية يعني ولا انتم من باب انكم ما تنشروش سيئة جارية ؟؟؟
وهذه هي الصورة الأصلية كما أرسلها لنا محمد توفيق ونشرها الوعي المصري ونقلتها عنا كل الصحف ووكالات الأنباء حتى رويترز أخذتها مننا

تأخر العدد الجديد

العدد الجديد مساء اليوم إن شاء الله وقدر وكان لنا عمر

Friday, 17 March 2006

إعتصام في حب مصر

 مجموعة 30 فبراير وإعتصام في حب مصر

التغطية الكاملة إضغط هنا
Click here for full coverage
Lisez et voyez des détails ici
Klicken Sie hier
Los detalles están aquí
I dettagli della notte


إضغط هنا لتشاهد فيديو لليوم
-
في ذكرى أربعين ضحايا العبارة
أسر ضحايا العبارة يوجهون أصابع الإتهام



















تفاصيل اليوم في الفيديو

إضغط هنا لمشاهدة فيديو













وظهر أحمد فؤاد نجم أيضا
-
إنهيار أسعار أسهم البورصة المصرية

الضحايا يتحدثون

إضغط هنا لمشاهدة فيديو

تجمهروا من الصباح أمام البورصة وتظاهروا وهتفوا ضد وزير الإستثمار ورئيس البورصة وحالات إغماء بسبب الخسائر الفادحة وسيارات الإسعاف تنقل المغمى عليهم

راجعوا عدد الوعي المصري الثالث من مارس
وكيف تنبأ الوعي المصري بالكارثة قبل حدوثها



داخل نادي المستثمرين راقبوا بحسرة ضياع أموالهم





للتفاصيل شاهدوا الفيديو
-
وطلاب الإخوان يساندون القضاة أيضا أمام جامعة القاهرة







-
محافظ القليوبية قاهر الخنازير

معلش هو الموضوع غريب شوية
وممكن ما يلاقيش قبول من ناس كتير
بس انا شايف ان له دلالات مش ظريفة
الموضوع هو ان محافظ القليوبية المستشار عدلي حسين قرر التخلص من مزارع تربية الخنازير في القليوبية تماما بدون اي تعويضات
والحجة هي ان الخنزير يعول فيروس انفلونزا الطيور
وما سيتم التخلص منه هو اربعون الف خنزير يتركز معظمها في عزبة الزرايب بالخصوص
ثم اضاف الوزير انه لن يسمح باعادة تربية الخنازير على ارض محافظة أبوه تاني
واضاف لا فض فوه بانه لن تصرف تعويضات لمربي الخنازير اسوة بمربي الفراخ
والسؤال هنا
قيل انه سيصرف لمربي الدجاج تعويضات
اي نعم ما فيش كلام من ده بس اهو اتقال وخلاص
لكن اشمعنى بتوع الخنازير اللي بيسترزقوا منها مالهمش تعويضات ؟؟؟
علشان الخنازير بياكلها المسيحيين مثلا ؟؟؟
والمسيحيين زي ما احنا عارفين كفرة مالهمش حقوق ولا حرية ياكلوا اللي هم عاوزينه ؟؟؟
وولاد الكلب ما ياكلوش فراخ مجمدة من اللي ها تستوردهالهم الحكومة ليه ؟؟؟
أهو يستنضفوا بدل الرمرمة !!!
ولا علشان الخنازير حرام ؟؟؟ ومش طالبة قرف بقى ولا نجاسة على ارض القليوبية الطاهرة ؟؟؟
ولا علشان الخنازير بتجيب الامراض ؟؟؟
ولا أحمد عز قرر يستورد الاسموكد بورك من امريكا والجيكوختن شينكن من المانيا ويحتكر المورتاديلا وافخر انواع لحوم الخنزير ليستمتع بها المسيحيون من الطبقات الراقية والسياح في فنادقهم بس بدل ماهي مرطرطة كده وبياكلها المسيحي اللي يسوى والمسيحي اللي ما يسواش ؟؟؟ جاتهم البلا ملو البلد هما والمسلمين اللي ما يسووش برضه !!!
ولا علاء مبارك كان عاوز يشارك مرقص الجزار المشهور بتاع شبرا خصوصا ان الراجل ربنا فتح عليه وبقى عنده فروع في مصر الجديدة والزمالك ما شاء الله ومبارك اتصل بيه وقال له اعتبر علاء من ولادك ... لكن مرقص رفض فقرر يخرب بيته ؟؟؟
طب حيث كده وبمناسبة الصحوة الدينية والصحية والاجتماعية الجامدة دي
اطالب انا كمان بوقف تصنيع بيرة ستيلا وسقارة وخوفو وخفرع ومنقرع كمان
ووقف تصنيع بيريل علشان فيها تشبه بشاربي البيرة والعياذ بالله وهذا فيه شبهة
وعدم تعويض اصحاب المصانع
وان لا يسمح محافظ الجيزة باقامة هذه المصانع النجسة على ارض محافظة ابوه هو كمان

-
أخبار ذات دلالة
تعذيب مواطن حتى الموت في قسم امبابة بعد ان رفض اظهار بطاقته في كمين شرطة لميكروباص
اسم المواطن سليم الصغير 26 سنة وتم احتجازه لمدة يومين وتم تعذيبه بالضرب بالشوم والكرابيج والصعق بالكهرباء لاجباره على الاعتراف بسرقة شقة في البراجيل علشان الزباط الامامير يقفلوا المحاضر ويخلصوا
فبيصطادوا اي حد من الشارع يقفلوا بيه القضية !!!
***
اما في محافظة الاسماعيلية في قسم الفنار فقد قام الضباط باشعال النار في احد المحتجزين حتى توفي واسمه خالد حسن ابراهيم 19 سنة وتم القبض عليه اثناء سيره في الشارع وتعليقه في القسم وضربه بالكرابيج وعند نقله الى المستشفى الجامعي هدده الضباط باعتقال ابيه اذا قال انهم عذبوه وقالوا له ان يقول انه قفز في مقلب قمامة مشتعل ليهرب من الشرطة وتوفي المواطن المسكين في المستشفى والتهمة سرقة سلك كهربا ان كان سرقه فعلا !!!
***
اما آخر نكتة فهي ان شركات التامين وشركة العبارة ستدفع نصف التعويض عن كل ضحية انثى وذلك لان للذكر مثل حظ الانثيين في المواريث في الشريعة الاسلامية !!! مش عارف هما ركبوها ازاي على قوانين المواريث وايه علاقة المواريث بالتعويضات بس والله العظيم دي مش نكته واسالوا ياسر فتحي محامي بعض اسر الضحايا !!!
***
تعليمات على جميع المصالح الحكومية باستقطاع راتب يوم من مرتب الشهر ليدفع كتعويضات لضحايا العبارة وتبرم عام بين موظفي الحكومة من هذا القرار وضحايا العبارة يقولون لم نتلقى شيء
***
اخر خبر هو ان المخابرات الهندية قلقانة من ان شركة اوراسكوم ها تشتري 10% من شركة هتشيسون إيسير الهندية للاتصالات وتدعي بان الصفقة تمثل خطرا على الامن القومي الهندي خصوصا وان اوراسكوم تتواجد بشكل واسع في بنجلاديش وباكستان مما يمثل خطرا على الهند ... كما اظهرت الصين تخوفات من هذه الصفقة ايضا والغريب ان اسرائيل ايضا اظهرت مخاوف ايضا من الصفقة والسبب هو ان شركة هتشيسون الدولية في هونج كونج سبق لاوراسكوم شراء 20% منها تمتلك 52% من شركة بيزق الاسرائيلية للاتصالات ويطالب الشين بيت بالغاء الصفقة ويعلق بعض الخبثاء لماذا يستثمر كل هذا الراس مال المصري في الخارج بينما بابا حسني بيدعو لزيادة وتشجيع الاستثمار في مصر !!!
-
جديد حجب المواقع
حجب موقع مصريون بلا حدود
http://www.imbh.net
حجب منتديات حرية
http://horrya.invisionzone.com
-
تي داتا تجمع معلومات للأمن عن زوار المواقع المحجوبة

الناس كلها بتعمل الموبايل سايلنت علشان الازعاج
لكن انا من كتر الازعاج عملت الكمبيوتر هو كمان سايلنت
ازاي يبقى الكمبيوتر سايلنت ؟؟؟
المفروض ان انا عندي فاير وول او حائط نار لحماية الجهاز من الاختراق وتنبيهي للمصدر
لكن من كتر محاولات الاختراق والهجوم زهقت من الازعاج
فقلت للفاير وول بتاعي بص يابن الناس انت تعملي حماية كده سايلنت من غير ما توجع دماغي
علشان كده بقيت مش مهتم بمين بيحاول يخترق الجهاز او مين بيحاول يجمع معلومات عني
لكن ايه الجديد ؟؟؟
بعد ما اكتشفت ان الحكومة ابتدت تمنع بعض المواقع السياسية بعت للناس اقول لهم
وبالنسبة لي العملية هي ان الشركة منعت الموقع وخلاص يا دار ما دخلك شر
لكن الاخ عمرو الشرقاوي من حزب الوفد بالزقازيق ارسل الى شيء غريب
بعد ان وصله ايميلي حول منع المواقع الالكترونية اغراه حب الاستطلاع بزيارة تلك المواقع ليرى هل هي محجوبة ام لا
وحيث ان هو راجل مش عامل الكمبيوتر سايلنت
الفاير وول نبهه ان فيه حد بيحاول يجمع معلومات عن جهازه باستماته بعد ما زار المواقع دي
وطبعا اداله بيانات عن مصدر المحاولة
والاخ عمرو برضه طلع مش سهل وخد البيانات دي وعملها اقتفاء اثر
طلع ايه ؟؟؟
طلع ان شركة تي داتا نفسها بتحاول جمع بيانات عن من يزور تلك المواقع المحجوبة
لحساب مين ؟؟؟
طبعا الاجابة معروفة
واصبحت تي داتا ليست متهمة فقط بحجب المواقع
بل بالتجسس على المواطنين وجمع معلومات عنهم لحساب اجهزة قمعية !!!
لذا أجدد الدعوة لمقاطعة تلك الشركة وكل الشركات التي تحجب المواقع وتساند القمع
-

وصلة ملف نادر لقصيدة نجم الجديدة عريس الدولة
بصوت أحمد فؤاد نجم نفسه

إضغط هنا لتستمع

-
الأمن المركزي ينفذ الإخلاءات لصالح ذوي النفوذ

كما اخبرنا أصحاب المحلات بشريف سنتر
أن ورثة مالك العقار اليهودي إستعانوا بالأمن المركزي لتنفيذ قرار إخلاء ثلاث محلات وأنهم أرادوا إستغلال الموقف وإخلاء جميع محلات السنتر بالقوة وليس فقط الثلاث محلات المنصوص عليهم

ضباط أمن الدولة ماذا يفعلون هنا



أحد المحلات التي تم إخلائها وتحطيم ما فيها

بعد تدخل الصحافة إنسحب كل المعتدين
-
وعمال كابري يتظاهرون أمام مجلس الشعب









-
الحرية لأميرة ملش

بانر للمدونين واصحاب المواقع وللوضع في توقيعات الايميل
-
إضحك مع تعبيرات وجه رجل يحكم العالم
حماس شديد
أسوشيتد برس
الاستعداد الجاد
أسوشيتد برس
روح الدعابة
أسوشيتد برس
ضربة جيدة
الوكالة الفرنسية
-
من محافظة قنا
قائد حرس الجامعة يعتدي على الطلاب
بسبب تعليق ملصقات ضد الرسوم الدنماركية
أثناء قيام مجموعة من الطلاب بلصق استيكرات تندد بالرسوم المسيئة للرسول (صلي الله عليه وسلم ) فوجئ الطلاب بوجود العميد/ جلال فكري قائد حرس الجامعة ومعه مجموعة من الجنود والذين قاموا بالإمساك بالطالب فتحي والطالب أحمد سيد ( كلية الطب البيطري ) وأجبروهم علي التوجه إلى مكتب الأمن وأجبروهم علي دخول مكتب قائد الحرس وتم ضربهم ضرب مبرح في الوجه وأماكن متفرقة من الجسد مما أدي إلي إصابتهم بإصابات بالغة وكدمات وجروح بالغة الخطورة ثم تم التفريق بينهم وقام العميد/جلال فكري ( بنفسه ) بضرب الطالب/ فتحي ووضع حذاءه فوق رأسه مما أدي إلى إصابته إصابات شديدة بوجهه وخصوصاُ عينه اليمني التي أصيبت إصابة بالغة ولم يكتفي العميد / جلال فكري بذلك بل قام بسبهم بألفاظ وشتائم نابية ووصل به الأمر الي سب الدين لهم

تجمع الطلاب أمام مكتب الأمن





الموضوع والصور للوعي المصري من مصادرنا بقنا
-

رسائل حب من القراء
رسالة 1
الاخوة الاعزاء محرري ومسؤولي صحيفة الوعي المصري
السلام عليكم ورحمة الله
انا اخوكم في الله عمرو المنيري
صحفي ومراسل حربي واقتصادي ربما تعرفوني وربما لا
عملت في عدد من الفضائيات العربية و قمت بتغطية حرب افغانستان والعراق والصومال وغيرهم.
اما بعد هذه المقدمة غير الهامة اردت فقط فقط ان احييكم جميعاً على عملكم المخلص ورسالتكم التقية الواضحة من اجل وطننا الذي بات مرتعاً للفساد
انا عدت للاقامة في لندن وصحيفتكم بالنسبة لي احد المنابر الرئيسية التي احس فيها بنبض الشارع المصري
ويجب علي ان اهنئكم على عملكم الرائع والراقي
في تغطياتكم الصحفية المختلفة وكشفكم لصور طغيان
النظام الحاكم ا"الملكي الجمهوري "
وحكومة "بزنس نظيف"
خصوصاً وانتم تتعاملون مع .... لنقول اسوأ جهاز امني
شهدته مصر منذ عقود
رسالتي هذه لتحيتكم جميعاً وللشد على ايديكم لوجه الله
وتحية خاصة لرئيس التحرير وائل عباس ولكل الجنود المجهولين
وشكراً
عمرو المنيري
***
رسالة 2
شكرا لانك نبض البلد دى
شكرا لانك نبض الشعب ده
شكرا لانك نبض الجيل ده
شكرا لانك نبضى انا
شكرا لانك انته انته
شكرا

Friday, 10 March 2006

دعوة في حب مصر

 دعوة للإعتصام في الحديقة المستديرة بميدان التحرير

بدأها د. يحي القزاز وتضامن معه نشطاء من كافة قوى التغيير
عش معنا ولو لساعات في منطقة محررة.. تحت علم قضاء مستقل وحماية الصحافة الحرة
دعوة للإعتصام حتى الصباح في حب مصر..تضامنا مع أنبل ما أانجبت
قضاة ملاحقون لرفضهم تزوير إرادة أمتهم.. وصحفيون تطاردهم السجون لفضحهم تحالف الفساد مع عائلة مبارك
لنشعل ليلة الخميس 16 مارس الجاري بتلاحمنا، والتي يتلوها يوم الجمعة العظيم الذي يحتضن جمعيتين عموميتين لنادي القضاة ونقابة الصحفيين
الاولى لرفض إصرار سلطة مبارك ومجلسها الأعلى على تمرير قانون يدخل المزيد من القيود على السلطة القضائية.. حصننا الآخير
الثانية لإتخاذ موقف حاسم من الصحفيين ضد إستمرار قانون حبس فاضحي الفساد والإستبداد.. وتقييد حرية إصدار الصحف
المكان: قلب ميدان التحرير.. أملاً في تحرير مصر من سلطة مبارك ونظامه
ساعة الصفر: السادسة من مساء الليلة المباركة

-
الحركة المصرية من أجل التغيير
كفاية


يوم الاثنين 13 مارس
يوافق اربعين ضحايا عبارة الموت
صباحا الساعة 12
بلاغ جماعي للنائب العام يحضر فيه اهالي الضحايا والجميع مدعو للمشاركة أمام النائب العام ونداء خاص للمحامين بالمشاركة للدفاع عن حقوق الضحايا
مساء الساعة 5
نوقد الشموع في ميدان طلعت حرب لاحياء ذكرى الاربعين للضحايا وندعو لهم بالرحمة ونطالب بتحقيق نزيه يحاسب القتلة

-
إنتظروا بقية العدد الجديد 

Friday, 03 March 2006

إنتفاضة الفرارجية

 مظاهرة تجار الطيور

شاهد فيديو عشرون دقيقة
شهادات أصحاب محلات ومزارع وعمال وبياعين سريحة
شهادات لن تروها في التلفزيون ولا الفضائيات
نسخة ذات جودة ضعيفة لوصلات الدايال آب
4 ميجا
Low Quality

إضغط هنا
للحصول على نسخة عالية الجودة
Broadcast Quality
يرجى الإتصال بالوعي المصري

نجح تجار الطيور فيما لم ينجح فيه الصحفيون عندما حاولوا الاعتصام ضد حبس الصحفيين ووصلوا الى بوابة مجلس الشعب وتظاهروا هناك بل وعلقوا لافتاتهم على بوابات وأسوار المجلس

أحد التجار عرض لي عنوان جريدة المساء



بائعة طيور تصرخ وتولول على أحوالها















أحد التجار يعرض علي ورقة توضح ديون مستحقة عليه



يمرون امام الجامعة الامريكية

ومجمع التحرير





والمتحف

متجهين صوب مبنى التلفزيون





ساروا من مجلس الشعب حتى مبنى التلفزيون
وهتفوا يا وزير الاعلام احنا اهم من الافلام

طوق أمني حول مبنى التلفزيون











لقطة زووم على فتحي سرور يركب سيارته داخل المجلس
سرور خرج للمتظاهرين وقال لهم ها تتبسطوا ومشي
ولم يعطهم عقاد نافع
-
أمسية غنائية في ميدان طلعت حرب

محدش بيرسم القفا كده غير عمرو سليم من الدستور
دايما الحلاق بتاعي لما يحب يضحك على زبون يقول له ها اعملك قصة شعر حسني مبارك
لو بصيتم للصورة ها تفهموا الحلاق يقصد إيه

إضغط هنا لتشاهد فيديو من المظاهرة

أحمد فؤاد نجم وقف يخاطب الجمهور من شرفة حزب الغد













ضابط أمن دولة وقف وسط المظاهرة يبلغ رؤساؤه
قام المتظاهرون بعمل زفة محترمة له



قصيدة عريس الدولة التي غنت في المظاهرة
إنظر أسفل
-
قصيدة أحمد فؤاد نجم الجديدة
مهداه الى جمال مبارك وعروسه خديجة

مبروك يا عريسنا
يا أبو شنة ورنة
يا واخدنا وراثة
أطلب وإتمنى
وأخرج من جنة
أدخل على جنة
مش فارقة معانا
ولا هارية بدنا
ولا تاعبة قلوبنا
ولا فاقعة بيضاننا
يا عريس الدولة
إفرح وإتهنى
ما احناش كارهينك
لكن هارشينك
حا تكمل دينك
وتطلع ديننا

-
أيام إشتراكية

عقد مركز الدراسات الإشتراكية مؤتمره السنوي أيام إشتراكية في نقابة الصحفيين وذلك في الفترة من 23 الى 26 فبراير

وقد نوقشت في المؤتمر مواضيع هامة مثل هل المصريون عنصريون وكيف نفهم الإخوان ومسألة الأقباط

جانب من الحضور

لقطة من ندوة هل المصريون عنصريون التي حضرها عدد من الاخوة السودانيون

لقطة من ندوة المسالة القبطية
وحضر المؤتمر نشطاء من كل التيارات السياسية وشخصيات من كل الاتجاهات مثل احمد نبيل الهلالي وكمال خليل وحمدين صباحي  وعايدة سيف الدولة وصنع الله ابراهيم وسمير امين وجون ريس وأليكس كالينيكوس وآخرون كما شهد المؤتمر حفلات لفرقة حبايبنا ووجيه عزيز

فرقة حبايبنا

وجيه عزيز

شاهد لقطة فيديو من الحفل
وعرض الفيلم الفلسطيني الجنة الآن وافلام تسجيلية أخرى

والحقيقة أول مرة أرى تناول للعمليات الإنتحارية غير حنجوري ويريحني نفسيا
وانتهى المؤتمر بأكثر الأحداث اثارة للجدل حيث اعلن كمال خليل عن ان تنظيم الاشتراكيين الثوريين سيخرج للعمل العلني وسيقيم له مقرات علنية بل وسيصدر جريدته العلنية الإشتراكي

-
حزب العمل يقيم حفل تكريم للمشاركين في حملته الإنتخابية
ويقدم شهادة تقدير لوائل عباس لتغطيته المحايدة للإنتخابات

فى لقاء اخوى نظم اتحاد شباب حزب العمل مساء يوم الاثنين الماضى حفلا لتكريم المشاركين من اعضاء وشباب الحزب او من خارجة فى الحملات الانتخابية لمرشحى الحزب فى الانتخابات البرلمانية الماضية وشارك فى الحفل من قيادات الحزب الاستاذ محفوظ عزام نائب رئيس الحزب والاستاذ مجدى احمد حسين الامين العام للحزب والاستاذ عبد الحميد بركات الامين العام المفوض والدكتورة نجلاء القليوبى امينة المرأة والاستاذ حسن كريم امين المحامين بالحزب والاستاذ اسامة الهتيمى امين الشباب وعدد كبير من شباب حزب العمل وبعض اعضاء حركة شباب من اجل التغيير

-
حكومة نظيف الإلكترونية بدأت في حجب المواقع الإلكترونية
ودعوة لمقاطعة موفري الخدمة

كل مستخدمي تي داتا ولينك دوت نت

لن تستطيعوا الدخول على المواقع التالية
شئون مصرية
http://www.masreyat.org
محاورات المصريين
http://www.egyptiantalks.org
جبهة إنقاذ مصر
www.saveegyptfront.org
وهذا ما رصدناه حاليا
ورجاء تبليغ الوعي المصري بأي موقع يتم حجبه لنضيفه للقائمة
ولا اعرف اذا كان موفري الخدمة هذين هما فقط من يحجب تلك المواقع
ولا اعرف اذا كانت هناك مواقع اخرى تم حجبها مؤخرا
وهذه المعلومات مؤكدة تأكدت منها بنفسي بكسر البروكسي لأجد المواقع موجودة
اقترح الدعوة لمقاطعة موفري الخدمة الكبار الذين يرضخون لتعليمات امن الدولة ويكذبون على المشتركين الذين يدفعون الاشتراكات الباهظة المبالغ فيها من اجل الحصول على الحرية
قاطعوا تي داتا
قاطعوا لينك دوت نت
خلينا نشوف مين اقوى
ومين يتسمع كلامه
احنا ولا امن الدولة

-
أخبار عاجلة

وصلت معلومات بأن أمن الدولة والأحياء تقوم حاليا بالضغط على أصحاب المحلات التجارية لتقديم بلاغات وعمل محاضر ضد حركة كفاية بتهمة تعطيل المرور وتطفيش الزبائن والتأثير على تجارتهم

القاء القبض على عدد من قيادات شباب الاخوان بمختلف المحافظات صباح اليوم الجمعة من منازلهم بطريقة استعراضية باستخدام اعداد كبيرة من قوات الامن المدججة بالسلاح
د. رشاد البيومي
م. عبد المجيد مشالي
أحمد عبد الجواد حفيد مصطفى مشهور
أنس القاضي
محمد السعيد
سيد الشويخي
عاطف العريان
أيمن القاضي
مرعي صابر

أبلغي أحد القريبين من دوائر البورصة بوجود حركة بيع وشراء مريبة في البورصة حيث يبيع المصريون أسهمهم ويشتريها أجانب وقل عدد المصريين في البورصة من 75%
الى 67% حاليا
وذلك في خلال أسبوع واحد فقط
أنا مش بافهم قوي في موضوع البورصة ده بس الموضوع كده شكله خطير
-
مبارك حارب السادات بعد موته وحاول تشويهه بالأفلام
فيلمان تحديدا عندما أراهما أشعر بالقيء
أنتجا في أول فترة حكم حسني مبارك ليراضي بهم الناصريين

الهجامة لأسامة أنور عكاشة

والمواطن مصري ليوسف القعيد

أسامة أنور عكاشة و يوسف القعيد
إعتمد فيلم الهجامة على الشرمطة وقلة الأدب وشتيمة السادات عيني عينك فنجد إثنان من كبار اللصوص يقفون أمام صورة السادات ويعددان مناقبه من أنه حلنجي وحبرتقي كده باللفظ وطول ماهو موجود هم في نعيم وذلك في سابقة هي الأولى من نوعها في السينما المصرية ولم يحدث في عصر عبد الناصر ان تم سب اي ملك سابق ولم يحدث ايام السادات ان نال فيلم باللفظ من جمال عبد الناصر كما صور الفيلم مصر السبعينات على أنها مرتع الحرامية والعاهرات على الرغم من أن فترة ناصر شهدت بزوغ طبقة من المسئولين الحرامية إحتكروا كل شيء وأثروا بالحرام من أموال الشعب التي كانت تحت ايديهم في القطاع العام والممتلكات المصادرة والمفروض عليها الحراسة وغير ذلك وهربوا نقودهم للخارج وتشهد بذلك سوق لبنان السوداء لكل ما هو مصري في حين ان السادات كل ما فعله هو ان ازال ما كان يجعل هؤلاء الحرامية يهربون نقودهم خارج البلد وجعل السوق السوداء في مصر بدلا من لبنان واهو نص العمى ولا العمى كله ... وهذا غير مستغرب من واحد زي أسامة أنور عكاشة لم يسلم حتى صحابة الرسول صلى الله عليه وسلم من سفالاته وصدم جمهوره في ليالي الحلمية بتلقيحاته على السادات وتمجيد عبد الناصر حتى كرهه الناس عندما تعمد ان تموت شخصية زينهم السماحي بعد حرب اكتوبر علشان يقلبها ضلمة وعزا وسواد كسواد قلبه وما يقولش كلمة حلوة في حق اكتوبر

غلاف النسخة العبرية من الحرب في بر مصر
أما يوسف القعيد فكريا أقعده الله فقد تنحرر بمنتهى العباطة ولم يتحرى لا الدقة القانونية ولا التاريخية واعماه كرهه للسادات فأقام قصته الحرب في بر مصر التي تحولت الى فيلم المواطن مصري على خطأ شنيع بإدعاؤه أن أراضي الإصلاح الزراعي عادت لأصحابها وتم طرد الفلاحين منها في عهد السادات
ولأنه يعلم بتهافت قصته فقد أضاف لها الحبشتكانات بقصة لا تحدث ولا في عصر المماليك والترك عن ابن الفلاح اللي دخل الجيش بدل ابن العمدة
مش عارف كان بيستعبط مين وهو بيكتب الى جانب حشره لحرب السادس أكتوبر ومحاولته النيل منها وهو ما دأب عليه مجموعة سياسية حنجورية تنتمي الى حقبة فاشية من تاريخ مصر وصحة الموضوع هو أنه ما أعيد هو أراضي الحراسات وليس أراضي الإصلاح الزراعي والمفاجأة الأنكى هي أن أول الأحكام التي صدرت كانت في عهد زعيمه الخالد الذي يعبده أو اللي عامل بيعبده في مقابل إيه الله أعلم وكانت في كمشيش 1969 يعني قبل السادات أصلا
وبالمناسبة في كمشيش لم يطبق الإصلاح الزراعي على أحمد الفقي - العمدة وعضو مجلس النواب في عهد عبد الناصر - مش بيفكركم بالعمدة عمر الشريف في الفيلم - الذي قتل على يديه ثلاثة من الفلاحين من 1952 حتى 1966 تحت حماية نظام ناصر الذي كان يعتقل الفلاحين ويحدد إقامتهم كما كان الفقي يفرض على كل فلاح ان يرسل احد ابناؤه ليعمل مجانا في الوسية وكان الفقي بيبيع مية الترعة بتاعة الحكومة للفلاحين بعشر قروش وقتها للقيراط واحتكر تجارة القطن والمواد التموينية والبذور والاسمدة وحرق مصنع الكتان بتاع بنك مصر في القرية وقفل المدرسة الوحيدة هناك وليست كمشيش هي المثال الوحيد فهناك أمثلة أخرى كثيرة منها رفيق شاكر بولس الذي طرد 23 عائلة وعملية تحديد إقامة 6 أفراد من عائلة غراب خارج بلدهم أوسيم وطرد 25 عائلة زعم الإتحاد الإشتراكي أنهم تركوا الأراضي طواعية لأن إنتاجيتها ضعيفة كما أصدرت المحكمة حكما بطرد فلاحي أرض زلعوم بأبو رواش وحدثت احداث مشابهة في كل من الحواتكة وبني سلطان ومطاي وبني سالم وغيرهم ووافق الإتحاد الأشتراكي في جلسته 12 فبراير 1969 على طرد الفلاحين إذا لم يدفعوا الإيجار وإعتبار بقاؤهم بلطجة كما اعتبر عبد الناصر الاشتراكي ان استصلاح الفلاحين للاراضي الزراعية وضع يد وبلطجة وسرقة لارض الحكومة - أول مرة أسمع ان فيه حاجة اسمها ارض الحكومة في الاشتراكية - اومال ايه حكاية الارض لمن يزرعها االلي صدعونا بيها دي - وبالمناسبة فقبل حدوث هذا كله قال عبد الناصر في إفتتاح مجلس الأمة 1967 بالحرف الواحد لن نفرج عن أرض خاضعة للحراسة ونسلمها إلى أصحابها بأي صورة من الصور
بالمناسبة كمان نشر في الأهرام 1969 إعلانات عن بيع مئات الفدادين من أراضي الحدائق المملوكة للدولة لكي يشتريها إقطاعيون جدد
وفي النهاية نذكر بعض الأقوال لجمال عبد الناصر في إحدى جلسات الإتحاد الإشتراكي قبل وفاته لما إبتدى يفكر
الحقيقة ساعات فيه حاجة كده الواحد بيلاقيها ملخبطة .. يعنى بيتحَمِّس وبعدين لَمَّا بتيجى الإدارة .. تبص تلاقى الواحد وقف
فرق بين اللى بِيْطَبَّق واللى بيتكلم .. اللى بيتكلم ده راجل كويس .. واللى بيكتب مقالة فى جرنال بيكتبها .. بيقعد ساعتين بيكتبها وِيْرَوَّح . اللى بيطبق بقى هُوَّ الراجل اللى بيقعد يسهر بالليل وبالنهار ، وبيقولوا له : ده فيه إيه .. وده فيه إيـه .. عايز يعرف العملية ماشية ازاى

حينما نتكلم عن التطبيق الاشتراكى .. والتحويل الاشتراكى .. لازم الحقيقة نفكر فى الإدارة ، لأن إذا ماكانتش الإدارة إدارة سليمة، حتكفَّر الناس كلهم من الاشتراكية
وفي النهاية أقول أنا ربنا ينتقم من كل من يشوه تاريخ مصر علشان يقبضله قرشين
والواحد لو إتكلم عن الفترة دي مش ها يخلص بس الناصريين بيزعلوا