كنت اعرف انه ستكون هناك مشكلات ضخمة ستواجه مظاهرة اليوم خصوصا وان بوتين موجود بالقاهرة في اول زيارة روسية من ايام خروشوف والحقيقة الناس بتلعن ابو خاش بوتين لانه قفل وسط البلد امبارح باصراره على العشاء في عابدين ... حيث نامت عابدين من المغرب زي الفراخ والناس قفلت محلاتها ... والحقيقة انا كنت في روكسي وقتها وبتاع الميني باص في موقف روكسي قال لنا انا مش نازل وسط البلد يا جدعان بس مستعد اوصلكم المترو محطة سراي القبة ببلاش ... وبعدين لقيت الموبايل بتاعي بيرن وواحد صاحبي بيتصل بيا ... يا وائل انا قاعد في العربية وطافي الموتور بقالي ساعتين في ميدان التحرير ... هو انتم بتعملوا ايه؟؟؟ - انتم ؟؟؟ احنا مين يابني ؟؟؟ والله ياخويا انا في روكسي ولا اعرفشي اي حاجة !!! الناس يظهر افتكروها مظاهرة !!! ... المهم يوم المظاهرة كنت في وسط البلد من اتناشر ولقيت البلد مدروزة امن من اول ميدان رمسيس ... عربيات مصفحة ومنزلين العساكر قدام الجامع من الصبح ... ميدان الاسعاف محاصر باسوار حديدية وحتى موظفي دار القضاء بيتخانقوا علشان يخشوا يشوفوا شغلهم ... مش لاقي حد اعرفه ... فجأة سمعت صوت زعيق والارض انشقت ولقيت مصورين اجانب رافعين الكاميرات وبيجروا جريت معاهم لقيت مجموعة حلاليف او بغال استرالي شايلين واحد من على الارض شيل وبيحاولوا يحطوه جوه تاكسي بالعافية ... طلعت الكاميرا وحاولت اصور ... انشقت الارض هذه المرة عن مزيد من الحلاليف الامنية جريوا وراء المصورين المصريين والاجانب وضربوهم وسمعت كلمات مثل بلاش كده وممنوع ووالله ها اكسرهالك ... جريت استخبيت في ممر بين العمارات ... اصل واحد زيي مالوش ديه ... يكسروا الكاميرا ويسكروني انا شخصيا ... مش مهم انا المهم الكاميرا اللي دافع فيها دم قلبي ... والمهم هاقولهم ايه ؟؟؟ انا مصور تبع جريدة الوعي المصري؟؟؟ هأو أو أو ...
المهم دخلت الممر وانا باحاول اخبي الكاميرا في هدومي لكن لقيت في الممر ضباط جايبين ترابيزة وقاعدين وبيتكلموا في اللاسلكي : فيه صحفيين اجانب ومراسلين وفضائيات ومعاهم كاميرات ... بلا بلا بلا ... بس الحمد لله ربنا عماهم عني ... رحت اكلم صديق لي مراسل اجنبي في التليفون كنا اتفقنا نتقابل في المظاهرة قال لي انه في رمسيس والمرور واقف ... بصراحة باتحامي فيه لان احنا في بلد ما بتحترمش غير الاجانب ... والراجل الصراحة عرض ان لو حصل لي حاجة ها يقول ان انا المصور بتاعه ... بعد ما خلصت التليفون لقيت انسة بتخبط على ظهري وبتقول لي مش انت من كفاية ... قلت لها اه ... قالت لي اومال فين المظاهرة ... قلت لها علمي علمك ... تعالي ندور ...
كنت زمان لما يكون فيه مظاهرة بادخل من باب دار القضاء العالي اللي عند الباركينج رحت اجرب حظي لقيتهم سبقوني ويظهر عرفوا اللعبة فحطوا قوات هناك كمان وقفلوا الابواب ومنعوا حد يدخل ... لفيت رحت عند نقابة الصحفيين لقيت برضه قوات هناك ومفيش متظاهرين ... رجعت انا والانسة ميدان الاسعاف لقيناهم بيمشوا الناس بس فيه مجموعة من الصحفيين الاجانب واقفين قمنا واقفين وسطيهم ومستلوحين واللي يحصل يحصل بقى ... والحمد لله محدش خد باله ... يظهر افتكرونا اجانب احنا كمان ... احم ... ما علينا ... لمحت صحفي اعرفه من جريدة العربي الناصري سالته هو فين المظاهرة ... برضه لا يعلم ... وبتوع الامن بيحلفوا بالطلاق ان مافيش مظاهرة خلاص وكلهم ثقة او ربما يريدون الايحاء بذلك ... هنا جاء صديقي الصحفي الاسباني ... ولقينا واحد كبير من بتوع كفاية معدي مش عارف اسمه ايه قال لنا المظاهرة قدام النقابة ... اخدنا بعضنا وبنعدي الشارع فوجئنا بجموعة اخرى من الثيران البشرية الامنية يقتادون المهندس كمال خليل لا اعرف الى اين وعندما تدخل تامر وجيه واسامة احمد اقتادوهم ايضا معهم ... وهنا التقطت اول صورة كما ترون وفيها المهندس كمال خليل يرفع علامة النصر وهم يقتادونه بعيدا
تتبعناهم وحاول صديقي الاسباني التقاط مزيد من الصور الا ان احد رجال الامن تعرض له وقال له ممنوع ووضع يده على عدسة الكاميرا وحاول اخذها ... ثم علمنا بعد انهم وضعوا المهندس كمال خليل والاخرون في تاكسي وامروه بالابتعاد ... لكنهم عادوا الى النقابة التي كنا قد وصلنا نحن ايضا اليها ... وفوجئنا بالاصرار العجيب للامن على فض المظاهرة حتى انهم اتوا بسيارة رش المياه ووضعوها عمودية على مبنى النقابة استعدادا لرش المياة الا ان صاحب القرار الاحمق قد تراجع وابعد السيارة ليس احتراما لنا على ما اعتقد ولكن بسبب وجود عدد كبير من المراسلين الاجانب والفضائيات ... والغريب ان مبارك في لقاؤه مع اديب ساله اديب عن من يرفعون لافتات التاييد لمبارك برغم ان مبارك لم يعلن ترشحه بعد فرد مبارك بانهم احرار بيعبروا عن رايهم !!!
احرار بيعبروا عن رايهم ؟؟؟ اومال احنا ايه ؟؟؟ عبيد بنعبر عن راي خالتي بمبة ؟؟؟ واشمعنى هما مسموح لهم واحنا نتمنع ؟؟؟ خصوصا واني سمعت من الزميلة شاهيناز عبد السلام من الاسكندرية ان المظاهرة منعت تماما ونفس الامر حدث في باقي المحافظات ...
المهم ان المظاهرة تمت والحمد لله وكانت من اضخم مظاهرات كفاية من ناحية عدد الحاضرين ومن ناحية الحشود الامنية ايضا
الامن يحاول منع بعض من يحملون اللافتات من الدخول
شباب من اجل التغيير ايضا شاركوا في المظاهرة
حتى كيرميت بيقول كفاية
الامن بيصور من فوق السطوح المرة دي
الامن يمنع المواطنين من الانضمام الى المظاهرة والدخول داخل الكردون الامني
سيارة المياه التي كانت موجهة الينا والتي تراجعوا عن استخدامها
وضعت هذه السيارة في هذا المكان خصيصا لتحجب الرؤية حتى لا يرى المار في شارع رمسيس المظاهرة تماما بالاضافة الى ان الشارع الذي تقع به النقابة تم اغلاقه تماما امام مرور السيارات
بعد سماعنا بحدوث اعتقالات في المحافظات قرر المتظاهرون الاعتصام امام النقابة حتى يتم الافراج عن المعتقلون وجلسوا على الرصيف وعلى درج النقابة ... ثم قابلت انا وصديقي الاسباني صديقة اخرى صحفية فرنسية وقررنا توجيه بعض الاسئلة الى عبد الحليم قنديل عن المعتقلين فقال قنديل ان المعتقلين الذين يعرف اسماؤهم بلغوا الخمسين لكن من لا يعرف اسماؤهم تعدوا المائة ... وفي سؤال عن ترشيح حركة كفاية لمرشح لرئاسة الجمهورية قال قنديل انه غير مسموح لنا حاليا بتقديم مرشحين فسألته وماذا اذا تم السماح لكم بتقديم مرشحين فقال لدينا سبعة اسماء من القضاة والعلماء سنقترحهم للترشيح في وقتها ...
شباب من اجل التغيير
الشباب يغنون اغاني سياسية شهيرة
والبقية بقى اكيد عرفتوها من الاخبار
...
ملحوظة باقولها على استحياء
ياريت نبطل نشتم السادات في المظاهرات
السادات مات ومش من اخلاق المناضلين انهم يعملوا كده
والا فبالتالي مفروض كمان نشتم جمال عبد الناصر
لكن ده لا يحدث مجاملة للناصريين بتوع كفاية
وده اسمحولي نوع من النفاق اننا نشتم السادات ولا نشتم عبد الناصر ايضا !!!
لو ها نشتم يبقى نشتم كله يا اما نبطل شتيمة خالص !!!
بالرغم من ان حركة كفاية ودي معلومة مش كتير يعرفوها كان اسم حركة يسارية مازالت موجودة حتى الان
تاسست 2002
هذه الحركة تقول كفاية حكم العسكر خمسين سنة بما فيهم عبد الناصر !!!
الا ان الناصريين ظهروا في الصورة اكثر واخذوا شعار كفاية
وبالاضافة الى ان شتيمة الاموات ليست من اخلاق وشيم المناضلين الا ربما الناصريين
وحركة كفاية على ما اعرف لا تضم ناصريين فقط ولكن بها يساريون واسلاميون وليبراليون
فرجاء لا تفرضوا علينا شعاراتكم السخيفة !!!
ومشكلتنا ليست مع السادات !!!
ولنلتزم جميعا بالقضية الاساسية والشخصية الاساسية التي يهمنا تغييرها
والا ستجبر كفاية على احترام السادات ايضا اذا ظهر حزب ساداتي او تنظيم من محبي السادات
ولن تستطيع كفاية رفضهم او لفظهم لان كثير منهم بالفعل اعضاء في كفاية وموقعين على انشاءها
وبالفعل انا اعلم عن عناصر من محبي السادات في القاهرة والاسكندرية
وهم عناصر نشطة وفاعلة ويجب احترامها ومراعاة مشاعرها
ليس ذلك فقط ولكن قطاع كبير من المصريين يحترمون السادات ويقدرونه ويترحمون عليه
بالاضافة الى ان شتيمة السادات والشماتة في موته تم تفسيرها في بعض الاحيان من قبل رجل الشارع على ان المتظاهرين ارهابيين من مشجعي تنظيم الجهاد واغتيال السادات ... وحركة كفاية حركة سلمية ولا يجب ان تتباهى بشعر بنت اختها ... ولا ايه ؟؟؟
وشكرا