الوعي المصري

ممثل كوميدي إسرائيلي يسخر من مبارك

تحذير
الفيديو قد يحتوي لغة قد لا تناسب جميع الزوار - بذاءات يعني
-
ردح عروبجي وثنجي على أوربت

وصلة ردح بين كرم جبر وعبد الحليم قنديل
-
كيف يعبر المصريون الشارع
 
من تصوير سائح أجنبي
-
كاريكاتير له قصة

هذا الكاريكاتير لعمرو سليم
منعت جريدة الدستور نشر هذا الكاريكاتير
وبسبب هذا الكاريكاتير ترك عمرو سليم الجريدة
إقرأ مقابلة فيها الكثير من الأسرار مع عمرو سليم
وإقرأ كيف قبض المعينون في الجريدة مرتبهم خمستاشر جنيه في جريدة يفخر رئيس تحريرها أنها توزع أكثر من مائة ألف نسخة
كما تهنيء الوعي المصري عبير العسكري لفوزها بجائزة حرية الصحافة الدولية
-
مين تاني صلاحيته إنتهت

الحكومة تبحث الغاء تراخيص السيارات موديلات 1980 وما قبلها في تحيز واضح للاغنياء والقرار في حالة صدوره سيحكم بالاعدام على 300 الف سيارة في القاهرة الكبرى وحدها
وحول هذا الموضوع جرت مناقشة طريفة بين مجموعة من الأصدقاء
فسأل أحدهم إشمعنى يعني موديل 1980 ومش موديل 1981
طبعا أنا مش ها اكمل لكم المناقشة إستمرت إزاي
بس إفتكروا إنتم 1981 حصل فيها إيه
وإنتم ها تعرفوا على طول المناقشة خدت أنهو إتجاه
وليه فعلا الحكومة إختارت ما قبل موديل 1980
مش 1981
والحدق يفهم
في إنتظار ردودكم
-
قمع البوليس النسواني في إيران
وسلام كبير أوي للمدون أحمدي نجاد
حبيب القومجية واليساريين





شفنا مناظر زي دي في القاهرة
في ميدان الاسعاف
عندنا رجالة هما اللي بيسحلوا النسوان
بس المرة دي نسوان في بعض

الولية دي شكلها مدير أمن طهران



-
هو أنا بقيت مايكل جاكسون

فيه إيه يا جدعان
هو أنا بقيت مايكل جاكسون خلاص ومشهور كده علشان كل الإشاعات دي تستهدفني
وبعدين الناس تتصل بيا علشان تتأكد من صحة الإشاعة ؟؟؟
بتتصلوا بيا ليه يا جدعان؟؟؟
كل حاجة عني معروفة!!!
ما تصدقوش غير اللي بأنشره على الوعي المصري واللي بأبعته في الإيميلات كل يوم
الموضوع أبسط من كده !!!
أنا مش من كام يوم نشرت تحذير إن ده بيحصل !!!
محدش بيسمع الكلام ليه !!!
وانا مش بأدخل أعلق في أي مواقع ولا مدونات خالص ولو كنت بأعمل كده فأنا بطلت !!!
أسخف تليفون جالي النهاردة واحدة بتسالني هو إنت صحيح غيرت ديانتك وبقيت مسيحي كاثوليكي ؟؟؟
وناس إمبارح في وسط البلد بتعزيني علشان أبويا مات وانا ما أعرفش !!!
أه والله مع إني لسه سايبه في البيت النهاردة الصبح !!! سبحان الله !!!
وواحد بيهنيني علشان كسبت جايزة كريستيان ساينس مونيتور لأحسن مصور من العالم الثالث
مع إن على حد علمي مافيش جايزة إسمها كده أساسا !!!
ولا فيه حد من كريستيان ساينس مونيتور عبر أهلي ولا إتصل بيا يعني !!!
وقبل كده حد معلق بإسمي بيشتم الإخوان
ما انا لو عاوز أشتم الاخوان ما أنا شتمتهم لما شبعت زمان!!!
دلوقت بانتقدهم بس وبانشر النقد ده على الوعي المصري على عينك يا تاجر
عندي موقعي بحاله أبرطع فيه
إيه يزنقني اروح أشتم الناس في التعليقات عند ناس تانية يعني !!!
وواحد تاني بيدعو باسمى لمظاهرة لحرق القران في ميدان التحرير!!!!!!
وبعدين يرجع يرد على نفسه ويقول هو وائل ملحد آه بس ما يعملش كده !!!!!!
قال يعني فيه حوار والناس بتتفاعل معاه !!!
وواحد بيكتب باسمي على اني مسيحي بروتستانتي
وواحد بيشتم في الاسلام باسمي
الظاهرة دي ابتدت على الضيق في المدونات في التعليقات والتشات بوكسيز
دلوقتي انتقلت للمواقع الاخبارية ومواقع اقباط المهجر
زي العربية وايلاف وعشرينات والاقباط المتحدون
وناس باعتالي بتهنيني على اعتناق المسيحية وبتشكر دفاعي عن حقوق الاقباط !!!
اللي ناقص يبقى عندي مزرعة زي مايكل جاكسون
ويقولوا اني بانام في غرفة اكسجين
ومربي قرود
وحد يتهمني بالتحرش الجنسي باطفاله
واني عامل مقام لستنا اليزابيث تايلور في بيتي !!!
واتجوز بنت الفيس بريسلي !!!
ايه الهبل ده !!!
قد كده فيه حد او ناس متضايقة مني وعاوزة تشوه صورتي وتكسبني عداوات !!!
ربنا يشفي كل مريض !!!
والهي اللي بيعمل كده يجيله حمى الوادي المتصدع علشان ما يصدعناش تاني !!!
وياريت الناس تعقل بقى
ولما ابويا يموت هابقى أقولكم !!! وهاعمل صوان واجيب مقريء يقرا القرآن مش يحرقه علشان أنا لسه مسلم ومؤمن زي بالضبط كده الرئيس المؤمن اللي إنتم عارفين إني باحبه !!!
إيه القرف ده !!!
وائل عباس
وصلة متعلقة بنفس الموضوع على موقع عشرينات ولاد البلد
وائل عباس : ربنا يسامحكم
-
ليه اللي يقول مبارك إستمرار للسادات يبقى حمار بودنين

كاريكاتير رفعه متظاهرون ضد كامب ديفيد في إسرائيل
فكرته أن السادات خدع إسرائيل وأخذ الارض والموارد منهم
رسالة إلى شاب ضال أضله مرتزقة السياسة في مصر
أحمد يا حبيبي
ما تستعجلش
لما تكبر ها تفهم
والسادات مش مستني كلمة تريقة من بقك علشان يبقى شهيد !!!
واللي بيقول إن مبارك إستمرار للسادات مغفل
وهم كتير بالمناسبة من اللي حادفين شمال على دنيا مش ها ترجع تاني وناس ماتت مش ها تصحى مهما اتمسحوا في حديد قبرهم اللي في كوبري القبة
بس أنا مش باطلع الكلمة دي قدامهم
علشان الكلمة دي بتطلع للغاليين بس !!!
وانت غالي يا حمادة
ماهو إنت لو عشت في مصر بداية الثمانينات كنت عرفت الفرق
لو كنت لبست بنطلونات لي كوبر ورانجلر كنت عرفت
لو كنت لبست كوتشي وجازيل وباتا ام نعل بيفك كنت عرفت
لو كنت قضيت رمضان من غير ياميش لان مبارك حظره زي المخدرات كنت عرفت
لكن انتم يظهر كنتم في الخليج وكنتم بتجيبوا ياميشكم معاكم
على الاقل الانفتاح كان للناس الصغيرة والتجار الغلابة بتوع الشنطة وبمبوطية بورسعيد
والنشالين والحرامية والهجامة اللي تابوا واشتغلوا شغلة شريفة بدل اللي كانوا فيه
ولو ان اكتر ناس استفادت هم الفلسطينيين زي بتوع شارع الشواربي
كان كله بياكل عيش وفاتح بيوت
اللي جاب تاكسي واللي جاب سوزوكي واللي جاب عربية كشري
خارجين من حرب بناكل تراب ومحدش سأل في ميتين أبونا من حبايبك بتوع الخليج
وناس متهجرة
ونسوة مصريات شريفات اشتغلن في الحرام علشان يصرفوا على عوايلهم
ومدن خربت عاوزة تتعمر
ومافيش اقتصاد اصلا علشان يتخرب زي ما بيقول الاونطجية المهزومين
كان لازم كل ده يستنى علشان يسار السبعينات السوفيتي القابض بالروبل الحلو يبنى البلد على كيفه !!!
اليسار اللي فلقس لعبد الناصر في 1964 لو تفتكر
لكن هما كانوا فاضيين أصلا
كفاية عليهم زياراتهم للسفارة السوفيتية ورا الشيراتون المصورة بالفيديو وتنفيذ أوامر المخابرات السوفيتية لتخريب مصر السادات بنت الكلب اللي خرجت عن طوعهم وحدفت على أمريكا
إشي إنتفاضات وإشي فتنة طائفية من أجل عيون الثورة الحمراء القادمة في مصر
مصر كان لازم تكون عبرة لكل دولة تخرج عن طوع السوفيت
...
لكن معلش نرجع تاني لمصر مبارك
مصر مبارك الثمانينات اللي قفلها على احتكارات لكام نفر من الكبار بقت البلد بتاعتهم
محدش بيشتري جزمة ولا بنطلون ولا تلفزيون الا من عندهم
خمسين مليون - تعدادنا ساعتها تقريبا - تحت امرهم
وساءت جودة الصناعة المصرية لانه كده كده بتتباع والسوق مافيهوش منافس
وهما اغتنوا وتوحشوا واصبحوا الان وزراء وفي لجنة السياسات
مبارك امتداد للسادات ؟؟؟
ليه ما اتقالش الكلام ده من خمسة وعشرين سنة ؟؟؟
كان اولى اللي خرجوا من معتقلات سبتمبر قالوهاله بدل ما قعدوا معاه زي المعرصين وطلعوا في التلفزيون بيسلموا عليه وبيهنوه انه انقذهم من السادات الكخة !!!
ولسه فاكرين دلوقتي يعارضوه !!!
بعد خمسة وعشرين سنة نايمين في العسل !!!
صراحة ما كانش في البلد غير حزب الوفد هو اللي بيعارض بقيقي في جرناله والعصفورة وجمال بدوي وشوية يساريين وناصريين هبل عملوا تنظيم مسلح يتعد اعضاؤه على صوابع اليد وإرهابيين إسلامانجية عملوا جمهوريات وامارات في امبابة واسيوط بيموتوا عيال المدارس والسياح الأجانب والاخوان كانوا بيلمولهم فلوس !!!
شفت بقى ...
دي كانت مصر مبارك
ثمانينات وتسعينات
أما إحنا بتوع دلوقتي فبنلعب في الوقت الضايع
ودلوقتي ...
ومن كام يوم واحنا في عصر الخمسين الف معتقل
في عصر مبارك
جايين يحتفلوا باعتقالات سبتمبر بتاعة السادات
ويعملوا قعدة عواجيز معرصة في نقابة الصحفيين
وكل اللي عنده كلمة حازقاه في طيزة عن السادات قالها
بس ما هياش جدعنة ولا وطنية ولا شجاعة يعني
ليس شجاعا الكلب الذي ينبح على جثة الأسد
يروحوا ينبحوا على مبارك بدل ما باعوا الشباب اللي اعتقل بسببهم ودخلوا هما جحورهم الحزبية والتنظيمية وخربوا الحركات اللي كانت شغالة ووطوا سقفهم تاني ورجعوا لمرحلة الصفر
افتكرت قعدة عواجيز تانية ضمت جيلين
ناس من اللي اعتقلوا في سبتمبر
وناس من اللي اعتقلوا في لمة 1959
قعد بتوع سبتمبر يحكوا نضالهم الأونطة ويفتخروا ... قامت واحدة شيوعية عجوزة من بتوع 1959 شاخرالهم وقالتلهم بالحرف اللي اتحبس ايام السادات ده كان بيتفسح !!!
واتوقع نفس الشخرة من معتقلي مبارك لمعتقلي سبتمبر أيضا !!!
ربنا يكون في عوننا من المعرصين
عاوزين نغيرها على نضافة بقى
الله يرحمك يا تلمساني
على الأقل كان حكيم مش خروف بينطح !!!
وائل عباس
-
هيكل أبو شرايط

مصطفى بيه أمين مـــات
وعلي بيه أمين مـــات
والإنجليز اللي حطوا أجهزة التصنت مـــاتوا
والملك فاروق مـــات
والبكباشي جمال عبد الناصر اللي كان بيحب يسمع الشرايط المسلية مـــات
والرئيس المؤمن أنور السادات اللي حرق الشرايط المسلية مات
والنحاس باشا مـــات
وكان في جيبه 36 جنيه
ومراته زينب هانم الوكيل مـــاتت
وفؤاد باشا سراج الدين مـــات
ومراته برضه مـــاتت
ورسام الكاريكاتير بتاع روزاليوسف اللي رسم زينب هانم ماسكة الحمامة مات
ومحدش عرف حمامة مين أكبر من حمامة مين
ومحدش قبض عليه ولا حطه في المعتقل
مع إن أفلام الخمسينات فهمتنا إن البوليس السياسي أو القلم المخصوص ما يعرفش ابوه
ووقفوا الفيلم وولعوا نور الصالة 
ومدير السينما مات والظابط مات ومدير الأمن مات والمحافظ مات
والست التخينة اللي راكبة حصان ماتت
وعادل إمام طلع بيعيط علشان الجزمة ضيقة ...
وهيكل أبو الشرايط عنده شرايط
بيتهيألي زينب هانم الوكيل بتقول فيها ان النحاس باشا ما بيعرفش
وعلشان ما بيعرفش وقع اتفاقية 1936
وإحتمال كمان إنها بتنام مع فؤاد باشا سراج الدين
وعلشان كده مكرم عبيد اتحلقله في حزب الوفد
والشرايط دي بقالها خمسين سنة عند أونكل هيكل
جاي دلوقتي على الجزيرة يقول إنها عنده
جاي يقول دلوقت على الجزيرة ها يعدمها
بعد أن مات كل من يستطيع أن يقول هيكل صادق أو كذاب
وعدم وجود دليل يثبت أو ينفي وجود الشرائط من أساسه
وبعض القومجنجية زعلانين وعاوزين هيكل يذيع الشرايط
ده على أساس إننا كلنا طبعا عارفين صوت زينب هانم الوكيل المميز
وعاوز تذيع ما تذيع ... عاوز تذيع ما تذيع ... وإيييييه
قد إيه يا هيكل إنت عظيم وعميق !!!
ياخي أحه !!!
إرحموا دين أبونا وموتوا بقى بجد وخدوا سنسن الطيار معاكم !!!
-
ناصر والسوفيت وتعريف جديد لخيانة وبيع مصر

صورة أرشيفية من قاعدة حلوان الجوية منتصف الستينات
هل كان طرد الخبراء السوفيت غلطة ؟؟؟
هل سمعتم عن الطائرة حلوان إتش إيه 300 بي ؟؟؟
لماذا شارك فرانكو ديكتاتور أسبانيا في دعم المشروع ؟؟؟
ولماذا أوقف دعمه ؟؟؟
هل صحيح ان المهندسون المصريون نجحوا في جعل الطائرة مستقرة وهو ما فشل فيه الاسبان ؟؟؟

النسخة الأسبانية من الطائرة
كيف شارك في المشروع المهندس الألماني ويلي ميسر شميت ؟؟؟
عارفين يعني إيه ميسر شميت ؟؟؟
يعني طيارات الميسر شميت اللي كان هتلر خارب بيها أوروبا ومحدش عارف يوقفه !!!
ميسر شميت يعني أشهر مهندس ومصمم طائرات في العالم !!!

أحد الطائرات الميسر شميت
كيف شارك في المشروع كمان مصمم المحركات النفاثة النمساوي فيرديناند براندينر ؟؟؟
وعمل للطيارة محرك تيربو جيت !!!
مولت الهند المشروع لانها ارادت محرك لطائرتها الماروت !!!
وكانت كل التجارب تجري في مصر
مشروع اتكلف 150 مليون جنيه مصري في الستينات لما كان الجنيه بيتفك دولارات !!!
لماذا يتم ايقافه؟؟؟
ولماذا استمات السوفيت في وقف المشروع ؟؟؟
ولماذا أغرقوا مصر بطائرات الميج ؟؟؟
ليه لما كانت مكنة تعطل في حلوان العامل او المهندس المصري ياخد جزا ويمكن يترفد لو حاول يصلحها ؟؟؟
كان لازم المكنة تفضل واقفة لحد الخبير الروسي ما ييجي من بيته في مدينة نصر ؟؟؟
كيف مات خبراء الصواريخ النازيون الذين فروا الى مصر مسمومين في فيلتهم بشارع الهرم ؟؟؟
ومين قتلهم ؟؟؟
إسرائيل ؟؟؟
ولا الإتحاد السوفيتي !!!
عارفين يعني ايه خبراء صواريخ نازيون ؟؟؟
يعني البليتزكريج
يعني لندن لما هتلر كحرطها وفحتها صواريخ
يعني أول صواريخ عابرة للقارات
يعني V1
يعني V2
يعني الصواريخ اللي دخلت بيهم أمريكا عصر الفضاء وحرب الكواكب

صاروخ V2 في أحد القواعد الألمانية أثناء الحرب العالمية الثانية
ولماذا رضخ لهم ناصر ؟؟؟
ولماذا أوقف المشروع في 1969 ؟؟؟
وأصبح عند الهند طائرة ماروت سوبر سونيك جيل تالت في 1969 !!!
وأصبح الهند عندها وعندها وعندها ... ...

الماروت الهندية
وإحنا أصبح معندناش ومعندناش ومعندناش ... ...
رجاء تصحيح مفهومنا للعمالة والخيانة
-
ثورة الفاتح والغامق والشفتشي

لم أستطع منع نفسي من الإنقلاب على ظهري والتدحرج على البلاط والدبدبة والترفيص من كتر الضحك وأنا أقرأ مقال محسن صالح على جريدة السفير يوم التاسع من سبتمبر والمقال عادي جدا من نوعية المقالات الحنجورية القومجنجية العروبجية الشعاراتجية اللي اتعودنا عليها من نوعية مقالات جرائد المخابرات العربية والصهيونية التي تصدر من لندن ليزايد بها الحكام العرب بعضهم على بعض والتي أصبحت مصدر دخل وفتح بيوت لكثير من الصحفيين العواطلية ولا جديد ولا مفيد فيها.
فالكاتب المحترم الذي يستخدم ألفاظ من عينة إبستيمة الوعي والتماهي وفرانسيس بيكون ونيتشه والنيرفانا ... تعامل مع مصطلح ستوكهولم سيندروم تارة على إنه عقدة إكتشفها عالم النفس الخواجة ستوكهولم إبن الخواجة سيندروم وتارة على إن ستوكهولم ده كان من نزلاء السرايا الصفرا بالعباسية كان عنده حالة نفسية نادرة إتسمت بإسمه !!!
لو كان تعب نفسه شوية قبل ما يتفلسف ويتفزلك ويتحذلق علينا ويعمل مثقف كان عرف إن ستوكهولم دي هي ستوكهولم أو شتوكهولم اللي في السويد وإن معنى كلمة سيندروم هو ظاهرة أو عقدة أو عارض.
بدأ إستخدام المصطلح عام 1973 عندما تمت سرقة بنك كريديتبانكين في نورمالشتورج في مدينة ستوكهولم حيث اتخذ اللصوص موظفي البنك رهائن لعدة أيام حدث خلالها تعاطف من المخطوفين تجاه خاطفيهم حتى أنهم دافعوا عن الخاطفين بعد إنتهاء المحنة في المحكمة وإتهموا الشرطة بأنها كانت الخطر الوحيد على حياتهم.
ومخترع المصطلح هو عالم النفس السويدي المتخصص في علم الإجرام نيلز بيجيروت أو بيئيروت وهناك إسم آخر خاطيء للمصطلح وهو هيلسينكي سيندروم والتسمية الخاطئة نتجت عن فيلم داي هارد لبروس ويليز.
أشهر مثال لهذا العارض هي قصة الفتاة الثرية باتي هيرست التي إختطفتها مجموعة إرهابية أمريكية كانت شهيرة في أوائل السبعينات تسمى جيش التحرير السيمبيونيزي وبعد إختطافها بشهرين ساعدت باتي هيرست المجموعة الإرهابية في سرقة بنك !!! وقد تناولت السينما الغربية هذه الظاهرة في عدة أفلام وحتى السينما المصرية في فيلم الإرهاب والكباب لعادل إمام.
الأستاذ محسن صالح ممكن تخبرني وماذا عن إختطاف شعوب بأكملها تحت مسميات ثورة يوليو المجيدة وثورة تموز المجيدة وثورة أكتوبر العظمى والثورة الثقافية والثورة الزوتشية وثورة سونكون والثورة الإسلامية وثورة البعث وثورة آذار وثورة اليمن وثورة الفاتح وثورة الغامق وثورة الكاروهات وثورة الشفتشي اللي جابتلنا حكام داقين عصافير ونجوم وسيوف على أكتافهم أو ملالي داقين عمم على رؤوسهم وذقون على خلقهم.
قد أتفهم موقف صحفيو البترودولار في لندن من عبادة وتاليه الأفراد من خاطفي الشعوب كعبد الناصر وصدام حسين والأسد والقذافي واسامة بن لادن والزرقاوي ومحاولاتهم لنفخ وخلق طواغيت من آخرين مؤخرا كحسن نصر الله لأن ده أكل عيشهم اللي إتعودوا عليه منذ عقود ... لكن يظهر السبوبة لمت وكل من هب ودب بقى ياكل عيش.
ولقد تحدثت أنت عن – البعض – من المخطوفين من قبل أمريكا ومشروعها ولكن ماذا عن – الباقي – المخطوفين بالماضي الحنجوري عديم المنجزات الذي أضاع أكثر مما أكسب والمسيطرين على إعلام الشعوب من صحف وفضائيات حتى الآن ولا دور لهم الا توطيد ركائز الحكم الديكتاتوري في المنطقة الذي يستمد شرعيته من ما يسمى ظلما وعدوانا ثورات ... لسه ما جاش وقتهم للعلاج ؟؟؟
مش كفاية بقى مقالات مملة ومتشابهة وموحدة المحتوى على الرغم من إختلاف كتابها ... مقالات إسطمبة واحدة ومكتوبة بمعايير واحدة ... إما تتحدث عن عظمة قادة الماضي المهزومين وعظمة تياراتهم السياسية أو تتحدث عن خيانة وعمالة كتاب آخرين وقد تكون فقط تصفية حسابات وتشويه واغتيال معنوي بأوامر مخابراتية وهي في النهاية مقالات لا تغني ولا تسمن من جوع ولا تفيد شعوب مقموعة جائعة الا في مسح مؤخراتهم الهزيلة من بقايا هضم الخبز الجاف على عكس مؤخرات حكامهم السمينة ممن يدفعون لتستمر تلك الثقافة الحنجورية الفاشلة المهزومة حية وكذلك هم وانظمتهم ومن يرثهم من بعدهم.
وائل عباس
-
أنا كمان باعترض بقى

رسائل بالانسحاب من جماعة مصريين ضد التمييز
مغرقاني في ايميلي الخاص من ناس ما اعرفهاش
ومغرقة الجروبات البريدية اللي باشرف عليها
حبيت اقول للمنسحبين انا معاكم
بس ها ازود كمان
انا كمان باعترض
باعترض على وجود اشخاص ينتمون لتيار اضطهد اليهود في مصر
وصادر اموالهم واملاكهم
ودفعهم اما للهجرة الى الكيان الصهيوني
او الهجرة الى امريكا واوروبا وامريكا اللاتينية
وقدم خدمة مجانية للكيان الصهيوني
وجعل من فشل عملية سوزانا نجاح يفوق نجاح نقل يهود الفلاشا من الحبشة
ولا هما اليهود دول ما كانوش مصريين ؟؟؟
وما كانش لهم حقوق كمصريين ؟؟؟
اظن كلام ما يزعلش بقى طالما هي كده !!!
-
رسالة من قارئة أردنية

صباح الخير وائل
اليوم كان اول مرة بدخل فيها على موقع الوعي المصري ، في اشي عن جد استغربت لما شفته و هو الفيديو الموجود عن الشرطة و شو بتعمل بالشعب ، هلأ انا مو قصدي انه ما في هيك عندنا و انه احنا ما شاء الله عايشين و الشرطة بتحمينا بالعكس احنا عندنا بلاوي سودة مخبية بس الي استغربته انه كيف صار التصوير ؟؟ لانه الي بعرفه و عن اكتر من تجربة انه الواحد مجرد ما يدخل المغفر (قسم الشرطة) بتعزل من كل شي يا دوب يبقى لابس اواعيه كيف صار التصوير ؟؟ بس خطر ببالي انه ممكن يكونو بصورو بعض و هم بعذبوا لاناس كنوع من المفخرة و انه شوفوني شو بعمل بالناس و هالشي انتشر . مش عارفة قلت بما انه انت رئيس التحرير قلت اكيد بتعرف عن الطريقة.
الله يعطيكم العافية و خليني اقولك اشي مهم انه لولا المدونات و المجموعات الي على الانترنت احنا ما كنا عرفنا انه بمصر فيه هيك اشي او ما عرفنا عن الاحداث الي صارت وقت نادي القضاة لانه على التلفزيون و الاخبار كنا نسمع اشياء بسيطة ، بنعرف انه كل الحكام العرب ولاد كلب و ما بسووا صرماية عتيقة بس ما بعرف كان عندنا شعور انه المصريين مرتاحين نوعا ما مع حاكمهم .
انا حزنت على البنت يا حرام .. رجعتني اربع سنين من عمري لما اكلت علقة سخنة متلها بس انا اكلتها ببسطار جيشي اصلي ، اكيد كان قياسه 49 او 50 لانه لهلأ بعاني من الاثار .
سلام من عمان
نادين
-
رشح الوعي المصري لجائزة دويتشه فيله


ولو كسبنا ها تكسب إنت كمان معانا جهاز
Apple iPod Video

للترشيح بالعربية إضغط هنا
للترشيح بالإنجليزية إضغط هنا
كيف تقوم بترشيحنا

إضغط هنا لتكبير الصورة التوضيحية
-
دعاء من كان على سفر
للمصريين فقط

منه لله الذي خَسَّر لنا هذا وما كنا له منتخبون، وإنا إلى ربنا لمشتكون..
اللهم باعد بيننا وبين القطارات والعبارات كما باعدت بين المشرقين..
اللهم جنبنا القطارات والعبارات كما جنبت خليلك إبراهيم الاحتراق في قلب النار وكما جنبت نبيك يونس الاختناق في بطن الحوت..
اللهم أنت الشاهد في الكارثة والخليفة في الأهل و المال والولد..اللهم هون علينا حادثنا هذا وخفف علينا وطئه..
اللهم اجعلنا من الجرحى ولا تجعلنا من القتلى..
اللهم اكفنا شر جزرة لا تنفع وضومان لا يرفع وقبطان لا يسمع ومحولجي لا يدفع وسيمافور لا يقرع، ونسألك من العبارات ما لا يغرق ومن القطارات ما لا يحرق ومن التعويضات ما لا يسرق..
اللهم إن قضت مشيئتك علينا ركوب القطارات أو العبارات فاجعلنا من ركاب العبارات ولا تجعلنا من ركاب القطارات، واقسم لنا تعويضات العبارات واجعلنا من ضحايا هيئة السلامة البحرية ولا تذلنا لتعويضات القطارات ولا تجعلنا من ضحايا هيئة السكك الحديدية ..
وآخر دعوانا أن حسبنا الله ونعم الوكيل..
طارق جابر
-
قطار الأحزان
بقلم
م - رءوف أباظة

يا مجبل يوم وليله من مصر للصعيد
وشايل الف عيله 
والدنيا ف جو عيد
شايل معاك أماني
 وأبسط شكل لأغاني
وناس مش راجعه تاني
 إلا ف يوم الوعيد
  يا مجبل يوم وليله من مصر للصعيد  
عربياتك فجيره وركابك غلابه
وعيون مليانه حيره وسؤال مالهوش إجابه
والعيد داخل عليهم و مروحين بعيد
  يا مجبل يوم وليله من مصر للصعيد
 جمعوا فرحه قليله 
 وإيدين ما فيهاشي حيله
و حمول والله تَجيله
 تشيب شعر الوليد
  يا مجبل يوم وليله من مصر للصعيد
  حمول مافيهاش هدايا 
دي حمول من الهموم
الستر فيها غايه
 والثانيه بألف يوم
شايلاها جلوب بسيطه
 ياللي جلبك حديد
  يا مجبل يوم وليله من مصرللصعيد
  عشرات ع الأرض جاعده
 وعشرات فوج الرفوف
وعشرات على دِكه جــامده
 حكمت بيها الظروف
وانتا واخدهم وسارح 
على سكه من حديد
  يامجبل يوم وليله من مصر للصعيد
  الليل داخل عليهم
 والكل معاك ضيوفك
ولا شمعة تضوي ليهم
 والضلمه ماليه جوفك
مفتوح من كل ناحيه
 والبرد يا بوووووي شديد
  يا مجبل يوم وليله من مصر للصعيد
  وعشان ما البلوه تكمل
 وتزيد بنا الإحزان
فيك نار ولًعها مهمل 
إتحولت لنيران
كَلِت لحم الغلابه 
وصهرت فيك الحديد
يامجبل يوم وليله من مصر للصعيد
  ساعات والنار تاكلهم 
وانت واخدهم وطاير
ولاحدش جام يجيرهم
 ولا يطَفي السعاير
العار دا يكون مصيرهم
 بعد العمر المديد
يا مجبل يوم وليله من مصر للصعيد
  الدنيا بحالها قامت
 إلا اللي مشغالينك
إذاعاتها علينا لامت
 الندل اللي ما صانك
لوكانت أرواحنا غالية
 كنت إنت بقيت جديد
  يا مجبل يوم وليله من مصر للصعيد
  يامجبل يوم وليله
 مانتاش آخر البلاوي
دي حكايه بقت طويله
 في عليل ومالوش مداوي
  ويا شعب انت الضحيه واللي ناهبك سعيد
يا مجبل يوم وليله من مصر للصعيد
  مسئول يطلع يقوللك
 اسفين وعيوننا دامعه
ويشوف يوماتي ذٌلَك
 وبرضه واكلها والعه
أنا باتمنى اللي جوا
 كان يبقى المستفيد
وإن الغلابه تسلم
 والشر يكون بعيد
  يا مجبل يوم وليله من مصر للصعيد
  طلع النهار أبكم
 والوقفه في عرفة
مليون سؤال يلطم 
يا حكومة مش شايفه
على مين ياناس نحكم؟
ع العبد واللا السيد
  يا مجبل يوم وليله من مصر للصعيد
  يا بهيه دواكي فيكي
 ورجالك مش قليل
وإن طال الليل عليكي..
مايطولشي عليكي ليل
بكره السعد يوافيكي
 والفجر أبو يوم جديد
يا مجبل يوم وليله من مصر للصعيد 
-
حكمة الوعي المصري

حكمة 1
لن يرضى عنك الناصريون والقومجية حتى تتبع ملتهم
حكمة 2
لو كان ليك صاحب ناصري لا تشاركه في حركة ولا تناسبه في جبهة
حكمة 3
الناصري زي الشريك المخالف
الشرح
يدخل كفاية يلطع بصمته في البيان التأسيسي عن عروبة مصر ورفض كامب ديفيد
وعلى الرغم ان مش كل اعضاء كفاية موافقين على البيان التاسيسي
يجيلك عبد الحليم قنديل في الديلي ستار يقولك مافيش عضو في كفاية مش موافق على إلغاء كامب ديفيد
راجع الديلي ستار
وفي المظاهرات عاوز يهتف شعاراته ويرفع صور زعيمه
يدخل مصريين ضد التميز يبتز اللي عاملينها ويتشرط عليهم مين يبقى عضو ومين ما يبقاش وفي الآخر ينسحبوا
بيغيروا الدستور علشان جمال يورث والناصريين لسه بيدوروا على كامب ديفيد
ياخي احه على دي معارصة
-
آخر تحديث لهذا العدد تم بتاريخ
Monday, 11 September, 2006 06:45:55 AM