الوعي المصري

الواد بلال والبيه نظيف

ما سمعناش عن حاجة زي كده أيام عبد الناصر لأن النتيجة كانت معروفة ومش محتاج أوضحلكم
الراجل يعني أعدم خميس والبقري ودخل مصنع الشوربجي في إمبابة بالدبابات
يعني مافيش هزار في الحاجات دي
جه السادات
فكها شوية وساب الناس على راحتها
جرايد وأحزاب وسيما
أحلى أفلام الكرنك وإحنا بتوع الأوتوبيس وثرثرة فوق النيل
شوية حرية ما دامتش
ولأنه غير عبد الناصر فهو كان بيقعد مع الناس بجد بدون تنقية يعني لما يقعد مع طلبة بيقعد مع طلبة بجد مش بينقوله شوية معرصين
فقام عبد المنعم أبو الفتوح الطالب الإخواني وإداهومله على الهواء مباشرة
طبعا السادات زعق فيه شوية وخلصت على كده
لا الواد اتشنير ولا إتفرم زي ما الناس توقعت ولا مستقبله ضاع
وبقى دكتور قد الدنيا
الله يرحمك يا سادات
أما مبارك بقى زي ما عودنا لما قال ما تفتكرونيش زي اللي قبلي
لما بيقعد مع شباب الجامعات بيختاروله زينة شباب التعريص
والتلفزيون كده بيبقى بيلعلط من العيال اللي مصروف لها تيشرتات وترينجات
وكله بيمشي حسب الخطة المرسومة وإلا
لكن نظيف الغلبان يا عيني بتكون الإجراءات الأمنية أقل طبعا من الريس
ففلت منهم الواد بلال أبو لسان زالف
وبرضك إداهومله زي ما ها تشوفوا في الفيديو
لكن يا ترى بلال ها يكون مصيره إيه ومستقبله إزاي
هل ها يبقى الدكتور عبد المنعم ابو الفتوح تاني
ولا ها يشتغل بياع سريح
عموما زي ما قالت نوارة نجم
مالناش دعوة
الواد ده لازم ينجح حتى لو ما ذاكرش
وأي محاولة للمساس بيه إنتم أحرار
شاهد الفيديو
إضغط هنا
الفيديو من تصوير آدم طنطاوي
بلال على فكرة كان قاعد معايا على البورصة قبلها بالليل أنا والمدون أسد وعدد من الشباب
بس والنعمة ما - حرضته - ولا أي حاجة أحسن يتهموها فيا
ده هو اللي طالع كده شيطاني لوحده
وإنتم عارفين التحريض بقى جريمة اليومين دول وكل واحد لازم - يحرض - قصدي يحرّص على نفسه
المهم كان معايا سندوتش باكله وبلال قال لي هات حته وأنا حلقتله لأني كنت جعان جدا الصراحة
لكن لو كنت أعرف كنت إديته السندوتش كله حلال عليه
لكن معلش ملحوقة
ليك عندي سندوتش وبيبس كمان ياد مش خسارة فيك يا نجم