الوعي المصري

عندما أدب شعب كفر الشيخ الشرطة التي فرت مذعورة

لقطتين فيديو بعتهملي مواطن وقاريء من كفر الشيخ
جرت الأحداث في أوائل شهر يوليو
والواقعة هي إن كان فيه حفل زفاف
وكعادة الشرطة في كل مكان إنها لازم تنكد على الناس بالذات لما يكون فيه فرح
وطبعا كلنا عارفين الشرطة بتروح الأفراح ليه ومش محتاج اوضح
ولا إنتم مش عارفين ؟؟؟
بس المرة دي الظابط الهمام محمد القاضي
وهو بالمناسبة ضابط مكروه جدا في كفر الشيخ بشهادة الأهالي
قرر يقبض على واحد من المعازيم وياخده رهينة إكمالا للتنكيد على الناس في فرحهم والتنكيل بهم لعدم الرضوخ له
وهنا بقى ومن المرات القليلة هب المواطنين في وجه الشرطة وفي وجه هذا الظلم والبلطجة وخلصوا الولد من براثن الشرطة وعجنوا العساكر والمخبرين والغفراء ضرب
لدرجة إن ضابطنا الهمام محمد القاضي أخد البوكس وفلسع وهرب بأقصى سرعة بدون حتى ما يحاول يدافع أو يخلص أو ينقذ اللي كانوا معاه من غضبة الأهالي
اللقطة اللي فوق بتصور هروب الظابط الشجيع محمد القاضي وتركه لرجال الشرطة للأهالي يطحنوهم ضرب كما ستشاهدون
إضغط هنا لتشاهد اللقطة الأولى

ودي اللقطة اللي بتبين رجال الشرطة وهما بيحاولوا القبض على شاب من معازيم الفرح
هي اللقطة بس مضلمة في الكام ثانية الأولانيين بس بعد كده بتوضح
بالمناسبة كل المشتحين على الأرض هم من رجال الشرطة والغفراء اللي الأهالي هما اللي بعد كده طلبولهم الإسعاف بعد هروب قائدهم المظفر محمد القاضي بيه
إضغط هنا لمشاهدة اللقطة الثانية
-
فيه ناس كتير بتبعتلي بتقول لي إنت مش بتدون اليومين دول ليه
بقالك فترة مش بتنشر جديد
وعلى العكس تماما
أنا موجود كل يوم
وكل يوم بانشر جديد على تويتر
ماهو ده نوع جديد من التدوين بالرسائل القصيرة برضه
لقراءة ما أنشره على تويتر أنظر العامود الأيمن للمدونة في الجزء الخاص بتويتر
يعني مثلا كتبت عن فيلم حسن ومرقص
وعن فيلم آسف على الإزعاج
وتابعت إعتقالات النشطاء في الإسكندرية
كله على تويتر
وتعالوا كل يوم
لأني بأنشر جديد كل يوم
-
الوعي المصري بتشكر كل القراء والمتفاعلين معاها
وكل اللي بيبعتولنا لقطات تبين أوجه الفساد في مصر
بس عزيزي القاريء تذكر دائما
سلامتك أهم من اللقطة