الوعي المصري

كارت الإنترنت الشقي من أمن الدولة للإتصالات
Egypt's Hotspots Now Under Surveillance

بعد إجبار كافيهات الإنترنت الفقايري على أخذ إسم ورقم بطاقة كل من يستخدم الإنترنت واجه جهاز مباحث أمن الدولة المجرم وإبنه غير الشرعي مباحث الإنترنت اللي للعبد لله ملف فيها - حتى بالأمارة ورق الملف لونه أزرق وما تسألونيش عرفت إزاي - واجه مشكلة جديدة وهي كافيهات أولاد الذوات اللي فيها واي فاي مفتوح زي اللي جنب الجامعة الأمريكية وفي المولات الكبيرة والزمالك واللي فيها الشباب بيروح ياخد اللابتوب ويقعد على الإنترنت
ويظهر الشباب ولاد الذوات الوحشين الأشقيا بقوا هما كمان بيشتغلوا في السياسة وبيستخدموا الإنترنت لأغراضهم الدنيئة دي
لكن طبعا مش ها يبقى شيك خالص إنك تخش ستارباكس أو سيلانترو أو بينوز أو كوستا أو بوتري أو وات إيفر كافيه فتلاقي جارسون بيقولك بطاقتك يا كابتشين
طب تعمل إيه يا عبرحيم يا أمني تعمل إيه يا عبرحيم يا أمني
ها نسيب الحبل على الغارب للعيال دي كده ولا إيه
مافيش كنترول
لازم نحزمه لازم نكتفه على رأي مرقص افندي في مسرحية حسن ومرقص وكوهين
أه
نقفل الواي فاي ونخليه بباسوورد
أوكيه قشطة فكرة كويسة بس مش حل برضه
وبعدين إنت عاوز الناس تفتكر إن إحنا عندنا حسن نيه وواثقين فيهم
لأن كده برضه مش ها نعرف مين اللي داخل ومين اللي خارج وإزاي ها تجبره إنه يعرف عن نفسه ماهو أي باسورد يستخدمها أي حد ويرمي الكارت وخلاص
لا بص بقى احنا ها نزود مرحلة في الموضوع
إيه هيا يابو مخ جهنمي
إن الباسوورد والتسجيل مش كفاية
أيوة يا حلو ده انت ها تعمل كونفيرميشان عن طريق ان تدينا رقم تليفون جنابك واحنا نبعتلك أكتيفيشان كود
وطبعا إنت زي الشاطر اجبرناك تسجل معلوماتك كاملة عن خط تليفونك المحمول ولا إنت نسيت لما هددنا بإيقاف أرقام المحمول اللي مالهاش معلومات
طبعا بكده إحنا عرفنا انت مين بالظبط وكمان ها نقدر نعرف انت دخلت انهو مواقع وعملت ايه فيها يا لئيم ماهو كل العملية دي أساسا لازم تحصل عن طريق بروكسي ومن وظايف البروكسي انه بيسجل الترافيك وكمان ممكن يتعمل - سنيف - لباكيتات الداتا بتاعة حضرتك
طبعا الكلام ده مش ها يفهمه غير الهاكرز بس ما علينا مافيش متسع للشرح
المهم إن العقلية الأمنية التوتاليتارية المترسخة من أيام المجرم المهزوم عبناصر لازم هي كمان تطور نفسها وتجاري العصر
ومش عاوز أي واحد إبن ميتين كلب يرد عليا ويبررلي هذه الخطوة الغير مبررة أصلا وإنها بحسن نية وأنه لا منظور أمني خلفها

إضغط هنا للتكبير
دي صفحة الواجهة اللي بتتفتحلك أول ما تخش على الواي فاي بتاع الكافيه وبتطلب منك تسجل أو تحط اليوزر نيم والباسوورد اللي إنت واخدهم

إضغط هنا للتكبير
طبعا علشان تسجل مطلوب منك معلومات إجبارية
إسمك
إيميلك
رقم تليفونك
تاريخ ميلادك
حاجات بسيطة خالص لازم تتعود إنك علشان تشرب كوباية قهوة وتشوف إيميلك تبلغها لمباحث أمن الدولة في بلد الحريات وأزهى عصور - من العصر والفعص - الديمقراطية

بعد كده بعد ما سيادتك زي الشطور الأمور إديتلهم رقم تليفونك ها يبعتولك كونفيرميشان كود على موبايلك برسالة إس إم إس مش ها تعرف تخش من غيره علشان يضمنوا إنك ما إديتلهمش رقم موبايل بلاستيك يا شقي فبلاش الحركات دي من الأول وخليك سلس

إضغط هنا للتكبير
وبتحط الكود في الصفحة دي

إضغط هنا للتكبير
وبعدين تدوس أكتيفيت

إضغط هنا للتكبير
ودلوقت إنت أكتيف
أكتيف تحت المراقبة يعني
شفتم إزاي العملية سهلة وبسيطة وزي شكة الدبوس
بدل ما تضيع وقتك في كلام فاضي وتدردش مع صحابك
وبدل ما تشرب الكابوتشينو سخن يلسع لسانك
تعمل الكام خطوة الظراف دول على ما يبرد
هو إنت يعني ها تروح الكافيه ليه غير علشان تتحط تحت المراقبة
هو إحنا عندنا أغلى ولا أهم من مباحث امن الدولة
وطز في وقت وخصوصية حضرتك