نوال والأهرام - وائل عباس : الوعي المصري

هذا هو الكذب الذي نشرته جريدة الاهرام يوم الخميس 26 مايو على صفحة 26

كما ترون تقول الاهرام ان احدى المتظاهرات مزقت ملابسها وادعت ان متظاهري الوطني هم من مزقوها
والقاريء العادي البريء قد يظن ان حركة كفاية هي كمان مأجرة شراشيح من حارة - خبيني جوه - ونسوان بتقطع هدومها وترمي بلاها على يا حرام بتوع الوطني المسالمين
والحقيقة انني عاصرت هذا الموضوع بنفسي انا والصحفي حسين متولي
والمفاجأة هنا ان المتظاهرة التي قال الاهرام انها مزقت ملابسها علشان ترمي بلاها على بتوع الوطني ما هي الا سيدة محترمة متزوجة وتعمل صحفية واسمها نوال علي ولا علاقة لها من قريب او من بعيد بحركة كفاية وتعمل بجريدة الجيل التابعة لحزب الجيل وصادف حظها العاثر ان يوم الاستفتاء كان لديها كورس لغة انجليزية في النقابة لكنها وجدت صعوبة في الدخول وحدث شد وجذب خفيف في الكلام بينها وبين احد ضباط الشرطة لانه كان يريد منعها من الدخول ثم سمح لها بالدخول وما ان اعطته ظهرها حتى غمز لبعض البلطجية ان يهاجموها
وقد كان
الى ان تم تخليصها منهم وكانت هذه الصورة التي بثتها وكالات الانباء وكما ترون ملابسها من اعلى ممزقة ومفتوحة

وذهب معها زميلي الصحفي حسين متولي لتوصيلها الى سيارتها المركونة في موقف عبد المنعم رياض وخلع قميصه واعطاه لها لتربطه حول وسطها وتستر نفسها حيث ان بنطلونها كان ممزقا بشدة من الخلف وكما ترون في الصورة ملابسها من اعلى ايضا كانت ممزقة ثم لحقت بهم انا ايضا الى موقف عبد المنعم رياض والتقطت هاتان الصورتان

الصحفية نوال وحقيبتها الجلدية فارغة وممزقة وكانها حقيبة ورقية وليست جلدية !!!

وطبعا كانت النقود مفقودة وكذلك جهاز موبايل وبه خط جديد واسورة ذهبية وكوليه ذهبي
وكانت نوال في حالة انهيار وعدم تركيز وخائفة جدا حتى ان تقدم بلاغ خوفا من ان يتم القبض عليها
وقالت انها شاهدت مصوغاتها مع احد رجال الامن
ولم تكن قادرة على القيادة فقدت سيارتها وتوجهنا الى لواءات امن الدولة الجالسين على الرصيف المقابل للنقابة لنطالب بالمصوغات لكن كل ما فعلوه هو التنصل من الامر وكل ما كان يهمهم هو ابعادنا وابعاد السيارة من امامهم حتى لا يتجمهر الناس حولنا واجبرونا على ركوب السيارة والرحيل وقد حاول بعض الصحفيين من لجنة الحريات بالنقابة مساعدتنا ومنهم الاستاذ احمد حلمي مشكورا لكن نوال كانت في حالة انهيار تام وعدم تركيز فتخوفت منهم وظنت انهم من الامن يريدون اختطافها واعتقالها وانا اعتذر لهم بشدة وارجو ان يقدروا الموقف الذي كانت تمر به

السيدة نوال تقف مرتكنة على سيارتها في حالة انهيار تام وملابسها ممزقة الا مما يسترها

الزميل الشهم حسين متولي بالفانلة الداخلية بعد ان اعطى قميصه للزميلة نوال علي

ويستمر كذب صحيفة الاهرام فتدعي ان رجال الشرطة اصطحبوها لتحرير محضر والحقيقة انه لم يحدث شيء من ذلك فقد كان كل ما يهمهم ابعادها فتوجهنا الى جريدة الجيل لترتاح قليلا ثم نصحنا بعض الزملاء الذين كانوا يطمأنون علينا بالتليفون بعد ان شاهدونا مع ضباط امن الدولة نصحونا بالتوجه الى مركز هشام مبارك لحقوق الانسان ثم انفصلت عنهم انا بعد ذلك ثم اتصل بي الزميل حسين ليخبرني انهم الان في قسم قصر النيل

ثم تكذب الاهرام في موقف اخر وتقول ان اعضاء كفاية بدأوا بقذف الحجارة من داخل نقابة المحامين والحقيقة ان بلطجية مبارك هم من خلعوا الرخام من نقابة الصحفيين وقذفوا به من هم بداخل نقابة المحامين ومنهم زميلي الصحفي بجريدة الدستور هاني الاعصر الذي اصيب بجرح قطعي في ذراعه وتوجهت معه الى مستشفى العجوزة حيث تم خياطة اربع غرز في ذراعه وكم كنت اتمنى تصوير الجرح في ذراعه الا ان ذاكرة الكاميرا كانت قد امتلأت وقتها ...

وائل عباس

9 comments

الاخ العزيز وائل عباس
تحيه طيبه وبعد..........
ارجو ان اتقدم لك بكل الشكر والتقدير علي هذا الجهد المبذول وهذا العمل الرائع لكن هذا هو المتوقع من كل الاشخاص النزهاء الذين شاركوا في هذا اليوم الحافل
شكرا
وارجو ان تنشا اواصر الصدقه بيننا

Published 242 months ago by مني المصري.

لا أملك سوى أن اسجل انبهارى بما تفعل فشكرا لك وأتمنى أن نلتقى يوما لأسجل عميق احترامى
لمياء

Published 242 months ago by لمياء لطفى.

يا وائل ربنا يسترها عليك...و الله يا بني انا خايف عليك...اما بالنسبه للي حصل انا حزنت حزن شديد جدا جدا خاصة اني مش في مصر و قرايت الموضوع في الجرايد(الشامته) للأسف...و مكنتش عارف اعمل ايه بس انا عايز اسأل سؤال ...ليه الناس ما ضربوش البلطجيه ولاد الكلب اللي الحكومه لماهم دول؟...انا عارف انهم بلطجيه وولاد كلب ...بس الناس برضه كتير و اكيد كانو اكتر من البلطجيه دول...انا عارف برضه ان مش كل الناس بتاعت ضرب و خناق ...بس الغضب يا اخي بيخلي الواحد يخرج عن شعوره...انت بذلت مجهود ممتاز يا وائل...و الله لو كنت في مصرلكنت........
مش عارف كنت عملت ايه بس اكيد كنت عملت حاجه

Published 242 months ago by عمرو.

انا بعت الوصلة للصفحة دي لكل عنوان إاكتروني لقيته علي صفحة الاهرام التالية:
http://extra.ahram.org.eg/mail/mail.htm
علي الله يحسّوا شويا لو في حد عندهم هناك عندو ضمير.
وبعتلهم هزقتهم شويتين ثلاثة...
ياريت الباقي يعمل نفس الموضوع... علي الاقل بنبينلهم ان احنا كرهنهم.. حتي لو معملوش حاجة ..
و مظنش ان حد مستني منهم حاجة بعد العملوه..
قذارة ما فوق القذارة..
وعذرا للعربي البايز :)

Published 242 months ago by فادي.

الإقالة مش كفاية في وزير الداخلية
ده لابد يتحاكم
هوه مفيش عضو مجلس شعب محترم يقدم إستجواب؟
بالرغم من تعاطفي مع من إمتهنت كرامتهم على أيدي بلطجية الأمن إلا انني لا أستطيع ان اخفي سعادتي لأن من الواضح إفلاسهم
من الواضح سقوطهم إلى الهاوية

شكراً يا وائل على مجهودك
و احيي ذلك الموقع الذي إكتشفته صدفة
و أتمنى أن يظل منبراً للحقيقة و إحقاق الحقوق

ماجد حسانين
فاكرني؟

Published 242 months ago by ماجد حسانين.

طبعا الصحفية اللى حصلها كده لها كل احترامنا بس هما اكيد نسيوا ان كما تدين تدان وانشاء الله حيترد فى كل واحد بس لمسها
وثانيا انا كنت متوقع ان الصحفية اللى اتبهدلت دى من كفاية ومن الناشطين كمان بس تعمل ايه محمد هنيدى قالها عسكرى امن مركزى غبى ما يعرفش امه
وثالثا يعنى ممكن نسمى اللى حصل ده عسكر وحرامى
بس هما كانو العساكر وهما كانو الحرامية يعنى الموبايل اكيد كان على نغمه كوفيا على وزن نوكيا
اما الدهب فأكيد كان مش أصلى علشان كده خدوه ماهو دا الفرع الجديد اللى حيتفتح فى شارع عبد العزيز مباحث أمن الدولة والتموين دى بقت مسخرة

وثالثا انت عاوز الاهرام تكتب ايه يعنى دى الاهرام يعنى اكبر جريدة فى مصر يعنى الدلع كله يعنى الدستور والقانون يعنى صفحة الوفيات وحظك اليوم ووظايف خالية ومتنساش كل جمعة ايامنا الحلوة وملحق السيارات يا عم الحاج اهرام ايه اللى انت جاى تقول عليه هى دى الاهرام.

Published 241 months ago by Taher Amin.

مطلوب التنسيق والضغط بصورة أكبر في الايام القادمة
مطلوب تعريف الناس في كل مكان في الشارع في الاتوبييس علي القهاوي
يعني في كل مكان باهمية قضية التغيير

Published 241 months ago by mahmoud.

يا استاذ وائل ارجوك... أنا بعثت للاخت شاهيناز وبقولك انت كمان دلوقتي... تازم تنزلوا للناس البسيطة اللي لا عندها دش ولا تقدر تشتري جرايد المعارضة... الناس دي كتير و اغلبهم شباب ...............
دول مش عارفين ايه اللي بيجرا في البلد ... صدقني ..
حتي ناس منهم كانوا فاكرين ان يوم الاستفتاء كان انتخاب للرئيس مبارك تاني وانه نجح تاني في الانتخابات
الناس دي عايزة اللي ينزل لها ويوعيها بطريقة بسيطة .. انتو متكين اوي علي نوعية معينة من الناس عارفة اصلا المهزلة اللي فيها بلدنا
ده فيه واحد كبير في السن .. غلبان اوي سمعته بيقول .. مالهم ومال الريس اهو هحسن من غيره ..هوه شوية الوزرا اللي حواليه هم اللي وحشين وهوه مش قادر يغيرهم...هوه لاقي احسن منهم و مغيرهمش؟
وعيل تاني مش عارف يعني ايه المادة ٧٦.. ولما قلت له اقرا جريدة الدستور ..لازم تفهم اللي بيحصل في بلدك.. قال هوه انا لاقي اكل ولا اتجوز لما اشتري جرنان ب ٢ ج
يا وائل انتو مقصرين جدا مع الناس ديه و همه اكتر بكتير من المثقفين ... انا مش عارفة ازاي مش حاطنهم في حساباتكم
واكيد همه ما عندهمش كمبيوتر علشان يشوفوا الصور ديه او يقروا الكلام الجميل ده

Published 241 months ago by lubna.

يا عم وائل ليه الفضايح دى ربنا أمر بالستر ، أستر عليا الله يسترك وبلاش الفانلة الداخلية بتاعتى أنا ماحيلتيش غيرها ولو أخذوها من الموقع دلوقتى أمشى أنا قدام الناس أون لاين ازاى ؟ كمان فيه حاجه تانيه ، الفانله ممكن تعجب مجدى علام او حنفى او الديب ودول ربك يستر من رجالتهم وأنا عاوزك تنشر صور دراع واحد بس فيهم وسيب القراء تقارن بين دراعى ودراعه .. انا مش ناقص يابا مش حايبقى أنتى والوزير الخالى من السرطان اللى عمل فيا كده .. معلشى احنا بنتكلم ويجعله عامر يا وائل بيه

Published 241 months ago by حسين متولى.

The comments are closed.

> Top