24 أغسطس 2005
هما مش بيقولوا الجنين في بطن أمه بيقول نعم لمبارك
إحنا برضه الجنين بينزل من بطن أمه بيقول باطل
ومحدش أحسن من حد
الراجل ده حتة سكرة وأي مظاهرة هو مش فيها مالهاش طعم
معلش يا جماعة كلام كمال خليل لازم تسمعوه بنفسكم ما ينفعش انقله
لازم احنسكم علشان تنزلوا وتيجوا معانا
خوفونا من أمن الدولة في المنصورة تحديدا
وقالولنا ما تفتكروش هنا زي مصر
هنا كفرة
ذات الرداء البرتقالي زعقت فيا وقالتلي ده حسني مبارك هو اللي حايش عننا الأمريكان
بس ما تقلقوش اللي معاها كان رأيهم مختلف وهيا كمان عرفت غلطها
وقف الخلق ينظرون
والحمد لله ماكانشي فيه أمن
عدينا الشارع وروحنا للناس الواقفة تتفرج وضموا علينا
السي إع إع
الله يجازيك ياللي جبتهم
بس يالله مصلحة برضه واللي ييجي منه - بوش - أحسن منه
ثم تحولت المظاهرة الى مسيرة أخترقت قلب مدينة المنصورة حتى محطة القطار
وطبعا لم يكن الامن ليسمح لنا بدخول السكة الجديدة
فجم دول حوطونا من الجنب ناحية المحطة
ولسه بالتفت ورا لقيت دول جم سدوا الشارع
والغريب معاهم كلاشنيكوفات وقاذفات قنابل Grenade Launchers بأعداد لا تستخدم في مظاهرة بل في حرب
دلوقتي عرفت اللي قالوا كفرة كانوا يقصدوا ايه
وعرفت اللي ماتوا في المنصورة من الاخوان ماتوا ازاي
بصيت على السكة الجديدة يا ما شاء الله الارض انشقت وظهروا دول في ثواني
بجد الامن هناك عارف شغله ومش بيهزر
الغريب ان نوعية العصيان في المنصورة مش زي كايرو
دي شماريخ يابا
والشمروخ طوله تلاته متر
هنا قنديل بيلقي بيان
ولحد هنا والذاكرة اتملت في الكاميرا
خسارة فاتني شوية صور عسل وها اضطر اوصفلكم بقى عمياني
فضينا المظاهرة ومشينا
اكتشفت ان ورا العساكر اللي بالكلاشنيكوفات وقاذفات القنابل عربيات مطافي
والعساكر واقفين فوقيها وماسكين الخراطيم وفي حالة تأهب
أنا عارف لقطة بمليون جنيه بس خيرها في غيرها
وكان نفسي أصورلكم قاذفات القنابل اللي كانت مع العساكر عن قرب
كمية ضخمة ومنظر مهيب
بس الكوميديا بقى في انصراف العساكر
بالضبط زي ما بتشوفوا في افلام عادل امام
بيدبدبوا على الارض وبيصيحوا صيحتهم المعهودة
هه دب دب دب ... هه دب دب دب ... هه دب دب دب
بس صراحة واحنا ماشيين جنب العساكر فوجئت ببعضهم بيحيينا وبيثني علينا
وعسكري قاللي أنا عمري ما شفت المنظر ده في حياتي
وسواقين التاكسي كانوا بيشاورولنا بعلامات النصر وعلامة أوكيه
وعموما تفاعل الناس معانا وتعاطفهم كان ملموس جدا الصراحة عن أي مكان شفته قبل كده
تعيش المنصورة
كان نفسي اتمشى على الكورنيش شوية
بس مش وقته بقى ...