الوعي المصري

الـتـهــمـة بـيــدون

صورة أرشيفية للمأسوف على شبابه - كنت لسه شاريه جديد ما بقاليش كام شهر لكن يظهر أخد عين جامدة - لاب توبي الذي يقبع في مكان ما في أحد مقرات مباحث أمن الدولة بعد أن قام دلاديل وحرامية ونصابين مصلحة الجمارك بمصادرته وسرقته بأوامر من خولات أمن الدولة بزعم عرضه على المصنفات الفنية في سابقة هي الأولى من نوعها في مصر ولم يسمع عنها أحد من قبل وعلى الرغم من ذلك تنفي المصنفات الفنية تلقيهم لجهازي من الجمارك نهائيا رغم مصادرته منذ حوالي شهرين بينما أخبرتنا مصادر داخلية موثوقة في جهاز الشرطة أن اللابتوب الآن في حوذة مباحث امن الدولة بالمخالفة للقوانين والدستور بإعتباره جهاز إتصال يحميه الدستور والقوانين التي تحظر التصنت والإطلاع على خصوصيات المواطنين وساهمت مصلحة الجمارك بدور قذر في هذه الجريمة

بقلم / ميادة مدحت

حجزوا الولد الاسمر
والتهمة بيدون
قال ايه كيبورده عنيد
وشاشاته بتمون
أفكار بلاد بره
وجمال بلاد بره
وفى شعبنا بيشحن

ليه يا ولد يا عنيد
بتثور على التقليد
وبتعشق الأصلى
وليه تقول اشاعات
عن عرشنا بالذات
عايز الشعوب تغلى؟

قال الولد الاسمر
معرفش حاجة يا بيه
إدينى لاب توبى
وسيبنى أمشى يا بيه
ده لو انت متربى

نظروله نظره شرار
وفتشوه ذاتى
فقالهم اقرار عليا وحياتى
لا عمرى كنت جاسوس
ولا كنت يوم مدسوس
لكن فضل محبوس
بينادى ويهاتى

واهو كل يوم ياخدوا
ف شباب بيتشون
فى السجن يتعبى
بالدم يتلون
ايه تهمتك يا ابنى
انا تهمتى مدون
ودى مين كمان ياختى؟
ظبطوها بتدون !
غور يا جحيم الظلم
ويا زمان .. دون