Ok

By continuing your visit to this site, you accept the use of cookies. These ensure the smooth running of our services. Learn more.

Tuesday, 08 March 2005

يا وائل يا حقود لسانك هياكله الدود - لايانا بهجت - إنجلترا

ايه يا وائل ايه يا وائل ايه يا واااائل يعنى لازم اغلط يعنى واول ما ارجع اكتب ابتديها بالغلط ... مالك انت يا صعلوك تدخل بين الملوك ها ... و لا علشان مانت فاشل و مالكش واسته توسلك لوزايف التبكات العليوى تئوم تحكد على ولاد الأسول اوفت يا ربى على الحكد اوفت
فيها ايه يعنى ما هتلر اللى انت بتحبه و بتقول فيه اشعار حب يتهر الشعب الألمانى من التبكات اللى اى كلام من امسالك و امسال اى واحد حكود علشان يخلى الشعب الألمانى صافى و نكى و تاهر من اى دماء غير غنية
و كمان العائلة المالكة فى انجلترا موتت ديانا و دودى لأنها من الأول خالص ماكانتش موافئة على جوازتها من تشارلى علشان دمها مش ازرق صافى لأ دا كان ازرق جانجاه
:))))))))
و بعدين الراجل مغلطش ماهو قالك اهو انه شاف عيال غلبانيين و تافحين الدم و بيجروا ( او بيشدوا ) عربيات الكارو بدل الحمير
بجد بجد انا نفسى اجيب بخاخة ريد او راجون و ارشش فشاش على كل الأولاد البيئة الفكراء اللى مش لاكيين علشان البلد تبئى نديفة و نقيه لأن حالها مش هاينسلح الا بالكداء على الفكر و الكداء على الفكر لا يأتى الا بالكداء على الفكراء نفسهم
بالذمة مش فكرة
و الله يا بت يا لوونى عليكى افكار جبارة
اه ه ه ه ه ه يا مرارتى
اقول ايه بس
انا مش عارفة مين هو حسين العشرى و لا مين الشاب اللى بيتكلم عنه و اللى بيتغزل فيه و بصراحة ما يهمنيش اعرف
انا مش هاتكلم عن الواسطة و بس انا هاتكلم عن بلوة سودة تانية قالها العشرى و محدش اخد باله منها
الأستاذ بيرجع تفوق الشخص اللى بيتكلم عنه الى ان اصوله ليست مصرية 100% و لكن تجرى فيها دماء انجليزية طاهرة

الأستاذ يقول
لكننى أعرف وسأقوله :أنا أعلم ،أن والده مهندس مصرى يعمل
بانجترا ووالدته إنجليزية، ولابد أن يكون معه جنسية
وباسبورت إنجليزى؟؟
دى حاجة، ثم وجهت كلامى إليه مباشرة أشرح له وجهة
نظرى...هكذا::
""وبناء عليه،فإنك حظيت على تعليم جيد فى إنجلترا ومما
أهّلك لعمل ممتاز هنا
بمصر، نضيف إلى ذلك أسرتك ووالدك بالذات،حيث كافح وثابر
واجتهد وتفوق ودخل ودرس الهندسة ،وفتحت له أبواب النعمة
والحمد لله،ولأن والدتك إنجليزية..فقد كانت أسرتك
صغيرة،مما سهل على الوالدين العناية بها وتنشئتها على
خير وجه، وهاهو أنت مثال حى
نتج عن جهد ووعى أسرة وكفاح والد....هذا عن الجانب التى
خرجت أنت منه

و قبل ماحد يفتح بقة بنص كلمة انا مولوده فى انجلترا و والدتى مش مصرية و معايا باسبور انجليزى و والدى رحمه الله اكمل دراسته برضه خارج مصر و بادرس فى لندن يعنى لا بحقد و لا بحسد و لا لى فى اللعبه دى من اساسه
بس الله يشهد انى فى حياتى ما استعملت الباسبور ده و لا فى اى سفر ولا اصلا كان حد يعرف عنى الموضوع ده الا مؤخرا بعد اللى حصل لى و اضطريت الى انى استخدمه
عارفين ليه
لأن والدى رحمه الله كان من ابطال اكتوبر و للأسف ارضعنى حب البلد بنت الإيه دى و فهمنى انى مهما طلعت و لا نزلت اصلى صعيدى اسكندرانى و لازمن حتمن و لابد من كل بد انى احط صوابعى العشرين فى عين اى واحد يتكلم عن البلد دى و لا على حد من اولادها نص كلمة
وكمان علشان حاجة تانية
أنى بصراحة باتكسف انى اقول انى معايا باسبور انجليزى
لأن الإنجليز دول شعب من اقذر الشعوب و ادناهم
اللى يقرأ تاريخهم يعرف كويس اوى هم ايه و كانوا ايه و لا زالوا
يا استاذ حسين يا عشرى ياللى بتفتخر بصاحبك اللى والدته انجليزية مالكش قريب و لو من بعيد اتشنق فى شدوان و لا غرق فى القناة و لا استشهد فى الثورة العرابية و لا فى العدوان الثلاثى و لا حتى فى اكتوبر و لا فى نحرير الكويت و لا فى اى داهية سودة
انت بتفتخر ان البيه صاحبك مش من اصول مصرية و ان والدته انجليزية و ان والدهعلشان اتعلم برة فا هو اتربى كويس؟؟؟؟؟؟ يا سلام و هو يعنى اللى اتربوا جوه كخة و اللى اتربوا بره دحة؟؟؟ و لا احنا ولاد البطة السودة و هم اولاد بحيرة البجع
فى ايه ماتفوق لنفسك و اقف عدل و اتكلم عدل و اعرف انت بتتكلم مع مين و اولاد مين
لو صاحبك ده ماسك منصب مهم يبقى وقعته هو و اللى عينه سودة و جت معاه ستروبيا لأن من الواضح ان فيه اتجاه ان اللى يمسك المناصب اليومين دول بيكون مزدوج الجنسية و ده مش وليد المصادفة بس مش وقته اتكلم فيه دلوقت
يا عشرى بيه تسمع عن شاب اسمه عبد الحميد ؟؟ الولد اللى رمى نفسه فى البيل و انتحر لأنه من اسرة فقيرة من اللى سعادتك بتستهزئ بيهم و تقول عليهم فقراءو الفقر كسل
الشهيد ( و انا مصرة اسميه شهيد لأنه اتقتل بإيدين ناس بتقيم البشر بما يحملوه من اموال و كروت توصية) انتحر لأن ماكانش فى جيبه كارت توصية من فلان بيه و لا علان باشا
الشاب ده اتخرج من كلية سياسة و اقتصاد يعنى كلية الوزراء و اهل القمة و ابوه كان بيقطع من لحم الحى علشان يعلم ابنه و كان متفوق دراسيا و من اوائل دفعته و فى الآخر و احد سفروت سنكوح يمسك بداله المكان اللى هو كان المفروض يمسكه .........لأن السنكوح كان متقل جيوبه بكروت التوصية علشان كده كفة ميزانه رجحت
يا عشرى بيه معلش تعال على نفسك حبة و اعصر على نفسك لمونه و انزل لف لك لفة فى شوارع مصر و شوف كام واحد عضلات وشه مش مشدودة من الهم و الغم و الحزن
تبقى قابلنى لو لقيت واحد بيضحك
تحب سيادتك نقضى لك عليهم علشان سموك تعيش و تغنى يادى النعيم اللى انت فيه يا قلبى من بعد العذاب
و النبى يا عم قول لصاحبك يخبى باسبوره و يكفى على الخبر ماجور لأنه عار و خيبة تقيلة مش ميزة الا فى حالة واحدة بس ......... انه يتعمل فيه اللى اتعمل فى و فى الحالة دى بس هاينفع معاه و لو انى لا اعتقد انه هايقضى كام يوم فى فندق الفايف ستارز اللى كنت فيه لأن طالما اتعين بواسطة و جاب له عربية على الزيرو من عرق جبينه يبقى من المرضى عنهم :))) و ياريت كمان تقوله انه يأجر له خزنه فى اى بنك يحط كرامته فيها و لا اقولك خليه يسمى و يبوسها و يحطها جنب الحيطة علشان مش هايستعملها تانى من غير شر كده
اصل اللى بياخد حاجة مش بتاعته و لا تنفع له بيدفع التمن غالى اوى ......ايا كان التمن ده ...
و للحديث بقية

Comments

صباح الفل علي البنات المصريات بحق وحقيق
عارفة يا لايانا.. في الاول لما قريت ردك علي وائل بخصوص موضوع هند الحناوي اتضايقت منك لانك بتصدري الاحكام جزافا.. بس لما قريت ردك علي حسين العشري .. فهمتك ... وبقيت سعيدة بيكي .. وفهمت ان اندفاعك وحماسك.. ولماضتك دي لانك مصرية اوي .. او مصرية بحرقة... حاجة اسعدتني جدا ولسة قايلة الكلام ده لطالبة برده زيك.. اسمها مشيرة كانت بترد عليا في صفحة شاهيناز عبد السلام... لازم اشكركم لانكم رجعتوا الثقة لواحدة من جيل السبعينات ان الجيل الجديد لسة بخير وفيه منه امل... عندك حق في كل كلمة قولتيهاله.. وفكرتيني ببنتي هي كمان معاها الجنسية الامريكين.. بس بوظنا دماغها بحب مصر زي باباكي ما عمل... ولازم ارفع له القبعة...واخيرا شكرا لك

Posted by: لبني محرم | Monday, 13 June 2005

http://www.masreyat.org/ib/index.php?showtopic=8353

Posted by: Prof | Thursday, 16 June 2005

للاسف مش عارف اصقف لك بس انت جميله اقل كلمه تتقال

Posted by: ebraheam | Saturday, 18 June 2005

1/2 kom egyptian.
girl who are you?Do you think because you live in england on welfare you have the right to insult the egyptian society this way.It is not modern way of life o talk half english and half arabic.Your ideas in life is painted with physical,body hair...you need a mental health consulation to see the right way of living.Whether you are a muslim or christian doesn't matter ,you consulations.

Posted by: DR MONIR | Sunday, 26 June 2005

الله ينور عليكى ويرحم والدك بجد راجل له كل الاحترام
طبعا حكاية الباسبور دى مشكلة بس نعمل ايه نظام الرسم والحركات وكده يعنى
وطبعا انا شفت مساخر بتحصل فى حكاية الباسبور دى وخاصة الدبلوماسى منها
وثانيا وحتى لو مش معاكى بسبور انجليزى ولا دياولو بس انتى مصرية ولكى الحق انك تتكلمى كده سواء كان معاكى ولا لا
بس والله اللى يشوفك بتتكلمى كده يقول دى ما طلعتش من القاهرة ابد
اه بالمناسبة كل الناس المصريين اللى بيسافرو دول الخليج واوروبا وامريكا يا ريت لما تيجو مصر تعوجوش لسانكم ومنهم ناس قرايبى
هههههههههههههههههههههههههههههههههه
كلامى للدكتور منير يا برنس عفوا يا دكتور انا من مصر ويمين بالله يا عم ما طلعت منها وانشاء الله مش حطلع الا لاستكمال الدراسة أصلها هنا والله تعجيزية بس كله تمام وزى الفل وبيوزعوا دكتوراهات وزمالات على الناس ببلاش ويا سلام لو لك ملف فى امن الدولة تاخد الدكتوراه فى 5 ست سبع تمن سنين وعجبت أشد العجب لما لقيت طبيب سنه 49 ومقدم على الدكتوراه وهو 37 ولسه واخدها السنه دى بس الحمد لله كله زى الفل ومفيش اى مشاكل
دا اللى انت عاوزها تقوله يا عم صلى على النبى واتكلمو كلام منطقى
لى ملحوظة تانية الاول على كلية هندسة جامعة الازهر بيشتغل بمصنع فى العاشر من رمضان ب 300 جنيه فى الشهرالمصنع فى العاشر من رمضان يعنى تقريبا مرتبه
ضايع مواصلات
خد عندك كمان لو اشتغلت عصفورة عارف عصفورق يعنى ايه يعنى عين لمباحث امن الدولة على الطلبة تقديرك بيتظبط وبتسكن مدينة حتى لو ملكش سكن
اقولك ان بلدك وسايط تانى بلدك كوسه وقرع وبطيخ وفيشار

Posted by: Taher Amin | Sunday, 26 June 2005

what a 35 years can do?
this how long it had been since I had in contact with egyptian other than my immediate family.I still speak arabic sakakine style...egypt never left my heart and my dreams.my brother taher ,I want to tell you, some thing in our culture now,most egyptian I am in contact with now have unorganized ways of thoughts and expressions.No relations between the actions they have to do and the reasons for it.look to this so called elyat,is she a good example for our girls any where in the world.if we don't change. the devils will stay in power and 200 years later we will be talking about Gamal munark grandson arranging for election of 2030,this if we will live to that time.wake up.

Posted by: DR MONIR | Sunday, 26 June 2005

دكنور منير ليه ما نحاول نغير ولا نسيبها تغرق
شوف ان كان دا رايك وشايف انها لحفيد جمال مفيش مشكلة بس والغالى عندك يا شيخ الناس فى مصر مش ناقصة احباط

Posted by: Taher Amin | Monday, 27 June 2005

لاينا
مش عارف اقولك ايه
انتى فكرتينى بسعديه ومسعدة وشلبيه لما حد يستعبط ويدوس ليهم على طرف
الله على كلامك ومصريتك اللى طالعه من قلب الحارة
وسلميلى على هايد بارك اللى عندكم

Posted by: واحد مفروس | Thursday, 14 July 2005

The comments are closed.