Ok

By continuing your visit to this site, you accept the use of cookies. These ensure the smooth running of our services. Learn more.

Friday, 29 April 2005

كلمة للتاريخ وللبطيخ - محمد زهدي المعلم

- سيادة الرئيس محمد حسني مبارك
انا مواطن مصري
وعاوز اشتري جزمة بني
وياريت حضرتك ما تزعلشي من اللي هاقوله

- لا لا أنا ما بازعلشي ابدا

- وعايز بعد ما اشتري ليا اشتري لابني كمان جزمة
وانا باكلمك بصفتك محمد حسني مبارك المواطن
مش الرئيس

- قرار شرا الجزمة ده قرار مش سهل ابدا .. انا عمري ما اخدت قرار في حياتي بسرعة .. و لو جيت اشتري جزمة لازم الأول ادرس القرار ده كويس و اجيب لجان متخصصة احسن ناس من كل حتة .. مش مهم انتمائتهم ايه لو واحد بيحب اللوتو واحد بيحب النايك المهم انه يكون واحد فاهم و نبتدي ندرس الجلود و نوعياتها و النعال و نوعياتها و الجزمة ديه حتضيق و حتتملع ازاي .مش اشتري جزمة و بعد شهرين الاقيها مبتتلمعش .. لازم الواحد يكون عنده نظرة لقدام .. ميبقاش واخد قرارته الا وهوه عارف و متأكد تماما هوه حيعمل ايه

- وسيادة الرئيس الراحل محمد انور السادات
ما كانشي بيعمل كده؟

- لا ما كانشي هو من النوع ده
كنت بنصحه طبعا و بقوله يعمل كده قبل ما يشتري اي جزمة
بس كان بيقولي ده كله كلام فارغ

- بيقولوا .. ساعة الثغرة .. ان السادات اتضايق .. و فيه كتاب كتبوا .. انه انهار .. و ناس تانية قالوا انه .. قعد على ترابيزة العمليات .. و قعد يعيط .. عشان .. الجزمة .. كانت .. ضيقة؟

- لا السادات عمره في حياته ما انهار و لا حس بقرص الجزمة بتاعته .. السادات ده كان راجل مش سهل
السادات كان في موضوع الجزم ده ميعرفش حد

- طب ده ها يفتح تساؤل وهو ازاي السادات عرف حضرتك
بس ها نأجل الموضوع ده لحلقة قادمة

- مافيش مانع

- سيادة الرئيس محمد حسني مبارك
ماذا كان شعورك
وجسد السادات راقد على بعد سنتيمترات منك؟

- دول مش كانوا سنتيمترات
دول كانوا مليمترات

- شفت السادات وهو ميت؟

- انا مشفتش اي حاجة خالص في الموضوع ده .. انا بصراحة من اول ما شفت العربية من بعيد كنت عارف ان ده حيحصل .. كنت يمكن عارف من زمان الموضوع ده .. و قلت للسادات البس بدلة واقية من الرصاص قالي لأ.. قلتله طب نأجل حفل اكتوبر لبعدين قاللي لأ .. يعني حاولت المستحيل لأني كنت عارف .. كان فيه احساس
فلما شفت العربية جاية من بعيد .. رحت نزلت تحت الكرسي قبليهم كلهم و قلت استناهم تحت
بعد دقيقتين سمعت صوت رصاص .. و لقيت حاجة وقعت جنبي قلت ده يبقى اكيد السادات
بعدين سمعت صوت واحد بيتقبض عليه .. فرحت قالب الكرسي .. و منغير ما ابص ورايا رحت المستشفى استنى جثمان الرئيس هناك فملحقتش صراحة اشوف اي حاجة

- سيادة الرئيس محمد حسني مبارك
انت كنت الرجل الأول في مصر بعد رئيس الجمهورية
ماذا كان يمكن ان يحدث لو
راحت عليك نومة
يوم سته اكتوبر الصبح؟

- شوف انا طول عمري بصحى بدري .. و بعدين يا اخوانا اللي بياخد قرار الحرب .ده قرار مش سهل ابدا .. بيبقى حاسب كل حاجة و عامل حساب كل حاجة .. احنا قعدنا قترة طويلة بنحط خطط و الخطط بيتوافق عليها نقوم ناخد قرارات و بعد كده نعدل و نبتدي من الاول مش موضوع سهل .. فمسألة الصحيان بدري دي خططنا اننا نضمنها تماما .. اول حاجة خلينا الضرب الساعة 2 الضهر علشان اللي ميصحاش بدري و تروح عليه نومة ميفتوش الضرب
و بعدين انا كنت عاملي حسابي فقلت للمشير احمد اسماعيل يبقى يتصل بيا يتأكد اني صحيت .. و بعدين قلت الله ما ممكن هوه كمان بالصدفة تروح عليه نومة.. فاتصل بالسادات و رجيته انه يبقى اول مايصحى الصبح بدري يوميها يتصل بالمشير احمد اسماعيل يتأكد انه صحي بدري.. و قلت طب افرض لأبعد الظروف احنا التلاتة راحت علينا نومة فاتصلت بعاطف السادات و قلتله يا عاطف .. اول ما تصحى يوميها بدري اتصل بالريس و اتأكد انه صحي و عاطف طبعا قال لناس تانية و الناس قالت لناس لغاية ما البلد كلها ما تكاتفت في اليوم ده عشان نتأكد اننا صحينا بدري .. و كل ده حدث في سرية تامة .. متعرفش بقى اليهود عرفوا يوميها اننا حنضرب ازاي في الوقت ده

- وقت ما صحيت ما حسيتش بخوف ؟

- شوف انا مبخفش ابدا .. انا موضوع الخوف ده يعني . .. اصلو انا كنت طيار .. من ساعة ما اتخرجت و انا بطير.. و الطيار ده بيبقى راكب الطيارة و معرض للخطر في اي وقت .. المسألة مش سهلة على الاطلاق يعني .. ممكن الطيار ايده تيجي غلط في زرار يقوم يطلق صاروخ الصاروخ ييجي في جبل .. ينفجر .. حجر طايش من الجبل ييجي يعور صباغ رجله الصغير
فموضوع مش سهل و الموت ده احنا كنا بنواجهه على طول .. و بقينا خلاص متعودين عليه

موسيقى تصويرية .. صورة واضحة للريس و هوه ينظر للشعب عبر شاشات التلفزيون بهدوئه المعتاد .. و يا ترى بيفكر في ايه و هوه باصصلنا دلوقتي

كان معكم مواطن مصري من جوار تلاجة عم عبده بتاع البيبسي و بيتفرج على التلفزيون المتشاف بوضوح من القهوة الصغيرة المجاورة للتلاجة

Comments

أستاذ محمد زهدي المعلم
الحقيقة أنا مش عارف المعلم دي لقب والا صفة
لكن بعد قراءة مقالتك البديعة اتهيالي انها صفة على موصوف
بالبلدي كده يخرب عقلك على خفة الدم وسلاسة الاسلوب
والله الواحد أما يقرأ مثل هذه الكتابات يجد بريق الضوء وشعاع الأمل يتسرب إلى قلبه المحبط رغم أنفه
والله البلد دي فيها خير ومليئة بالمواهب الواعدة والجادة والناس فاهمة وبتفكر وفهمها على أعلى مستوى وكمان تفكيرها من أرقى ما يكون
لكل من اراد أن يجد تفسيرا لولهنا وولعنا بهذا البلد كل ما عليه أن يمس هذه الروح المتقدة الساخرة الذكية، نبتة هذه الأرض العجيبة الساحرة
أحسنت يا معلم زهدي أو يا زهدي المعلم

طارق

Posted by: طارق جابر | Tuesday, 03 May 2005

:) أضحكتنا يا معلم , إيه الحلاوة دي

Posted by: wa7damasrya | Thursday, 05 May 2005

السلام عليكم و رحمة الله و بركاته
بداية احب ان اقول اني من اشد المرحبين بفكرة الbloggers و لكني اري انها اصبحت لكل (من هب و دب)
اسمحلي اختلف معاك فاللي انت كاتبه
تقدر تقولي ايه اللي الناس استفادتوا من المشهد الساخر ده؟ طبعا ولا حاجة
احنا مش بننقد نقد بناء يعني نقول الشيء و نقول ده غلط ولا صح و صح ليه او غلط ليه
ده حاجة و تاني حاجة اسمحلي اسالك انت باي حق تتريأ علي معركة مات فيها شباب من افضل شباب البلد في سبيل استرجاع الكرامة و العزة لهذه البلد اللي طالما احنا واخدين الموضوع هزار و تنكيت و تهزيء من غير ما ننقد نقد صحيح يبقي عليها السلام
و شكرا
وارجو الا اكون قد اطلت عيكم

Posted by: محمد عبد الفتاح | Saturday, 13 August 2005

محمد عبد الفتاح
انا لا بنقد ولا بتريأ انا نقلت الحوار زي ما هوه بس بشكل كوميدي
عشان اوصل وجهة نظري للناس لأن الضحكة طريق سهل للقلب

Posted by: المعلم زهدي | Friday, 23 September 2005

إلى السيد/ محمد عبد الفتاح

يوجد في الكتابات الأدبية ما يسمى بالرمزية ... الأستاذ/ المعلم زهدي يريد أن يقول لك أن حسني مبارك حمار ... وإن البعيد عامل ناصح وفهلاو ... وأنه مشترك مع المخابرات الأمريكية في عملية اغتيال السادات

الأستاذ/ المعلم قال كل ذلك دون أن يصرح به بصورة مباشرة ... أما تساؤلك عن فائدة كل ذلك فهو مثل تساؤل الآخرين عن فائدة وجودك ذاته ... السؤال صعب والإجابة سهلة ... وهي أنك موجود لكي تأكل صحن فول الصبح ...وطبق فتة الظهر... وتعمل يك بالليل... وتقوم من النوم تنام تاني...


إلى المعلم زهدي

ما تزعلش يا ابني ... اكتب وعبر عن همومك كيفما شئت ... انفخ في القربة المخرومة ... وتأكد أن الوطن بخير وأن شعبان عبد الرحيم سيتم تعيينه رئيسا لنقابة الفنيين ثم رئيسا للجمهورية ... ولكي يتم الخراب فإن شعبان عبد الرحيم سوف يختار حسني مبارك نائبا له حتى تكتمل الخيبة .

Posted by: محمد عبد اللطيف حجازي | Sunday, 25 September 2005

أنا أسمي :هبة و الحقيقي تيسير السيد
السن :19 سنة
الدراسة :دبلوم صنايع القسم:إصلاح و صيانة الأجهزة الكهربية.
أنسة .دبلوم 2004_2005
والله العظيم بحب أ.محمد حسن مبارك قوي مثت والدي بدون أي مقابل او أي مصلحة وأرجو ان توصلوا له هذه الرسلة
و الله العظيم بحس انه بني ادم بجد تمنياتي له با لحياة السعيدة و الصحة و العافية

Posted by: هبة | Monday, 30 January 2006

The comments are closed.