الوعي المصري

وزير الإتصالات يطلب مساعدة المفتش كرومبو

والله بقالي كتير ما هيستش وبالذات هنا عالوعي المصري
كله كآبة وتعذيب ومظاهرات وقرف
يا سبحان مين مصبركم عليا
لكن القعدة من غير إنترنت خلت الواحد يحاول يستعيد مواهبه في المسخرة شوية بعد ما صدت وتلحمت من كتر الركنة وإدعاء الجدية
بصوا بقى
بيقولك إيه يا سيدي

بيقولك وزير الإتصالات إتصل بالمفتش كرومبو علشان يعرف مين قص الكابل البحري بالمقص
قوم المفتش كرومبو حصر المشتبه فيهم في تلاتة
سكسوكة الحلاق - سوستة الترزي - فجلة الجنايني
لو عرفت الحل إتصل بالوعي المصري
بالمناسبة فجلة الجنايني ده شخصية من تأليف العبد لله
وبيقولك إيه كمان
داهمت قوات من مباحث أمن الدولة أمس بيت كل من سيد حبل الغسيل وبفتة المنجد
وذلك للإشتباه في حيازتهم مقصات بدون ترخيص
وبيقولك يا سيدي كمان

العثور على أدلة وقرائن جديدة تشير الى تورط المعلم حمبولة الجزار في قطع الإنترنت
والمعلم حمبولة قد يكون قد قام بذلك بدافع الإنتقام من الواد أشرف دوت كوم علشان سرق خروف العيد
يلا كفاية عليكم كده أحسن يطلعوا بايخين وتاخدوا فكرة مش قد كده عني
عموما لو شايفينهم بيضحكوا يبقى حق الملكية الفكرية وحق الأداء العلني محفوظين للوعي المصري
وعشان السرقة حرام مسموح بالنقل والإقتباس مع ذكر المصدر