الوعي المصري

حول اشاعة اسلام موريس بوكيه
وان رمسيس الثاني هو فرعون موسى ... الخ
واضح ان فيه حملة محمومة لنشر هذه الاشاعة على الانترنت
ايوة اشاعة وهاقول ليه دلوقتى

بس الاول نفسى افهم هو الاسلام ناقصه ايه ؟؟؟
ناقصه ايه علشان نحاول ننشره بالخرافات والاباطيل ونخترع الحواديت عنه ؟؟؟
لا جدال فى ان الاسلام والقران والسنة تحوى المعجزات فى كل المجالات ...
لكن الخطر كل الخطر من هؤلاء المضللين انصاف المثقفين وانصاف العلماء
اللذين ينسجون الاساطير ويحاولون ربطها بالعلم الحديث وهى ليس بها من العلم الا الخيال العلمى !!!

انا سبق وحذرت من الناس بتوع الاعجاز العلمى فى القران ... بدون ذكر اسماء
بسبب محاولتهم الواهية لربط القران بظواهر علمية ما زالت فى الطور النظرى ولم تثبت
فاذا اثبتت كانت خير وبركة ...
اما غير المثبت منها فهو يعطى الفرصة للمشككين فى الاسلام للدخول من اوسع الابواب
وهذا هو الخطر اللذي يجب اجتنابه
لذا وجدت من واجبي ان لا التزم الصمت بحجة ان دي ناس كبيرة وبركة !!!
فهناك من يقول لو كانت الكذبة ستساعد على زيادة ايمان الناس فمرحبا بها ...
اما انا فاقول لا والف لا !!!
فقد يزيد ايمان ضعيف الايمان
اما من يتصيد الاخطاء للاسلام واهله من الملاحدة والمغرضين وما اكثرهم
فستكون مثل هذه المزاعم جل مأربه
ليدخل منها ويطعن في صلب الدين فينتكس ضعاف الايمان ويهتز من رسخ ايمانهم !!!

وتوجد مواقع كاملة على الانترنت
لا هم لها الا تفنيد مزاعم الاعجاز العلمي في القران
فلماذا نضع قرآننا وسنة نبينا الكريم موضع المناقشة والتفنيد من اساسه ؟؟؟

ونعود الي ايميل موريس بوكيه ...
مبدئيا التواريخ والشخصيات فى الايميل مفبركة
لان موريس بوكيه نشر كتابه وابحاثه فى اوائل السبعينات وليس الثمانينات
يعنى ولا فيه ميتران ولا حسن زعبله حتى ولا مطار ولا حتى موقف ميكروباص
ثم ان الايميل لم يذكر اسم الفرعون المشار اليه
يعنى يخرب بيت الدقة العلمية !!!!!!

فان كان الراسل مسلم حسن النية
فيجب اعلامه انه يضر الدين لا ينفعه
وان كان الراسل صهيونيا او مغرضا
فيجب التحذير منه ومن تضليله للناس ونشره للاكاذيب بين البسطاء
للاضرار بالدين
ولاغراض اخرى اذكرها لاحقا ان شاء الله

والمعروف ان موريس بوكيه عمل على مومياء مرنبتاح او مرنفتاح !!!
وهو الفرعون التالى لرمسيس الثانى وابنه من نفر ايزيس وليس من نفرتارى كما هو معتقد

وموريس بوكيه لم يكن المسئول الاعلى عن المومياء
ولكن كان عضوا فى الفريق العلمى
ولم تخلص ابحاثه لنتيجة نهائية ابدا حول مرنبتاح وكونه فرعون الخروج
ومقولة ان مومياء مرنبتاح هى احسن المومياوات حالة هو محض كذبة علمية !!!

والمعروف ان موريس بوكيه كان الطبيب الخاص للملك فيصل ملك السعودية
واغدق عليه الاموال ليكتب هذا الكتاب ويكذب فيه هذه الكذبة
والتى عارضه فيها كل علماء عصره حتى الان حتى ان اثره العلمى انقطع
وضعفت مصداقيته واصبح لا يعتد بها
والملك فيصل مع طيبته وحسن نيته واحترامي لمواقفه السياسية فهو جاهل !!!

واساسا القول بان خروج اليهود كان فى عصر رمسيس او مرنبتاح هو خطأ تاريخى
لان هذا القول يعتمد على كرونولوجية التوراة المحرفة !!!
اي ان الموضوع به ايد صهيونية خفية !
وهى ما نقضه عالم المصريات جيم فيليبس
واللذى هو فى نفس الوقت متخصص فى الديانات القديمة
حيث يقول ان فرعون موسى هو احد ملوك الهكسوس
ويشاطره فى هذا الراى زاهى حواس كما ساذكر
وبالتحديد اخر ملوكهم قبل احمس

ومقولة ان موريس بوكاى سمع ان المسلمين يقولون انه فرعون موسى
دى برضه فبركة وكذبة كبيرة جدا
لانهم ما قالوش كده غير بعد ابحاثه وكتابه !!!
وهو اول من قال بذلك !!!

اما موضوع دخول موريس بوكاى فى الاسلام من اساسه فكذبة اخرى
لانهم سالوه صراحة فى محاضرة فى سوسة بتونس سنة 1977 ورد بالنفى
وسالوه مرة اخرى فى محاضرة فى فاس بالمغرب سنة 1983 وكان رده انه ما زال كاثوليكيا !!!

كان اجدر بالحمقى الى كتبوا الموضوع ده اظهار دقة القران فى التأريخ لمصر القديمة
لان فعلا القرآن الكريم ادق المصادر للتأريخ للفراعنة
وكرونولوجية القرآن متماشية تماما مع كرونولوجية تسلسل الاسرات الفرعونية
هل لاحظ احدكم ان فى عهد سيدنا يوسف كان من يحكم مصر اسمه العزيز او الملك !!!
واللى كان بيحكم مصر فى عهد موسى كان اسمه فرعون !!!
حد فيكم سأل نفسه ليه ؟؟؟
اقولكم انا ليه
كلمة فرعون ظهرت اول ما ظهرت فى عهد المملكة الحديثة
بداية من الاسرة الثامنة عشر
حتى استخدمت بشكل رسمى فى الاسرة 22
يعنى كلمة فرعون لم تظهر الا فى اخر عصور الفراعنة ثم عممها علماء المصريات على كل الملوك
وكلمة فرعون اصلها الهيروغليفى : بير عا
وبير عا معناها البيت الكبير او قصر الحكم

وبالربط القرانى مع التاريخ الفرعونى
نجد ان عزيز يوسف هو سيزوستريس الثالث
حيث ان فى عهده حدثت السبع سنوات العجاف بالفعل كما هو مكتوب في نصوص الفراعنة !!!
سبحان الله ...
تطابق هائل مع القرآن
ونجد ان الكرونولوجية التوراتية مجرد تهريج بجانب هذا !
وبالتالى يكون الارجح ان موسى ظهر فى عهد الهكسوس وليس الفراعنة المصريون
ولانه حسب التقويم التوراتى الخاطىء عاش فى عهد رمسيس ثم مرنبتاح
ولكن مومياء رمسيس تاكد انها لم تغرق !!!
وكذلك مرنبتاح يثبت التاريخ انه عاش ليصبح عجوزا فوق السبعين
وانجب سيتى الثانى !!!
ثم انه قام بفتوحات وصلت ليبيا وفلسطين كما تقول النصوص !!!!!

واللى مش مصدقنى يروح المتحف المصرى
ويسأل على حجر اسمه حجر اسرائيل !!!
لانه الحجر الوحيد اللى مذكور فيه اسم اسرائيل صراحة !!!
وهو حجر اسود مكتوب عليه 28 سطر يسمى انشودة النصر
وهو يمجد انتصارات مرنبتاح على الليبيين وشعوب البحر المتوسط ومنهم اسرائيل

وترجمة ما على الحجر بداية من السطر 26 كما يلى
واعذرونى لان الترجمة مش ترجمتى انا لانى بالتاكيد مش باعرف هيروغليفى :
" وانبطح كل الزعماء طالبين السلام ، ولم يعد أحد يرفع رأسه من بين التسعة ، وأمسكت التحنو ، وخاتي هدأت ، وأصيبت كنعان بكل أذى ، استسلمت عسقلون وأخذت جزر ، وينعم أصبحت كأن لم تكن "ويزريل" أقفر، ولم يعد له بذور ، وخارو أصبحت أرملة "

اكيد انتم ممكن تتعرفوا على بعض الاسماء زى كنعان وعسقلون اللى هى عسقلان دلوقتى
و شايفين يزريل دى هى بنو اسرائيل حيث يقول الحجر انهم اقفروا وانقطع نسلهم
ده معناه انتصار مرنبتاح عليهم فى فترة تالية لفترة موسى وانه ليس فرعون الخروج !!!

نيجى بقى لتفسير الاية بتاعة ننجيك ببدنك اللى العبقرى استخدمها لترويج كدبته
بحثت عن تفسير الاية فى ابن كثير والطبرى والقرطبى وابن عباس
وجدت التفسيرات تتراوح بين انه جثته هى اللى طفت والقاها البحر
او ان اللذى طفا فقط هو درعه حيث ان كلمة بدن كانت تعنى الدرع فى تلك الفترة
اما سبب التنجية فكانت كما ذكر ابن عباس وابن كثير ان بنو اسرائيل طلبوا من موسى ان يطلب من ربه تأكيدا على موت فرعون فاظهر لهم الله جثته او درعه ليطمأنوا
وليس معنى ذلك ان تصل جثته الينا او تكون مومياء او تكون فى المتحف او اى كلام من ده ...
لان الغرض كما هو واضح من التفسير هو ان يطمئن بنو اسرائيل !!!

كمان كنت زمان قريت للدكتور زاهى حواس انه قال ان موسى كان على عهد الهكسوس
وان لا رمسيس الثانى ولا مرنبتاح هم فرعون موسى
وان الكلام ده تهريج واسرائيليات لينالوا من حضارة الفراعنة
زى بالضبط لما بيقولوا ان اليهود هما اللى بنوا الاهرامات !!!
واظن محدش بيفهم فى المصريات قد دكتور زاهى حواس وعلى مستوى دولى كمان !!!

واللى عاوز يدور على موريس بوكاى فاسمه بالفرنساوى: Maurice Bucaille
علشان انا شفته مكتوب غلط فى حتت كتيرة
كمان كتابه اسمه الانجيل والقران والعلم
وتاكيدا لكلامى فيه طبعة سنة 1996 الانجليزية من دار نشر يملكها عربى فى لندن
موجود فى التعريف بالكاتب ما يلى :
Dr.Bucaille's study of scientific information in ******ures gave him
high regard for Qur'an and recognition of contradictions in Christian
******ures. Yet he remained a Christian, but deeply respectful of Islam.
An invaluable work!

يعنى ولا اسلم ولا يحزنون
فين المصداقية بقى ؟؟؟
فين الامانة العلمية ؟؟؟
وبلاش نضحك الناس علينا والنبى
زى ما قعدوا يقولوا نيل ارمسترونج سمع الاذان على القمر واسلم لما نزل على الارض !!!
والاخوة اللي ما يعرفوش احسنلهم يخليهم فى دينهم وبلاش يفتوا فى العلم كمان
ولو انى اشك اصلا ان العملية كلها مدسوسة من برة
كده اللي مش عارف ها يقول على الاسلام دين خرافات واشاعات
ودين بتاع ناس جهلاء
مع ان الاسلام اكثر دين حث على العلم والمعرفة
والقران ليس به اكثر من افلا تعلمون وافلا تعقلون وافلا تتذكرون وافلا تبصرون وافلا تتقكرون !!!
حث واضح على اعمال العقل والحواس والبحث العلمي والاستكشاف
لم يكن القرآن ابدا يحث على الجمود والنصوصية
وليس من الاسلام ان ننتظر مكتشفات الغرب وعلومه
ثم نعتلي احدى الشلت لنفلسف تلك المخترعات ونقول ان القران اول من تنبأ بها !!!
اين علمنا نحن ومكتشفاتنا نحن وحضارتنا نحن ؟؟؟
فالقران الكريم ليس كتاب للنبؤات !!!
ولا سيدنا محمد سيد الخلق هو نوستراداموس !!!

وها اشرحهالكم بشكل ظريف
نفترض مثلا واحد فاكره صاحبي
جه وقاللى الحق يا وائل ده الشمس بتطلع من الغرب
وحيث ان انا وائل بقى جاهل ولا املك المقومات العلمية للتاكد من المعلومة دى
فها تلاقينى داير زى العبيط على صحابى عمال اقولهم المعلومة الغلط دى
وصحابى بما انهم جهلة زى حالاتى كده ها يصدقوا
وفى النهاية صديقي المزعوم عمال يضحك عليا ويقول للناس مش قلتلكم وائل ده عبيط
وهو اصلا اللى اعطانى المعلومة الغلط دى علشان يخلى الناس تضحك عليا ...

وفى النهاية هاقتطف جزء من مقال للدكتور يوسف زيدان المتخصص فى التراث والمخطوطات:


فى الطابق الأعلى ، حيث قاعة المومياوات ، تأمَّلتُ أجسادَ فراعين مصـر العظام : سيتى ، رمسيـس الثانى ، مرنبتاح .. وغيرهم ، ولما أوشكتُ على الخروج من القاعة ، اقترب منى شابٌّ فى زىٍّ رسمى يميز موظفى المتحف ، همس فى أذنى بما نصه : هل تعرف هذا الفرعون ، إنه رمسيس الثانى ، فرعون موسى! أدهشتنى المعلومة ، وأدهشنى الموظِّف حين سألته عن المصدر الذى جلب منه هذه المعلومة السوداء ، فقال ما نصه : هذه حقيقةٌ علمية مؤكَّدة ! سألته عمن أكدها، قال : الأساتذة الكبار فى علم المصريات !
وهكذا يتم الترويج لمزاعم اليهود .. فى قلب القاهرة ، بل فى قلب التاريخ المصرى القديم الذى يصـرُّ يهود اليوم على تزييفه بمختلف السبل ؛ وهاهم يجدون منا ، وفى قلب قلعتنا الأثرية ، منْ يروِّج تزييفهم .. أفهمتُ الشابَّ المتحذلق ، الجاهل ، المرشد ، المدعى؛ أن ما يقوله: لا هو مطلوب منه أصلاً ولا هو علمى أصلاً ، ولا هو متفق عليه أصلاً .. والأصل فى الأمر أن اليهود ، حثالة مصـر القديمة ، يريدون اليوم أن يكسروا شوكة الاعتزاز المصرى بالتاريخ القديم ، بإحداث تناقض لدى معاصرينا بين انتمائهم التاريخى وانتمائهم الدينى .. هَزَّ الشاب كتفيه ! وخرجتُ أتأمَّل هذه الحالة ، التحتية ، من عدم الوعى بأثر المعلومة فى تأسيس الرؤى والتوجُّهات ، وعدم الانتباه إلى الدور الخطير الذى يمكن أن تلعبه معلومةٌ سوداء واحدة يتم الترويج لها

يا جماعة الاسلام مش محتاج ارمسترونج ولا بوكيه ولا ويل سميث ولا محمد على كلاى ولا تايسون ولا مايكل جاكسون!!!
الاسلام غنى بالعناصر العلمية المقنعة وحقائق التاريخ والاحكام الانسانية !!!
وده فى حد ذاته كفيل بالاقناع لذوى العقول
اما ذوى الاربع فما حوجتنا اليهم !!!

وارفعوا ايديكم عن الحضارة الفرعونية بقى !!!
ماهى كان فيها امراة فرعون ولقمان الحكيم وماشطة فرعون وسيدنا ادريس وغيرهم من الصالحين اللذين حكى عنهم القران !!!

كان لى صديق ربنا يهديه برضه سكينة الجهل سارقاه كده
وكنا بنتكلم عن طالبان لما كسروا تمثال بوذا بتاع باميان
فقام اسم النبى حارسه قاللى طب ماهو صح عندهم حق
مش احنا اللى حاطين تمثال فرعون موسى فى ميدان رمسيس !!!
يخرب بيت دى عقليات يعنى
كان بالاولى عمر بن الخطاب يأمر عمرو بن العاص بهدم تلك التماثيل والمعابد !!!
مش جاى الكتكوت الشركسى يفتى على اخر الزمان !!!
ربنا يهدى !!!

وائل عباس