الوعي المصري

هذه رسالة من اخت اسمها امل بتعارض حركة كفاية وموجهاها ليهم
وردي عليها اذا سمحت لي حركة كفاية بين سطور رسالتها

السلام عليكم يابتوع كفاية

اممكن اسال سؤال؟

ليه كل الدوشة والزيطة دى؟

مفيش يا ستي لا دوشه ولا زيطه دول بيطلعوا في مظاهرات صامته

مش عايزين تجديد ولا توريث

اوكى جميل

بس ايه البديل بنسبة لحضراتكم يعنى؟

يعنى لو افترضنا ان اللى بتعملوه ده هيخلى مبارك مايجدش فترة حكمه

ايه اللى هيحصل بعد كدة؟

مين اللى هيكون البديل؟

95% هيكون واحد اسوا منه 100 مرة

ما نقدرش نجزم بكده لاننا مجربناش غيره

بالعكس انا شايفة لو حسنى مبارك دلوقتى هو اللى تنحى عن رئاسة الجمهورية,لو عمل كدة في الوقت ده يبقى حرام عليه لانه كدة هيورط البلد وهيدخلها في عدم استقرار وخناقات مابين مرشحين كلهم اسوا من بعض

وهل سيعمر الريس الى الابد ..هيجي يوم ونكون مضطرين للتغيير

وبعدين لو احنا ضمنا وجود ديموقراطيه صحيحه-تعديلات دستوريه- مش هنقلق من المرشحين لانه ببساطه اللي اللي مش هيعجبنا هياخد استماره6 باراده الشعب

حسنى مبارك ده رمز لاكثر الاواضاع استقرارا بنسبة للوضع اللى فيه بلادنا

على فكرة انا مش معاه ولا موافقة عليه او على طريقه حكمه

لكن بفكر بواقعية

مش بعترض وخلاص

وجوده ضرر لكن خروجه ممكن يؤدى للضرر مضاعف

النظريه الرائعه اللي بيؤمن بيها المصريين بلا استثناء (اللي نعرفه احسن من اللي منعرفوش) تتجلى في هذه الجمل

هو اخد اللى اخده من البلد وخلاص

مش هياخد اكتر من اللى اخده....معنى كدة انه في خلال الايام الجاية اللى باقية من عمره مش هياخد حاجة مننا لانه خلاص شبع

هل انت متأكده انه اخد من البلد ....وهل انت متأكده انه شبع

ثم الواحد مفروض يكون بردو حقانى

محدش يقدر ينكر انجازات الراجل يعنى اللى حققها في عصره

ابسطها واوضحها ..وضع مصر السياسي مابين الدول

اقصد زعامة مصر سياسيا على الدول العربية

وده يرجع لدبلوماسيته وتفكيره السياسي الجيد

لا اعتقد ان وزن مصر بين الدول العربيه يجعلها الزعيمه الحاليه

كفاية الامن اللى في البلد

انا اعرف ناس كتير من دول عربية واجنبيه

نزول بنت لوحدها بعد الساعة 8 يساوى تعرييض حياتها للخطر

مش بس البنات لكن حتى الاسر في خطر على نزولها متاخرا

في حين اننا الحمد لله في مصر ممكن اى حد ينزل في اى وقت وان شاء الله يكون في امان

مش شايفين ان دى حاجة تحسبله؟

فدي عنك حق احنا الحمد لله عندنا امن وامان ميه ميه بس ممكن اقولك (اطلب اكتر اكيد فيه اكتر) بمعنى ليه منطمعش في مزايا تانيه

يعنى فى ليه انجازات في مجالات كتيرة تانيه اكيد لو فكرتو شوية هتحسو ا انكو عايشين في نعمة مقارنتا بالدول التانية اللى حواليكم

مالها الدول اللي حوالينا كلهم احسن مننا مع ان عندنا امكانيات احسن منهم

في دوله فيهم عندها نهر النيل

في دوله عندها ممر مائي بحجم قناه السويس يدر عليها دخل من لاشئ

هي دوله فيهم عندها شواطئ سياحيه زينا

في دوله عندها اثار زينا

في دوله ممكن تزرع قطن زي القطن المصري

في دوله عندها عقول عبقريه زينا



مفيش و مع ذلك دخل المواطن المصري هو الاقل



وتانى بقول انا مش راضية بحال الحكم في بالدنا كبلد عربى مسلم

لكن زى ماقلت احنا حالنا مع مبارك يعتبر احسن الوحش

والمفروض نكون اكثر واقعية

ومنعترضش كدة وخلاص

يبقي ليه منطالبش بتعديلات جذريه في الدستور لضمان انصلاح الحال وانك تشوفي بلدك بالحاله الي تعجبك

وبنسبة للعساكر السوداء والبنادق والاسلحة اللى بتقولو عليه دى ,فانا شايفة انها مش لمنع الديموقراطية ولكن حفاظا على الامن

في العالم كله مظاهرات و بيكون موجود فيها رجال امن اكتر من عندنا ولكن لهدف اخر وهو الحفاظ على امن المتظاهرين وليس ترهيبهم المتظاهرين

احنا لو مكناش بلد ديموقراطى,كان زمان الانترنت على سبيل المثال مش متسهل اوى كدة ومفتوح لتبادل الاراء اللى سياسية الحساسة زى ماحنا بنعمل دلوقتى

برضوا كالعاده بتبصي على الحد الادني من الطموحات .طز في النت ماهم سايبنا نقول اللي عايزين نقوله بس ايه الفايده..صفر طبعا

كام واحد بيدخل ويقرا الكلام ده وبعدين اللي عندهم نت من كلهم من الطبقه المتعلمه و الواعيه اصلا فاين باقي شعب مصر 50% من الجهله والاميين

لوفتحتو اى قناه محلية حتى هتلاقوهم بيعرضو وجهات نظر مختلفة في مواضيع مختلفة...ومابيموتوش ولا بيتقتلو ولا حاجة

راجعي نفسك تاني في كلمه محليه الا اذا كانت قنوات اليوم و الجزيره محليه

اه معاكم بيبقى في حدود للتوغل السياسي

بس بردو الحدود دى انا شايفاها للمصلحة العامة

هل تعتبري اخفاء الحقائق على الشعب من مصلحتهم العامه ؟!!!!!!!!

لعدم زيادة البلبله بين الاوساط ووجود الفتنة

هل اعلام الناس بما يجري في بلدهم سيسبب فتنه بينما ترك الامور كما هي عليه هو ما سيدفع البلد للامام

معروف ان كل حاجة لازم يكون ليها حدود

و الصبر له حدود

وسبب وجود العساكر دول ماهو الا لحفظ الامن ومنع التخريب التى تقوم بيها الكثير من المظاهرات

معظم المظاهرات اللى بيتخللها المشاغبين والارهابين والحراميين

ينزلو في البلد تكسير

عربيات ناس ملهمش ذنب,محلات ,خطوط المترو,......الخ حتى البنى ادميين ممكن يتئذو في مظاهرات زى دى

وعشان كدة هما بيكونو موجودين بشكل مكثف

نقطه المشاغبين عندك حق فيها بس اعتبار ان الامن موجود عشانهم ده خلط للحقائق لان في كل العالم بيبقى موجود عساكر جوه المظاهرات لحفظ امن المتظاهرين ...

اللى انا شيفاه والله اعلم ان كل واحد يحاول يصلح من نفسه لحد منكون ناس محترمة وساعتها الحاكم بامر الله وسنة رسوله هيخرج من واحد فينا بمنتهى السلاسة والبساطة من غير مظاهرات ووعنف

ازاي يعني ؟!!!

طبعا احنا عندنا عيوب كتير اوي ولكن هموم المواطن المصري هي السبب الاول في تدهور الحال

تدهور حال التعليم هو سبب انحراف الشباب لذلك اصلاح حال المواطن اولا و اخيرا



لكن طول مااحنا بعديين كل البعد عن اخلاقياتنا ودينا وشاغليين نفسنا بعيوب الغير بدل مانبص على عيوبنا ,يبقى هنقضى عمرنا كله في مظاهرات وخناقات من غير اى فايدة

ما المقصود بكلمه الغير؟

هل تعتقدين ان اصحاب الحكم في مصر من الناس الذين يجب الا نشغل انفسنا بعيوبهم؟

وعلى من يرجع الضمير في "عيوبنا" هل تقصدين الفرد بمعنى ان كل واحد يبدأ بنفسه .. ماشي كويس بس انا ابدأ بنفسي واقول ان اهم عيوبي اني سلبي وشايف الغلط قدامي و ساكت عليه عشان كده انا هغير نفسي واقول ان لازم الوضع الحالي يتغير وان توضع بلدي في الوضع المناسب لها و لامكانيات شعبها و لعقول ابناءها



نحن قوم اذلاء اعزنا الله بالاسلام فان اردنا العزة في غيره اذلنا الله

طوبى لمن شغلته عيوبه عن عيوب الغير