الوعي المصري

جنازة الأستاذ أحمد نبيل الهلالي
الملقب بقديس الشيوعيين في مصر



السيارة التي حملت النعش

النعش في طريقه لمسجد عمر مكرم

داخل المسجد























الحلوين رغم إنها جنازة كانوا واقفين على الرصيف التاني
وأنا بعدي الشارع سامع واحد فيهم بيتكلم في اللاسلكي وبيقول أيوة يا فندم أربعين واحد واقفين بره الجامع مش عارف يعني مستني الطرف التاني على اللاسلكي يقول له إيه مثلا؟ يقول له ده تجمهر يا روح أمك إنت إزاي سايبهم يللا أقبض عليهم؟







ولو سألتهم بتعملوا إيه ها يقولولك بنحمي الجنازة مش عارف ها يحموها من إيه من الإخوان مثلا؟ ده حتى مهدي عاكف بيصلي جوه















المستشار محمود حمزة حضر الجنازة



يضعون النعش حتى يصلى عليه صلاة الجنازة

مهدي عاكف المرشد العام للإخوان المسلمين تقدم صفوف المصلين



الأستاذ مجدي حسين

كل التيارات السياسية كانت موجودة في الجنازة



مهدي عاكف







وشيعت الجنازة في مزيج من آيات القرآن والأدعية والهتافات الشيوعية في نفس الوقت









وإتجهت قافلة المشيعين نحو مدينة السادس من اكتوبر

القافلة في طريق المدافن





























مش عارف جايين يهببوا إيه دول حتى في المدافن
يمكن عاوزين يصنفوا الملايكة اللي ها تحاسبه ويشوفوهم إخوان ولا شيوعيين
شاهد فيديو للجنازة

إضغط هنا
-
سرقة تليفون السفير الأمريكي بالقاهرة
أنا إسمي مكتوب؟؟؟

الوعي المصري تدعو سارق التليفون لإخبارنا بقائمة الأسماء على المحمول عن طريق إرسالها على إيميل الجريدة ونعد بإبقاء شخصيتك سرية ونعد بنشرها كاملة وهو ما لن تجرؤ أن تفعله أي جريدة
وليك الحلاوة يا عم
-
رسمة هندسية لزنزانة المعتقلين
رسمها الزميل أحمد ماهر أثناء إعتقاله وهو بالمناسبة مهندس

إضغط على الصورة لتكبيرها

إضغط على الصورة لتكبيرها
نقلا عن مدونة منال وعلاء
-
حول حقوق الملكية والعلامة المائية
والفرق بيننا وبين المحتكرين السفلة

الصورة من وكالة جيتي إيميدجيز لاحظوا العلامة المائية وهكذا تعرض الوكالة صورها على الموقع قبل بيعها والوكالة تبيع لرويترز وإيه بي والفرنسية
أكثر ما إستفزني وكاد أن يخرج مني وائل البذيء الذي أحرص أيما حرص على أن أبقيه في قمقمه هو تعليق لأحد الحمقى الذي لا أشك لثانية واحدة في أنه يتبع جهة ما إما يهمها الإحتكار و أو سرقة مجهود الآخرين وكان تعليق هذا الأحمق هو أنه يلوم الوعي المصري على حملتها على الشيخ صالح المحتكر وكيف يكون ذلك ونحن الوعي المصري نفسنا ندعي لنفسنا حقوق ملكية ونضع علامة مائية على صورنا
إلى هذا الأحمق وكل من على شاكلته أقول هل تحتكر الوعي المصري صورها؟ هل لا تسمح لأحد برؤيتها؟ هل تدفع أيها الأحمق رسوم عند دخولك الموقع هنا؟ هل الموقع مشفر يا تافه؟ هل الوعي المصري فعلا لا تمتلك تلك الصور؟ هل نحن إشترينا حق عرضها لنحتكرها ؟ هل يجب أن أضع الصور بدون علامة مائية حتى يسرقها الصحفيون الجشعون؟ هل يبيع هؤلاء الصحفيون صحفهم المطبوعة مجانا؟ المصورين الذين يعملون لتلك الصحف هل يعملون مجانا؟ أم يتقاضون أجر أو ثمن للصور التي يمدون الصحيفة بها؟ من يسرق صوري هل يتصل بي من نفسه ويقول لي عاوز كام قصاد اللي سرقناه؟ هل حتى يذكر المصدر الذي استقى منه تلك الصور؟ سيبك من حقوقي المادية هل يحافظ على حقوقي الأدبية؟ هل تعلم أن جميع وكالات الأنباء تضع علامة مائية على صورها قبل أن تبيعها؟
لكن دعنا نتكلم عن الشيخ صالح وسيبنا من كاس العالم وحتى الدوري المصري اللي ها يتشفر ودعني أسألك اين تراثنا السينمائي من الأفلام القديمة والنادرة؟ مش هو اللي إشتراه؟ لو عاوز تتفرج على الأفلام دي تروح فين؟ مش لازم تدفع للشيخ صالح؟ والشيخ صالح ده مصري ولا سعودي؟ وإزاي سعودي يحتكر تراث السينما المصري بتاعنا؟ بس علشان عنده فلوس؟ هو الشيخ صالح كان بيغني بدل سعاد حسني؟ ولا بيرقص بدل تحية كاريوكا؟ بيعرف يصور؟ يخرج؟ يعمل مونتاج؟ بيطبع ويحمض؟ بيكتب سيناريو؟ أومال إيه معاه فلوس وخلاص؟ يعني من حقه ياخد الأفلام دي يعمل بيها اللي هو عاوزه؟ يحرقها مثلا؟ يعني تيجي إسرائيل مثلا تشتري حق عرض فيلم الرصاصة لا تزال في جيبي وأبناء الصمت وأغنية على الممر وجميع افلام حرب سته أكتوبر مثلا؟ وها يعملوا بيها إيه؟ ها نقول حقها؟ تولع فيهم؟ وتمسح ذكرة البلد؟ ها تقول لولادك إيه اللي تاريخهم إتمسح؟ تفتكر أمريكا ما معاهاش فلوس تشتري حق عرض الهرم الأكبر وأبو الهول؟ وتقفلك منطقة الهرم وتشفرها ويا تسمحلك يا ما تسمحلكش تشوف تاريخ جدودك؟؟؟ فلوسهم بقى وكما قال أحد الحمقى من حكم في ماله ما ظلم؟؟؟ ويشيلوا راس أبو الهول ويحطوا مكانها راس إبراهام لنكولن مثلا؟؟؟ أو راس بن جوريون حتى؟؟؟
وائل عباس
-
في تصويت الوعي المصري
المصريون قالوا للشيخ صالح جاك كسر حُقك
كان موضوع التصويت ما رأيك في إحتكار الشيخ صالح كامل وقنوات الآرت لإذاعة مباريات كأس العالم وحرمان المصريين منها؟
وكانت النتائج كالتالي

مجموع الأصوات 2007
حَقه وبفلوسه يشتري اللي هو عاوزه (187)	9%
جاته كسر حُقه (1828)	91%

وكما ترون بلغ عدد من رفضوا الإحتكار عشرة أضعاف من تقبلوه
ويمكنك قراءة التعليقات هنا
-
سر تشفير مباريات كأس العالم

الكاريكاتير نقلا عن عرب تايمز
السر هو ان الشيخ صالح كامل راجل وطني
غيور
عاشق لتراب بلده
عزبة ومزرعة وإقطاعية آل سعود بعبيدها المسماة على إسم جدهم الكبير وشركاهم آل بوش
ما خلصوش كل الناس تشوف بلده وهي بتتهزم اربعة صفر النهاردة من أوكرانيا
ومن كتر وطنيته قلبه كان حاسس
فقال يداري الفضيحة ويكفي على الخبر ماجور
فقام شاري حق عرض مباريات كاس العالم
وشفرها
لكن اللي حصل حصل والفضيحة الآن بجلاجل
وأوووووه يا سعووووودي

الكاريكاتير نقلا عن عرب تايمز
-
البيض بيضك

لست معتادا على مشاهدة القنوات الحكومية المصرية من ساعة ما ربنا فتح عليا وجبت ديش لكن علشان كنت منتظر برنامج في العمق بتاع رولا خرسا اللي كان ها يذيع حلقة عن المدونين وقالولي ها يتذاع الساعة العاشرة وللأسف إتذاع الثانية عشر لإن تلفزيون بلدنا ما بيحترمش المشاهدين ولا مواعيدهم يعني أنا لو ظابط الفيديو على الساعة عشرة ها يسجلي حاجة تانية واروح الاقي حاجة غير اللي عاوز اسجلها ولحظي العاثر كانت الحاجة دي هي برنامج البيض بيضك اللي فعلا فقعهوملي وقلت معلش اديني مستني البرنامج اللي بعديه لكن اللي خلاني عاوز اشيل التلفزيون اهبده في الارض هو احد المذيعين الفرافير اياهم اللي ما اعرفش اساميهم ولا عاوز اعرفها كان بيعلق على موضوع الشيخ صالح وكاس العالم وقال حاجة مش فاكرها أوي من كتر الصدمة اللي شعرت بيها وقتها وكان معناها ان الشيخ صالح ربنا يخليه لحق كاس العالم في الاوكازيون واشتراه علشان العرب ولولاه ما كناش ها نعرف نشوف كاس العالم خالص
يا عالم إختشوا دانتم عاوزين ضرب الشبشب على بوزكم
-
المدونون يخترقون عمق الإعلام المصري
برنامج في العمق - القناة الثانية

إضغط على الصورة لتشاهد أجزاء من الحلقة
أثارت هذه الحلقة جدلا كبيرا في أوساط المدونين والمتابعين لهم والنشطاء السياسيين
فالبعض إتهمنا بالإبتذال والسعي للظهور باي طريقة أو أنهم ضحكوا علينا وإدونا على قفانا أو إن فيه محاولات حكومية لشراؤنا وإسكاتنا
تعالوا خدوا عقلي وسيبوني أمشي حافي شوية
لما واحد إسمه عند أمن الدولة مطلوب ومتلفقله ست قضايا أمن دولة زي حضرتي يدخل مبنى الإذاعة والتلفزيون ضيف زي الباشا وكمان يطلع على القناة الثانية مكسب ده ولا مش مكسب
لما الحلقة تغطي حفلة نظمها المدونين لجمع تبرعات للمعتقلين مكسب ولا مش مكسب
لما تذكر أسماء المدونين ومدوناتهم وبعضهم معتقل وكلهم معارض ده مكسب ولا مش مكسب
تعالوا كمان نشوف كرم جبر كاهن جريدة روزاليوسف جريدة لجنة السياسات كتب إيه عننا
صحافة «أولاد الشوارع» هى الهم الذى ابتلينا به، ومعظمهم لا يحملون بطاقات نقابية ولا عضوية نقابة الصحفيين.. اللغة أصبحت متدنية، والهجوم لا يعرف شيئا عن أخلاقيات المهنة ولا سلوكياتها.. و«قليل الأدب» هو الذى يفرض رأيه على الآخرين بالقوة.. أصبحت هذه الصحف مثل القاطرة التى تقود البلاد بسرعة كبيرة إلى هاوية. صحافة «ولاد الشوارع» لم تترك شيئا إلا لطخته ولم تترك رمزا إلا أهانته، ولا سقف عندها ولا ميثاق شرف ولا مبادئ ولا ضمير، وصحفيوها الذين اغتصبوا لقب صحفى يستخدمون أقلامهم بنفس طريقة استخدام المطاوى والسواطير، ليس لهم ماض ولن يكون لهم حاضر ولا مستقبل! صحافة «أولاد الشوارع» تظن أنها تصنع الحرية، ووجدت ضالتها الكبرى فى المظاهرات وأجواء الحراك السياسى، فانطلقت دون ضوابط قانونية أو مهنية تهدم كل شىء وتنشر الفوضى وروح التمرد والعصيان، وتسللت إلى مشاكل القضاة والصحفيين والمحامين وغيرهم، تعبث بقضاياهم وتزج بها فى طريق مسدود، حتى يحدث الصدام الذى تحلم به وتسعى إليه. والسؤال هنا: ماذا يفعل مسئول أو حتى مواطن عادى إذا «شبط» فيه صحفى من «أولاد الشوارع» وكيف يدافع عن نفسه ويأخذ حقه؟
طيب لما ولاد الشوارع دول يطلعوا في التلفزيون الحكومي المصري مش كده يبقوا طلعوا لسانهم لواحد زي ده
كمان تعالوا نشوف قال إيه في مقال قبل الحلقة بكام يوم وكان الواد كان قلبه حاسس يا عيني
وأخشى ما أخشاه هو أن ينجحوا فى التسلل إلى التليفزيون المصرى فيصبح ملاذا هو الآخر للمناضلين الجدد ويفتح أبوابه وبرامجه لمن يهاجمون الدولة والحكومة إما إتقاء لشرهم أو سعيا لكسب ودهم وفى الحالتين سوف تفشل عملية «اتقاء الشر» أو «كسب الود».. التليفزيون مازال صامدا
مش بكده يبقى خد على قفاه كمان
كل ده وتقولولي مش مكسب
ولا هو إحنا يعني لما نطلع في التلفزيون المصري لازم نطلع نقرا بيان رقم واحد يا إما بلاش
-
المدونون المصريون على مجلة شتيرن الألمانية

أوسع المجلات إنتشارا في ألمانيا واوروبا

إضغط هنا للتكبير
معلش ما فضيتش أترجم الصراحة بس هو كلام كويس يعني الحمد لله
والعدد ده إتنشر في وقت ألمانيا مليانة أجانب بيشوفوا كاس العالم وأعتقد إن توزيعه ها يكون عالي جدا
-
إعلانات العرب مؤمنة وبنت ناس ومحترمة
وما تعرفش الحاجات الوحشة دي

حد بيشوف إعلان كوكا كولا بتاع كاس العالم؟
شفتم أنهو نسخة؟
بتاعة الحرامي ولا بتاعة عشيق الزوجة؟
لو إنتم في الدول المنافقة المسماة بالدول العربية أكيد شفتم نسخة الحرامي
أما في أوروبا فعندهم نسخة تانية
الإعلان بيعبر عن إزاي الناس بتنسى خلافاتها وبتوحدهم كرة القدم وجايبين طباخ وفرخة وشجرة وحطاب وذبابة ومضرب ذباب وبالونة وصبار وعالم وفأر تجارب كل دول لما بيسمعوا ان فيه جول جه بيحضنوا بعض وبينسوا مشاكلهم وبيبقوا أصحاب أما آخر جزء من الإعلان فيذاع في الدول العربية واحد نايم مع مراته بيتفرجوا على ماتش وبعدين لما بييجي جول فيه واحد بيخرج من الدولاب لابس حرامي والزوج بيحضنه أما في الإعلان الأصلي فبيخرج عشيق الزوجة بملابسه الداخلية وهو والزوج المخدوع بيحضنوا بعض

هذه هي اللقطة اللتي تخفيها الحكومات العربية علشان إحنا شعوب قاصرة وقطط مغمضة مش عاوزين يفتحوا عنينا إن فيه ستات بتخون إجوازها اللهم إحفظنا وحاجات وحشة كده بتحصل في العالم
ويمكنك مشاهدة الإعلان على الوصلة التالية نسخة بالإيطالية
http://meems.imeem.com/LXf1x1EL/video/dMWPGZBb
-

-
العدد لم يكتمل بعد
تابعونا
-
آخر تحديث لهذا العدد بتاريخ
Friday, 23 June, 2006 04:02:27 PM