الوعي المصري

و النبى انت طيب يا وائل و ساذج و علانياتك و نيتك صافيااااااااا اكتر من مية نستلة :)))) و الله انا باتكلم بجد انت فعلا طيب و الله ....طيب انك تصدق ان فيه بنت فى الدنيا ساذجة ( منهم انا) ........بص انا هاقولك على حاجة.......البنت ( اى بنت) ممكن ينضحك عليها بكلمتين حلوين و شوية رومانسية .... و ساعتها تشوف اللى قدامها قمر اربعتاشر و اللى يقول غير كده ينضرب بالشوزة القديمة لأنه مش شايف ان العينين اللى عاملة زى عيون الضفادع شبه عيون مايكل دوجلاس و الشعر الأقرع زى شعر ليوناردو دى كابريو و التخن و القصر زى كيفين كوستنر و البطبطة فى الحركة هى هى خفة جيمس بوند بكل شخصياته!!!!! فى حالة الحب القصوى بس البنت بتكون فى اقصى درجات العمى السمعى و البصرى و ساعتها ممكن تعمل اى حاجة علشان ترضى اللى معاها ( حتى لو كانت فيزا لأى دولة اوروبية) هاهاهاها فاهم انت طبعا
انما حتى فى اللحظات دى بتفكر فى الإرتباط السليم هايكون ازاى و امتى .....لو هى بنت من عيلة ميسورة هاتقف موقف رجولى و تقول له انا عايزاك بشنطة هدومك و هاقف جنبك لحد ما تلاقى اللى يسد معاك....لو هى عادية هاتحارب وتعمل قردة علشان يعدوا سوا لبر الأمان اللى هو ايييييييه الجواز الشرعى و الزفة و الذى منه
اما بقى لو هى من البنات الفرى سايز و الهشك بشك و كله فى الموانى يابا هتلاقيها تعمل زى الست هند الحناوى هى و سى احمد الفيشاوى و يلا شباب نقضيها ويك اند.... و طبعا هى مش بينضحك عليها و لاحاجة دى بكامل ارادتها ( 27 سنة) خاصة و انها قالت انهم ما عرفوش بعض الا كام يوم بس و ان اللى جذبها ليه ( خفة دمه) اووه لا لا ياااااااى اصله واد روش طحن يا ماااامىىىىى
بس حتى لو هى فى اقصى حالات القذارة بتعمل حساباتها كويس انها تطلع من الموضوع من غير خسائر تذكر يعنى من غير حمل و الذى منه علشان لو حصل و جالها قرطاس جوافة عليه القيمة و يستاهل تعيش معاه فى الحلال ديتها زيارة لعيادة فلان الفلانى و كله يرجع فى السليم الأليم و يتقرطس الواد يا حسرتااه و لا من شاف و لا من درى
اما اذا كان الواد روش طحن و من عيلة ممكن تصرف عليها يبقى واى نوت انها تجيب منه بيبى و اهى تبقى تدبييسة و اهى تبقى ضربت عصفورين بحجر اتجوزت و خلفت ( ان نوتايم) ..... انا مش بادافع عن الفيشاوى لأنه بصراحة نزل من نظرى يوم ما مسك برنامج دينى و قعد يفتى فيها ...ماهو اصله لو كان حد فهمه ان شهرته هاتخلى الشباب الروش يروح يصلى بما انه واحد منهم اهو يبقى حمار لو كان صدقه لأن الدين مش فى حاجة الى واحد زيه يدعو اليه..... اما اذا كان عملها منه لنفسه يبقى غبى و بيصدق انه بصحيح ممكن يبقى داعية
عارفين انا كل لما اقرأ الموضوع ده بيجى لى احباط و ابافتكر مش عارفة ليه سميرة موسى اللى اغتيلت على ايدى اليهود..... مش عارفة ليه دايما بافتكرها كل لما اشوف صورة بنت اللذينا هند بنت عتبة دى
عارفين انا نفسى فى ايه؟؟ .....
قفلوا على الموضوع ده و النبى
اه وائل على فكرة ..تصدق بالله انى اول ماعرفت موضوع القنبلة البلدى اللى انضربت فى الأزهر قلت يبقى منهم فيهم و عاملينها مقلب فى الناس و لما فتحت النهارده لقيت كل الناس بتقول كده
ده ايه التليباثى اللى موجود فى البلد ده يا ربى

ايه يا وائل ايه يا وائل ايه يا واااائل يعنى لازم اغلط يعنى واول ما ارجع اكتب ابتديها بالغلط ... مالك انت يا صعلوك تدخل بين الملوك ها ... و لا علشان مانت فاشل و مالكش واسته توسلك لوزايف التبكات العليوى تئوم تحكد على ولاد الأسول اوفت يا ربى على الحكد اوفت
فيها ايه يعنى ما هتلر اللى انت بتحبه و بتقول فيه اشعار حب يتهر الشعب الألمانى من التبكات اللى اى كلام من امسالك و امسال اى واحد حكود علشان يخلى الشعب الألمانى صافى و نكى و تاهر من اى دماء غير غنية
و كمان العائلة المالكة فى انجلترا موتت ديانا و دودى لأنها من الأول خالص ماكانتش موافئة على جوازتها من تشارلى علشان دمها مش ازرق صافى لأ دا كان ازرق جانجاه
:))))))))
و بعدين الراجل مغلطش ماهو قالك اهو انه شاف عيال غلبانيين و تافحين الدم و بيجروا ( او بيشدوا ) عربيات الكارو بدل الحمير
بجد بجد انا نفسى اجيب بخاخة ريد او راجون و ارشش فشاش على كل الأولاد البيئة الفكراء اللى مش لاكيين علشان البلد تبئى نديفة و نقيه لأن حالها مش هاينسلح الا بالكداء على الفكر و الكداء على الفكر لا يأتى الا بالكداء على الفكراء نفسهم
بالذمة مش فكرة
و الله يا بت يا لوونى عليكى افكار جبارة
اه ه ه ه ه ه يا مرارتى
اقول ايه بس
انا مش عارفة مين هو حسين العشرى و لا مين الشاب اللى بيتكلم عنه و اللى بيتغزل فيه و بصراحة ما يهمنيش اعرف
انا مش هاتكلم عن الواسطة و بس انا هاتكلم عن بلوة سودة تانية قالها العشرى و محدش اخد باله منها
الأستاذ بيرجع تفوق الشخص اللى بيتكلم عنه الى ان اصوله ليست مصرية 100% و لكن تجرى فيها دماء انجليزية طاهرة

الأستاذ يقول
لكننى أعرف وسأقوله :أنا أعلم ،أن والده مهندس مصرى يعمل
بانجترا ووالدته إنجليزية، ولابد أن يكون معه جنسية
وباسبورت إنجليزى؟؟
دى حاجة، ثم وجهت كلامى إليه مباشرة أشرح له وجهة
نظرى...هكذا::
""وبناء عليه،فإنك حظيت على تعليم جيد فى إنجلترا ومما
أهّلك لعمل ممتاز هنا
بمصر، نضيف إلى ذلك أسرتك ووالدك بالذات،حيث كافح وثابر
واجتهد وتفوق ودخل ودرس الهندسة ،وفتحت له أبواب النعمة
والحمد لله،ولأن والدتك إنجليزية..فقد كانت أسرتك
صغيرة،مما سهل على الوالدين العناية بها وتنشئتها على
خير وجه، وهاهو أنت مثال حى
نتج عن جهد ووعى أسرة وكفاح والد....هذا عن الجانب التى
خرجت أنت منه

و قبل ماحد يفتح بقة بنص كلمة انا مولوده فى انجلترا و والدتى مش مصرية و معايا باسبور انجليزى و والدى رحمه الله اكمل دراسته برضه خارج مصر و بادرس فى لندن يعنى لا بحقد و لا بحسد و لا لى فى اللعبه دى من اساسه
بس الله يشهد انى فى حياتى ما استعملت الباسبور ده و لا فى اى سفر ولا اصلا كان حد يعرف عنى الموضوع ده الا مؤخرا بعد اللى حصل لى و اضطريت الى انى استخدمه
عارفين ليه
لأن والدى رحمه الله كان من ابطال اكتوبر و للأسف ارضعنى حب البلد بنت الإيه دى و فهمنى انى مهما طلعت و لا نزلت اصلى صعيدى اسكندرانى و لازمن حتمن و لابد من كل بد انى احط صوابعى العشرين فى عين اى واحد يتكلم عن البلد دى و لا على حد من اولادها نص كلمة
وكمان علشان حاجة تانية
أنى بصراحة باتكسف انى اقول انى معايا باسبور انجليزى
لأن الإنجليز دول شعب من اقذر الشعوب و ادناهم
اللى يقرأ تاريخهم يعرف كويس اوى هم ايه و كانوا ايه و لا زالوا
يا استاذ حسين يا عشرى ياللى بتفتخر بصاحبك اللى والدته انجليزية مالكش قريب و لو من بعيد اتشنق فى شدوان و لا غرق فى القناة و لا استشهد فى الثورة العرابية و لا فى العدوان الثلاثى و لا حتى فى اكتوبر و لا فى نحرير الكويت و لا فى اى داهية سودة
انت بتفتخر ان البيه صاحبك مش من اصول مصرية و ان والدته انجليزية و ان والدهعلشان اتعلم برة فا هو اتربى كويس؟؟؟؟؟؟ يا سلام و هو يعنى اللى اتربوا جوه كخة و اللى اتربوا بره دحة؟؟؟ و لا احنا ولاد البطة السودة و هم اولاد بحيرة البجع
فى ايه ماتفوق لنفسك و اقف عدل و اتكلم عدل و اعرف انت بتتكلم مع مين و اولاد مين
لو صاحبك ده ماسك منصب مهم يبقى وقعته هو و اللى عينه سودة و جت معاه ستروبيا لأن من الواضح ان فيه اتجاه ان اللى يمسك المناصب اليومين دول بيكون مزدوج الجنسية و ده مش وليد المصادفة بس مش وقته اتكلم فيه دلوقت
يا عشرى بيه تسمع عن شاب اسمه عبد الحميد ؟؟ الولد اللى رمى نفسه فى البيل و انتحر لأنه من اسرة فقيرة من اللى سعادتك بتستهزئ بيهم و تقول عليهم فقراءو الفقر كسل
الشهيد ( و انا مصرة اسميه شهيد لأنه اتقتل بإيدين ناس بتقيم البشر بما يحملوه من اموال و كروت توصية) انتحر لأن ماكانش فى جيبه كارت توصية من فلان بيه و لا علان باشا
الشاب ده اتخرج من كلية سياسة و اقتصاد يعنى كلية الوزراء و اهل القمة و ابوه كان بيقطع من لحم الحى علشان يعلم ابنه و كان متفوق دراسيا و من اوائل دفعته و فى الآخر و احد سفروت سنكوح يمسك بداله المكان اللى هو كان المفروض يمسكه .........لأن السنكوح كان متقل جيوبه بكروت التوصية علشان كده كفة ميزانه رجحت
يا عشرى بيه معلش تعال على نفسك حبة و اعصر على نفسك لمونه و انزل لف لك لفة فى شوارع مصر و شوف كام واحد عضلات وشه مش مشدودة من الهم و الغم و الحزن
تبقى قابلنى لو لقيت واحد بيضحك
تحب سيادتك نقضى لك عليهم علشان سموك تعيش و تغنى يادى النعيم اللى انت فيه يا قلبى من بعد العذاب
و النبى يا عم قول لصاحبك يخبى باسبوره و يكفى على الخبر ماجور لأنه عار و خيبة تقيلة مش ميزة الا فى حالة واحدة بس ......... انه يتعمل فيه اللى اتعمل فى و فى الحالة دى بس هاينفع معاه و لو انى لا اعتقد انه هايقضى كام يوم فى فندق الفايف ستارز اللى كنت فيه لأن طالما اتعين بواسطة و جاب له عربية على الزيرو من عرق جبينه يبقى من المرضى عنهم :))) و ياريت كمان تقوله انه يأجر له خزنه فى اى بنك يحط كرامته فيها و لا اقولك خليه يسمى و يبوسها و يحطها جنب الحيطة علشان مش هايستعملها تانى من غير شر كده
اصل اللى بياخد حاجة مش بتاعته و لا تنفع له بيدفع التمن غالى اوى ......ايا كان التمن ده ...
و للحديث بقية